Cipande ca Mauzyo

Uzye ya kasimikila yalinzile ukuomvya Intaneti ku kusimikila nanti ukusambilizya antu Baibo aakaikala uku mpanga zyuze?

Ya kasimikila yamwi yakaomvya Intaneti ukusambilizya antu Baibo aakaikala umu mpanga muno umulimo wa kusimikila waindwa nanti umutavula sana ya kasimikila. Nupya yamwi akacita vivyo yakaomba ningo sana. Lelo, intazi amuno zyaya ndi cakuti ya kasimikila yakusimikila antu ukuomvya makalata aapa Intaneti nanti ukulanzyanya na antu pa Intaneti aakaikala uku mpanga zyuze. Nanti cakuti tukalonda ukwazwa antu aakulondesya ukusambilila icumi, limwi ukulanzyanya na antu aku mpanga zyuze kungalenga umwina nanti nkazi ukutandika ukulanzyanya na antu amiyele iipe kumwi sile na asangu ukwaula nu kumanya. (1 Kol. 1:​19-​25; Kolo. 2:⁠8) Nacuze i cakuti, umu mpanga muno yalesya nanti ukuinda umulimo wa kusimikila, limwi amu uteeko yangaaceeceta makalata. Mameseji nanti vyuze vino mukutuma, vingalenga aina na ya nkazi aakaikala umu mpanga zizyo ukuya umu uzanzo. Acino fwandi, ya kasimikila yatafwile ukuomvya Intaneti uku kulondelako antu aakaikala uku mpanga zyuze pakuti yayasimikila.

Ndi cakuti lino tukusimikila twazana umuntu afumile uku mpanga yuze, tutafwile twalanzyanya nawe na lino waaswilila uku mwao, suka ndi cakuti aaya ukwi ofesi lya musambo uku ncende kwene iiyo iyatuzumilizya. Cingazipa ukumulanga vino angazana ivyeo na vyuze pa jw.org nanti vino angalanzyanya na aya uku musambo uwayela kuko kwene kuno akaikala. Nupya tungamukomelezya ukuti akaye uku Ng’anda ya Wene iyayela umupipi na kuno wikala. Kwene i cacumi, umu mpanga zimwi mutaya Mang’anda ya Wene. Ndi cakuti wazumila ukuti ya Nte yace yakamutandalile, tulinzile ukulemba pali fomu iyakuti, Mukwai Mulondini Wii (S-43) nu kupeela kalemba, aaliwe alaituma pa jw.org. Iofesi ilika-angalila umulimo wa kusimikila umu mpanga ino umuntu wiyo akaikala, i lyamanya ningo ivintu ivikacitika umu mpanga iyo nupya i lingaavwa umuntu wiyo ukusambilila Baibo.​—Lolini Mulimo Witu Uwa Wene wakwe Juni 2014, ifwa. 7, alino nu wa Ciyemba wakwe Novemba 2011, ifwa 2.

Ndi cakuti wino tukalanzyanya nawe wakukila uku mpanga yuze nanti tukasambilizya Baibo umuntu aakaikala uku mpanga yuze wino twamanyine sile pa Intaneti, tulinzile ukulondela ivyeo ivili umu cipande kwene cii. Lelo, limwi tungatwalilila ukulanzyanya nawe kufika lino yatandika ukusambilila na kasimikila akaikala uku ncende kwene iyo. Nomba, mufwile ukucenjela sana ndi cakuti mukuomvya foni, makalata, nanti utuombelo tuze pa kulanzyanya nu muntu aakaikala umu mpanga ino yalesya nanti ukuinda umulimo wa kusimikila.​—Mate. 10:⁠16.