Adamu na Eva Yatuvwiilile Leza

Wanda umwi lino Eva wali sile wenga, inzoka yamuvwanzizye. Yamunenyile ati: ‘Uzye icacumi Leza wamulesya ukulya ivizao vya ku miti yonsi?’ Eva watile: ‘Tungalya ivizao vya ku miti yonsi kufumyako sile ivya ku muti onga. Ndi cakuti twalya ivizao ivya ku muti uwo, tulafwa.’ Inzoka nayo yatile: ‘Mutalafwa foo. Alino nga mwalya ivizao ivya ku muti uwo, mulaya wakwe Leza.’ Uzye cico cali cacumi? Awe, wali ufi. Nomba Eva uvwiilile inzoka. Lino Eva watwalilile ukulolekesya icizao, calenzile ukuti aalondesya ukulya. Waliile icizao, aya apeelako na Adamu. Adamu wamanyile ukuti yaali nu kufwa ndi cakuti yakana ukuvwila Leza. Nomba Adamu waliile vivyo kwene.

Pa wanda kwene uwa, Yeova walanzile kuli Adamu na Eva. Leza wayuzizye icalenzile ukuti yatamuvwila. Eva walanzile ukuti inzoka iyalenzile. Adamu nawe walanzile ukuti a Eva. Pa mulandu wa kuti Adamu na Eva yatuvwiliile Yeova, wayazinzile mu calo ca Edeni. Yeova wisile ya malaika nu lupanga ulwakanga umoto ku nzila ya kuilamo uku calo ca Edeni.

Yeova walanzile ukuti wali nu koonona nu wabefile Eva kwene. Asi inzoka iyalanzile na Eva, pano Yeova ataapanzile inzoka ukuti yalanda. Malaika umwipe aliwe walenzile ukuti inzoka ivwange. Nupya wacisile vii pakuti abepe Eva. Malaika wiyo akaamwa ukuti Satana Ciwa. Ku nkoleelo, Yeova alonona Satana pakuti atakatwalilile ukulenga antu ukucita iviipe.