Vino Yeova Akaasuka Mapepo Itu

1-2. I cani limwi cino tungasakamikwa api pepo?

UZYE mukatala imuyuvwapo ukuti Yeova asikwasuka mapepo inu? Ndi cakuti avino mukayuvwa, ale mutaya mwenga. Aina na ya nkazi aingi yakayuvwa wakwe vikwene, sana sana nga yakwata intazi izitale sana. Naswe kwene nga tukucuula cingatutalila ukulola vino Yeova akaasuka mapepo itu.

² Lekini lyene tusambilile vino Yeova akaasuka mapepo aa yaomvi yakwe. (1 Yoa. 5:15) Tumasambilila na pa mauzyo alondelelapo: U mulandu ci uno insita zimwi tungalolela ukuti Yeova asikwasuka mapepo itu? Iinzila ci zimwi zino Yeova akaasukilamo mapepo ndakai?

INSITA ZIMWI YEOVA ASIASUKA MAPEPO ITU UMU NZILA INO TUKWENEKELA

3. U mulandu cino Yeova akalondela ukuti twapepa kuli aliwe?

³ Malembo yakatwazwa ukumanya ukuti Yeova watutemwa sana nu kuti twacindama sana kuli aliwe. (Hag. 2:7; 1 Yoa. 4:10) Ali mulandu kwene uno akalondela twalenga uwazwilizyo kuli aliwe ukupitila umwi pepo. (1 Pet. 5:6, 7) Akalonda twapalama kuli aliwe nupya akatwazwa ukuzizimizya intazi zino tukakwata.

4. Uzye twamanya uli ukuti Yeova akaasuka mapepo aa yaomvi yakwe? (Loliniko ni cikope.)

⁴ Lino tukubelenga Baibo, tukazana malyasi akalanda pali vino Yeova wasukanga mapepo aa yaomvi yakwe. Uzye mwamanyako yamwi yano vii vyacitikiile? Umwi wino vii vyacitikiile u Mwene Devedi. Wakweti alwani aingi mu umi wakwe, nomba imiku iingi wapepanga kuli Yeova ukuti amwazwe. Pa nsita imwi wapaapasile Yeova ukuti: “We Yawe, uvwa ipepo lyane! Kutika kuno nkukupapata, unjasuke pano wewe mulungami. Unjasuke pano wewe mufumaluke!” (Masa. 143:1) Yeova waswike ipepo lino Devedi wapefile. (1 Sam. 19:10, 18-20; 2 Sam. 5:17-25) Devedi wasininkizye ukuti: “Wene [Yeova] waya umupipi na yonsi akakuuta kunoli.” Naswe kwene tungasininkizya vivyo.—Masa. 145:18.

5. Uzye Yeova wasukanga mapepo aa yaomvi yakwe aliko mpiti umu nzila ino yenekelanga? Langililini. (Loliniko ni cikope.)

⁵ Insita zimwi Yeova atanga aasuke mapepo itu ukulingana na vino tukwenekela. Vikwene i vyacitikiile nu mutumwa Paulo. Walenzile Leza ukuti amufumizye “umunga umu mwili.” Pa miku itatu, Paulo wapepiile pa ntazi ino wakweti. Uzye Yeova waswike mapepo yakwe Paulo? Ee, lelo asi kulingana na vino Paulo wenekelanga. Yeova atafumizyepo intazi ino Paulo wakweti, lelo wamupeezile amaka yano walondekwanga pakuti atwalilile kumuombela na ucisinka.—2 Kol. 12:7-10.

6. U mulandu ci uno insita zimwi cingaloleka kwati Yeova asikwasuka mapepo itu?

⁶ Insita zimwi naswe kwene mapepo itu yatanga yasukwe ukulingana na vino tukwenekela. Tungasininkizya ukuti Yeova wamanya inzila isuma ino angatwazwilamo. Angatucitila ivintu ‘ukucila na pali vino tungalenga nanti vino tukwelenganya.’ (Efes. 3:20) Pa mulandu kwene uu, limwi vino angasuka mapepo itu vingapusana na vino tukwelenganya.

7. U mulandu ci uno cingalondekwa ukusenuka pa vintu vino tukupepelapo? Langililini.

⁷ Insita zimwi tungalondekwa ukusenuka muli vino tukapepelapo ndi cakuti twalola vino Yeova akulonda twacita. Elenganyini pali vino vyacitikile ya Martin Poetzinger. Pa cisila ca kutwala, umwina Poetzinger yamutwazile umu nkambi ya kucuziwilwamo iya Nazi. Lino yafisile, yapefile kuli Yeova ukuti ayazwe yafume umu nkambi ya kucuziwilwamo iya Nazi pakuti yangaya yakasakamala aci nu kutandika nupya ukuomba umulimo wa kusimikila. Lino papisile imilungu iili, kutaali ivili vyonsi ivyalangililanga ukuti Yeova waswike ipepo lyao ilyakuti yafume. Fwandi yatandike ukupepa ukuti: “Yeova napaapata ndange vino ukulonda incite.” Lyene yatandike ukwelenganya pa ntazi zino aina yauze umu nkambi yakwatanga. Aingi yasakamiile pali ya wao na ana yao. Lyene umwina Poetzinger wapefile ati: “Yeova nataizya pa kumpeela mulimo upya. Ngazwe ukukomelezya aina.” Yamazile imyaka 9 umu nkambi ala yakuomba umulimo kwene uu!

8. I cintu ci icicindame cino tulinzile ukwiusya lino tukupepa?

⁸ Tulinzile ukulaiusya ukuti Yeova alafikilizya ukulonda kwakwe ukulingana ni nsita ino umwineco wimika. Ukulonda kwakwe u kwa kufumyapo intazi zyonsi izikatucuzya ndakai wakwe mazanzo akaiponela, kulwala alino ni mfwa. Yeova alaomvya Uwene wakwe ku kufikilizya ukulonda kwakwe. (Dan. 2:44; Kuso. 21:3, 4) Lino insita iyo itatala yafika, Yeova wazumilizya Satana ukulatungulula insi.b (Yoa. 12:31; Kuso. 12:9) Ndi cakuti Yeova afumyapo zuwa intazi zyonsi izyayako pano nsi, nga caloleka ukuti Satana a kateeka musuma. Nanti cakuti tulinzile ukuloleela ukuti Yeova akafikilizye malayo yamwi, ala cisikupiliula ukuti Yeova asitwazwa. Lekini tulande pa nzila zimwi zino Yeova akatwazwilamo.

INZILA ZINO YEOVA AKAASUKILAMO MAPEPO ITU NDAKAI

9. Uzye Yeova angatwazwa uli lino tukupingula pali vimwi? Langililini.

⁹ Akatupeela mano. Yeova walaya ukuti alatupeela amano yano tukalondekwa pakuti twapingula ningo pa vintu. Tukalondekwa mano akafuma kuli Leza lino tukupingula pa vintu ivicindame umu umi witu wakwe, ukwikala usimbe, ukutwalwa nati ukutwala. (Yako. 1:5) Lekini tulande pali vino ivyacitikile Maria nkazi umusimbe.c Umwina umwi watandike ukumulonda ala akaomba upainiya uwa nsita yonsi. Watiile: “Pa mulandu wakuti twalazyanyanga sana, twatandike ukutemwana. Namanyile ukuti nalondekwanga ukupingulapo. Fwandi napepelangapo sana pa cintu cii. Nalondekwanga utunguluzi wakwe Yeova, nomba namanyile ukuti atali nu kumpingwila.” Lino walenzile amano, waweni vino Yeova waswike ipepo lyakwe. Wacisile uli vivyo? Lino walondelizye umu mpapulo zitu, wazanyile ivipande ivyamwazwile ukwasuka amauzyo yano wakweti. Nupya wasambilileko na kuli vino ya nyina ali na ucisinka yamunenyile. Vino ya nyina yamunenyile vyalenzile aelenganye sana pali vino wayuvwanga. Cii camwazwile ukupingulapo ningo.

10. Ukulingana na Filipi 4:13, i vyani vino Yeova alacita pa kwazwa ya kapepa yakwe? Langililini. (Loliniko ni cikope.)

¹⁰ Akatupeela amaka yakuzizimizya. Wakwe vino Yeova wacisile ku mutumwa Paulo, naswe kwene akatupeela amaka akutwazwa ukuzizimizya intazi zino tukakwata. (Belengini Filipi 4:13.) Lekini tulande vino Yeova wazwile umwina Benjamin ukuzizimizya pa nsita ino wakweti sana intazi . Lino ya Benjamin yali ance, yene nu lupwa lwao ikazile umu nkambi zya mbutusi izingi izya mu Africa. Ya Benjamin yatiile, “Napepanga lyonsi kuli Yeova, nu kumulenga ukuti ampeela amaka akutwalilila ukucita ukulonda kwakwe. Yeova waswike mapepo yane lino walenzile ukuti inje nu mutende uwa mu melenganyo, kulenga ntwalilile ukuya umusipe lino nkusimikila, alino nu kulenga nkwate impapulo zino nalondekwanga pakuti ntwalilile ukuya umukome muli ukapepa.” Nupya yatiile: “Ukubelenga pa malyasi aakalanda pali vino vyacitikiile aina na ya nkazi alino nu kulola vino Yeova wayazwile ukuzizimizya intazi, kwalenzile nalondesya ukutwalilila ukuya uwa cisinka.”

11-12. Uzye Yeova angaomvya uli aina na ya nkazi ukwasuka mapepo itu? (Loliniko ni cikope.)

¹¹ Akaomvya aina itu na ya nkazi. Usiku lino Yesu atatala wafwa, wapefile ukufuma pansi ya mwenzo. Wapefile kuli Yeova ukuti alenge antu yatalola ukuti wapontelanga Leza nu kuti yatamupeela umulandu pali cico. Lelo Yeova atacisile vino Yesu wamulenzile, wamutumiile malaika pakuti amukomelezye. (Luka 22:42, 43) Nupya Yeova angatukomelezya ukupitila umu ina na ya nkazi ndi cakuti yatutumila foni nanti lino yatutandalila. Swensi kwene tungasyukila kasita akakunena aina na ya nkazi “amazwi ya mutembo.”—Mapi. 12:25.

¹² Elenganyini pali vino vyacitikiile nkazi Miriam. Pa cisila ca milungu inono ukufuma pano ya iya yafwilile, ya Miriam yayuvwanga ukuzukilwa nupya yasakamikwanga sana. Insita izingi yalilanga nupya yalondekwanga uwa kulanda nayo. Yatiile: “Ntakweti na maka ya kutuma foni, fwandi napefile kuli Yeova. Lino nalilanga ala nkupepa, nuvwile sile foni yalila. Eluda wino twamanyine sana nawe u watumile.” Eluda wiya na mamakwe yakomelizye ya Miriam. Ya Miriam yasininkizye ukuti Yeova u walenzile ukuti umwina atume foni.

13. Langililini vino Yeova angaomvya antu aasimuombela pa kwasuka mapepo itu.

¹³ Angaomvya antu asi yakapepa yakwe. (Mapi. 21:1) Insita zimwi, Yeova angaasuka mapepo ya antu yakwe ukuomvya antu asipepa pakuti yayazwe. Wakwe, walenzile Umwene Alitakisesi ukuzumilizya Neemiya ukuswilila uku Yelusalemu pakuti akazwilizye ukukuula cipya cipya umusumba. (Neem. 2:3-6) Na ndakai kwene, Yeova angaomvya antu aasimuombela ukutwazwa lino tukulondekwa uwazwilizyo.

14. Uzye ivyacitikiile nkazi Soo Hing vyamukomelezya uli? (Loliniko ni cikope.)

¹⁴ Nkazi uwizina lyakuti Soo Hing waweni ukuti Yeova wamwazwile ukupitila muli dokota. Umwanakwe waculanga nu ulwale uwa ku ongo. Lino umwanao wazanyilwe umu uzanzo uwipisye, ya Soo Hing na ya iya yalesile ukuomba incito pakuti yasakamala umwana. Ni vyafumilemo pa mulandu na vino yalesile ukuomba incito, izile iyakwata intazi iya kuliizya impiya. Ya Soo Hing yalanzile ukuti yatanga yatwalilile ukuzizimizya intazi na zyuze. Yanenyile Yeova vyonsi ivyali uku mwenzo nu kumunena ukuti ayaazwe. Dokota wapingwile ukuzana inzila ino angayazwilamo pamwi nu lupwa lwao. Pa mulandu na vino dokota wacisile, yapokelile ukwazwa ukufuma uku uteeko nupya yayapeezile umwa kwikala umusuma. Pa cisila, ya Soo Hing izile iyalanda ukuti: “Twaweni vino Yeova watwazwile. Waswike ‘amapepo’ itu.”—Masa. 65:2.

CIKALONDEKWA UTAILO PA KULENGA NU KULOLA VINO YEOVA AKAASUKA MAPEPO

15. I cani icazwile nkazi umwi ukumanya ukuti Yeova wasukanga mapepo yakwe?

¹⁵ Ilingi amapepo itu yasiasukwa ukulingana na vino tukwenekela. Nomba Yeova akaasuka mapepo itu ukulingana na vino tukulondekwa pakuti tutwalilile ukuya acisinka kuli aliwe. Fwandi mwaikako sana mano pakuti mwalola vino Yeova akaasuka mapepo inu. Nkazi uwizina ilyakuti Yoko wayuvwanga ukuti Yeova atasukanga mapepo yakwe, nomba wizile atandika ukulemba vino watapepelapo kuli Yeova. Lino papisile insita, wizile atandika ukupituluka umwi buku lino walembangamo nupya wazanyile ukuti Yeova waswike amapepo aingi nupya yamwi ala wiliila nu kwilila. Insita izingi tulinzile ukulaelenganya pali vino Yeova akaasuka mapepo itu.—Masa. 66:19, 20.

16. Tungalanga uli ukuti tuli nu utailo lino tukupepa? (Aebele 11:6)

¹⁶ Tukalanga ukuti twataila Yeova ndi cakuti tukupepa kuli aliwe nu kuzumila vino wasuka mapepo itu asi mulandu ni nzila ino wataomvya pa kwasuka. (Belengini Aebele 11:6.) Lekini tulande pali vino vyacitikiile ya Mike na aci yao ya Chrissy. Yalondesyanga ukuombela pa Betele. Ya Mike yatiile: “Nemo na mamane, twapepelangapo imuku iingi nu kuuzya ukuti tungaya tukaombele pa Betele nomba yatatwamanga.” Ya Mike na ya Chrissy yatwalilile ukutaila ukuti Yeova wamanyile ningo vino wali nu ku yaomvya umu mulimo wakwe. Yatwalilile ukuomba apapezile amaka yao, ukuomba upainiya wa nsita yonsi, kuomba ukukalondekwa ya kasimikila aingi, alino nu kwazwilizya umu mulimo wa makuule. Ndakai yaya umu milimo wa kutandalila ivilongano. Ya Mike yatiile: “Asi lyonsi lino Yeova wasukanga mapepo itu ukulingana na vino twenekelanga, nupya wasukanga umu nzila isuma ino tutelenganyanga napo.”

17-18. Ukulingana na Masamu 86:6, 7, i vyani vino tungataila?

¹⁷ Belengini Masamu 86:6, 7. Kalemba wa Masamu Devedi wasininkizye ukuti Yeova wakutikanga nu kwasuka mapepo yakwe. Namwe kwene mungataila wakwe Devedi. Antu yano itulandapo umu cipande cii iyalenga tusininkizye ukuti Yeova angatupeela mano na maka yano tukulondekwa pakuti tuzizimizye intazi. Angaomvya aina na ya nkazi nanti sile antu aasimupepa pakuti yatwazwe.

¹⁸ Nanti cakuti Yeova atanga aasuke mapepo itu umu nzila ino tukwenekela, twamanya ukuti akaasuka. Alatupeela vino tukulondekwa nupya pa nsita ino tukuvilonda. Fwandi lino mukupepa, mwataila ukuti Yeova alasuka mapepo inu nu kuti alatwalilila ukumusakamala nupya ‘alikusya consi ica umi vino cikulonda’ umu nsi ipya ili umupiipi.—Masa. 145:16.