Ikasa Lyakwe Yeova Asi Liipi

1. Uzye Mose walangilile uli ukuti wataile Yeova lino watungulwile Aina Izlaeli ukufuma umu Ijipti?

PA YANTU aali nu utailo aalumbulwa umwi buku lya Aebele, paya na Mose uwali sana nu utailo. (Aeb. 3:​2-5; 11:​23-25) Walangizye ukuti wali nu utailo lino wafumizye Aina Izlaeli umu Ijipti. Atalesile ukuti Umwene uwa maka uwa Ina Ijipti na asilika yakwe ukumulesya ukucita vino Leza wamunenyile. Wataile Yeova nu kutungulula antu yakwe ukulamba Yemba Muyenzu alino nu lwanga. (Aeb. 11:​27-29) Aina Izlaeli aingi yatandike ukutwisika ndi cakuti Yeova wali nu kuyasakamala, lelo Mose wene watwalilile ukutaila Leza. Mose atatile ukutaila Leza, pano Leza wayapeelanga ivyakulya na manzi lino yali umu lwanga.a—Kufu. 15:​22-25; Masa. 78:​23-25.

2. U mulandu ci uno Leza uzizye Mose ukuti: “Uzye ikasa lyakwe Yeova iliipi sana”? (Mpendwa 11:​21-23)

² Nanti cakuti Mose wali nu utailo ukome, lino papisile umwaka onga ukufuma pano Yeova wafumizye aina Izlaeli umu Ijipti, Mose watwisike ndi cakuti Yeova wali nu kupeela Aina Izlaeli yonsi inyama. Aina Izlaeli yali aingi sana, fwandi Mose welenginye vino Yeova wali nu kupeela antu yaa yonsi inyama. Pa kwasuka vino Mose uzizye, Yeova wamwaswike ati: “Uzye ikasa lyakwe Yeova iliipi sana?” (Belengini Mpendwa 11:​21-23.) Mazwi yaa akuti “ikasa lyakwe Yeova” yakalozya uku mupasi wa muzilo wakwe Leza, nanti amaka yano akaomvya pa kucita ukulonda kwakwe. Fwandi tungati, Yeova wanenanga Mose ukuti, ‘Uzye ukulola ukuti ningafilwa ukucita vino indanda ukuti ndacita?’

3. U mulandu ci uno ukwelenganyizizya pali vino vyacitikile Mose na Ina Izlaeli kwacindamila kuli sweswe?

³ Uzye mwatala mwasakamalapo ndi cakuti Yeova alamusakamala pamwi nu lupwa lwinu muli vino mukalondekwa? Asi mulandu mwasakamalapo nanti foo, lekini tulande pali vino vyacitikile Mose alino na Ina Izlaeli aatwisike ndi cakuti Yeova wali nu kulayasakamala muli vino yalondekwanga. Nupya tumalola Malembo angatwazwa ukutaila sana Yeova ukuti alatwalilila ukutwazwa.

VINO MUNGASAMBILILA KULI MOSE NU KU INA IZLAELI

4. I vyani vyalenzile ukuti aingi yatandike ukuilizyanya ndi cakuti Yeova nu kuyasakamala muli vino yalondekwanga?

⁴ I cani calenzile Aina Izlaeli yatandike ukutwisika ndi cakuti Yeova wali nu kuyapeela vino yalondekwanga? Uluko lwa Ina Izlaeli alino ni “impendwa ikalamba iya yantu yauze” aataali Aina Izlaeli yali umu lwanga pa nsita iitali. (Kufu. 12:38; Malan. 8:15) Antu yaa yatandike ukuilizyanya pali mana ino yalyanga, kumwi sile na Ina Izlaeli nayo yatandike ukuilizyanya. (Mpe. 11:​4-6) Antu yatandike ukuluuka ivyakulya vino yalyanga umu Ijipti. Pa mulandu wakuti antu yatandike ukuilizyanya kuli Mose, Mose watandike ukwelenganya ukuti aliwe walinzile ukuyapeela vino yalondanga.—Mpe. 11:​13, 14.

5-6. I vyani vino tukusambilila kuli vino antu aatali Aina Izlaeli yalenzile Aina Izlaeli ukulayakolanya?

⁵ Antu aatali Aina Izlaeli yatataizyanga pa visuma vino Yeova wayacitilanga, fwandi na Ina Izlaeli nayo yatandike ukuyakolanya. Ivya musango uu naswe kwene vingatucitikila ndi cakuti tukuzanwa na antu asitaizya, tungata ukulataizya pa vintu vino Yeova akatupeela. Vii vingacitika ndi cakuti twatandika ukuluuka ivintu vino twakweti uku cisila nanti ukuya nu uzuwa pali vino yauze yakwata. Lelo, tulaya ni nsansa ndi cakuti tukuteeka umwenzo kuli vino tukweti asi mulandu na vino ivintu vili umu umi witu.

⁶ Aina Izlaeli yalinzile ukwiusya vino Yeova wayalavile ukuti ndi cakuti yafika umu Mpanga ya Ulayo, yali nu kuipakizya ivintu ivingi sana. Vino wayalavile vyali nu kufikiliziwa umu Mpanga ya Ulayo, asi lino yapitanga umu lwanga. Naswe kwene tutalinzile ukulaelenganya sana pa vintu vino tutanga tukwate, lelo tulinzile ukulaelenganya pa vintu vino Yeova watulaya vino tulakwata umu nsi ipya. Nupya tungelenganya na pa malembo angatwazwa ukutaila sana Yeova.

7. U mulandu ci uno tungasininkizizya ukuti ikasa lyakwe Yeova asi liipi?

⁷ Nomba limwi mungelenganya ukuti, u mulandu ci uno Yeova uzizye Mose ukuti: “Uzye ikasa lyakwe Yeova iliipi sana?” Yeova afwile wazwanga Mose ukwelenganya pa maka yano wakwata na pali vino ikasa lyakwe ilya maka lingaomba. Nanti cakuti Aina Izlaeli yali umu lwanga, Yeova wakweti amaka akuyapeela inyama izingi. Leza “waomvizye ikasa lya maka nupya ilikonzoloke,” pa kwazwa antu yakwe. (Masa. 136:​11, 12) Fwandi ndi cakuti twakwata intazi, tutalinzile ukutwisika ukuti ikasa lyakwe Yeova lilatwazwa ngu muntu wenga na wenga.—Masa. 138:​6, 7.

8. I vyani ivilatwazwa ukukanacita vino antu aingi yacisile lino yali umu lwanga? (Loliniko ni cikope.)

⁸ Patalengiile Yeova wayapeezile inkwale izingi sana. Nomba Aina Izlaeli yatataizye pa cizungusyo cii cino Yeova wayacitile. Lelo aingi yalondesyanga ukukwata inkwale izingi ukucila na pali zino yalondekwanga. Pa wanda onga na afu yalemanga inkwale ukulingana na vino yakulonda. Yeova wasokiile yayo “aali na ukaitemwe” nupya wayafulwile. (Mpe. 11:​31-34) Tungasambililako kuli vii ivyacitiike. Tulinzile ukucenjela pakuti tutaya na ukaitemwe. Nampo nga sweswe akankala nanti apina, tulinzile ‘ukusungila ivyuma vitu ukwi yulu’ ukupitila umu kukomya ucuza witu na Yeova alino na Yesu. (Mate. 6:​19, 20; Luka 16:9) Ndi cakuti twacita vivyo tungasininkizya ukuti Yeova alatupeela vino tukalondekwa.

9. I vyani vino tungasininkizya pali vino Yeova akatusakamala?

⁹ Yeova waiteyanya ukwazwa antu yakwe ndakai. Lelo cii cisipiliula ukuti tutalatala tuulizyepo impiya nanti ivyakulya.b Nomba Yeova atalatala ate ukutusakamala. Lyonsi alatwalilila ukutwazwa ndi cakuti twakwata intazi. Uzye tungalanga uli ukuti twataila ukuti Yeova alatusakamala? Lekini tulande pa nzila ziili: (1) lino tukulonda incito iya kuomba pakuti twasakamala amu lupwa lwitu na (2) lino tukwelenganya pali vino ivintu vilaya nga twakota.

LINO TUKULONDA INCITO

10. Iintazi ci zino tungakwata?

¹⁰ Lino tukuya tukupalamila uku mpelelekezyo ya nsi yii, tulinzile ukwenekela ukuti ivintu vilatalilako sile pa mulandu ni vikanza vya miteekele, inkondo, ivilundumusi, nanti ivikuko. Incito ingasila ukwaula ukwenekela, tungaponzya vino twakwata, nanti ukufuma uku ncende kuno tukaikala nupya vii vingalenga citutalile ukusakamala ulupwa lwitu muli vino lukalondekwa. Limwi tungalondekwa ukulonda incito yuze nanti ukukukila uku ncende yuze pakuti twasakamala ulupwa lwitu. I vyani ivilatwazwa ukupingula pa vintu ivilalangilila ukuti twataila Yeova?

11. I vyani ivingamwazwa ndi cakuti mukuulizya impiya? (Luka 12:​29-31)

¹¹ Cacindama sana ukunena Yeova intazi zino mukweti nupya ukucita vii kulamwazwa sana. (Mapi. 16:3) Mwamulenga ukuti amupeele mano akumwazwa ukupingula ningo pa vintu alino nu kumwazwa ‘ukukanasakamikwa’ pali vino vikumucitikila. (Belengini Luka 12:​29-31.) Mwamupapata ukuti amwazwa ukuteeka umwenzo kuli vino mukweti. (1 Tim. 6:​7, 8) Mwalondelezya umu mpapulo zitu pali vino mungacita ndi cakuti mwakwata intazi iya kuulizya impiya. Antu aingi yakalanda ukuti mavidyo alino ni vipande ivyaya pa jw.org ivikalanda pa mpiya vyayazwa sana.

12. A mauzyo ci angazwa Umwina Klistu ukupingula ningo pa vintu ivingazipila ulupwa lwakwe?

¹² Yamwi yakazumila ukulaomba incito iikalondekwa ukuti yasye ulupwa lwao nu kuya umu kuombela ukutali, nomba aingi aakacita vii yakaiza iiluka ukuti vino yapingwilepo vitaali ningo. Lino mutatala mwatandika ukuomba incito imwi mutaelenganya sile pa mpiya zino mulakwata, lelo mwaelenganya na pali vino incito iyo ilalenga ukapepa winu na Yeova ukuya. (Luka 14:28) Mulinzile ukuyuzya ukuti: ‘I cani icingacitika uku cupo cane ndi cakuti nasya uwane pa nsita itali? Uzye indakwanisya ukulazanwa umu kulongana konsi, ukulasimikila, alino nu kukwata insita iya kuzanwa pamwi na ina na ya nkazi?’ Ndi cakuti mwakwata ana, namwe kwene mulinzile ukuyuzya ukuti: ‘Uzye ndaazwa ana yane ukupalama kuli Yeova alino nu kulamuvwila, ndi cakuti insi nayo?’ (Efes. 6:4) Mwacita ivintu wakwe vino Yeova akaelenganya, mutalondela vino ya lupwa lwinu nanti ya cuza inu aatacindika masunde yakwe Yeova yakumunena.c Ya Tony aakaikala uku Asia, yayalavile ukuinjizya incito izingi uku mpanga yuze kuno yali nu kulafola impiya izingi. Pa cisila ca kupepelapo nu kulanzyanya na aci yao, yapingwilepo ukukana ingila incito zii, lelo yapingwilepo ukukana sumba impiya izingi pa kukala ivintu. Ya Tony yatiile: “Nakwata isyuko ilya kwazwa antu aingi ukumanya Yeova, nupya ana itu yatemwa ukuombela Yeova. Nemo na amu lupwa lwane twasambilila ukuti ndi cakuti tukulondela amazwi aaya pali Mateo 6:​33, Yeova alatwalilila ukutwazwa.”

LINO TUKWELENGANYA PALI VINO IVINTU VILAYA NDI CAKUTI TWAKOTA

13. I vintu ci vino tulinzile ukucita ndakai pakuti tukaisakamala muli vino tukulondekwa uku nkoleelo?

¹³ Tungalanga ukuti twataila Yeova lino tukwelenganya pali vino ivintu vilaya ndi cakuti twakota. Baibo ikatukomelezya ukuti tulinzile ukulaombesya pakuti tukaisakamala uku nkoleelo. (Mapi. 6:​6-11) Cazipa ukulasungako ulupiya lumwi ulungiza lutwazweko uku nkoleelo. Impiya zikacingilila umu vintu vimwi. (Kasa. 7:12) Nomba tutalinzile ukuleka ukulonda impiya kuye ali cintu icicindamisye umu umi witu.

14. U mulandu ci uno tulinzile ukwelenganyizizya pa mazwi aaya pa Aebele 13:5 lino tukupekanya pali vino tulaikala uku nkoleelo?

¹⁴ Yesu walanzile pa cilangililo ca muntu umuwelewele uwasunzile impiya ukwaula ukuti aye “umukankala kuli Leza.” (Luka 12:​16-21) Kutaya uwamanya vino uwanda wa mutondo ulaya. (Mapi. 23:​4, 5; Yako. 4:​13-15) Naswe kwene swe yalondezi yakwe Klistu tukakwata intazi. Yesu walanzile ati tulinzile ukusya vyonsi vino twakwata pakuti tuye asambi yakwe. (Luka 14:33) Aina Klistu aakutandikilapo aali umu Yudeya yaitemilwe ukucita vikwene. (Aeb. 10:34) Ndakai, aina aingi yayazinga incito pa mulandu wakuti yakana ukuika umu vikanza vya miteekele. (Kuso. 13:​16, 17) I vyani ivyayazwa ukucita vivyo? Yataila sana vino Yeova watulaya ukuti: “Ntalakusya, nupya ntalatala nkutazyele.” (Belengini Aebele 13:5.) Tukaombesya ukulingana na pano tungapezya ukupekanya vino tulaikala uku nkoleelo, nupya ivintu ivyaula ukwenekela nga vyatucitikila tukataila ukuti Yeova amatwazwa.

15. Uzye avyazi Aina Klistu yalinzile ukulalola uli ana yao? (Loliniko ni cikope.)

¹⁵ Umu ncende zimwi, antu yakalonda ukukwata ana pakuti yace yayasakamala uku nkoleelo ndi cakuti yakota. Baibo ikalanda ukuti avyazi yalinzile ukulasakamala ana yao muli vino yakalondekwa. (2 Kol. 12:14) Ukuya kwene ndi cakuti avyazi yakota, yangalondekwa ukuti ana yao yayazwa muli vino yakulondekwa nupya ana yao yakauvwa ningo ukucita vivyo. (1 Tim. 5:4) Lelo avyazi ataila Yeova yamanya ukuti yangaya sana ni nsansa ndi cakuti yazwa ana yao ukulaombela Yeova, ukucila ukulakuuzya ana ala yakwelenganya ukuti aliyo yalayepeela impiya izya kukalilamo vino yakulondekwa.—3 Yoa. 4.

16. Uzye avyazi yangazwa uli ana yao pakuti yace yaisakamala muli vino yalalondekwa? (Efeso 4:28)

¹⁶ Mwasambilizya ana inu ukutaila Yeova alino nu kulaisakamala aineco muli vino yakalondekwa ukupitila muli vino mukacita. Mwayasambilizya umulandu uno cacindamila ukuombesya ala yacili ance. (Mapi. 29:21; belengini Efeso 4:28.) Lino yakuya yakukula, mwayazwa ukulaombesya mu vya ku sukulu. Avyazi Aina Klistu yakacita ningo ndi cakuti yakulondelezya alino nu kuomvya ivisinte vya muli Baibo lino yakwazwa ana ukuomvya masambililo yano yasambilila, pakuti yaisakamala aineco alino nu kulaombako umulimo wa kusimikila.

17. I vyani vino tungasininkizya?

¹⁷ Aomvi yakwe Yeova acisinka yataila ukuti alayasakamala muli vino yakalondekwa. Lino tukupalamila uku mpelelekezyo ya nsi yii, tulinzile ukwenekela ukuti utailo witu muli Yeova ungeziwa. Asi mulandu ni vingatucitikila, tungataila ukuti Yeova alaomvya amaka yakwe ukutupeela vino tukalondekwa. Tungataila ukuti Yeova alatwalilila ukutwazwa asi mulandu na kuno tuli.