Ezaya
57 Umulungami watalowa,
Lelo kusi nanti aumwi uwataikako mano.
Antu ya cisinka iyafwa,
Lelo kusi nanti aumwi uwatailuka ukuti umulungami watafwa
Pakuti iviipe vitamucitikila.
2 Wataya nu mutende.
Yonsi aakacita ivisuma yalaala yakupuuza.*
3 “Lelo mwemo izini kuno,
Mwe yana ya mwanaci aakauvwana ni mipasi,
Mwe yana ya mucende nupya cizelele:
4 A weni wino mukutumfya?
A weni wino mukuyulila akanwa nu kuwela?
Uzye musi yana yakwe kacita wa viipe,
Nupya uwa ucenjezi?
5 Mwaya sana ni nsuna iya kucita uzelele umu miti ikalamba,
Nu mwisika lya miti ileembe ningo,
Mukakomela ana umu mikonko,
Na pakasi ka mawe.
6 Mwasoolola mawe atelepe amu mikonko.
Aliyo yalaya ali ca upyanyi cinu.
Nupya mukapeela na malambo ya vya kumwa ni vya upe kuli aliyo.
Uzye ivintu vii ivilivyo vinganzanzya?
7 Pa mwamba utali nupya utumpuke apano waile uwika bedi wako,
Nupya apano wayanga umu kupeela ilambo.
8 Ukwi tundu lya cisaasa na pa mulyango wisilepo ica kukwiusya.
Wansiile nu kuyaizuula;
Waile pali bedi wako nu kuyakuzya incende.
Nupya wapangiine nayo upangano.
Watemilwe ukulaala pa mabedi yao,
Nu kulola ivyanzwalo vya onsi.
9 Waile kuli Meleki* na mafuta
Nupya wasenzile ivinunkile ivingi.
Watumile antu yako ukutali,
Pakuti utentemukile ukwi Lindi.*
10 Watonta muno ukululumba,
Lelo utaatala walandapo uti, ‘Musi vino nkuzanamo!’
Maka yako yakawela.
Ali mulandu uno utatoovokela.
11 A weni wino wazakazanga nu kutiina
Pakuti utandike ukubepa?
Wanjilile.
Utisileko mano.
Pa mulandu wakuti nasuzileko sile nupya ntaacisile ivili vyonsi pa vicitwa vyako
Watiile ukuntiina.
12 Ndasokolola ivicitwa vyako iviipe ni milimo yako
Nupya vitalakwazwa.
13 Lino ulalondekwa uwazwilizyo,
Ivilubi vyako vino wakolonganika vitalakupususya.
Umuza ulavisenda vyonsi,
Umupu ulavyulula,
Lelo uwataila muli nene alapyana impanga
Nupya alikala umu mwamba wane uwa muzilo.
14 Umwi alalanda ati, ‘Pangini! Pangini umuseo!
Pekanyini inzila mufumyemo vyonsi vino antu yane yangapumikako.’”
15 Uwa Papelapela uwayako manda pe,
Nupya aakaamwa ukuti uwa Muzilo walanda wati:
“Nkaikala papela nupya umu ncende ya muzilo,
Lelo naya umupiipi na aakacuziwa na atakwata uwa kuyavwa,
Pakuti nteekezye aatakwata uwa kuyavwa
Nu kukomelezya aakacuziwa.
16 Ntalatwalilila ukuyakana
Nanti ukuyasokela manda pe;
Pano umuntu angasila maka pa mulandu nani,
Nanti sile ivya umi vino napanga.
17 Namusokiile pa mulandu nu luyembu lwakwe ulwa kulonda ukulonka ivyuma umu ucenjezi,
Fwandi namufulwile, nafisile icinso cane, nupya nasosile sana.
Lelo watwalilile ukuya wa musangu nu kucita vino akulonda umwineco.
18 Nalola ivicitwa vyakwe,
Lelo ndamupozya nu kumutungulula
Nupya ndamuteekezya nu kuteekezya antu yakwe aakuloosya.”
19 Yeova walanda wati: “Ndika mazwi ya kulumbanya pa milomo yakwe,
Uwaya ukutali nu waya umupiipi alatwalilila ukuya nu mutende
Nupya ndamupozya.
20 Lelo aipe yaya wakwe yemba aasiya mya aatanga ate ukusunkaana,
Aakatwalilila ukukatusya ivikoona na matipa.”
21 Leza wane walanda wati: “Aipe yataya nu mutende.”