Uzye Insi Ilasila Lilaci?

Vino Baibo yalandapo

Pakuti tumanye lino insi ii ilasila, cikulondekwa ukumanya vino Baibo ikaomvya izwi lyakuti “insi.” Izwi lya Cigliki ilyakuti koʹsmos, ilikapiliula “insi” ilingi likalozya uku nsi ya antu, sana sana iciputulwa icisiuvwana nu kulonda kwakwe Leza. (Yoane 15:18, 19; 2 Petulo 2:5) Insita zimwi izwi lyakuti koʹsmos likalozya ku masunde ni vicitwa vya yantu.—1 Kolinto 7:31; 1 Yoane 2:15, 16.a

Uzye “ukusila kwa nsi” ali cani?

Amazwi yakuti “ukusila kwa nsi” aaya mu Mabaibo aingi, yangasenulwa nu kuti “mpelelekezyo ya nsi” nanti “kusila kwa nsi.” (Mateo 24:3; English Standard Version) Amazwi yayo yasipiliula ukononwa kwa nsi nanti antu yonsi, lelo yakalozya uku kusila kwa masunde ni vicitwa iviipe ivya yantu.—Loma 2:20.

Baibo ikasambilizya ukuti “yakacita ya viipe yalaputulwa” pakuti antu aakacita ivisuma yakaipakizya umi pano nsi. (Masamu 37:9-11, Upangano Upya na Masamu) Ukononwa kuu kulacitika lino kulaya “macuzi aipisye ukuluta,” alasila lino kulaya ulwi wa Alamagedoni.—Mateo 24:21, 22; Umbwilo 16:14, 16.

Uzye insi ilasila lilaci?

Yesu walanzile ukuti: “Kusi nanti wenga wamanya kwiza kwa wanda ulya nanti kasita. Angeli ya mwi yulu nanti Mwana kwene yatamanya, suka sile Tata.” (Mateo 24:36, 42) Nupya walanzile nu kuti ukwiza kwa wanda uwa kulaya u kwa kupumikizya, uliza “pa nsita ino mutenekile.”—Mateo 24:44.

Nanti icakuti tutange tumanye uwanda ni nsita lino uwanda uu uliza, Yesu watupeezile “cilangililo” nanti ivintu ivilacitika, ivilalangilila ukuti insita yatipalama iya kusila kwa nsi. (Mateo 24:3, 7-14) Baibo ikaama insita iyo ukuti “insita ya mpela ya nsi,” “ku mpelelekezyo,” nanti “mu manda ya kusyalikizya.”—Danieli 12:4; 2 Timoti 3:1-5.

Uzye kulaya icili consi icilasyala pa mpela ya nsi?

Ee. Insi ilasyala vikwene, pano Baibo ikati “wasimpisya insi ndi, isi yakutelengana foo.” (Masamu 104:5) Nupya umu nsi kwene ii mulaya antu aingi, wakwe vino Baibo yalaya ukuti: “Antu aololoke yalikala umutende umu mpanga, nu kuipyana umuyayaya.” (Masamu 37:29) Leza alaleta ivintu vyonsi vino walondanga pa kutandika:

• Paladaise.—Ezaya 35:1; Luka 23:43.

• Ukucingililwa nu ukankala.—Mika 4:4.

• Yonsi yalakwata incinto nupya izisuma.—Ezaya 65:21-23.

• Untungwa uwakukanalwala nu kukota.—Yobo 33:25; Ezaya 33:24.