Mwakolanya Vino Yesu Wali Umucincile Lino Wasimikilanga

1. I cintu ci conga icikalenga ukuti antu yakwe Yeova yapusaneko na antu amu nsi yii?

Aomvi yakwe Yeova yakalondesya ukusimikila ilyasi lisuma nupya yakaombesya. Na cii cikalenga yapusaneko na antu akailola ukuti Aina Klistu.a (Tito 2:14) Nomba insita zimwi, limwi cingamutalila ukuya acincile umu mulimo wa kusimikila. Limwi mungayuvwa wakwe vino eluda umwi aakaombesya wayuvwile. Watiile: “Insita zimwi, cisiyamo ica kulondesya ukuomba.”

2. I vyani ivingalenga ukuti insita zimwi citutalile ukulaombesya umu mulimo wa kusimikila?

² Limwi tungaipakizya ukuomba imilimo yuze iya wene ukucila vino tungaipakizya ukuomba umulimo wa kusimikila. U mulandu ci? A pa mulandu wakuti ndi cakuti twakuula Mang’anda ya Wene, ukwazwilizya aina na ya nkazi atiyaponelwa na mazanzo, nanti ukuyakomelezya, tungalola ivisuma ivikufumamo papo kwene sile nupya cii cikalenga ukuti twaya ni nsansa. Tukaipakizya umutende alino nu kutemwa kuno tukalanga lino tukuombela pamwi na ina ya nkazi, nupya tukamanya ukuti aina na ya nkazi yakataizya pali vino tukayacitila. Insita zimwi, limwi tukasimikila umu cifulo cino tukaombelamo apa myaka iingi lelo antu sile anono aliyo yakakutika ukwi lyasi lisuma. Nanti limwi antu aingi yakakana ukukutika ukwi lyasi lisuma. Nupya lino impelelekezyo ya nsi yii ikupalama, tulinzile ukwenekela ukuti antu yalatukanya. (Mate. 10:22) I vyani ivingatwazwa ukuya acincile alino nu kulaombesya umu mulimo wa kusimikila?

3. Uzye ilembo lyakwe Luka 13:​6-9 likalondolola uli vino Yesu wali umucincile?

³ Kuli ivintu vino tungasambilila pakuti tuye acincile lino tukusimikila kuli vino Yesu wasimikilanga. Lino Yesu wali pano nsi, ataatile ukuombesya umu mulimo wa kusimikila. Lino wamalilanga umulimo wakwe uwa kusimikila, waombesyanga ukucila na pali vino waombanga lyonsi. (Belengini Luka 13:​6-9.) Wakwe vino umuomvi wa calo ca myangazi walemile icimuti ca musamvu pa myaka itatu icitaseekanga ivizao, ali vino na Yesu wasimikile pa myaka itatu uku Yayuda, lelo Ayuda aingi yakanyile ukuvwa ukwi lyasi lisuma. Lelo wakwe vino umuomvi wa ca calo ca myangazi atatoovwike, na Yesu kwene atatoovwike ukusimikila antu ilyasi lisuma. Lelo watwalilile ukuombesya ukusimikila uku Yayuda pakuti ayazwe ukutaila ilyasi lisuma.

4. I vintu ci 4 vino tumasambilila kuli Yesu?

⁴ Umu cipande cii, tumasambilila pali vino Yesu walangilile ukuti wali umucincile, sana sana umu myezi 6 iya kusyalikizyako ukuomba umulimo wa kusimikila. Ukusambilila kuli vino wasambilizyanga nu kukolanya vino wacisile kumatwazwa ukutwalilila ukuya acincile ndakai. Lekini tusambilile vino tungakolanya Yesu umu vintu 4: (1) Vino wisile mano ukucita ukulonda kwakwe Leza, (2) vino wisile mano uku usesemo wa muli Baibo, (3) vino wataile Yeova ukuti amwazwa, na (4) vino wataile ukuti antu yamwi yali nu kuvwa kuli vino wasimikilanga.

WISILE MANO UKU KUCITA UKULONDA KWAKWE YEOVA

5. Uzye Yesu walangilile uli ukuti wisile mano uku kucita ukulonda kwakwe Leza?

⁵ Yesu wali umucincile lino wasimikilanga “ilyasi lisuma ilya Wene” pano wamanyile ukuti ali mulimo uno Leza walondanga ukuti aombe. (Luka 4:43) Yesu wisile sana amano uku mulimo wa kusimikila. Nanti sile umu myezi iya kusyalikizyako lino wasimikilanga, wapisile “umu misumba nu mu mizi,” pakuti asimikileko yauze. (Luka 13:22) Nupya wasambilizyeko na asambi yakwe ivya kuomba umulimo wa kusimikila.—Luka 10:1.

6. Uzye umulimo wa kusimikila walemana uli ni milimo yuze ino tukaombela Yeova? (Loliniko ni cikope.)

⁶ Na ndakai kwene, ukusimikila ilyasi lisuma ali mulimo uno Yeova na Yesu yakalonda ukuti twaomba. (Mate. 24:14; 28:​19, 20) Umulimo onsi uno tukaombela Yeova walemana nu mulimo wa kusimikila. Wakwe, tukakuula ivikuulwa ivya kulonganilamo nanti ukuombela pa Bethel pakuti twatungilila umulimo wa kusimikila. Tukaazwilizya aina na ya nkazi aatiyaponelwa na mazanzo, nupya asi pa mulandu wakuti tukulonda ukuyazwa sile lelo tukayazwa ukutwalilila ukuomba imilimo yakwe Leza, ukwikapo sile nu mulimo wa kusimikila. Ndi cakuti tukwiusya umulandu uno umulimo wa kusimikila wacindamila nu kumanya ukuti ali mulimo uno Yeova akulonda ukuti tuombe, cilalenga ukuti twaombesya umu mulimo wa kusimikila. Ya Janos, ya eluda uku Hungary, yatiile: “Lyonsi nkayiusyako ukuti kutaya umulimo uuli onsi uno tukaombela Yeova uwacila umulimo wa kusimikila.”

7. U umulandu ci uno Yeova akalondela ukuti twatwalilila ukusimikila? (1 Timoti 2:​3, 4)

⁷ Tungaya acincile umu mulimo wa kusimikila ndi cakuti tukulola antu wakwe vino Yeova akayalola. Akalonda antu aingi ukuvwa ukwi lyasi lisuma alino nu kusambilila pali aliwe. (Belengini 1 Timoti 2:​3, 4.) Pa mulandu wakuti ilyasi lisuma likapususya, Yeova akutusambilizya ivya kusimikila pakuti twalanzyanya ningo na antu lino tukusimikila. Wakwe, kabuku kakuti Mwatemwa Antu—Mwapanga Asambi kakatwazwa ukumanya ivya kutandika ukulanzyanya na antu pakuti yasambilila Baibo alino nu ku nkoleelo yace yaye asambi yakwe Yesu. Nanti cakuti yasiombela Yeova ndakai, yangiza yakwate isyuko ilya kumuombela lino ucuzi ukalamba utatala watandika. Vino tukalanda kuli aliyo ndakai limwi i vilalenga ukuti yace yazumile ilyasi lisuma uku nkoleelo. Lelo vivyo vingacitika sile ndi cakuti twatwalilila ukusimikila.

WISILE MANO UKU USESEMO WA MULI BAIBO

8. A masesemo ci aazwile Yesu ukulaomvya ningo insita?

⁸ Yesu wamanyile vino masesemo yali nu kufikiliziwa. Wamanyile ukuti wali nu kuomba umulimo wa kusimikila apa myaka itatu na afu. (Dan. 9:​26, 27) Nupya wamanyile nu usesemo uwalanzile pa nsita ino yali nu kufwa na pali vino wali nu kufwa. (Luka 18:​31-34) Pa mulandu wakuti Yesu wamanyile ivyali nu kumucitikila, calenzile ukuti aomvya ningo insita. Cii calenzile ukuti aye umucincile umu mulimo uno waombanga pakuti amale umulimo uno wapeezilwe.

9. Uzye ukuvwikisya masesemo kukatwazwa uli ukutwalilila ukuya acincile lino tukusimikila?

⁹ Ndi cakuti tukwelenganya pa masesemo akufikiliziwa umu manda itu alino na ali nu kufikiliziwa uku nkoleelo, tulatwalilila ukuya acincile lino tukusimikila. Twamanya ukuti insita iyatiisyalako pakuti insi yii yononwe inono sana. Baibo yasoowile pa yantu alaya umu manda akusyalikizya ni vilacitika umu manda kwene yaa, nupya tukalola kuno masesemo yaa yakufikiliziwa. Tukalola kuno uteeko uwakwata Amaka Sana umu Nsi uwa Anglo-America ukulwisyanya nu uteeko wa Russia na aakautungilila, nupya tukalola vino ukulwisyanya kuu kukafikilizya usesemo uukalanda pa mwene wa ku kaeya nu mwene wa ku katutu umu “nsita ya kusyalikizya.” (Dan. 11:40) Nupya twamanya nu kuti uteeko wa Anglo-America ukaimililako ingazo zya cilubi icalondololwa pali Danieli 2:​43-45. Twasininkizya ukuti, wakwe viivi kwene vino usesemo ukalangilila ali vino Uwene wakwe Leza wasya onone mauteeko ya yantu yonsi likwene sile. Masesemo yaa yonsi yakalangilila ukuti tukwikala sana umu manda aakusyalikizya, fwandi tulinzile ukulaomvya ningo insita ukulingana na pano tungapezya pakuti twasimikila ilyasi lisuma.

10. U mu nzila ci muno masesemo amuli Baibo yangalenga tuye acincile umu mulimo wa kusimikila?

¹⁰ Masesemo amuli Baibo yakalenga ukuti twalondesya ukunenako yauze. Nkazi Carrie, aakaombela umu Dominican Republic walanzile ukuti, “Malayo yano Yeova watulaya akuti ivintu vilazipa uku nkoleelo yakalenga nalondesya ukunenako yauze.” Nupya watiile: “Ndi cakuti nalola ivikucitikila antu ndakai, nkalola ukuti na antu yauze yalinzile ukumanya malayo yaa yano Yeova watulaya.” Masesemo yaa yakalangilila ukuti Yeova akatwazwa ukuomba umulimo uu, nupya cii cikatukomelezya ukutwalilila ukuomba umulimo wa kusimikila. Ya Leila, aakaikala umu Hungary, yatiile: “Ilembo lyakwe Ezaya 11:​6-9 likankomelezya ukulasimikila ilyasi lisuma nu ku yantu akuloleka kwati yatanga yakutike. Namanya ukuti umuntu ali wensi angakutika ndi cakuti Yeova wamwazwa.” Nupya umwina Christopher akaikala uku Zambia, watiile: “Wakwe vino ilembo lyakwe Mako lyasoowile, ilyasi lisuma likusimikilwa umu nsi yonsi, nupya i syuko sana ukwazwilizyako ukufikilizya usesemo uu.” A masesemo ci amuli Baibo aakamukolezya ukulasimikila?

WATAILA YEOVA UKUTI ALAMWAZWA

11. U mulandu ci uno Yesu walondekelwanga ukutaila Yeova ukuti amwazwa pakuti atwalilile ukuya umucincile lino akusimikila? (Luka 12:​49, 53)

¹¹ Yesu wataile Yeova ukuti alamwazwa ukutwalilila ukuya umucincile umu mulimo wa kusimikila. Wasoololanga ningo amazwi lino walandanga na yauze, nomba lino wasimikilanga wamanyile ukuti antu yamwi yali nu kusoka nupya aingi yali nu kukana ukukutika ukwi lyasi lisuma. (Belengini Luka 12:​49, 53.) Pa mulandu na vino Yesu wasimikilanga, intunguluzi zya mapepo zyalondanga ukumukoma. (Yoa. 8:59; 10:​31, 39) Lelo Yesu watwalilile ukusimikila pano wamanyile ukuti Yeova wali nawe. Watiile: “Ntaya nenga, lelo Tata uwantumile waya nani . . . atansya nenga, pano lyonsi nkacita ivyakumuzanzya.”—Yoa. 8:​16, 29.

12. Uzye Yesu wazwile uli asambi yakwe ukuipekanya ukulasimikila lino antu yakuyacuzya?

¹² Yesu wiwisyeko asambi yakwe ukuti nga yataila Yeova wali nu kulayazwa. Pa miku iingi wayanenyile ukuti Yeova wali nu kulayazwa na lino yakuyacuzya. (Mate. 10:​18-20; Luka 12:​11, 12) Pa mulandu wakuti Yesu wamanyile ukuti antu aingi yali nu kulakaanya ilyasi lisuma, wanenyile asambi yakwe ukuti yalinzile ukuya acenjele. (Mate. 10:16; Luka 10:3) Wayanenyile ukuti yatalinzile ukulapatikizya antu ukuvwa ukwi lyasi lisuma. (Luka 10:​10, 11) Nupya wayanenyile nu kuti yalinzile ukuutuka ndi cakuti antu yatandika ukuyacuzya. (Mate. 10:23) Nanti cakuti Yesu wali umucincile nupya wataile Yeova, watalukanga uku vintu ivyali nu kulenga aye umu uzanzo.—Yoa. 11:​53, 54.

13. Mungasininkizya uli ukuti Yeova alamwazwa?

¹³ Antu aingi ndakai yakakaanya umulimo witu, fwandi tukalondekwa ukwazwa kwakwe Yeova pakuti tutwalilile ukulasimikila ilyasi lisuma. (Kuso. 12:17) Mungasininkizya uli ukuti Yeova alamwazwa? Elenganyini api pepo lino Yesu wapefile ilyaya muli Yoani icipande 17. Yesu walenzile Yeova ukuti acingilila asambi, nupya Yeova waswike ipepo lyakwe. Ibuku lya Milimo likalanda pali vino Yeova wazwile atumwa ukutwalilila ukuya acincile lino yakusimikila asi mulandu na vino yayacuzyanga. Nupya umwi pepo kwene lii, Yesu wanenyile Yeova ukuti acingilila na yayo aali nu kutaila ilyasi lisuma lino atumwa yali nu kuyasimikila. Ukwikako sile namwe kwene. Yeova watwalilila ukwasuka ipepo lyakwe Yesu, nupya alatwalilila ukumwazwa wakwe vino wazwile atumwa.—Yoa. 17:​11, 15, 20.

14. Uzye twamanya uli ukuti tulatwalilila ukuya acincile lino tukusimikila? (Loliniko ni cikope.)

¹⁴ Lino impelelekezyo ya insi ukuya ikupalama, limwi cingatutalila ukuya acincile lino tukusimikila ilyasi lisuma. Nomba Yesu watulaya ukuti tulapokelela uwazwilizyo uulalenga ukuti tuye acincile lino tukusimikila. (Luka 21:​12-15) Wakwe vino Yesu na asambi yacisile, naswe kwene tukaleka ukuti antu aineco yaisoolwele ndi cakuti yamakutika nanti foo, nupya tusipazyanya nayo. Nanti uku ncende kuno yainda umulimo witu, aina itu na ya nkazi yakatwalilila ukusimikila ilyasi lisuma pa mulandu wakuti yataitaila, lelo yataila Yeova. Wakwe vino Yeova wazwile aomvi yakwe umu manda ya Ina Klistu aakutandikilapo, na ndakai akatupeela amaka pakuti “ilyasi lisuma lingasimikilwa sana,” kulingana na vino akalonda. (2 Tim. 4:17) Mungasininkizya ukuti nga mwataila Yeova, mulatwalilila ukuya acincile lino mukusimikila.

WATAILE UKUTI ANTU YAMWI YALI NU KUVWA KULI VINO WAYASIMIKILANGA

15. I vyani ivikalangilila ukuti Yesu wataile ukuti antu yamwi yali nu kuvwa ukwi lyasi lisuma?

¹⁵ Yesu wataile ukuti antu yamwi yali nu kuvwa ukwi lyasi lisuma lino wasimikilanga. Ukucita vii, kwamwazwile ukuya ni nsansa nu kutwalilila ukuombesya umu mulimo wa kusimikila. Wakwe uku kusila kwa mwaka wakwe 30 C.E., Yesu waweni ukuti aingi yalondanga ukuvwa ukwi lyasi lisuma, nupya wayakolinye uku calo icikulondekwa ukuzombola. (Yoa. 4:35) Lino papisile umwaka onga, Yesu wanenyile asambi yakwe ati: “Uzombozi uukulu.” (Mate. 9:​37, 38) Nupya wizile ayanena ati: “Lengini Umwineco wa uzombozi kuti atume aomvi mu mulimo wakwe uwa kuzombola.” (Luka 10:2) Yesu watwalilile ukutaila ukuti antu yali nu kukutika ukwi lyasi lisuma, nupya wayanga ni nsansa ndi cakuti wayasimikila.—Luka 10:21.

16. Uzye ivilangililo vino Yesu walanzile vyalangilile uli ukuti antu yali nu kukutika ukwi lyasi lisuma? (Luka 13:​18-21) (Loliniko ni cikope.)

¹⁶ Yesu wazwile asambi yakwe ukuya acincile, lino waiusyeko ivisuma ivyafumanga umwi lyasi lisuma lino yasimikilanga. Wakwe, katulande pa vilangililo vii vino waomvizye. (Belengini Luka 13:​18-21.) Yesu waomvizye ulumbezu lwakwe musunta pa kusambilizya pali vino ilyasi lya Wene lyali nu kusalangana umu nzila iya kuzungusya nupya kutaali umuntu aliwensi uwali nu kulesya umulimo uu. Nupya waomvizye icilangililo ca citutumusi pa kulanda pali vino ilyasi lisuma lyali nu kusalangana umu nsi yonsi na vino lyali nu kulenga antu ukusenuka ukwaula ukuti yauze yamanye lilyo kwene. Fwandi Yesu wazwile asambi yakwe ukusininkizya ukuti ilyasi lino yasimikilanga lyali nu kwazwa antu aingi.

17. I vyani ivingalenga twalola ukuti antu yamwi yalakutika ukwi lyasi lisuma?

¹⁷ Ndi cakuti tukwelenganya pali vino umulimo wa kusimikila ukaazwa antu umu nsi yonsi, tukakomeleziwa ukutwalilila ukulasimikila. Cila mwaka, antu aingi sana aakalondesya ukukutika ukwi lyasi lisuma yakazanwa uku Ciusyo nupya yakalondesya ukuti twasambilila nayo Baibo. Antu aingi yakabatiziwa nu kutandika ukusimikila ilyasi lisuma pamwi naswe. Tutamanya uwingi wa yantu angakutika ukwi lyasi lisuma, lelo twamanya ukuti Yeova akukolonganika antu aingi aalapusuka ucuzi ukalamba uuli nu kwiza. (Kuso. 7:​9, 14) Yeova ali kazombola Mukalamba nupya wataila ukuti antu aingi yaluvwa ukwi lyasi lisuma, fwandi tulatwalilila ukusimikila.

18. I vyani vino tukalonda yauze yalola pali sweswe?

¹⁸ Asambi ya cumi yakwe Yesu yakalolekela muli vino yakaya acincile lino yakusimikila. Lino antu yaweni vino atumwa yali asipe lino yasimikilanga, “yilwike ukuti yaali pamwi na Yesu.” (Mili. 4:13) Naswe kwene tulinzile ukuya asipe nupya acincile lino tukusimikila, nupya ndi cakuti tukucita vivyo antu yalalola ukuti tukukolanya Yesu.