1 | Ipepo ‘Mwasumbila Masakamika Inu Pali Aliwe’

BAIBO IKATI: ‘Mwasumbila amasakamika inu pali Leza, pano wene akamusakamala.’—1 PETULO 5:7.

Vino Cikapiliula

Yeova Leza akalonda ukuti twamunena vyonsi ivikatusakamika. (Masamu 55:22) Kusi intazi ingakulisya nanti ukucepesya ino tutange tupepelepo. Ndi cakuti icicindama kuli sweswe, ala icicindama na kuli Yeova. Pa mulandu wakuti Yeova akatusakamala, akasakamala na pali vino tukayuvwa. Ukupepa kuli aliwe ali cintu cimwi cicindame icingalenga mwaelenganya ningo.—Filipi 4:6, 7.

Vino Ipepo Lingamwavwa

Lino tukucula nu ulwale wa mu melenganyo, limwi tungayuvwa ukuti tuli swenga. Asi lyonsi lino antu yauze yanguvwikisya vino tukupitamo. (Mapinda 14:10) Nomba nga twapepa kuli Leza nu mwenzo onsi nu kumunena vino tukuyuvwa, alakutika kuli sweswe nu kutuvwikisya. Yeova akatulola, wamanya ivikatucuzya na vino tukupitamo, nupya akalonda twapepa kuli aliwe pa vintu ivili vyonsi ivikatusakamika.—2 Milandu 6:29, 30.

Ukupepa kuli Yeova kukalenga tutaile sana ukuti akatusakamala. Tungayuvwa wakwe vino kalemba wa masamu wayuvwile uwapefile ukuti: “Pano wewe walola mpiti ulanda wa mwenzo wane.” (Masamu 31:7) Ukumanya ukuti Yeova akamanya vino tukapitamo kungatwazwa ukutwalilila ukuzizimizya lino twakwata intazi izitale. Nomba akacita na vyuze ukucila sile pa kumanya intazi zino tukapitamo. Akamanya vino tukapitamo ukucila aliwensi nupya akatwazwa ukuzana ukuteekeziwa nu kukomeleziwa muli Baibo.

Vino Baibo Ikaazwa Antu Ya Julian

Vino Naculanga na Masakamika

“Naculanga na masakamika alino nu ulwale uwa kukanaikanya (Obsessive-Compulsive Disorder). Insita izingi nkaya na masakamika ukwaula ukwenekela. Insita zimwi nkaya sile ningo insita zyuze nazyo nkasakamikwa sana apaula umulandu. Ilingi nkasakamikwa sana nga tuli na antu yauze pano nkaika mano pali vino yakwelenganya pali nene.

“Ya cuza yane aamanya intazi ino nakwata yakangazwa sana ndi cakuti ivya musango uu vyacitika. Insita zimwi yakalanda ivintu vino ntali nkwenekela ukuvwa. Nomba nkataizya sana ukuti yakaezya ukungazwa.”

“Insita zimwi ukusakamikwa alino nu ulwale wa kukanaikanya vikalenga cantalila ukupepa. Cikalondekwa ukwikako sana mano pakuti ndande na Yeova umwi pepo. Nkaelenganya pa vintu ivipusanepusane na cii cikalenga imvulunganyiziwa. Nga navulunganyiziwa cikantalila sana ukunena Yeova vino nkwelenganya na vino nkuyuvwa.”

Vino Baibo Yangazwa

“Lino nasambililanga Baibo nasambilile ukuti ipepo litalinzile ukuya ilitali nanti ukulizifilizya pakuti Leza aasuke. Insita zimwi nga cantalila ukulondolola vino nkuyuvwa nkapepa sile ukuti: ‘Yeova, napapata ngavwe.’ Nga caya vivyo nkamanya ukuti Yeova amangasuka nu kungazwa. Ukupepa nu kuya uku cipatala vyangazwa sana. Naya sana ni nsansa pali vino ukupepa nu kuya uku cipatala vyalenga umi wane uzipileko. Nanti cakuti calondekwanga ukwikako sana mano pakuti ndande na Tata wane uwa kwi yulu pakuti angazwe, nkapepa pano namanya ukuti wantemwa nupya akalonda ukungazwa.”