Mwapepa Kuli Leza Pakuti Muye Cuza Wakwe

1, 2. U mulandu ci uno ukupepela kuli Yeova kwayela isyuko ilikulu cuze, nupya i cani cino tufwile ukumanyila vino Baibo ikasambilizya apipepo?

UUMBO wakwe Leza wakulisya cuze nupya insi ikaloleka ukuya kantu akanoono sana ndi mwailinganya uku uumbo onsi. Yeova, “uwaumvile iyulu ni nsi,” akaalola imitundu ya antu wa kalitoni ka manzi akali apa milomo ya nsembo. (Masamu 115:15; Ezaya 40:15) Baibo ikati Yeova “waya umupipi na yonsi akakuuta kunoli, yonsi akakuuta kunoli umusi mwisyente. Wene akapeela ivikalonda aakamoopa, akauvwa ukukuuta kwao nu kuyatuula.” (Masamu 145:18, 19) Icintu cii cikakomelezya sana! Kaumba wa maka yonsi waya apiipi naswe nupya akaumvwa ndi ‘twakuuta kuno ali umu cumi.’ Fwandi ukupepa kuli Yeova i syuko sana!

² Nomba, ndi tukulonda Yeova auvwa mapepo itu, tulinzile ukupepa kuli aliwe umu nzila ino wazumilizya. Uzye vwilini tungacita vivyo ndi tutamanyile vino Baibo ikasambilizya apipepo? Cacindama sana ukumanya vino Malembelo yakalanda apilyasi lii, pano ipepo likatwazwa ukuya sana ya cuza yakwe Yeova.

I CANI CINO TULINZILE UKUPEPELA KULI YEOVA?

3. Uzye u mulandu ci onga ucindame sana uno tukapepela kuli Leza?

³ Umulandu onga uno tufwile ukupepela kuli Yeova u wakuti, Leza umwineco akatukomelezya ukupepa kuli aliwe. Baibo ikatukomelezya ukuti: “Mutasakamikwa pa cintu cili consi, lelo pepini pamulandu wa vintu vyonsi, mule mukulenga Leza nu kutaizya mu myenzo. Lyene pamulandu wakuti mwemwe yakwe Klistu, Leza alamupeela mutende uno kusi umuntu nanti wenga angaumanyikisya. Mutende kwene uu, ulatungulula umi winu ni myelenganyizizye inu.” (Filipi 4:6, 7) I cumicumi, tutanga twilileko sile ukwisyuko kwene lii lino Kateeka wa Papelapela uwa vintu vyonsi watupeela pa mulandu nu luse lwakwe!

4. Uzye ucuza witu na Yeova ukakoma uli ndi tukupepa lyonsi kuli aliwe?

⁴ Umulandu na uze uno tulinzile ukupepela kuli Yeova u wa kuti, ndi tukupepa kuli aliwe alino ucuza witu na Leza ukakoma sana. Ya cuza ya cumi yasilanzyanya sile lino yakulonda vimwi. Lelo, ya cuza yasuma yakasumba sana mano uku muze, nupya ucuza wao ukakoma sana ndi yakulanzyanya ivili uku mwenzo, ivikuyacuzya, na vino yakuyuvwa. Ilingi kwene, avino caya na pali ucuza witu na Yeova Leza. Ibuku lii, lyamwazwa sana ukumanya ivingi pali vino Baibo ikasambilizya pali Leza, vino wene waya, na vino akalonda ukucita. Mwasambilila ukuti Leza akuno waya ukwaula nu kutwisika. Lino mukupepa, mukakwata isyuko lya kunena Tata winu uwa mwiyulu vino mukwelenganya ni vili uku mwenzo. Ndi mukucita vivyo, Yeova akaya sana cuza winu.—Yakobo 4:8.

UZYE I VYANI IVIKALONDEKWA PAKUTI LEZA AUVWA MAPEPO ITU?

5. Uzye i cani cikalanga ukuti asi mapepo yonsi yano Yeova akauvwa?

⁵ Uzye Yeova akauvwa amapepo yonsi sile? Uvwini vino Leza wanenyile aina Izlaeli ya cipondoka aliko umu manda yakwe Ezaya: “Nanti mupepe uli nemo namapupuzyanga sile, pano iminwe inu ikowele ku uyi.” (Ezaya 1:15) Fwandi ivicitwa vimwi vingalenga ukuti Leza atauvwa mapepo itu. Acino, pakuti Leza auvwa mapepo itu, kwaya ivintu vimwi ivicindame sana vino tulinzile ukucita.

6. I cani icikalondekwa sana pakuti Leza auvwa mapepo itu? Uzye tungalangizya uli ukuti twaya nu utailo?

⁶ Icintu cakutandikilako icacindama sana pakuti Leza auvwa mapepo itu, u kuya nu utailo. (Mako 11:24) Mutumwa Paulo walemvile ukuti: “Kusi umwi angazanzya Leza kwaula kukwata utailo. Pano wino wensi akaiza kuli Leza alinzile ataile ukuti Leza akuno waya nupya akalambula yao akamulondalonda.” (Ayebulai 11:6) Ukuya nu utailo wa cumi kwaluta pa kumanya sile ukuti Leza akuno waya nu kuti akauvwa nu kwasuka mapepo. Ivicitwa vya muntu i vikasininkizya ndi cakuti waya nu utailo nanti foo. Tulinzile ukulanga apaswe ukuti twaya nu utailo, muli vyonsi vino tukacita cila-wanda.—Yakobo 2:26.

7. (a) I cani cino tufwile ukuyela nu mucinzi lino tukupepa kuli Yeova? (b) Uzye tungalanga uli ukuti twatituicefya nu kuti tuli ni cumi lyonsi lino tukupepa kuli Leza?

⁷ Nupya Yeova akalonda ukuti yonsi aakupepa kuli aliwe yaicefya nu kuya acumi. Uzye vwilini tutafwile ukuicefya lino tukupepa kuli Yeova? Lino antu yakwata isyuko lya kulanda nu mwene nanti kateeka, yakaya sana nu mucinzi, kulanga ukuti kateeka wiyo waya ni cifulo ca papela. Ndi cakuti antu yakacita vivyo kuli kateeka wa untunze, fwandi tulinzile nu kulutapo ukuya nu mucinzi lino tukupepa kuli Yeova! (Masamu 138:6) Ukwaula nu kutwisika, wene a “Leza Wamaka Yonsi.” (Utandiko 17:1) Lino tukupepa kuli Leza, imipepele itu ifwile ukulanga ukuti ituicefya nu kuti wene wakwata icifulo capapela sana ukutuluta. Ndi cakuti tukuicefya vivyo, tulaapepa nu mwenzo onsi nu kuya acumi, kwaula ukuya ni ciyelezyo cakuti cikulu tukupepa, nupya tutalaaswilizyapo amazwi aliyamwi sile lyonsi lino tukupepa.—Mateo 6:7, 8.

8. Uzye tungaomba uli ukulingana na vino tukupepelapo?

⁸ Cuze icikalondekwa pakuti Leza auvwa mapepo itu, i cakuti tulinzile ukuomba ukulingana na vino tukupepelapo. Yeova akalonda ukuti twaombesya pakuti twacita ivintu kulingana na vino tukupepelapo. Tuti twapepa kuli Leza ukuti, ‘atupeele ivyakulya ivya wanda wi lelo,’ tufwile ukuombesya apangapela amaka itu incito iliyonsi iyaloleka ino tungaomba. (Mateo 6:11; 2 Tesalonika 3:10) Ndi cakuti twapepa ukuti Leza atwazwe ukucimvya uwezyo umwi, tufwile ukucenjela ukuti tutazanwa uku ncende, nanti ukucita vimwi ivingalenga tweziwe. (Kolose 3:5) Pa vintu kwene vii vino tulinzile ukucita pakuti Leza auvwa mapepo itu, kuli na mauzyo yano antu yakauzya api pepo yano tulinzile ukwasuka.

KWASUKA MAUZYO YAMWI PALI YANO ANTU YAKAUZYA APIPEPO

9. A kuli weni kuno tulinzile ukupepa, nupya tufwile ukupitila muli weni lino tukupepa?

⁹ Uzye tulinzile ukupepa kuli weni? Yesu wasambilizye alondezi yakwe ukupepa kuli “Tata witu uwa mwiyulu.” (Mateo 6:9) Fwandi wino tulinzile ukupepako sile a Yeova. Lelo, Yeova akalonda ukuti twalanga ukuti twamanya icifulo ca Mwanakwe wenga mpo, Yesu Klistu. Wakwe vino twasambiliile umu Cipande 5, Yesu watumilwe pano nsi ukuti aize atufwile pakuti atukulule uku maifyo ni mfwa. (Yoane 3:16; Loma 5:12) Yesu ali Simapepo Mukalamba nupya ali Kapingula wino Leza wasonta. (Yoane 5:22; Ayebulai 6:20) Acino Amalembelo yakatuneenela ukuti lino tukupepa kuli Leza, tulinzile ukupitila muli Yesu. Alino na Yesu kwene umwineco walanzile ati: “Nene ndi nzila ni cumi, nu umi. Pasi umwi angiza kuli Tata suka wizila muli nene.” (Yoane 14:6) Pakuti amapepo itu yuvwike, tulinzile ukupepa sile kuli Yeova ukupitila umu Mwanakwe.

10. U mulandu ci uno kutayela umusango uno tulinzile ukwikalilamo nanti ukwimilila lino tukupepa?

¹⁰ Uzye kwaya ivyalondololwa pali vino tulinzile ukucita lino tukupepa? Awe. Yeova ataalanda ukuti lino tukupepa tufwile ukwimilila nanti ukwikala umu musango umwi, nanti sile ukwika amakasa umu musango umwi. Baibo ikasambilizya ukuti pa kupepa, umuntu nga akulonda angikala, ukwinama, ukufukama, nanti ukwimilila. (1 Milandu 17:16; Neemiya 8:6; Danieli 6:10; Mako 11:25) Icacindama asi vino antu yangalola tukucita pa kupepa, lelo u kuya umololoke umu mwenzo. Icisinka i cakuti, lino tukuomba imilimo ya cila-wanda nanti lino kwaya vimwi ivyatucitikila, tungapepela umu mwenzo konsi kuno tuli. Yeova akauvwa amapepo ya musango uwo nanti cakuti antu aali apiipi naswe yatuvwile ipepo litu.—Neemiya 2:1-6.

11. Uzye i vyani vimwi-vimwi vino tungaipepela sweineco?

¹¹ Uzye i vyani vino tungapepelapo? Baibo ikati: “Ndi twamulenga wene akatuvwa nu kutwasuka pali consi cino twalenga kulingana nu kulonda kwakwe.” (1 Yoane 5:14) Fwandi tungapepela consi icikauvwana nu kulonda kwakwe Leza. Uzye u kulonda kwakwe Leza ukuti twapepela pa vintu ivikutucuzya? Ee, tutafwile nu kutwisika! Ukupepa kuli Yeova kwakolana na vino umwi angavwanga kuli cuza wakwe. Tungavwanga ukwaula intete, ukuneena Leza ivili uku mwenzo. (Masamu 62:8) Caya sile ningo ukuleenga umupasi wakwe Leza uwamuzilo, pano ukatwavwa ukucita ivyaololoke. (Luka 11:13) Nupya tungalenga nu kuti atwavwe ukupingula ningo pa vintu nu kutwazwa ukuzizimizya intazi. (Yakobo 1:5) Ndi twaifya, tungaleenga ukuti Leza atwelele ukupitila umumfwa yakwe Yesu. (Efeso 1:3, 7) Kwene, tutalinzile ukupepela sile vintu vino tukalonda. Tufwile ukupepelako na antu yauze—yalupwa itu alino na ina Klistu yanji.—Milimo 12:5; Kolose 4:12.

12. Uzye tungalanga uli ukuti twacindika sana Tata witu uwa mwiyulu umu mapepo itu?

¹² Ivintu ivikauvwana nu kulonda kwakwe Leza i vyacindama sana ukupepelapo. Kwaya ivintu ivingi sana vino tungalumbanyizyapo Leza nu kumutaizya pa usuma wakwe. (1 Milandu 29:10-13) Yesu walangiliile vino tulinzile ukupepa lino walanzile amazwi aaya pali Mateo 6:9-13, muno watuneenyile ukupepa ukuti izina lyakwe Leza licindikwe, nanti liye ilya muzilo. Walumbwile na mazwi yakuti Uwene wakwe Leza wize nu kuti ukulonda kwakwe Leza kucitike pano nsi wa mwiyulu. Lino Yesu walumbwile ivintu kwene vii ivicindame, alino wakonkizyepo ukulumbula vino umuntu angaipepela. Naswe ndi tukucindika sana Leza umu mapepo itu, tukalanga ukuti tutaasumba sile amano kuli vino tukalonda sweineco.

13. Uzye Malembelo yalandapo uli pa utali wa mapepo yano Leza akauvwa?

¹³ Uzye amapepo itu yafwile ukutalimpa uli? Baibo itaalanda pali vino amapepo itu yalinzile ukutalimpa ndi tukupepa lino tuli swenga nanti lino tukwimililako iumba. Tungapepa ipepo iliipi lino tutatala twalya icakulya, nanti tungapepa ipepo ilitali lino tuli swenga ukuneena Yeova ivili uku mwenzo witu. (1 Samueli 1:12, 15) Nomba, Yesu ataatemilwe antu aailungamikanga aineco, nupya aapepanga amapepo atali pakuti yailange sile uku yantu. (Luka 20:46, 47) Amapepo ya musango uwo yasilenga ukuti Leza auvwe ningo pa mulandu sile wa mazwi yano umuntu waomvya. Icacindama u kupepa ukufuma uku mwenzo. Fwandi, utali wa mapepo yano Leza akauvwa wapusana-pusana ukulingana ni vikulondekwa alino ni vintu ivikacitika.

14. Uzye calola mwi vino Baibo ikatukomelezya “ukupepa insita zyonsi,” nupya i cani cino icintu cii cikatukomelezezya?

¹⁴ Uzye tufwile ukupepa imiku inga pa wanda? Baibo ikatukomelezya “ukupepa insita zyonsi.” (Mateo 26:41; Loma 12:12; 1 Tesalonika 5:17) Kwene cii cisikupiliula ukuti tufwile ukupepa cila-nsita pa wanda. Lelo, Baibo ikatukomelezya ukupepa imiku iingi, kutaizya Yeova lyonsi pa vintu visuma vino akatucitila nu kulenga kuli aliwe ukuti aatutungulula, ukututeekezya, alino nu kutukomelezya. Cikatukomelezya sana ukumanya ukuti Yeova ataatunena imiku ino tufwile ukupepa kuli aliwe pa wanda na vino amapepo itu yafwile ukutalimpa! Ndi cakuti tukataizya apisyuko lya kupepa kuli Leza, tulaalondesya ukupepa kuli Tata witu uwa mwiyulu maila ingi cila-wanda.

15. U mulandu ci uno tulinzile ukulandila “Ameni” apa mpela yipepo lino tukupepa swenga nanti ndi umwi wimililako iumba umwipepo?

¹⁵ U mulandu ci uno tufwile ukulandila “Ameni” pa mpela yipepo? Izwi lyakuti “ameni” lyalola umu kuti “ciye vivyo kwene.” Mu Malembelo mwaya malyasi ya antu aakalangilila ukuti calinga ukulanda “Ameni” pa mpela yipepo lino umuntu akupepa wenga nanti ndi cakuti umwi akwimililako iumba umwipepo. (1 Milandu 16:36; Masamu 41:13) Ndi twalanda “Ameni” apa mpela yipepo, tukasininkizya ukuti vyonsi vino twalanda umwipepo, twati-tuvilanda umu ufumacumi. Ndi twalanda “Ameni”—umu mwenzo nanti na mazwi yuvwika—lino uwala-kupepela iumba wamala ipepo, tukalanga ukuti twati-tuzumillizya kuli vino wali wavwanga umwipepo.—1 Kolinto 14:16.

VINO LEZA AKA-ASUKA MAPEPO ITU

16. Uzye uusininkizyo ci uno twakwata ukulozya ukwipepo?

¹⁶ Uzye i cumicumi Yeova aka-asuka amapepo? Ee, aka-asuka! Twakwata usininkizyo wakuti ‘Kuuvwa wipepo’ aka-asuka mapepo ya antu aingi cuze aakapepa kuli aliwe. (Masamu 65:2) Yeova angasuka amapepo umu nzila izipusane-pusane.

17. U mulandu ci uno tungalandila ukuti Yeova akaomvya angeli na aomvi yakwe aaya pano nsi ukwasuka amapepo itu?

¹⁷ Yeova akaomvya angeli yakwe na aomvi yakwe aaya pano nsi pa kwasuka mapepo. (Ayebulai 1:13, 14) Kwaya antu aingi sana apefile kuli Leza ukuti ayavwe ukuvwikisya ivyaya muli Baibo; nupya pataalengiile nu kuleengela ukufuma pano yaapepiile, avino nu muomvi wakwe Yeova umwi ayatandalila. Ivintu vya musango uu vikasininkizya ukuti angeli yakatungulula umulimo wa kusimikila pa Wene wakwe Leza. (Umbwilo 14:6) Insita zimwi, Yeova angaomvya umwina Klistu unji ukutwazwa ndi cakuti twapepa kuli aliwe pali vimwi vino tukulondesya sana.—Mapinda 12:25; Yakobo 2:16.

18. Uzye Yeova akaomvya uli Izwi lyakwe nu mupasi wakwe uwamuzilo pa kwasuka amapepo itu?

¹⁸ Nupya, Yeova Leza akaomvya umupasi wakwe uwamuzilo ni Izwi lyakwe, Baibo, pa kwasuka amapepo ya aomvi yakwe. Angasuka mapepo itu lino akututungulula nu kutupeela amaka ukuomvya umupasi wakwe uwamuzilo. (2 Kolinto 4:7) Ilingi Yeova akaomvya Baibo pa kwasuka amapepo itu pakuti tumanye vino tungaomba lino tukupingulapo ukucita vimwi. Tungazana amalembelo akutwazwa lino tukuisambilizya Baibo na lino tukuwelenga impapulo zya ina Klistu, wi buku kwene lii. Ivisinka vimwi ivya mu malembelo ivingatwazwa tungavisambilila pa kulongana kwa ina Klistu, nanti limwi eluda umwi umu cilongano angatuneenako vino tulinzile ukucita.—Galatiya 6:1.

19. I cani cino tufwile ukwiusya ndi cakuti limwi caloleka ukuti amapepo itu yasikwasukwa?

¹⁹ Ndi caloleka kwati Yeova akuleengela pa kwasuka amapepo itu, cisipiliula ukuti asikulonda ukwasuka amapepo. Lelo, cino tufwile ukwiusya i cakuti Yeova aka-asuka amapepo ukulingana nu kulonda kwakwe pa nsita yakwe iilinge. Yeova wamanya vino tukalonda na vino angatupeela ivintu vivyo ukuluta navino swemo twamanya. Ilingi akaaleka ukuti tutwalilile ‘ukuleenga, ukulonda, nu kukonkosya.’ (Luka 11:5-10) Ndi tukucita vii ukwaula kuta, ala tukulanga Leza ukuti utailo witu u wa cumi nupya tukalondesya ukuti aatwazwa. Kapya, Yeova angasuka amapepo itu ukwaula na kuti twiluke ukuti wata-asuka. Limwi angasuka ipepo litu pa ntazi ino tukweti, ukwaula ukusisyapo intazi iiyo, lelo angatupeela maka akuzizimizya.—Filipi 4:13.

20. U mulandu ci uno tulinzile ukusumbilako sana amano ukwisyuko ilisuma cuze lino twakwata ilya kupepa kuli Yeova?

²⁰ Cikatuletela sana uluzango ukumanya ukuti Kaumba wa vintu vyonsi waya sana apiipi na yonsi aakapepa kuli aliwe umu nzila ino wazumilizya! (Masamu 145:18) Fwandi tulinzile ukupepa lyonsi kuli Yeova, pano i syuko sana ukupepa kuli aliwe. Ndi tukupepa kuli Yeova lyonsi, tulaya sana ya cuza yakwe, pano wene akauvwa mapepo.