Inzila Ipya Iyakuomvya pa Kusimikila Ukuli Antu Aingi
1. Uzye ivilongano ivyakwata incende ukukapita antu aingi, yavikomelezya ukucita uli?
1 Vilongano ivyakwata incende ukukapita antu aingi yavikomelezya ukuti vingaasimikila uku ncende zizyo ukuomvya matebulo nanti tusitandi twa kukunkulusya tuno yakaikapo impapulo. Ndi cakuti mukuomvya kasitandi, limwi kasimikila wenga angimilila nanti ukwikala umupipi na kasitandi kako. Lelo nga mukuomvya tebulo, pafwile ukuya ya kasimikila yaili. Yonsi aakuombela pa matebulo nanti pali tusitandi yalinzile ukuya ansansa nupya yatalinzile ukuifinya. Ndi cakuti umuntu wasumbako mano ku mpapulo zino mutantike, kasimikila wenga pali yano yalipo angatandika ukulanda nawe; limwi angatandika na mazwi akuti, “Uzye mwatala mwelenganyapo vino Baibo ikalanda pi lyasi lii?” Kasimikila muze nanti yaili yangimilila apaakuti lino yakusimikila antu aakupita, ala ni vitantikwe pali tebulo vikuloleka.
2. Landini icacitiike icikulangilila vino ukusimikila ukuli antu aingi ukuomvya matebulo kwacindama.
2 Kusimikila kwa musango uu kwalenga ukuti masambililo ya Baibo yavulileko. Musambi umwi wa pa koleji wasoolwile ukulondelezya ivyeo pakuti alembe vimwi pali ya Nte Yakwe Yeova, nomba ataazanyile Ing’anda ya Wene. Mulungu walondeliilepo waweni tebulo pano iyatantika impapulo pa koleji kwene. Watandike ukusambilila Baibo, nupya ndakai umusambi wiyo a kasimikila muwatiziwe, napya nawe kwene akaomvya inzila kwene ii pa kusimikila.
3. Uzye ya kasimikila yamwi yakauvwa uli pa nzila yii iya kusimikililamo?
3 Nkazi umwi aakaomvya inzila kwene yii iyakusimikililamo ukuli antu aingi walanzile ati: “Yamwi yakaiza yimilila apatantikwe impapulo pakuti yasendepo yamagazini apya yano yakulonda. Yamwi yene yatatala yuvwapo na pali ya Nte Yakwe Yeova. Nkalola ukuti kuomvya inzila yii, kukalenga aingi ukuvwa icumi.” Nkazi namuze watiile: “Inzila yii iipya, nupya iisuma sana pano ikalenga ukuti antu yaileta kuli sweswe, nupya, nanti yataali yakulonda ukuyasimikila, yakalondesya kuti yamanye ivitantikwe.”
4. U mulandu ci uno cingazipila ukulatantika impapulo pa nsita, ni ncende iili-imwi cila-mulungu?
4 Cingazipa sana ukulaika matebulo yaa pa ncende iili-imwi, pa manda aaliyamwi, ni nsita iili-imwi cila-mulungu. Na cii cikalenga antu kuelezya ukulola ivili pa matebulo, nupya wanda umwi yangasuka yayepo nu kuuzya mauzyo nanti ukusendapo impapulo. Uzye icilongano cinu catantika ukusimikila uku ncende ukukazanwa antu aingi? Ndi cakuti catantika, mungaombako umulimo wa kusimikila ukuomvya inzila kwene yii isuma cuze iya ‘kukosoolelamo ivya Wene wakwe Leza.’—Luka 9:60.