Mu Nsita ya Ciusyo ca Uno Mwaka, Uzye Mulaya Acincile Wako Vino Yeova na Yesu Yaaya?

1. I vyani vino ya Nte Yakwe Yeova yakalondesya ukucita umu nsita ya Ciusyo?

¹ Yeova waaya umucincile pakuti ace afikilizye ukulonda kwakwe. Pali Ezaya 9:7, NW pakalondolola ivintu visuma vino uwene wakwe Leza ulaleta, ukuti: “Kucincila kwakwe Yeova wa maumba kulacita cii.” Na Yesu kwene lino waombanga umulimo wa kusimikila pano nsi, walangizye ukuti wali umucincile mu kupepa kwa cumi. (Yoa. 2:13-17; 4:34) Cila mwaka ndi cakuti insita ya Ciusyo yafika, ya kasimikila aingi umu nsi yonsi yakaombesya sana umu mulimo wa kusimikila pakuti yaakolanya ukucincila kwako Yeova na Yesu. Uzye mwemo mutalaombesya wako vino ya kasimikila yauzo yakacita?

2. Kutandika pa 7 Maaci, uzye ukucincila kulalenga kuti twacita vyani?

² Kampeni ya Kwama Antu ku Ciusyo: Kampeni ya kwama antu ku Ciusyo ica uno mwaka, ilatandika pa Ciwelusi pa 7 Maaci. Fwandi mufwile ukutandika ukuipekanya likwene pakuti mukaye acincile pa kusimikila. Ya kasimikila aingi umu vilongano yalaya nu luzango cuze lino yalaombesya sana mu ncende ino yakasimikililamo. Fwandi mukaombesye pakuti muce mulaalike yano mukasambilizya Baibo, yano mwasimikiile, yano mukaomba nayo, ya lupwa, alino na yano mukasambilila nayo, nupya cingazipa ukuti muce mwayapeela na kapepala ka kuyaamila uku Ciusyo nanti sile ukuyalanga pali webusite ya jw.org.

3. Uzye tungacita uli pakuti tuce tuombesye umu mulimo wa kusimikila umu Maaci na Epulelo?

³ Upainiya wa Nsita Inono: Kucincila kulalenga nu kuti tuombesye sana umu mulimo wa kusimikila. Kwaula nu kutwisika, ya kasimikila aingi yalaombako upainiya wa nsita inono mu Maaci na Epulelo, pano mu myezi yii itukwata ni syuko ilya kusoolola ukuomba upainiya uwa ma-awazi 30. Fwandi pa kupepa kwa lupwa nanti pa nsita ino mukaisambilizya Baibo, mukapepe kuli Yeova pakuti muce mumanye vino mulaomba. (Mapi. 15:22) Ukuombesya kwinu, kulalenga ukuti nayauze yakaye acincile. Ndi cakuti mwatantika ningo pakuti muce muombesye, mulalanga ukuti mukukolanya ukucincila kwako Yesu.—Mako 6:31-34.

4. Uzye i visuma ci vilacitika ndi cakuti twaca twakolanya ukucincila kwakwe Yeova na Yesu?

⁴ Cumi kwene tulapolelelwa wakwe cimwi ndi cakuti twaca twakolanya ukucincila kwakwe Yeova na Yesu mu nsita ya Ciusyo. Antu aingi aaya umu ncende ino tukasimikila yaluvwa ilandwe. Tulaya nu luzango cuze ulwaya mu kuombela Yeova alino nu mukupeela anji. (Mili. 20:35) Lyene ni cicindamisye i cakuti, tulazanzya Leza nu Mwana wakwe, yano yaaya acincile.