Mwaomvya Ningo Insita Lino Mukusimikila
Umu mwaka wa mulimo wa 2014, ya Nte Yakwe Yeova umu nsi yonsi yaomvile maawazi kucila pali 1.9 bilyoni umu mulimo wa kusimikila, fwandi cii cikulangilila ukuti cumi cumi twali sweswe yacincile umu mulimo wakwe Yeova! (Masa. 110:3; 1 Kol. 15:58) Vino insita isileko “yaticepesya,” uzye citange cizipe ukuti twaomvya insita itu ukusimikila uku antu aingi?—1 Kol. 7:29.
Pakuti mwaomvya ningo insita cikalondekwa ukwaluka-aluka. Ngi cakuti mukaomba maawala aingi ukusimikila kwaula ukulandapo nu muntu, uzye mungaalulako imiombele inu pakuti mwazana antu aingi nu kulanda nayo? Kwene ivintu vikapusana-pusana ukulingana ni ncende. Nomba, ukuomvya inzila izili apisika kungamwavwa ukuomvya ningo insita pakuti mutauma sile “umuza.”—1 Kol. 9:26.
Ukusimikila Uku Ng’anda ni Ng’anda: Pa myaka ingi, ya kasimikila aingi yakatandika uwanda nu mulimo wa kusimikila uku ng’anda ni ng’anda. Nomba, vino antu aingi yakaya uku kuomba imilimo yao akatondo, uzye mutanga mwezyeko ukusimikila uku ng’anda ni ng’anda amanguzi lino antu aingi yali pa ng’anda yakupuza? Mungaomba ningo ndi cakuti mukusimikila umu miseo na pa maliketi umusanya.
Ukusimikila Ukukazanwa Antu Aingi: Ya tebulo nanti tusitandi vikalondekwa ukwika uku ncende ukukazanwa antu aingi umu cifulo cino icilongano cikasimikilamo. (Lolini Umulimo Witu Uwa Wene wa Ciyemba wakwe Sepetemba 2013, ifwa 5.) Ndi cakuti antu yacepa uku ncende ino mukasimikila ukuomvya ya tebulo nanti tusitandi, limwi aaya muli Komiti wa Mulimo pa Cilongano yangasoolola ukuti mutandike ukusimikila ukuomvya ya tebulo nanti tusitandi uku ncende yuze ukukuzanwa antu aingi.
Ukuswilila Kuli Yano Mwasimikile nu Kutungulula Masambililo: Lino mwalola ukuti inzila imwi iyakusimikililamo isikuomba ningo, uzye citange cizipe ukutantika insita yuze lino mungatungulula masambililo nanti ukuswilila kuli yano mwasimikile? Ndi cakuti mukaomba ningo ukusimikila uku ng’anda ni ng’anda mu viwelusi akatondo, uzye citange cizipe ukutungulula masambililo umusanya nanti manguzi?
Ica cumi tukapenda insita lyonsi lino twasimikila, nomba tukaya sana nu luzango nga tukuombesya. Ndi mwalola ukuti inzila imwi itakuomba ningo mungezyako ukuomvya inzila yuze. Mwapepa kuli Yeova “Mwine wa uzombozi,” kuti amutungulula pakuti mwaomvya ningo insita lino mukusimikila!—Mate. 9:38.