Mwe ya Kasimikila Mwalukulunduluka
1. I vyani vino yamwi mu nsita ya atumwa yaacisile ivikaalanga ukuti tulinzile ukulunduluka?
1 Ya kasimikila Aina Klistu yalinzile yalunduluka. Ali cino Yesu wasambilizye alondezi yakwe ivyeo ivyali nu kuyazwa kuti yalunduluka lino yakuomba umulimo wa kusimikila. (Luka 9:1-5; 10:1-11) Nupya ali mulandu uno Akwila na Pulisila yasendiile Apolo ku mwao “yamulondolwela ningo ivya nzila yakwe Leza.” (Mili. 18:24-26) Nupya cikwene i calenzile nu kuti Paulo akomelezye kakosoola Timoti uwaombanga ningo, kuti angatwalilila ukulondela vino wasambililanga pakuti ‘antu yonsi yangalola vino walundulukanga.’ (1 Tim. 4:13-15) Asi mulandu ni myaka uwingi ino twatituombela Umwene mu mulimo wa kusimikila ilandwe lisuma, swensi kwene tulinzile ukutwalilila kuzifya imisambilizizye itu.
2. Uzye tungacita uli pakuti tusambilile uku yanji?
2 Mwasambilila na Kuli Yauze: Inzila yonga ino tungaomvya pakuti tuzifye imisambilizizye itu, u kusambilila uku yanji. (Mapi. 27:17) Acino fwandi, mwaikako sana mano lino ya kasimikila yauzo yakusimikila. Mwayuzya umu kulungatika pakuti yamunene vino namwe mungaasambilizya ningo, nupya mwakutikisya lino yakumunena. (Mapi. 1:5) Uzye cikamutalila ukuswilila kuli yano mwasimikile, kutandika isambililo lya Baibo, nanti ukuomvya inzila zyuze izya kusimikililamo? Mwaitandikilako, nupya mwauzya umwangalizi wi umba lino mwayamo nanti kasimikila muze aakaomba ningo pakuti amwazwe. Mwaiusya nu kuti umupasi wa muzilo wakwe Yeova ungatwazwa ukuya ya kasambilizya yasuma, acino lyonsi mwalenga kuli Leza ukuti amupeele umupasi.—Luka 11:13.
3. Uzye tufwile ukucita uli ndi cakuti umwi watunena ivyakucita, nanti cakuti limwi tutamunenyile ukuti atwavwe?
3 Ndi cakuti yamunenako vino mungacita pakuti mwaomba ningo, mutaasoka nanti cakuti mutayalenzile ukuti yamwazwe. (Kasa. 7:9) Wakwe vino cali kuli Apolo, mwaicefya nu kuzumila vino yakumwazwa, nupya mwataizya. Kucita vivyo kulalanga ukuti mwaya na mano.—Mapi. 12:15.
4. Uzye Yesu wasambilizye ukuti u mulandu ci uno tulinzile ukulundulukila pakuti tuye ya kakosoola yasuma?
4 Kulunduluka Kukacindika Leza: Yesu waomvizye icilangililo pa kukomelezya alondezi yakwe ukuya ya kasimikila yasuma. Waikolinye ku muti wa matingi alino alondezi yakwe apakwe nayo wayakolinye ku misambo. Walanzile ukuti Tata akatungwila imisambo iikaseeka ivizao pakuti ‘yaseeka ivizao ivingi.’ (Yoa. 15:2) Wakwe vino umwineco wa calo ca matingi akalondesya kuti imisambo ya mitingi yaseeka ivizao ivingi, Yeova nawe akalonda kuti tutwalilile ukuzifya imisambilizizye itu lino tukumulumbanya. (Ayeb. 13:15) I visuma ci ivikacitika ndi ca kuti tukulunduluka ukuya yakakosoola yasuma? Yesu watuneena ukuti: “Tata akalumbanyiziwa ndi mukuseeka ivizao ivingi.”—Yoa. 15:8.