Uzye Yacuza Yakwe Leza Aweni?

Yesu Klistu u Mwana wakwe Yeova, kapya ali cuza wakwe wino watemwisya sana. Lino Yesu atali aize kuti aye umuntu pano nsi, wali u mungeli uwa maka ukwi yulu. (Yoane 17:5) Lyene wizile pa mpanga ya pa nsi ku kusambilizya antu icumi cakwe Leza. (Yoane 18:37) Kapya wafwile pa kuti akulule antu ya cuvwilo ku luyembu ni mfwa. (Loma 6:23) Ndakai Yesu u Mwene wa Wene Wakwe Leza, kuli kuti uteeko wa mwi yulu uno ulalenga insi ukuya Paladaise.—Uumbwilo 19:16.

Angeli na yo a cuza yakwe Leza. Angeli yatatazile iyaya antu pano nsi. Yapanzilwe sile umwi yulu kwene lino Leza atali apange insi. (Yobo 38:4-7) Angeli yaya imintapendwa. (Daniele 7:10) Yacuza yakwe Leza kwene yaa aikala ukwi yulu, yakalonda kuti antu yamanye icumi pali Yeova.—Uumbwilo 14:6, 7.

Leza wakwata yacuza na yauze pano nsi; akaama yacuza yayo ati ya nte yakwe. Nte, nanti kamboni, umu ng’anda ya cilye akalanda pali vino amanyile pa muntu umwi nanti apa cintu cimwi. Na ya Nte Yakwe Yeova yakaneena antu vino yamanya pali Yeova, na vino akalonda. (Ezaya 43:10) Ndi vino angeli yakalonda ukwavwa antu ukumanya icumi pali Yeova, avino na ya Nte kwene yakalonda. Yakalondesya ukuti namwe kwene muye cuza wakwe Leza.