Vintu Viili Ivingalenga Icupo Ukutwalilila

1, 2. (a) Uzye Leza walondanga ukuti atwalana yaya pamwi manda yanga? (b) I cani icingaazwa atwalana ukutwalilila umu cupo?

LINO Leza watwalizye umonsi nu mwanaci akutandikilako, atalanzile ukuti yali nu kuya sile mu cupo manda anono. Adamu na Eva yali nu kuya umu cupo manda yonsi. (Utandiko 2:24) Leza walanda ukuti mu cupo ca mucinzi, mufwile ukuya iya wenga nu muci wenga, casila. Malembelo yalanda ukuti ukucita ucende sile u kungalenga ukuti atwalana yataane nu kuyatwalana na muze.—Mateo 5:32.

² Uzye atwalane yangatwalilila ukuya ni nsansa manda yonsi? Ee, Baibo yalanda ivintu viili ivicindame ivingalenga kuti yatwalilile ukuya ni nsansa. Ngi cakuti iya nu muci yakulondela ivintu kwene vii, yangaya ni nsansa mu cupo cao. Lekini tulande pa vintu kwene vii viili?

CAKUTANDIKILAKO ICIKALONDEKWA PAKUTI ICUPO CITWALILILE

3. U kutemwa ci kutatu kuno aya mu cupo yafwile ukukwata?

³ Icintu conga icacindama umu cupo u kutemwana. Baibo yalanda ukuti kwaya ukutemwa ukupusane-pusane. Ukutemwa kwa kutandikilako akuku ukukaya pa yantu yaili atandana ucuza. (Yoane 11:3) Ukutemwa kuze akuku ukukaloleka pa yantu aya mu lupwa longa. (Loma 12:10) Ukutemwa kwako citatu akuku ukukaya pa monsi nu mwanaci. (Mapinda 5:15-20) Iya nu muci yafwile ukuya nu kutemwa konsi kuu kuno twalandapo. Lelo, kwaya ukutemwa na kuze ukwacindama sana ukuluta pali kuu.

4. U kutemwa ci na kuze ukwayako?

⁴ Mu lulimi lwa Cigliki ulwaomviwe lino yalembanga Malembelo ya Ina Klistu a Cigliki, yalanda pa kutemwa ukuka-amwa ukuti a·ga′pe. Ukutemwa kuu kwalandwa na pali 1 Yoane 4:8, apakalanda ukuti: “Leza u kutemwa.” Fwandi “swemo tukatemwa pano Leza uwatandike ukututemwa.” (1 Yoane 4:19) Umwina Klistu afwile ukutandikilapo ukutemwa Yeova nga alino atemwe antu yauze. (Mako 12:29-31) Izwi lyakuti a·ga′pe lyaomviwa na pali Efeso 5:2, apakati: “Lekini umi winu watungululwa nu kutemwa, wakwe vino Klistu watutemilwe nu kupeela umi wakwe pa mulandu witu.” Yesu walanzile ukuti ukutemwa kwa musango uu, kwali nu kulenga kuti antu yamanye alondezi yakwe acumi; walanzile ukuti: “Ndi mukutemwana [a·ga′pe] lyene antu yonsi yalamanya vino mwemwe alondezi yane.” (Yoane 13:35) Lolini vino yaomvya izwi lyakwe a·ga′pe pali 1 Kolinto 13:13: “Ndakai kuli vintu vii vitatu, utailo, upaalilo nga nu kutemwa. Lelo pali vyotatu kutemwa [a·ga′pe] u kukulu kuluta vyonsi.”

5, 6. (a) U mulandu ci uno ukutemwa kwaluta pa utailo nu upaalilo? (b) I milandu ci ino tungalandila ukuti ukutemwa kungalenga icupo kutwalilila?

⁵ U mulandu ci uno ukutemwa ukwakuti a·ga′pe kwaluta utailo nu upaalilo? Pano kwene kukatungululwa ni visinte ivyaya muli Baibo. (Masamu 119:105) Muntu ngali nu kutemwa kwa musango uu, akalondesya ukucitila yauze ivisuma, wakwe vino Yeova akalonda, asi mulandu na vino yauze yaaya. Ngi cakuti atwalana yali nu kutemwa kwa musango uu yalaalondela vino Baibo yalanda ukuti: “Mwatekelana nu kwelelana lyonsi lino umwi wailizyanya pa muze. Mulinzile kwelelana ndi vino Mwene wamwelela.” (Kolose 3:13) Iya nu muci atemwana, yakaombesya pakuti yatwalilile ‘ukutemwana [a·ga′pe] nu mwenzo onsi, pano ukutemwa kukalenga ukwelelana maifyo aingi.’ (1 Petulo 4:8) Ukutemwa kukalenga ukusuula uku maifyo yako yauze. Ukutemwa kusisisya maifyo, pano muntu wensi atamalilika akaluvyanya.—Masamu 130:3, 4; Yakobo 3:2.

⁶ Ndi cakuti atwalana yatwalilila ukutemwa Yeova alino nu kutemwana, icupo cao cilatwalilila napya yalaya ni nsansa pano “kutemwa u kwa pe.” (1 Kolinto 13:8) Ukutemwa “kukakundanya vintu vyonsi pamwi mukulemana kumalilike.” (Kolose 3:14) Ngi cakuti mwatwalana, mungacita uli pakuti muye nu kutemwa kwa musango uu? Mwawelengela capamwi Izwi lyakwe Leza, alino nu kulanzyanya pali vino mukuwelenga. Mwasambilila pa kutemwa kuno Yesu watulanga, mwaelenganyapo alino nu kwezya ukumukolanya. Napya mwaya nu ku kulongana kuno tukasambilila Izwi Lyako Leza capamwi. Mwapepa kuli Leza pakuti aamwazwa ukuya nu kutemwa kwa musango uu, ukukalanga ukuti tukatungululwa nu mupasi wa muzilo.—Mapinda 3:5, 6; Yoane 17:3; Galatiya 5:22; Ayebulai 10:24, 25.

CAKWE CIILI ICIKALONDEKWA PAKUTI ICUPO CITWALILILE

7. Ukucindika ali kutuuli, nupya a weni alinzile ukucindika umuze mu cupo?

⁷ Ndi cakuti atwalana yatemwana, lyonsi yalaacindikana. Ukucindikana ali cakwe ciili icingaazwa aali umu cupo ukutwalilila ukuya ni nsansa. Ukucindika kuli kuti, ukulangulukilako yauze, ukuyapeela umucinzi. Baibo ikasunda Aina Klistu yonsi kumwi sile na atwalana ukuti: “Mwacindikana.” (Loma 12:10) Umutumwa Petulo walemvile ukuti: “Mu musango uli onga kwene mwe onsi namwe mulinzile ukwikala na aci inu nu kumanya ukuti yene antu atonte ukuluta mwemwe.” (1 Petulo 3:7) Nupya Baibo ikasunda aci ukuti, “Mwanaci alinzile ukucindika iya wakwe.” (Efeso 5:33) Ndi cakuti mukulonda ukulanga umucinzi kuli umwi, mukaya ni cikuku ku muntu wiyo, mukamucindika alino nu kuvwila vino walanda, napya mukacita cino wamunena nga cili ningo.

8-10. A muli vyani vimwi vimwi muno ukucindikana kungalenga icupo ukuya icikome napya ica nsansa?

⁸ Akulonda ukuya ni nsansa mu cupo, yakalanga ukuti yacindika wino yatwalana nawe ndi yakulondela mazwi aya muli Baibo akati: “Mutacita vingamuzipila mwenga sile, lelo mwacita vingazipila na auzo kwene [wino mwatwalana nawe].” (Filipi 2:4) Yasicita sile ivingayazipila, pano ukucita vivyo i cili cimwi na ukaitemwe. Lelo yakakolezya ukucita ivingazipila ya wao.

⁹ Ndi cakuti atwalana yaacindikana yalamanya ukuti vino yangapingula pa vintu vikapusana-pusana. Fwandi citaya ningo ukutaila kuti antu yaili yamapingula ivili vimwi. Vino iya angatemwa asi vingatemwa umuci, napya vino umuci angatemwa limwi iya atange avitemwe. Lelo cila wino afwile ukucindika vino umuze wapingula ndi cakuti visikutama masunde yakwe Yeova. (1 Petulo 2:16; loliniko na Filimoni 14.) Nakapya, cila wino afwile ukucindika umuze, ukukanalanda mazwi yamusalula nanti a mitumfyo, paye pa yantu nanti lino yali yoili.

¹⁰ Fwandi atwalana ndi cakuti yatemwa Yeova alino nayo kwene yatemwana napya yacindikana, cilalenga kuti yaye ni nsansa mu cupo cao. Lekini tulande vino miyele kwene ii ingaomba nu mu mbali zyuze izicindame ku yantu aya mu cupo

VINO KLISTU AKAATUNGULULA

11. Uzye ukulingana na Malembelo, a weni waya umutwe umu cupo?

¹¹ Baibo ikalanda ukuti umonsi wapanzilwe ni miyele ikalenga kuti atungulula ningo ulupwa. Yeova wapeela umonsi umulimo wa kusakamala ulupwa muli vino lukulonda alino na muli ukapepa. Afwile ukulapingula ningo ivintu kulingana na vino Yeova akalonda, napya afwile ukuya ni miyele isuma ingalenga yauze ukumukolanya. Umutumwa Paulo walemvile ukuti: “Anaci yatontela ya iya yao, wakwe vino yakatontela Mwene. Pano iya ali mutwe wa muci. Wakwe vino Klistu ali mutwe wi uvi.” (Efeso 5:22, 23) Lelo Baibo ikalanda ukuti iya wakwata aakamutungulula uno afwile ukutontela. Umutumwa Paulo walemvile ukuti: “Lelo nkulonda kuti mumanye vino Klistu ali mutwe pa onsi yonsi, nga monsi nawe ali mutwe pa mwanaci. Leza nawe ali mutwe pali Klistu.” (1 Kolinto 11:3) Iya wa mano, akasambilila ivya kuomvya ningo maka yano wapelwa ndi cakuti akukolanya Yesu Klistu.

12. Uzye Yesu walanganga uli kuti watontelanga napya watungululanga ningo antu?

¹² Na Yesu kwene wakwata akamutungulula, kuli kuti Yeova, napya akamutontela. Yesu walanzile ukuti: “Nemo ntangacita cimwi mu nsambu yane . . . suka kulonda kwakwe Tata wino uwantuma.” (Yoane 5:30) Ala cazipa sana ukukolanya Yesu! Yesu “ali yeli” pa viumbwa vyonsi. (Kolose 1:15) Nupya uwizile aya Mesiya. Wene wali nu kuya Umutwe wa cilongano ca Ina Klistu apakwe napya wali nu kuya Mwene wa Wene wakwe Leza, pa angeli yonsi. (Filipi 2:9-11; Ayebulai 1:4) Nanti cakuti Yesu wali nu kuya ni cifulo ca papela, napya wamanyile ukuti alaya Umwene, atatitikizyanga auze, atapampamilanga sile pali vino akulonda, nanti ukupatikizya yauze ukucita vimwi. Wene atacuzyanga antu, nanti kupatikizya asambi yakwe ukuti yamuvwila. Yesu wene wali nu kutemwa ni cikuku, maka maka kuli yano yaculanga. Walanzile ati: “Izini kunondi, mwensi mwe yatonte nupya anyomelwa, nani namamupeela upuzo. Zwalini ikoli lyane, musambilile kunondi, pano nene wa mutembo, nupya nkaicefya mu mwenzo, nga mumazana upuzo mu myenzo inu. Pano ikoli lyane lino nkazwika ilyangupale, ni cisendo cino nkatwika citanyooma.” (Mateo 11:28-30) Antu yatemwanga sana ukuya pamwi na Yesu.

13, 14. Uzye iya uwaya nu kutemwa akalanga uli ukuti akakolanya Yesu muli vino akaomvya maka?

¹³ Iya aakulonda kuti mu lupwa muye insansa, afwile ukwelenganya sana pa miyele ino Yesu wali nayo. Iya musuma asiya umukalipe nanti umunkalwe icakuti nu muci aculilamo pa mulandu sile wakuti umonsi ali mutwe. Lelo akamutemwa nu kumucindika. Ngi cakuti Yesu u wali “umuicefye umu mwenzo,” iya wene afwile nu kucilapo pano wene akaluvyanya. Ndi cakuti iya waluvyanya akalonda ukuti umuci amwelele. Fwandi, iya muicefye akazumila ngi cakuti waluvyanya, nandi cakuti catala ukulanda ukuti, “Induvyanya; wewe iwalungika.” Ngi cakuti iya waicefya napya ataya ni cilumba, cilalenga ukuti umuci amucindika. Na cii cilalenga ukuti muci uwacindika iya nawe kwene akaalenga uwelelo nga waluvyanya.

¹⁴ Leza waumvile umwanaci ni miyele isuma ingalenga ukuti mu cupo muye insansa. Iya uwakwata mano akamanya cii, napya asimusuula foo. Ya mama aingi yaya sana ni cikuku napya yakakuntukilwa zuwa, napya imiyele ii ikalondekwa pa kusakamala ulupwa na pakuti yauvwana na yauze. Ya mama yakamanya ningo ivya kucita pakuti pa ng’anda paloleka ningo. “Umuci umufyeleke” uwalandwa umu cipande 31 mwi buku lya Mapinda wali ni miyele isuma sana nupya wamanyile imilimo, napya amu lupwa lwakwe yamutemilwe sana pali vino wayacitilanga. Baibo ikati iya ‘wamutaile’ sana.—Mapinda 31:10, 11.

15. Uzye iya angalanga uli ukuti akakolanya kutemwa kuno Yesu waya nako, napya wacindika umuci?

¹⁵ Umu ntambi zimwi yakacindikisya ya iya, icakuti umuci ndi wamuzya pali vimwi ale umusaalula. Iya akasunga umuci ngati sile u muzya wakwe. Iya ndi waya vivyo cingalenga kuti atauvwana ningo nu muci wakwe, napya cingalenga nu kuti aonone ucuza wakwe na Yeova. (Loliniko na 1 Yoane 4:20, 21.) Lyene kwaya ya iya yamwi aakafilwa ukutungulula lupwa, yakalekela aci yao kuti aliyo yatungulula. Iya aakatontela Klistu akacindika umuci wakwe, napya asimulenga kuti ayuvwa ungati pasi vino waya. Akakolanya ukutemwa kuno Yesu waya nako, napya akalondela mazwi yano Paulo walanzile akuti: “Mwe onsi mutemwe aci inu wakwe vino Klistu watemilwe iuvi nga nu kupeela umi wakwe pa mulandu wakwelyo.” (Efeso 5:25) Yesu Klistu watemilwe sana alondezi yakwe, cakuti wapeezile nu umi wakwe pa mulandu wao. Vikwene avino iya musuma waya, akalola ivisuma mu muci wakwe, ukucila ukumutitikizya. Ngi cakuti iya akukolanya kutemwa kuno Yesu waya nako nu kuya nu mucinzi, cilalenga kuti umuci wakwe amutontela.—Efeso 5:28, 29, 33.

MAMA ALINZILE UKULATONTELA

16. I miyele ci ino umuci alinzile ukuya nayo umu cupo?

¹⁶ Lino Yeova waumvile Adamu, walanzile ukuti: “Cisi cisuma kuti umuntu aikala wenga. Caleka namamuumbila alingine na aliwe [“umuze,” NWT] kuti ya-azwana.” (Utandiko 2:18) Leza waumvile Eva kuti auvwana na Adamu asi kuti acimvyanya nawe. Icupo citaali nu kuya wa wato umuli antu yaili akulwilana ukupisya. Iya wali nu kulalanga ukutemwa lino akutungulula ulupwa, umuci nawe wali nu kulalanga ukutemwa, ukuya nu mucinzi alino nu kutontela iya.

17, 18. U mu nzila ci muno umuci angalanga ukuti aka-azwilizya iya?

¹⁷ Nomba, umuci musuma asipelela sile pa kutontela. Aka-azwilizya sana iya, nu kumutungilila muli vino akupingula. Cika-anguka sana umuci ukuzumilizya vino iya atapingula ndi cakuti nawe atavitemwa. Lelo nanti atatemilwe vino iya atapingula, atafwile ukufuma uku cupo nu kuya ku yavyazi nanti kuli yalupwa yakwe yauze, alinzile ukutwalilila ukutungilila iya pakuti yatwalilile ukuvwana.

¹⁸ Umuci angalenga iya ukutungulula ningo mu lupwa mu nzila na zyuze. Alinzile ukutaizya iya pali vino akutungulula, atafwile ukumutumfya ukumulola kwati pasi vino akumucitila. Umuci uwacindika iya, alinzile ukwiusya amazwi akati, ‘myenzo ifuke napya itekele . . . ili ya mpomvu ukuluta, pa manso yakwe Leza,’ asi akuli iya mutupu. (1 Petulo 3:3, 4; Kolose 3:12) Cingaya uli ngi cakuti mwanaci watwalwa uku monsi atataila? Nanti cakuti iya atataila, umuci alinzile ukuvwila amazwi aya muli Baibo akalanda ukuti, aci yafwile “kutemwa ya iya na ana yao, yaye asanguluke nupya aci asuma akuyela ya iya. Yene yalinzile kucita cii pakuti kutaya umuntu nanti wenga uwakulandila ilandwe lyakwe Leza viipe.” (Tito 2:4, 5) Nga kwaya vimwi ivingalondekwa kuti umuci aomvye kampingu pa kupingula, afwile ukulanda amazwi “amutembo nu mucinzi,” kucita vii kungalenga kuti iya amucindike. Napya cingalenga nu kuti ya iya ‘atataila mazwi yakwe Leza ndi yalola ivicitwa vinu, nayo kwene yataile kwaula izwi kuno yali, pano yalola vino micitile inu yaya isuma napya iya mucinzi.’—1 Petulo 3:1, 2, 15, 16; 1 Kolinto 7:13-16.

19. Umuci angacita uli ndi cakuti iya wamunena ukutama isunde lya muli Baibo?

¹⁹ Umuci angacita uli ndi cakuti iya wamunena ukucita cino Leza wakanya? Nga cacitika vivyo alinzile ukwiusya ukuti Leza ali Kateeka wakwe uwapapelapela. Afwile ukucita vino atumwa yacisile lino ya kateeka yayanenyile ukucita ivyali nu kulenga kuti yatame masunde yakwe Leza. Pa Milimo 5:29 pakalanda ukuti: “Petulo na alondezi yauze yaasuka yati, ‘Tulinzile ukuyela Leza, kuluta kuyela antu.’”

UKULANZYANYA NINGO

20. A lilaci lino cazipa ukulanga ukutemwa nu kucindikana?

²⁰ Ukutemwana nu kucindikana kwacindama pano kukalenga atwalana ukulanzyanya ningo. Ngi cakuti iya watemwa umuci, akalanzyanya nawe pali vino akuomba, pa ntazi zino umuci ali nazyo, alino na pali vino umuci akwelenganya pali vimwi. Ukucita vii kulalenga kuti umuci auvwa ningo lyonsi. Iya angalanga ukuti watemwa umuci wakwe ndi cakuti akukwata insita yakulanzyanya nawe alino nu kumukutika kuli vino akulanda. (Yakobo 1:19) Aci yamwi yakailizyanya pa mulandu wakuti ya iya yasikwata insita ikulu yakuya pamwi nu kulanzyanya nayo. Ala cikaipa sana. Icacumi ukuti ndakai antu yaya apamviwe sana, cikalenga ukuti ya iya yaafuma pa ng’anda insita ikulu pa mulandu wa ncito, napya pa mulandu wakuti mikalile itale calenga nu kuti aci yamwi nayo kwene yaingila incito. Lelo atwalana yafwile yapaatula insita ya kuya pamwi. Ngi cakuti cisi vivyo, cingalenga ukuti cila wino aicitila vino akulonda. Napya cingaleta intazi izipisye nga umwi watandika ukuvwana sana na muze wino yatatwalana nawe.

21. Uzye amazwi asuma yangalenga uli amu cupo ukuya ni nsansa?

²¹ Vino umuci na iya yakacita pa kulanzyanya navyo kwene vyacindama. “Amazwi ya mutembo . . . yalyompa umu kanwa, yazipila nu mwili.” (Mapinda 16:24) Nanti cakuti mwaapusana muli vino mwataila na wino mwatwalana nawe, mufwile ukuvwila mazwi akalanda ukuti: “Mvwango zinu zilinzile kuya zisuma nupya izyakuzanzya antu.” (Kolose 4:6) Ndi cakuti wino mwatwalana nawe wawela nu ulanda kuno alaile, cingazipa ukulanda mazwi asuma napya acikuku. “Amazwi alondoloke yakolana ni viseekwa viyengese vyakwe zaabu, ivili pa mbale yakwe siluva.” (Mapinda 25:11) Mufwile ukulanda ni izwi ilitekele nu kuomvya amazwi asuma. Citange ciye ningo ukulanda mazwi wakwe yaa: “Yala icisaasa!” Lelo cingazipa ukulanda ni izwi lisuma napya iliteekele wakwe vii, “Uzye munganjalilako icisaasa?”

22. I miyele ci ino atwalana yafwile ukuya nayo pakuti yalanzyanya ningo?

²² Ukulanzyanya kukaya ningo ndi cakuti mukuomvya amazwi asuma, mukuloleka ansansa, muli ni cikuku, nupya mukukutika. Ndi cakuti iya nu muci yakuombesya pakuti yalanzyanya ningo, cilalenga kuti yalanda ivili ku mwenzo, napya cilalenga kuti yakomelezyanya nu kwazwana lyonsi lino yaya ni ntazi. Baibo ikalanda kuti: ‘Mwakomelezya aali nu ulanda.’ (1 Tesalonika 5:14) Kukaya insita imwi lino iya nanti muci angasakamala pali vimwi. Nga caya vii, yafwile ‘ukukomelezyanya.’—Loma 15:2.

23, 24. Uzye ndi cakuti iya nu muci yatemwana nu kucindikana, cilalenga kuti yacita uli nga yatazumilizyanyizye pali vimwi? Landini icacitike.

²³ Ngi cakuti atwalana yatemwana nu kucindikana, yatalaalola ukuti lyonsi lino yatazumilizyanyizye pali vimwi, ale yakwata uwavya ukulu cuze. Lelo yalaombesya ukukanasaalulana. (Kolose 3:19) Yonsi yoili yafwile ukwiusya ukuti “ukwasuka luse luse kukamala icipyu.” (Mapinda 15:1) Fwandi mufwile ukucenjela pakuti mutapingula zuwa uwinu lino walondolola ivili ku mwenzo, nanti kulola ngati vino walondolola i vyasilesile. Lelo mufwile ukutekanya nu kuvwikisya ukuti avino uwinu akwelenganya. Lyene, mwensi mweili mufwile ukuombela pamwi nu kumala intazi ino mukweti nu kuzumilizyanya muli vyonsi.

²⁴ Tale iusyini icacitike lino Sala wanenyile iya Abulaamu ukucita cimwi cino atatemilwe pakuti intazi ino yaali nayo isile. Nanti cakuti abulaamu atatemilwe, Yeova wamunenyile ukuti: “Cita consi cino Sala wakunena ukucita.” (Utandiko 21:9-12) Abulaamu wacisile vivyo kwene napya wapolelilwe. Vikwene avino na iya afwile ukucita; ndi cakuti umuci walanda vimwi ivipusine na vino wene akwelenganya, cingazipa ukumukutika. Umuci nawe atafwile ukulalanda sile ukwaula kuti auvwe na kuli vino iya akulanda. (Mapinda 25:24) Ndi cakuti iya nanti umuci akalonda sile kuti vino akwelenganya avino viombwe, ale atacindika nanti kutemwa umuze.

25. Uzye ukulanzyanya kusuma kungalenga uli atwalana ukuya ni nsansa napa vya kupanga icupo?

²⁵ Ukulanzyanya kusuma kukalondekwa na pa vya kupanga icupo. Ukuya na ukaitemwe nu kukanaikaanya kungonona ukutemwa ukwaya mu cupo. Ukulanzyanya kusuma, alino nu kuteeka umwenzo vyacindama. Ngi cakuti atwalana yasi na ukaitemwe, napya yakulangulukilana, ukupanga icupo kutalaya uwavya ukome sana. Mu milandu ya musango uu cazipa ukuvwila mazwi akalanda ukuti, “tulinzile kwelenganya pa vilondwa vya antu yauze, asi sile pa vilondwa vitu.”—1 Kolinto 7:3-5; 10:24.

26. Nanti cakuti atwalana yonsi yakaya ni ntazi, uzye ukuvwila Izwi Lyakwe Leza kulalenga uli ukuti yaye ni nsansa?

²⁶ Masunde aya muli Baibo yacindama wakwe cimwi! I cacumi atwalana yonsi yakaya ni ntazi. Lelo ndi cakuti atwalana yakuvwila vino Yeova walanda, napya yakulanga ukutemwa nu kucindikana, yangataila ukuti icupo cao cilatwalilila napya yalaya ni nsansa lyonsi. Nupya yalalaanga ukuti yacindikana nu kucindika Yeova Leza uwalenzile ukuti icupo ciyeko.