Cikalondekwa Ukuyako Zuwa

Kufuma pano twayuliile Webusaiti itu iya pa intaneti, antu aingi yakatulembela ukuomvya intaneti kwene ukuti yakulonda ukutandika ukusambilila Baibo. Antu nayauze yakalenga ukuti yatandike ukusambilila Baibo pa mulandu ni nzila izipya izikuomviwa ndakai ukusimikila uku yantu aingi. Aomvi ya ku ofesi yakaombelapo zuwa-zuwa ndi yapokeelela amazwi ukufuma kuli yano yakulonda ukutandika ukusambilila Baibo. Ndi cakuti umwi waomvya Webusaiti ya jw.org pa kulenga ukusambilila Baibo, ya eluda aaya umu cilongano icikasimikila umu cifulo umwaya umuntu wiyo, yakayamanyiisya ku ina ya ku ofesi ndi papita sile amanda yaili. Nomba, cazanwa ukuti yamwi aakalenga ukutandika ukusambililila Baibo, yasitandalilwa, nupya pakapita ni milungu ala yakuloleela. Uzye tungacita uli pakuti twasininkizya ukuti twazwa umuntu lino acili akulondesya ukusambilila Baibo?—Mako 4:14, 15.

Ndi cakuti umuntu wino akulonda ukusambilila Baibo asi-ikala umu cifulo cino mukasimikilamo, mulinzile ukulemba zuwa-zuwa pali fomu wakuti Mukwai Mulondini Wii (S-43) nu kupeela kalemba lino umulungu kwene uwo utatala wasila. Lyene lino patatala papita amanda yaili kalemba alinzile ukutuma uku cilongano icingaombelapo, nanti ukutuma ukwi ofesi lya musambo ukuomvya Webusaiti ya jw.org ukutinika apaalembwa ukuti CONGREGATION (Cilongano). Ya eluda amu vilongano ivitatala vyatandika ukuomvya jw.org yafwile ukulondela masunde aalembwa ku nsizi yakwe fomu wa S-43. Ya eluda yafwile ukuyula Webusaiti lyonsi. Ndi yapokelela amazwi ya kuyamanyiisya ukuti yakalole umwi, yalinzile ukuyako zuwa-zuwa. Kasimikila wino ya eluda yaneena ukuti aye uku muntu wiyo, alinzile ukulola ukuti icicindama sana ukuyako zuwa. Ndi cakuti umuntu wiyo atazanyilwe apa ng’anda, limwi mungasya mwamulembela akapepala imwikapo ivingaazwa ukuti mukalolane nanti ukuvwanga nawe.