CIPANDE CA KUSAMBILILAMO 31
Mwataizya pa Upe Uno Mwapeelwa Uwa Kupepa
“Ipepo lyane likwele kunuli wa ubani.” —MASA. 141:2.
LWIMBO NA. 47 Mwapepa Kuli Yeova Cila Wanda
VINO TUMASAMBILILAPOa
1. Uzye tulinzile ukuyuvwa uli pali vino Yeova watupeela isyuko ilya kupepa kuli aliwe?
KAUMBA wi yulu ni nsi, watupeela upe ucindame sana uwa kupepa kuli aliwe. Tale elenganyini pali cii: Tunganena Yeova vyonsi vino tukuyuvwa pa nsita ili yonsi nupya umu lulimi ululi lonsi ukwaula ukumunenela limwi ukuti tumapepa kuli aliwe. Tungapepa kuli aliwe lino tuli umu cipatala nanti umu cifungo nu kutaila ukuti Tata witu uwaya nu kutemwa amakutika kuli sweswe. Tukataizya sana pa upe uu.
2. Uzye Devedi walangilile uli ukuti wataizyanga pa upe wa kupepa?
2 Umwene Devedi wataizyanga sana api pepo. Wimbiile Yeova ukuti: “Ipepo lyane likwele kunuli wa ubani.” (Masa. 141:1, 2) Mu nsita ino Devedi waliko, ubani uno yaomvyanga umu kupepa kwa cumi uno ya Simapepo yaomvyanga, ikangako sana mano pa kuupanga. (Kufu. 30:34, 35) Vino Devedi walanzile pa ubani vyalangililanga ukuti wali nu kwelenganyapo sana pali vino wali nu kulanda umwi pepo. Vikwene avino naswe tukalondesya ukucita. Tukalonda mapepo itu ukuzanzya Yeova.
3. I vyani vino tulinzile ukucita lino tukupepa kuli Yeova, nupya u mulandu ci?
3 Lino tukupepa kuli Yeova, tulinzile ukuya nu mucinzi. Elenganyini pa vilolwa vino Ezaya, Ezekelo, Danieli na Yoani yaweni. Ivilolwa vii vyapusine nomba kwaya mumwi muno vyakoliine. Vyonsi kwene vikalondolola Yeova ukuti U mwene wa lulumbi. Ezaya waweni Yeova “ala atenzi apa cilimba cakwe ica wene, icisanzuke.” (Eza. 6:1-3) Ezekelo waweni Yeova wataikala api celeta lyakwe ilyazingulwikwe nu luswepo ulwali wa mulalamfuti. (Ezek. 1:26-28) Danieli waweni “uwaliko ku katalili” watazwala ivya kuzwala ivitiswe ala umoto ukufuma umu cilimba cakwe ica wene. (Dan. 7:9, 10) Nupya Yoani waweni Yeova wataikala pa cilimba ca Wene icazingulwikwe nu mulalamfuti uwalolekanga kwati iwe lino yakata emalodi. (Kuso. 4:2-4) Ndi cakuti twelenganya sana pa lulumbi lwakwe Yeova, cikalenga twataizya sana pa upe uno twapeelwa uwa kupepa kuli aliwe na vino cacindama ukuya nu mucinzi lino tukupepa kuli aliwe. Nomba uzye tulinzile ukupepa uli?
“MULINZILE UKUPEPA VII”
4. I vyani vino tukusambililako uku mazwi aakutandikilako aya umwi pepo ilyamanyikwa sana ilya pali Mateo 6:9, 10?
4 Belengini Mateo 6:9, 10. Umwi Lyasi lya pa Mwamba, Yesu wasambilizye asambi yakwe vino yangapepa umu nzila ingazanzya Leza. Pa cisila ca kulanda amazwi yakuti “mulinzile ukupepa vii” Yesu walanzile pa vintu ivicindamisye sana lino wapepanga. Wapepiile pa kucindika izina lyakwe Leza, pa kwiza kwa Wene ulonona yonsi akakanya Leza alino na pa vintu visuma vino alacita pano nsi nu kucitila antu yakwe uku nkoleelo. Nga tukupepela pa vintu vya musango uwo, ala tukulanga ukuti ukulonda kwakwe Leza u kwacindama sana kuli sweswe.
5. Uzye Yeova akakutika ndi cakuti tukupepela pa vintu vya pa lwitu?
5 Yesu walangilile umu ciputulwa cuze ici pepo ukuti caya sile ningo ukupepela pa vintu vya pa lwitu. Tungalenga Yeova ukuti atupeele ivya kulya vya wanda kwene uwo, ukutwelela imembu, ukutucingilila uku matunko alino nu kutupususya uku mwipe. (Mate. 6:11-13) Ndi cakuti twalenga Yeova ivintu vii, tukamulanga ukuti twamanya ukuti tukalondekwa uwazwilizyo ukufuma kuli aliwe nupya tukalonda ukumuzanzya.
I vyani vino iya angapepelapo lino yali na mamakwe? (Lolini palaglafu 6)b
6. Uzye tulinzile sile ukupepela pa vintu ivyalandwa umwi pepo ilyamanyikwa sana? Londololini.
6 Yesu atenekelanga alondezi yakwe ukulanda vivi kwene sile vino walanzile lino yakupepa. Umu mapepo apusanepusane yano Yesu wapepanga, walandanga pa vintu ivyali ivicindame sana kuli aliwe pa nsita kwene iya. (Mate. 26:39, 42; Yoa. 17:1-26) Naswe kwene tungapepela pa vili vyonsi ivikutusakamika. Ndi cakuti tukulonda ukupingula pali vimwi, tungalenga Yeova ukuti atupeele mano nu kumanya. (Masa. 119:33, 34) Ndi cakuti tukulonda ukutandika ukuomba umulimo umwi utale sana, tungapepa kuli Yeova ukuti atwazwe ukumanya vino tungauomba. (Mapi. 2:6) Avyazi yangapepelako ana yao, ana nayo yangapepelako avyazi yao nupya swensi kwene tulinzile ukupepelako yano tukasambilizya Baibo na yano tukasimikilako. Nomba lino tukupepa, tutalinzile sile ukulalenga Yeova ukuti atwazwe.
I vyani vino tungalumbanyizizyapo Yeova nu kumutaizya umu mapepo itu? (Lolini mapalaglafu 7-9)c
7. U mulandu ci uno tulinzile ukulumbanyizizya Yeova lino tukupepa?
7 Tulinzile ukulaiusya ukulumbanya Yeova umu mapepo itu. Kusi aliwensi uwalinga ukulumbanyiziwa ukucila Leza. Wene u ‘musuma nupya akaelela uluse.’ Wakwatisya uluse nupya a Leza ‘wakutemwa wino asisoka zuwa, lyonsi waya nu kutemwa ukwa muntaputuka, nupya u wakutailwa lyonsi.’ (Masa. 86:5, 15) Fwandi kwaya ivintu ivisuma ivingalenga twalumbanya Yeova pali vino waya na pali vino akatucitila.
8. I vyani vimwi vino tungataizizyapo Yeova? (Masamu 104:12-15, 24)
8 Ukulunda pa kulumbanya Yeova umu mapepo itu, tungamutaizya na pa vintu ivisuma vino akatupeela. Tungataizya Yeova pa maluwa asuma yano tukalola, pa vyakulya ivingi vino tukakwata alino na pali ya cuza asuma sana. Tata witu uwaya nu kutemwa akatupeela ivintu vyonsi vii pakuti sile tuye ni nsansa. (Belengini Masamu 104:12-15, 24.) Ni cicindamisye i cakuti, tukataizya Yeova pa vyeo ivisuma vino akatupeela ivikatwazwa ukuya nu utailo ukome alino na pa kumanya ukuti watulaya ivintu visuma uku nkoleelo.
9. I cani cingatwazwa ukulaiusya ukutaizya Yeova? (1 Tesalonika 5:17, 18)
9 Cinganguka sana ukwilila ukutaizya Yeova pali vyonsi vino akatucitila. I cani cingamwazwa ukulaiusya? Mungalemba vimwi vino mwapepelapo, nga papita insita mungalolapo pakuti mulole vino Yeova wasuka. Lyene mungapepa pakuti mumutaizya pali vino wamwazwa. (Belengini 1 Tesalonika 5:17, 18.) Elenganyini pali cii: Tukauvwa ningo ndi cakuti yamwi yatutaizya. Vikwene avino na Yeova akauvwa ndi cakuti twamutaizya pali vino wasuka mapepo itu. (Kolo. 3:15) Nomba kwaya umulandu na uze ucindame sana uno tulinzile ukutaizizya Leza.
MWATAIZYA YEOVA PA MWANAKWE WINO WATEMWA
10. Ukulingana na 1 Petulo 2:21, u mulandu ci uno tulinzile ukutaizizya Yeova pa kutuma Yesu pano nsi?
10 Belengini 1 Petulo 2:21. Tulinzile ukutaizya Yeova pa kutuma Umwanakwe wino watemwa uku kutusambilizya. Tukasambilila ivingi pali Yeova na pali vino tungamuzanzya ndi cakuti tukusambilila pali Yesu. Ndi cakuti twalanga ukuti twataila umwi lambo yakwe Klistu, tukaya na ucuza usuma na Yeova Leza nu kuipakizya umutende pamwi nawe.—Loma 5:1.
11. U mulandu ci uno tukapepela kuli Yeova ukupitila umwi zina lyakwe Yesu?
11 Tukataizya Yeova pali vino tukapepa kuli aliwe ukupitila umu Mwanakwe. Yeova akaomvya Yesu ukutupeela vino twamulenga. Yeova akakutika nu kwasuka mapepo yano tukapepa ukupitila umwi zina lyakwe Yesu. Yesu walondolwile ati: “Consi cino mwalengela umwi zina lyane, ndacicita, pakuti Tata acindikilwe umu Mwana.”—Yoa. 14:13, 14.
12. U mulandu ci na uze uno tulinzile ukutaizizya Yeova pa Mwanakwe?
12 Yeova akatwelela imembu pa mulandu ni lambo lyakwe Yesu. Malembo yakalondolola Yesu ukuti a simapepo witu mukalamba nupya “wikala ukwi kasa li lunji ilya cilimba cakwe Leza ica Wene ukwi yulu.” (Aeb. 8:1) Yesu a “kaazwa [witu] uwaya pamwi na Tata.” (1 Yoa. 2:1) Tukataizya Yeova pa kutupeela simapepo mukalamba uwamanya ukukanamalilika kwitu “nupya akatupaapatilako.” (Loma 8:34; Aeb. 4:15) Tutamalilika fwandi ukwaula ilambo lyakwe Yesu nga tusipepa kuli Yeova. Ukwaula nu kutwisika mungazumila ukuti tutange tutaizye Yeova ukufikapo pa upe ucindame sana uno watupeela, kuli kuti Umwanakwe wino watemwisya.
MWAPEPELAKO AINA NA YA NKAZI
13. Pa wanda wa kusyalikizyako usiku lino Yesu atatala wafwa, walangizye uli ukuti watemilwe asambi yakwe?
13 Pa wanda wa kusyalikizyako usiku lino atatala wafwa, Yesu wapepiileko asambi yakwe pa nsita itali kulenga Isi ukuti ayacingilile “ku mwipe.” (Yoa. 17:15) Mu cumi Yesu walangilile ukuti wayatemilwe. Nanti cakuti wamanyile ukuti pali nu kupita sile insita inono ala watandika ukucula, wasakamiile sana pa yatumwa yakwe.
I vyani vino tungalanda lino tukupepelako aina na ya nkazi? (Lolini mapalaglafu 14-16)d
14. Tungalanga uli ukuti twatemwa aina na ya nkazi?
14 Nga tukukolanya Yesu, tutalaika sile mano kuli vino tukulonda. Lelo lyonsi, tulapepelako aina na ya nkazi. Nga tukucita vivyo ala tukuvwila isunde lyakwe Yesu ilya kutemwana nupya tulalanga Yeova vino twatemwa aina na ya nkazi. (Yoa. 13:34) Kupepelako aina na ya nkazi kungayazwa sana. Izwi Lyakwe Leza likatunena ukuti “Ipepo lya kupaapata kwa mulungami lyakwata sana amaka.”—Yako. 5:16.
15. U mulandu ci uno tulinzile ukupepelako aina na ya nkazi?
15 Aina na ya nkazi yakalondekwa ukuyapepelako pakuti yazizimizye intazi izingi zino yakakwata. Tungalenga Yeova ukuti ayazwe ukuzizimizya malwale, mazanzo aakaiponela, inkondo, ukucuziwa nanti intazi zyuze. Nupya tungapepelako aina na ya nkazi aakaipeelesya ukwazwa yayo aakulondekwa uwazwilizyo. Limwi imumanyako yamwi aakweti intazi zya musango uu. Uzye citange cizipe ukuyalumbula mazina lino mukuyapepelako? Tukalanga ukutemwa kwa cumi uku aina na ya nkazi nga tukulenga Yeova ukuti ayazwa ukuzizimizya.
16. U mulandu ci uno tulinzile ukupepelako yayo aakatungulula?
16 Yayo aakatungulula umu cilongano yakataizya sana pali vino yauze yakayapepelako na vino mapepo yayo yakayazwa. Mutumwa Paulo wamanyile ukuti walondekwanga yauze ukumupepelako. Walemvile ati: “Nani kwene mwampepelako, kuti napeelwa mazwi ya kulanda, pakuti nalanda nu kusipa lino nkulenga inkama yakwe Leza iyi lyasi lisuma ukumanyikwa.” (Efes. 6:19) Na ndakai kwene twakwata aina iingi aakaombesya lino yakutungulula. Tukalanga ukuti twayatemwa ndi cakuti tukulenga Yeova ukuti aapaala imilimo yao.
NDI CAKUTI YATUPEELA UKUPEPA
17-18. A lilaci lino yangatunena ukupepa, nupya i vyani vino tulinzile ukulaiusya?
17 Insita zimwi yangatunena ukupepa lino pali antu yauze. Limwi nkazi wino akutungulula isambililo anganena nkazi wino yali nawe ukuti apepe. Nkazi uwatalondela ukwi sambililo limwi atange amanye ningo umusambi fwandi angatemwa ukupepa ipepo lya kusyalikizya. Lino yakusambilila, angamanya ningo vino angapepelako umusambi.
18 Limwi umwina yangamunena ukupepa pa kukomaana kwa kuya umu mulimo nanti sile pa kulongana. Aina aakapeelwa isyuko lya kupepa lino kuli ukukomaana kumwi yalinzile ukwiusya umulandu uno kuyelile ukukomaana kuko. Insita ya kupepa, asi nsita ya kulungika nanti ukumanyisya amu cilongano vimwi. Pa kulongana ukwingi, ipepo nu lwimbo vilinzile sile ukusenda mamineti 5 fwandi umwina aakupepa atalinzile ukulanda “mazwi aingi” sana sana api pepo lya kutandikilako.—Mate. 6:7.
MWALEKA IPEPO UKUYA ALI CINTU CICINDAMISYE SANA UMU UMI WINU
19. I cani cilatwazwa ukuipekanya uku wanda wakwe Yeova uwa upinguzi?
19 Lino tukuya tukupalamila uku wanda wa upinguzi wakwe Yeova, tulinzile ukuleka ipepo ukuya ilicindamisye umu umi witu. Yesu walanzile api pepo ukuti: “Twalililini ukuya aiteyanye, nupya lyonsi mwapepa mapepo ya kupaapata pakuti mukapusuke kuli vyonsi ivilacitika.” (Luka 21:36) Ndi cakuti tukupepa lyonsi, utailo witu ulakoma nupya tulaya aiteyanye lino uwanda wakwe Yeova uwa upinguzi uliza.
20. Uzye mapepo itu yangaya uli wa cena icinunkile?
20 I vyani vino twasambilila? Tukataizya sana pa upe uno twapeelwa uwa kupepa. Ivintu ivicindame sana vino tulinzile ukupepelapo vilinzile ukuya i vintu ivikumile ukulonda kwakwe Yeova. Nupya tukataizya na pa Mwana wakwe Leza na pali vino Uwene wakwe ukuteeka nupya tukapepelako na ina itu na ya nkazi. Yeova nupya akalonda twapepela na pali vino tukulondekwa uwanda kwene uwo alino nu kutwazwa ukuya nu utailo ukome. Ndi cakuti twelenganya sana pali vino tumalanda umwi pepo, ala tukulanga ukuti tukataizya apa upe uno Yeova watupeela uwa kupepa. Nupya ala amazwi itu yalaya wa cena icinunkile kuli Yeova kuli kuti ipepo lya kumuzanzya.—Mapi. 15:8.
LWIMBO NA. 45 Melenganyo ya mu Mwenzo Wane
a Tukataizya sana pali vino Yeova watupeela isyuko ilya kupepa kuli aliwe. Tukalonda mapepo itu ukuya wa cena icinunkile nupya aakumuzanzya. Umu cipande cii tumalanda pali vino tungapepelapo. Nupya tumalanda na pali vimwi vino tulinzile ukulaiusya ndi cakuti yatupeela ukupepa.
b ULONDOLOZI WA CIKOPE: Iya nu muci yakupepelako umwanao ukuti Yeova amucingilile lino ali uku sukulu, aazwe avyayo yao atiyakota alino nu na asambi yao ukulunduluka.
c ULONDOLOZI WA CIKOPE: Umwina uwacance akutaizya Yeova pali vino Yesu watukulula, apa nsi isuma ino watupeela alino na pa vyakulya ivisuma vino tukakwata.
d ULONDOLOZI WA CIKOPE: Nkazi akupepa kuli Yeova ukuti apeele Iumba Ilikatungulula umupasi wa muzilo nu kuti aazwe yayo aakucula pa mulandu na mazanzo aakuiponela alino nu kuyacuzya.