CIPANDE CA KUSAMBILILAMO 26
LWIMBO NA. 123 Lyonsi Twatontela Vino Leza Watantika
Mwaicefya Lino Mutamanyile Ivintu Vimwi
“Tutanga tuvwikisye Uwa Maka Yonsi.”—YOBO 37:23.
VINO TUMASAMBILILAPO
Nanti cakuti tutamanyile ningo ivilacitika uku nkoleelo, tungazizimizya intazi zino tungakwata ndi cakuti tukwelenganya pali vino twamanya alino nu kutaila Yeova.
1. I vintu ci vino Yeova watupeela, nupya u mulandu?
YEOVA watuumvile umu nzila ya kuzunguka, tukaelenganya, ukusambilila ivipya, kumanya, alino nu kuomvya vino tukusambilila. U mulandu ci uno watupangiile umu nzila yii? Akalonda ukuti tumumanye nu kulamuombela ukulingana na maka itu aakwelenganya.—Mapi. 2:1-5; Loma 12:1.
2. (a) I vintu ci vino tutanga tukwanishe ukucita? (Yobo 37:23, 24) (Loliniko ni cikope.) (b) Uzye ukumanya ukuti tutamanya vyonsi kungatwazwa uli?
2 Yeova watupanzile ukuti twasambilila ivintu ivingi, lelo kwaya ivintu ivingi vino tutamanya. (Belengini Yobo 37:23, 24.) Elenganyini pali vino vyacitikile Yobo. Yeova uzizye Yobo mauzyo aingi amwazwile ukumanya ukuti kwali ivintu ivingi vino atamanyile. Ivyamucitikiile vyalenzile aicefye nu kumwazwa ukusenuka muli vino welenganyanga. (Yobo 42:3-6) Naswe kwene ivintu vikatuzipila nga twaicefya nu kwiusha ukuti asi vyonsi vino twamanya. Ndi cakuti tukwiusha ukuti asi vyonsi vino twamanya, cilatwazwa ukuya aicefye nu kutaila Yeova ukuti lyonsi alatunena vino tulinzile ukumanya pakuti twapingula ningo pa vintu.—Mapi. 2:6.
Ukwiusha ukuti tutamanya vyonsi kungatwazwa wakwe vino kwazwile Yobo (Lolini palaglafu 2)
3. I vyani vino tumasambilila umu cipande cii?
3 Umu cipande cii, tumasambilila pa vintu vimwi vino tutamanya alino ni ntazi zino tungakwata pa vintu kwene vino tutamanya. Nupya tumalanda na pa mulandu uno cazipila ukukanamanya ivintu vivyo. Ukusambilila pa vintu vii kumatwazwa ukutaila sana Yeova wino “ukumanya kwakwe kwaya ukumalilike,” aakatunena vino tulinzile ukumanya.—Yobo 37:16.
TUTAMANYA LINO IMPELA ILIZA
4. Kulingana na Mateo 24:36, i vyani vino tutamanya?
4 Belengini Mateo 24:36. Tutamanya lino impelelekezyo ya nsi yii iliza. Nanti sile lino Yesu wali pano nsi, atamanyile ‘uwanda ni nsita.’a Yesu wanenyile atumwa yakwe ukuti Yeova sile aliwe wakwata amaka akumanya lino ivintu vimwi vilacitika. (Mili. 1:6, 7) Yeova watantika insita lino impela iliza, lelo tutamanya lino insita iyo ilafika.
5. Iintazi ci ino tungakwata pa mulandu wakuti tutamanya lino impela iliza?
5 Ukulingana na vino Yesu walanzile, tutamanya utali wa nsita ilapitapo pakuti impela ize. Fwandi limwi cingatutalila ukulolela nanti tungatoovoka, sana sana ndi cakuti itulolela uwanda wakwe Yeova pa myaka iingi. Nupya tungatoovoka ndi cakuti ya lupwa lwitu alino na antu yauze yakutucuzya. (2 Pet. 3:3, 4) Limwi tungatandika ukwelenganya ukuti ndi cakuti twamanyile uwanda lino impela iliza, tungatwalilila ukulolela nu kukanatoovoka nanti cakuti yauze yakutucuzya.
6. U mulandu ci uno cazipila vino tutamanya uwanda lino impela iliza?
6 Vino Yeova atatunena uwanda lino impela iliza, watupeela ishuko ilya kulanga ukuti tukamuombela pa mulandu wakuti twamutemwa. Tukalonda ukulaombela Yeova amanda pe, asi sile ukufikila lino impela iliza. Ukucila ukwika sana mano ku nsita lino “uwanda wakwe Yeova” uliza, tulinzile ukwika sana mano ku visuma ivilacitika pa cisila ca wanda wakwe Yeova. Ukucita vivyo kulalenga ukuti tupalame sana kuli Yeova nu kumutaila nupya tulaezya na maka ukucita ivingamuzanzya.—2 Pet. 3:11, 12.
7. I vyani vino twamanya?
7 Cacindama sana ukwika mano kuli vino twamanya, twamanya ukuti manda aakushalikizya yatandike umu 1914. Muli Baibo, Yeova watupeela masesemo aakalangilila ukuti manda aakushalikizya yatandike umu 1914. Nupya watunena na vino insi yali nu kuya pa cisila ca mwaka wa 1914. Fwandi masesemo yaa yalenga tusininkizye ukuti “uwanda ukalamba wakwe Yeova uli umupiipi.” (Zefa. 1:14) Nupya twamanya ukuti Yeova watupeela umulimo wa kuomba, kuli kuti ukunena antu api ‘lyasi lisuma ilya Wene.’ (Mate. 24:14) Ilyasi lisuma lii likusimikilwa umu mpanga 240 nupya umu ndimi ukucila pali 1,000. Tusilondekwa ukumanya “uwanda ni nsita” pakuti tuye acincile umu mulimo uu ucindame uwa kusimikila.
TUTAMANYA VINO YEOVA ALACITA
8. Uzye “milimo yakwe Leza wa cumi” ikalozya kuli vyani? (Kasambilizya 11:5)
8 Asi lyonsi lino tukamanya “milimo yakwe Leza wa cumi.” (Belengini Kasambilizya 11:5.) Amazwi yaa yakalozya kuli vino Yeova akalenga vicitike nanti kuli vino akalenga vicitike pakuti afikilizye ukulonda kwakwe. Tutanga tumanye umulandu uno Yeova angazumilizya ukuti vimwi vicitike nanti vino angacita pa kutwazwa. (Masa. 37:5) Baibo ikakolanya ukukanamanya milimo yakwe Leza wa cumi kuli vino tutamanya vino umwana akakula munda muli nyina. Na ya sayansi kwene yatamanya ningo ivikacitika pakuti umwana akule munda. Vikwene ali vino caya na kuli sweswe, tutamanya ningo vino Yeova akacita ivintu.
9. Pa mulandu wakuti tusimanya vino Yeova angatwazwa, iintazi ci zino tungakwata?
9 Ndi cakuti tutamanyile vino Yeova alatwazwa, tungasitoka ukupingulapo ivya kucita pa vintu vimwi. Limwi tungasitoka ukuta ukucitako ivintu vimwi pakuti twaombesya mu mulimo wa kusimikila, nanti ukuya uku ncende ukukalondekwa ya kasimikila aingi. Nanti limwi tungatandika ukwelenganya ukuti tusikuzanzya Yeova ndi cakuti twafilwa ukufikilizya mauyo yano twimika muli vyakwe Leza.
10. I miyele ci ino tulinzile ukukwata ndi cakuti tutamanyile vino Yeova angatwazwa?
10 Ukukanamanya vino Yeova angatwazwa kulatwazwa ukuya ni miyele isuma, wakwe ukuicefya. Nupya kukatwazwa ukumanya ukuti lyonsi Yeova wamanya ivingatuzipila. (Eza. 55:8, 9) Tukataila sana Yeova nu kumanya ukuti alatwazwa. Ndi cakuti ivisuma vyacitika umu mulimo wa kusimikila nanti umu milimo yuze, tukapeela Yeova ululumbi. (Masa. 127:1; 1 Kol. 3:7) Ndi cakuti ivintu vitaomvile ukulingana na vino tukwenekela, tulinzile ukulaiusha ukuti Yeova watamanya vyonsi. (Eza. 26:12) Tukacita vino tungakwanisha ukucita, nu kutaila ukuti Yeova alatwalilila ukutwazwa. Twataila ukuti alatupeela utunguluzi uno tukulondekwa nanti cakuti atalacita vivyo umu cizungusho wakwe vino wacitanga uku cisila.—Mili. 16:6-10.
11. I vintu ci ivicindame vino twamanya ivingatwazwa?
11 Twamanya ukuti Yeova lyonsi waya nu kutemwa, mulinganya alino nu luse. Yeova akataizya sana pali vino tukamuombela na pali vino tukacitila ya kapepa yanji. Nupya twamanya ukuti lyonsi Yeova akalambula yayo aaya na ucisinka kuli aliwe.—Aeb. 11:6.
TUSIMANYA IVILACITIKA UWANDA ULONDELILEPO
12. Ukulingana na Yakobo 4:13, 14, i vyani vino tutamanya?
12 Belengini Yakobo 4:13, 14. Cisinka i cakuti tusimanya vino umi ulaya uku nkoleelo. Umu manda yaa aakushalikizya, ivintu ivyaula ukwenekela nupya vino tutanga tukwatepo amaka vingacitika. (Kasa. 9:11) Vii vyalenga ukuti twafilwa ukumanya ndi cakuti tulacita vino tukulonda ukucita, nanti tulatwalilila ukuya nu umi pakuti tukavicite.
13. Uzye ukukanamanya ivilacitika uku nkoleelo kungalenga tuyuvwe uli?
13 Cingatutalila ukuzizimizya pano tutamanya ivilacitika uku nkoleelo. U mulandu ci? Limwi tungasakamala pa vilacitika, nupya ukucita vivyo kungalenga tute ukuya ni nsansa. Umi witu ungasenuka ukwaula ukwenekela nanti iviipe vingacitika, nupya vii vingalenga ukuti tuye sana nu ulanda. Nupya ndi cakuti vino tukwenekela ukuti ivimacitika vyakana ukucitika, cingalenga tutoovoke.—Mapi. 13:12.
14. I vyani vino tulinzile ukucita nu kumanya pakuti tuye ni nsansa zya cumi? (Loliniko ni vikope.)
14 Ndi cakuti twazizimizya intazi, tukalangilila ukuti tukaombela Leza pa mulandu wakuti twamutemwa, asi pa mulandu wakuti tukalonda aatucitilako ivintu vimwi. Malyasi amuli Baibo yakalangilila ukuti Yeova asitucingilila uku ntazi zyonsi nupya asitantika ivintu ivikatucitikila umu umi. Yeova wamanya ukuti tungaya ni nsansa nanti cakuti tutamanyile vyonsi ivilatucitikila uku nkoleelo. Lelo tukaya ni nsansa ndi cakuti tukulondela utunguluzi wakwe alino nu kulamuvwila. (Yele. 10:23) Ndi cakuti tukutaila Yeova lino tukupingula pa vintu ala tukulanda ukuti: “Yeova nga watemwa, tulaya nu umi, nupya tulacita cii nanti ciica.”—Yako. 4:15.
Kulondela utunguluzi wakwe Yeova alino nu kulamuvwila kungatucingilila (Lolini mapalaglafu 14-15)b
15. I vyani vino twamanya pa vilacitika uku nkoleelo?
15 Nanti cakuti tutamanya ivilatucitikila cila wanda, twamanya ukuti Yeova watulaya umi wa manda pe, nampo nga tulikala ukwi yulu nanti pano nsi. Twamanya ukuti asibepa nupya kusi icili consi icingamulesha ukufikilizya malayo yakwe. (Tito 1:2) Wene akalandila ‘limwi ivilacitika, nupya ukufuma uku mpiti akalandila limwi ivitatala vyacitika.’ Ivintu vyonsi vino walanzile mpiti vyacitike, nupya vino walanda ukuti vilacitika uku nkoleelo vilacitika. (Eza. 46:10) Twasininkizya ukuti kusi icili consi icilalenga Yeova ate ukututemwa. (Loma 8:35-39) Akatuteekezya nu kutupeela amaka pakuti twazizimizya intazi zyonsi zino tukakwata. Tungasininkizya ukuti Yeova alatwazwa nupya alatupaala.—Yele. 17:7, 8.
TUTANGA TUVWIKISHE NINGO VINO YEOVA WATUMANYA
16. Ukulingana na mazwi aaya pali Masamu 139:1-6, a mano ci yano Yeova wakwata yano tutangatuvwikishe?
16 Belengini Masamu 139:1-6. Kaumba Witu wamanya vyonsi pali sweswe. Wamanya vino tukaelenganya nu mulandu uno tukaelenganyizizya vivyo. Wamanya vino tukalanda ni vyaya umu mwenzo witu nupya wamanya vyonsi vino tukacita nu mulandu uno tukavicitila. Umwene Devedi walanzile ukuti, Yeova lyonsi waiteyanya ukutwazwa nupya akalondesha ukucita vivyo. Tukaya sana ni nsansa ukumanya ukuti Leza u wa Maka Yonsi nupya uwaumvile ivintu vyonsi, akatusakamala. Devedi watiile: “Kumanya kwa musango uwo ntange nkwiluke.”—Masa. 139:1-6.
17. U mulandu ci ungalenga citutalile ukuzumila ukuti Yeova watumanya ningo?
17 Limwi pa mulandu ni vyatucitikile, kuno twakuliile nanti vino twazumilemo uku cisila, vingalenga twatwisika ndi cakuti Yeova a Tata witu uwatutemwa nupya uwatwikako mano. Nanti limwi tungayuvwa ukuti atatutemwa nu kuti waya ukutali naswe pa mulandu ni membu zino twacisile mpiti. Nupya vikwene ali vino na Devedi wayuvwanga. (Masa. 38:18, 21) Nupya umuntu aakulonda ukusenuka nu kutandika ukucita ivintu kulingana na vino Yeova akalonda angatandika ukwelenganya ukuti, ‘Ndi cakuti Leza wamanya ningo, u mulandu ci uno angaenekela ukuti inte ukucita ivintu vino nemo nkalola ukuti vyaya sile ningo?’
18. Uzye ukumanya ukuti Yeova watumanya ningo ukucila vino twaimanya kungatwazwa uli? (Loliniko ni vikope.)
18 Tungataila ukuti Yeova watumanya ningo ukucila vino twaimanya nupya akalola ivisuma muli sweswe vino swemo tutanga tulole. Akalola vino tukaluvyanya, lelo akatuvwikisha nupya watutemwa. (Loma 7:15) Ndi cakuti twamanya ukuti Yeova akalola vino tukamuombela ukulingana na papezile amaka itu, cilalenga ukuti tutwalilile ukumuombela na ucisinka alino ni nsansa.
Yeova akatwazwa ukukomya utailo witu ukupitila muli vino watulaya nupya ukucita vii kukatwazwa ukuzizimizya intazi zino tungakwata (Lolini mapalaglafu 18-19)c
19. I vyani vino twamanya pali Yeova?
19 Twamanya ukuti Yeova ukutemwa. Tusitwisika pali cii. (1 Yoa. 4:8) Akatunena vino tulinzile ukucita na vino tutalinzile ukucita pa mulandu wakuti watutemwa nupya akalonda ukuti ivintu vyatuzipila umu umi. Twamanya ukuti Yeova akalonda ukuti tukaye nu umi wa manda pe. Ilambo lino watupeela i lilalenga ukuti tukikale manda pe. Pa mulandu wakuti Yesu watufwilile tungatwalilila ukuombela Yeova nanti cakuti tutamalililaka. (Loma 7:24, 25) Nupya twamanya ukuti “Leza waluta sana imyenzo itu nupya wamanya ivintu vyonsi.” (1 Yoa. 3:19, 20) Yeova akalola vyonsi pali sweswe, nupya wataila ukuti tungakwanisha ukucita ukulonda kwakwe.
20. I vyani ivilatwazwa ukukanasakamala sana?
20 Yeova akatunena vyonsi vino tukalondekwa ukumanya. Ukwiusha icisinka cii kukatwazwa ukukanaika sana mano uku vintu vino tutakwetipo amaka nanti vino tutamanyile nu kwika mano uku vintu ivicindame. Ukucita vii, kulalangilila ukuti twataila Yeova, “uwamanya ningo vyonsi.” (Yobo 36:4) Nanti cakuti tutanga tumanye vyonsi ndakai, uku nkoleelo tulasambilila ivintu ivingi pali Leza witu.—Kasa. 3:11.
LWIMBO NA. 104 Leza Akatupeela Umupasi wa Muzilo
a Yesu aliwe alaya pa nkoleelo ukulwisha Satana ni nsi yii iipe, fwandi tungalanda ukuti ndakai wamanya uwanda lino kulaya inkondo ya Amagedoni na lino ‘alamalila ukucimvya kwakwe.’—Kuso. 6:2; 19:11-16.
b ULONDOLOZI WA VIKOPE : Isi nu mwana yakulonga ivintu umu kacola ka kupita nako pakuti yaipekanye uku uzanzo ungacitika.
c ULONDOLOZI WA CIKOPE: Umwina aali ni ntazi akwelenganya pali vino alaya ni nsansa umu nsi ipya.