Nacingililwa pa Mulandu Wakuti Nataila Yeova

VINO NIZILE IMANYA YEOVA NU KUMUTAILA SANA

Navilwe umu 1948 umu muzi unono uwa mu Nigeria. Pa nsita iya ya tata yanono ya Moustapha, na tatalenzi Wahabi, yabatiziwe nu kuya ya Ya Nte Yakwe Yeova. Lino nali ni myaka 9, ya tata yafwile. Nuvwile ulanda sana. Ya Wahabi yanenyile ukuti tulalolana na ya tata nupya. Amazwi yaa akuteekezya yalenzile ntandike ukusambilila Baibo. Nabatiziwe umu 1963. Nupya na ina yane yatatu nayo kwene yabatiziwe.

Umu 1965, natandike ukwikala na ya tatalenzi ya Wilson umu musumba wa Lagos nupya naipakiizye ukuombela pamwi na ya painiya umu cilongano ca Igbobi. Insansa zino yakwatanga zyalenzile nalondesya ukuomba upainiya, nupya umu Januwale 1968 nizile intandika upainiya.

Umwina Albert Olugbebi aakaombela pa Betele wapekinye ukuti kuye ukukomaana ukuiyele ukwa ina na ya nkazi acance, walanzile sana pali vino uku katutu ka Nigeria kwalondekwanga ya painiya aiyele. Ncili nkaiusya vino umwina Olugbebi walanzile, watile: “Mucili mwemwe yance nupya mungaomvya amaka inu ni nsita inu uku kuombela Yeova. Kuli imilimo ingi sana ino mungaomba.” Natandike ukulondesya ukukolanya Ezaya, nu kuya konsi kuno Yeova angantuma, fwandi nalemvile kalata uku musambo.—Eza. 6:8.

Umu 1968, natandike ukuomba nga painiya muiyele umu musumba wa Kano, uku katutu ka Nigeria. Pa nsita iya ala kuli inkondo iyatandike umu 1967 iizile isila umu 1970. Inkondo ii yalenzile ivintu vitale sana nupya antu yafwile uku katutu ka Nigeria. Pa mulandu ni nkondo ii umwina umwi wanenyile ukuti ntayako. Nomba na munenyile ukuti: “Nataizya sana pali vino mwanjikako amano. Nomba, ndi cakuti Yeova akulonda nkaombele uku ncende ii, nsikutwisika ukuti alancingilila.”

NATAILE SANA YEOVA LINO IVINTU VYATAZILE PA MULANDU NI NKONDO

Ivintu vyatazile sana umu Kano. Inkondo iyaikala mpanga yononyile sana ivintu. Insita zimwi lino twaombanga umulimo wa kusimikila twalolanga ivitumbi vyakwe yano yakomile umu nkondo. Nanti icakuti kwali ivilongano ivingi umu Kano, aina aingi yutukile umu mpanga zyuze. Ya kasimikila asile yatacizile pali 15, alino yuvwanga sana intete nupya yatoovwike. Aina na ya nkazi yuvwile ningo sana lino swe ya painiya aiyele 6 twafisile. Twayakomelizye nupya yuvwile ningo sana. Twayazwile ukutandika ukwika sana amano kuli vyakwe Leza nupya twayazwile nu kutandika ukutuma lipoti wa mu mulimo wa kusimikila alino nu kuoda amabuku uku musambo.

Swensi kwene 6 twatandike ukusambilila ululimi lwa Cihausa. Antu aingi amu Kano yazumilanga ukuvwa ukwi lyasi lisuma pano twasimikilanga umu lulimi lwao. Nanti ciye vivyo, antu amu mipepele yatatemilwe umulimo uno twaombanga fwandi twalondekwanga ukuya acenjele. Wanda umwi, nemo na wino twaomvile nawe yatupepike uku monsi umwi nu mupeni. Lelo twasimulisye ukumucila nupya atatuzanyile. Asi mulandu ni vyakutiinya ivyacitikanga, Yeova ‘watusunganga ningo,’ nupya ya kasimikila yatandiike ukuvulilako. (Masa. 4:8) Ndakai umu Kano mwaya ivilongano 11 alino na ya kasimikila ukucila pali 500.

YATUCUZYANGA UMU NIGER

Lino twaomvileko imyenzi inono umu Kano, mu 1968 umu Ogasiti, nemo na ya painiya yaili aiyele izile iyatutuma uku Niamey, umusumba ukalamba uwa mu Republic of Niger. Lino twafisile sile twizile itumanya ukuti impanga ya Niger iyayela ku West Africa, yaya pa mpanga izyakaya sana pano nsi. Twalondekwanga ukuyelezya ukusimikila ala ikukaya, pa nsita ili imwi nu kusambilila ululimi lwa Cifrench luno yakaomvya sana uku ncende ii. Asi mulandu ni ntazi zii, twataile Yeova nu kutandika ukusimikila umu musumba pamwi na ya kasimikila anono yano twazanyileko. Patalengile, antu yonsi umu Niamey amanya ukubelenga yakweti ibuku lyakuti The Truth That Leads to Eternal Life. Antu izanga umukutulonda kuti yapokeko ibuku lii.

Lino papisile sile insita inono, twizile itumanya ukuti amu uteeko yatalondanga ya Nte Yakwe Yeova. Umu Julai 1969, twakweti ukongano wa ciputulwa uwa kutandikilapo umu mpanga ii, nupya antu azanyilweko yali umupipi na 20. Twalondesyanga ukulola kuno ya kasimikila yaili ya kubatiziwa. Lelo pa wanda wa kutandikilapo uwa ukongano, ya kapokola izile nu kutulesya ukulongana. Yasenzile ya painiya aiyele nu mwangalizi wa ciputulwa uku polisi. Pa cisila ca kutuuzya mauzyo, yatunenyile ukuti tukaswilile uwanda uwalondelilepo. Lino twilwike ukuti amu uteeko yali nu kutuletela intazi, twasoolwilepo ukuti ilyasi lya lubatizyo lilandilwe uku ng’anda nu kubatizya aali nu kubatiziwa umu umfisolo.

Lino papisile imilungu inono, nemo na ya painiya yauze aiyele 5 yatunenyile ukufuma umu Niger. Yatupeezile amanda yaili akucita vivyo nupya twali nu kuilondela ivyalondekwanga pakuti tufumemo. Tuvwilile nupya papo kwene sile twaile uku musambo wa ku Nigeria kuno yaile iyatupeela imilimo yuze.

Yantumile uku Orisunbare muzi uwayela umu Nigeria, kuno naipakizyanga ukuomba umulimo wa kusimikila pamwi ni umba ilinono lyakwe ya kasimikila. Lelo pa cisila ca myezi 6, akwi ofesi lya musambo yanenyile ukuswilila uku Niger. Pa kutandika nazungwike nupya nuvwile intete, lelo nalondesyanga ukuyalola aina nupya uku Niger.

Naswilile uku Niamey. Uwanda uwalondelilepo lino nafisile, umonsi umwi aakacita bizinesi wizile amanya ukuti nene Inte Yakwe Yeova nupya watandike ukunguzya mauzyo pali Baibo. Twatandike ukusambilila, nupya wizile abatiziwa pa cisila cakuta ukupeepa nu kumwesya uwengwa. Naipakizyanga ukuombela pamwi na ina na ya nkazi umu ncende izipusane pusane umu Niger, nu kulola kuno antu yazumilanga icumi panono panono. Lino nafisile sile umu mpanga ii mwali ya Nte 31, lino naswililanga yali 69.

“TUTAMANYA IVINGI PALI VINO UMULIMO WA KUSIMIKILA UKAOMBWA UMU GUINEA”

Umu kusila kwakwe 1977, naswilile uku Nigeria umu kusambiliziwa. Pa cisila cakusambiliziwa pa milungu itatu, kalemanya muli Komiti ya Musambo, ya Malcolm Vigo, yanenyile ukubelenga kalata iyafumile uku musambo wa Sierra Leone. Aina yalondanga umwina umusimbe nupya uwa umi usuma aakavwanga Icizungu ni Cifrench pakuti angaya akaomba ngu mwangalizi wa ciputulwa umu Guinea. Umwina Vigo wanenyile ukuti nasambiliziwanga pakuti ningaya nkaomba umulimo uu. Wanenyile ukuti umulimo uu utaali uwangupale. Wanenyile ukuti, “Welenganyepo sana lino utatala wazumila.” Papo kwene sile naswike inti, “Vino Yeova aliwe akuntuma, namaya.”

Naile uku Sierra Leone nupya naile indolana na ina api ofesi lya musambo. Umwina wenga uwaya muli Komiti ya Musambo wanenyile ukuti, “Tutamanya ivingi pali vino umulimo wa kusimikila ukaombwa umu Guinea.” Nanti cakuti umusambo uu u wangalilanga umulimo wa kusimikila umu Guinea, cayatalilanga ukulanzyanya na ya kasimikila pa mulandu ni vimvulunganya vya miteekele ivyali umu mpanga iya. Pa miku iingi aina ku musambo yezyanga ukutuma aina uku Guinea, lelo aina yafilwanga. Fwandi yanenyile ukuya uku Conakry, umusumba ukalamba umu Guinea nu kulonda umwa kwikala.

Lino nafisile uku Conakry, naile ukwi ofesi lyakwe ya Nigeria umu Guinea nu kulolana nu mwimilizi umukalamba. Namunenyile pali vino nalondesyanga ukulasimikila umu Guinea. Wanenyile ukuti ntalinzile ukwikalamo pano umi wane wali nu kuya umu uzanzo. Watiile, “Swilila uku Nigeria akuno ukasimikila,” nani namunenyi inti, “Nkulondesya ukwikala kuno.” Lyene walembiile amu uteeko wa Guinea ukuti yangazwe, nupya yangazwile.

Patalengile naswilile ukwi ofesi lya musambo uku Sierra Leone nupya nanenyile aina pali vino uteeko wapingwile. Aina yuvwile ningo sana pali vino Yeova wangazwile. Uteeko wanzumilizye ukwikala umu Guinea.

Kufuma umu 1978 ukufika umu 1989, naomvile umulimo wa kutandalila ivilongano umu Guinea, nu mu Sierra Leone, nupya naali umwangalizi wa ciputulwa uwakwazwilizya umu Liberia. Pa kutandika, nalwalanga insita izingi. Cii cacitikanga sana umu ncende izyayelile ukutali. Lelo aina yaombesyanga ukuntwala uku cipatala.

Pa nsita imwi, nalwile sana malelya nupya nakweti inzokanda. Lino napozile, nizile imanya ukuti aina yalanzyanyanga kuno yali nu ku nzikila nga nafwa. Asi mulandu na vyonsi vii ivyacitike, ntatazile inelenganyapo pa kusya umulimo uno napeezilwe. Nupya nasininkizya ukuti Leza sile aa ngatucingilila pano nanti twafwa wene angatutuutulula.

NEMO NA MAMANE TWATAILA YEOVA

Umu 1988, twaloline na ya Dorcas, nkazi painiya umuicefye nupya uwatemwa vyakwe Leza. Twatwaline, nupya twatwalilile ukuombela pamwi umulimo uwa kutandalila ivilongano. Ya Dorcas yakwata sana ukutemwa nupya yaipeelesya. Twapitanga ulwa pa nsi makilomita 25 ala itusenda ivyola pa kuya uku vilongano. Ndi cakuti ukuyelile icilongano ukutali sana, twaomvyanga imipitile ili yonsi iyaloleka nupya twapitanga umu miseo ya matipa umwayanga iviwina.

Ya Dorcas yasipa sana. Wakwe, insita zimwi twalambanga inguzi umwayanga mung’amba. Pa nsita imwi lino twali pa lwendo lwa manda 5, twazanyile ulalo uononeka, fwandi twaomvizye kawato pa kulamba. Lino ya Dorcas yakatwike umu kawato kuti yafume, yaponiile umu manzi, apazike. Swensi kwene tutamanyile ukowa, nupya umu luzi mwali mung’amba. Icazifileko icakuti, alumendo yamwi aamanyile ukowa izile iyayafumya. Swensi kwene twalotanga pali vii ivyacitike, lelo twatwalilile ukutandalila ivilongano.

Kukutandika kwakwe 1992, twazungwike lino twamanyile ukuti ya Dorcas yali ni inda. Uzye ii yali ali mpela itu iyakuya umu mulimo wa nsita yonsi uiyele? Twatile, “Yeova watatupeela upe.” Fwandi twasoolwile ukutemela umwana witu umukazyana izina lyakuti Jahgift. Pa cisila ca myaka 4 kufuma pano Jahgift wavyalilwe, twizile itukwata umwana umonsi, Eric. Ana itu yonsi yakaombela Yeova. Jahgift waombiilepo api ofesi lyakwe ya kasenula uku Conakry, nupya Eric nawe u muomvi aakatumikila.

Nanti cakuti ya Dorcas yatiile upainiya uiyele, yatwalilile ukuomba upainiya wa nsita yonsi lino twakuzyanga ana. Pa mulandu nu kwazwa kwakwe Yeova, natwalilile ukuomba umu mulimo wa nsita yonsi uiyele. Lino ana itu yakuzile, ya Dorcas izile iyatandika upainiya uiyele nupya. Lyene ndakai, nemo na mamane sweswe ya misyonali umu Conakry.

YEOVA AKATUCINGILILA

Lyonsi kwene nkaya konsi kuno Yeova wantuma. Pa nsita izingi nemo na mamane twalola vino Leza akatucingilila nu kutupaala. Kutaila Yeova kwatucingilila uku ntazi na masakamika ivikaiza pa mulandu nu kutaila ivyuma. Ivyatucitikila vyalenga tusininkizye ukuti Yeova ali Ntulo ya kucingililwa nupya ali “Katuula witu.” (1 Mila. 16:35) Nasininkizya ukuti yonsi aakataila Yeova ‘alayacingilila wakwe vino umwi akacingilila icuma icamutengo ukulu.’—1 Sam. 25:29.