Isamu
Masikiu.* Lwimbo luno Asafu wimvile
78 Uvwini mwe yantu yane kwi sunde;
Kutikini ku mazwi ya mu kanwa kane.
2 Ndalanda ukuomvya ipinda.
Nupya ndacoleka utucole twa mpiti sana,
3 Ivintu vino tuvwa nupya vino twamanya,
Vino ivikolwe vitu vyatunenyile,
4 Tutalavifisa uku yana itu;
Tulanena inkulo ikwiza
Imilimo yakwe Yeova iya kuzungusya na maka yakwe,
Ni vintu vya kuzungusya vino wacita.
5 Wapangiile Yakobo isunde
Nupya wapeezile Aina Izlaeli masunde;
Wanenyile ivikolwe vitu
Ukuleka ana yao yamanye ivintu vii,
6 Pakuti inkulo ilalondelelapo,
Kuli kuti ana aatatala yavyalwa yangavimanya.
Pakuti nayo yakize yakaneneko ana yao.
7 Lyene yaa yalataila Leza.
Yatalilila imilimo yakwe Leza
Lelo yalaalondela masunde yakwe.
8 Nupya yatalaya wa vikolwe vyao,
Aali acilumba nupya ya cipondoka,
Inkulo iitapekiinye imyenzo yao
Nupya yano imyenzo yao itaali ya cisinka kuli Leza.
9 Aina Efulemu yakweti maulapwa,
Lelo yutwike umu wanda wa ulwi.
10 Yataasunzile upangano uno yapangine na Leza,
Nupya yakanyile ukulondela masunde yakwe.
11 Nupya iliile vino wayacitiile,
Milimo yakwe iya kuzungusya ino wayalanzile.
12 Wacisile ivintu vya kuzungusya ala ni vikolwe vyao vikulolako,
Mu mpanga ya Ijipti umu ncende iya Zoani.
13 Wapaatwile yemba ukuti yapitepo,
Nupya walenzile manzi ukwimilila wa ciumba.
14 Wayatungululanga ukuomvya ikumbi mu nsita ya musanya
Nupya wayatungululanga ukuomvya umoto usiku onsi.
15 Walepwile amawe umu lwanga,
Nupya walesile ukuti yamwe manzi mpaka ulusala ulusila.
16 Walesile manzi ukufuma umu ciliwe
Nupya walesile manzi iyatandika ukupita wa nguzi.
17 Lelo yatwalilile ukumuyembukila
Kupitila umu kupondokela Uwa Papelapela umu lwanga;
18 Yezizye Leza mu myenzo yao
Ukupitila umu kumupatikizya ukuyapeela vyakulya vino yalondesyanga.
19 Fwandi yailizyanyanga pali Leza,
Ala yakuti: “Uzye Leza angatupeela ivyakulya umu lwanga?”
20 Umile umu ciliwe
Cakuti na manzi yafumile nupya yafumile aingi sana.
“Uzye lyene angatupeela ni vyakulya,
Nanti ukupeela antu yakwe inyama?”
21 Lino Yeova uvwile vii wasosile sana;
Waleesile umoto pali Yakobo,
Nupya wasokiile sana Aina Izlaeli
22 Pa mulandu wakuti yatataile Leza;
Yatataile ukuti wakweti maka aakuyapususya.
23 Fwandi wanenyile iyulu umwali makumbi,
Nupya wayuzile ivisaasa vya mwi yulu.
24 Lyonsi wayaponyezyanga mana pakuti yalye;
Wayapeelanga ivyakulya ukufuma ukwi yulu.
25 Antu yaliile ivyakulya vya yonsi ya maka;*
Wayapeezile ivyakulya ivingi ivyakuti yalye nu kwikuta.
26 Walenzile ukuti umuza wa ku ufumondaka upunge umwi yulu
Nupya walenzile ukuti umuza wa ku kaeya upunge pa mulandu na maka yakwe.
27 Lyene wayaponyezizye inyama kwati ulukungu,
Ni vyunyi kwati umucanga wa mu nkumba yakwe yemba.
28 Walenzile ukuti viponele mukasi ka nkambi yakwe,
Kuzinguluka matenti yakwe.
29 Nupya yaliile iikuta;
Wayapeezile vino yalondesyanga.
30 Nomba lino yatatala ikuta,
Ala ni vyakulya vicili mu tunwa twao,
31 Leza wayasokiile.
Wakomile antu yao aamaka sana;
Waponyizye alumendo Aina Izlaeli.
32 Nanti ciye vivyo alino yacizilepo nu kuyembuka
Nupya yatataile umu milimo yakwe iya kuzungusya.
33 Walenzile ukuti manda yao yasile wa mupu,
Walesile nu kuti imyaka yao isile uku vimvulunganya ivyaula ukwenekela.
34 Lyonsi lino wakomapo yamwi, yatandikanga ukumulonda;
Yaswililanga nu kulonda Leza,
35 Iusyanga ukuti Leza ali Ciliwe cao
Nu kuti Leza wa Papelapela ali Kakulula wao.
36 Lelo yezizye ukumubepa ukuomvya utunwa twao
Nupya yamubefile ukuomvya indimi zyao.
37 Yataali acisinka kuli aliwe;
Nupya yatasunganga icipangano cino wapangine nayo.
38 Lelo wakweti uluse;
Wayelelanga nga yaluvyanya nupya atayononanga.
Ilingi walekanga ukusoka
Ukucila ukulanga ukali wakwe onsi.
39 Pano wiusyanga ukuti aantu sile,
Aakapunga wa muza uno nga wapita usiwela.
40 Ilingi yamupondokelanga umu lwanga
Nupya yalenganga auvwa uyi!
41 Imiku iingi yezyanga Leza,
Nupya yasosyanga Uwa Muzilo wakwe Izlaeli.
42 Yatiwisye amaka yakwe,
Pa wanda uno wayakulwile uku mulwani,
43 Vino wayalanzile ivimanyililo umu mpanga ya Ijipti
Ni vizungusyo vino wacisile umu mpanga ya Zoani,
44 Na vino wasenwile tumifolo utwafumyanga manzi umu Luzi Lwa Naelo ukuya uwazi
Pakuti yataamwa umu tunguzi twao.
45 Watumile ivizyembele vingi pakuti viyacuzye
Na ya cula pakuti yonone antu.
46 Wapeezile ivilimwa vyao kuli ya makanta aipisye
Nupya wapeezile vino yazombwile kuli ya makanta aingi.
47 Ononyile ivyalo vya myangazi
Ni misamvu ukuomvya imvula ya mawe.
48 Walenzile imvula ya mawe ukukoma inyama zyao
Nupya walenzile inkuwa ukukoma iviteekwa vyao.
49 Wayasokiile sana,
Walenzile ukali wakwe ni cipyu ukuya pali aliyo nupya wayaletiile intazi,
Ya malaika aingi yayaletelanga intazi.
50 Wazifiizye inzila ya cipyu cakwe.
Atayapuswisye uku mfwa;
Nupya wayaletiile icikuko.
51 Nu mu kusyalikizya wakomile mayeli yonsi amu Ijipti,
Kuli kuti aatandikilepo ukuvyalwa umu matenti yakwe Hamu.
52 Lyene wafumizye antu yakwe umu Ijipti wa mfwele
Nupya wayatungulwile umu lwanga.
53 Wayacingililanga pa kuyatungulula,
Nupya yatuvwanga intete;
Yemba wavimbilikizye alwani yao.
54 Wayatwazile uku ncende yakwe iya Muzilo,
Incende ya myamba ino ikasa lyakwe ili lunji lyatoozile.
55 Wayankinye impanga ukuya ica upyanyi;
Ino wapimile ukuomvya itambo;
Walesile imitundu ya Ina Izlaeli ukwikala umu mang’anda yao.
56 Yatwalilile ukwezya Leza Uwa Papelapela nu kumupondokela;
Yatikanga mano ku masunde yakwe.
57 Yamupondokelanga nupya yali nu ucenjezi.
Yataali aatailwe wakwe vino ulapwa uteevuke utanga utailwe.
58 Yaatwalilile ukumusosya pa mulandu ni vifulo vyao vya kupepelapo,
Nupya yatwalilile ukumulenga ukusoka sana pa mulandu ni vilubi vyao ivya kuwaza.
59 Leza uvwile nupya wasosile sana,
Fwandi wakanyile Izlaeli.
60 Lyene walekelizye icikuulwa ca muzilo icali umu Syilo,
Kuli kuti itenti lino wikalangamo pamwi na antu.
61 Walesile icimanyililo ca maka yakwe ukuya umu uzya;
Nu lulumbi lwakwe ukuya umu makasa ya mulwani.
62 Wapeezile antu yakwe uku lupanga
Nupya wasokiile sana ica upyanyi cakwe.
63 Umoto osile alumendo,
Nupya kusi uwimbiile yana cisungu inyimbo zya pa winga.
64 Ya simapepo yakomilwe uku lupanga,
Nupya ya mukamfwilwa yao yataloosizye.
65 Lyene Yeova wazyusile kwati wafuma umu tulo,
Wa muntu wa maka uwakololoka kuli waini.
66 Nupya wazinzile alwani yakwe;
Nu kuyazewanya manda pe.
67 Wakanyile itenti lyakwe Jozefu;
Nupya atasoolwile umutundu wakwe Efulemu.
68 Lelo wasoolwile umutundu wakweYuda,
Kuli kuti umwamba wa Zioni uno watemwa.
69 Wapanzile incende yakwe iya muzilo wa mayulu,
Wa nsi ino wapanga ukuti itwalilile ukuyako manda pe.
70 Wasoolwile Devedi umuomvi wakwe
Nupya wamufumizye pa mfwele,
71 Wamufumizye umu kusakamala ya nyina ya mfwele aali nu twana;
Wamulenzile ukuya kacema pali Yakobo, kuli kuti antu yakwe,
Na pa Ina Izlaeli, ica upyanyi cakwe.
72 Wayacemanga nu mwenzo wa kaele,
Nupya wayatungululanga ningo sana.