2 | “Kuteekeziwa Ukukafuma Umu Malembo”

BAIBO IKATI: “Vyonsi ivyalemvilwe mpiti, vyalemvilwe uku kutusambilizya, pakuti ukupitila umu kuzizimizya nu mu kuteekeziwa ukukafuma umu Malembo tuye nu upaalilo.”—LOMA 15:4.

Vino Cikupiliula

Muli Baibo mwaya ivyeo ivingatuteekezya ivingatupeela amaka alino nu kuzizimizya pakuti tucimvye amelenganyo aiipe. Amazwi aya muli Baibo yakatupeela nu upaalilo uwakuti likwene sile ukuwaika konsi kulasila.

Vino Baibo Ingatwazwa

Swensi kwene tukasoka insita zimwi; nomba yayo akacula namasakamika nu kuya nu ulanda yakatwalilila ukuyuvwa vivyo insita yonsi. Uzye Baibo ingamwazwa uli?

Muli Baibo mwaya ivyeo ivingi ivingatwazwa ukuta ukuya na melenganyo aiipe. (Filipi 4:8) Ingatukomelezya, kututeekezya nu kulenga ukuti twaelenganya ningo.—Masamu 94:18, 19.
Baibo ingatwazwa ukuta ukwelenganya ukuti tutacindama.—Luka 12:6, 7.
Malyasi aingi amuli Baibo yakatwiusyako ukuti tutaya swenga, nu kuti Leza Kaumba witu, wamanya ningo vino tukayuvwa.—Masamu 34:18; 1 Yoani 3:19, 20.
Baibo yatulaya ukuti Leza alafumyapo iviipe vyonsi ivikatucuzya. (Ezaya 65:17; Kusokolola 21:4) Ndi cakuti tukucula uku masakamika, ulayo uu ukatupeela amaka pakuti tuzizimizye.

Vino Baibo Ikaazwa Antu Ya Jessica

Vino Nalwazile Ulwale Uwakuvwa Ulanda

“Lino nali ni myaka 25, nasakamikwanga sana nupya izile iyanzana nu ulwale uwakuvwa ulanda. Naculanga ni vintu ivyancitikiile mpiti. Ya dokota yangazwile ukumanya ukuti ulwale uu wizile pa mulandu ni vintu vino nelenganyangapo ivyancitikiile mpiti. Ukulunda pa mulembo uno yampeezile uwa kuomvya uku ulwele uu, nalondekwanga nu kuti yangazwe pakuti ntandike ukwelenganya ningo.”

Vino Baibo Yangazwa

“Lino nuvwanga ulanda navilwanga ukupema ningo, nasakamikwanga nupya navilwanga nu ukulala. Ilingi usiku nayanga na melenganyo aiipe ansakamikanga nupya cantalilanga ukuta ukwelenganyapo. Wakwe vino Masamu 94:19 ikalondolola, Leza angatuteekezya nu kutusansamusya ndi cakuti twasakamikwa. Fwandi nikanga Baibo na kabuku kano nalembangamo amalembo aakukomelezya umupipi na pano nalalanga. Ndi cakuti nafilwa ukulala, nabelenganga ivikomo vimwi muli Baibo pakuti ntekeeziwe na Leza.”

“Baibo ikatukomelezya ukuta ukwelenganya pa vintu ivikapusana na vino twamanya pali Leza. Mpiti namanyile ukuti ntacindama nupya ntatemwikwa. Nomba nasambilila ukuti vino namanyile vyapusana na vino Baibo ikalanda ukuti Leza waya nu kutemwa nupya a tata wa luse aakatusakamala swensi wenga na wenga. Lilyo kwene sile natiile ukutungululwa na vino nelenganyanga nupya natandike ukutungulula amelenganyo yane. Nasambilile ukulailola wakwe vino Leza akandola. Cii cali icintu cimwi icicindame cino nacisile pano cangazwa ukuta ukwelenganya iviipe pali ne mwineco.”

“Nkalolela insita lino tutalaelenganya pa vintu iviipe ivyatucitikila na lino kutalaya ukuya na melenganyo aipe. Namanya ukuti uku nkoleelo ulwale wa mu melenganyo ulafumiziwapo, cii cikangazwa ukuzizimizya ndakai nu kutwalilila ukulolela insita ya ku nkoleelo lino ndaleka ukuya nu ulanda.”