“Soololini . . . Wino Mumaombelanga.”

1. I vyani vino tulinzile ukucita pakuti tuye ni nsansa izya cumi, nupya u mulandu ci? (Ezaya 48:​17, 18)

TATA witu uwa kwi yulu watutemwa sana, nupya akalonda ukuti twaipakizya umi ndakai alino nu ku nkoleelo. (Kasa. 3:​12, 13) Watuumvile na maka akucita ivintu ivyakuzungusya, lelo atatupeezile amaka yaa pakuti twaitungulula nanti ukulaisoolwela icisuma ni ciipe. (Kasa. 8:9; Yele. 10:23) Wamanya ukuti pakuti tuye ni nsansa izya cumi, tulinzile ukulamuombela nu kulondela masunde yakwe.—Belengini Ezaya 48:​17, 18.

2. I vyani vino Satana akalonda tutaile, nupya i vyani vino Yeova wacitapo?

² Satana akalonda tutaile ukuti tutange tuye ni nsansa ndi cakuti Yeova akututungulula, lelo akalonda tutaile ukuti tungaya ni nsansa ndi cakuti tukuitungulula. (Utan. 3:​4, 5) Pakuti Yeova asinile Satana ukuti uwa ufi, wazumilizya antu ukulaiteeka pa ciputulwa ca nsita imwi. Twailolela ukuti antu yafilwa ukuiteeka. Lelo Baibo yalanda pa aonsi na anaci aali ni nsansa lino yaombelanga Yeova. Pa yantu aali sana ni nsansa ukucita vivyo a Yesu Klistu. Lekini tulande pali vino vyalenzile ukuti Yesu asoololepo ukuombela Yeova. Lyene tumasambilila nu mulandu uno tulinzile ukulapepa Yeova. Nu mu kusyalikizya, tumalanda pa vintu ivyalenga tusoololepo ukulaombela Yeova.

IVYALENZILE UKUTI YESU ASOOLOLEPO UKUOMBELA YEOVA

3. I vyani vino Satana walondanga ukupeela Yesu, nupya i vyani vino Yesu wasoolwile ukucita?

³ Lino Yesu wali pano nsi, wali nu kusoololapo wino wali nu kulaombela. Pa cisila cakuti Yesu wabatiziwa sile, Satana wanenyile Yesu ukuti wali nu kumupeela Mawene yonsi aa pano nsi ndi cakuti wamupepako sile umuku onga. Yesu wamwaswike ati: “Fuma pano, Satana! Pano calembwa ukuti: ‘Yeova Leza wako ali wino ulinzile ukupepa, nupya wenga sile awino ulinzile ukuombela.’” (Mate. 4:​8-10) U mulandu ci uno Yesu wasoolwilepo ukucita vii? Lolini imilandu imwi iyalenzile.

4-5. I vyani vimwi ivyalenzile ukuti Yesu asoololepo ukulaombela Yeova?

⁴ Umulandu ucindame sana uwalenzile ukuti Yesu asoololepo ukuombela Yeova u wakuti watemilwe sana Isi. (Yoa. 14:31) Nupya Yesu waombelanga Yeova pano ali cintu campomvu ukucita. (Yoa. 8:​28, 29; Kuso. 4:11) Wamanya ukuti Yeova ali Ntulo ya umi, u wa kutailwa nupya waya na ukapekape. (Masa. 33:4; 36:9; Yako. 1:17) Vyonsi vino Yeova wanenanga Yesu i vya cumi nupya aliwe wamupeezile vyonsi vino wakwata. (Yoa. 1:14) Lelo Satana wene wapusanako na Yeova, wene walenga ukuti antu yayembuka nu kufwa. Wene u wa ufi nupya waya na ukaitemwe. (Yoa. 8:44) Ukwiusya vii kwalenzile ukuti Yesu ataelenganya pa kukolanya Satana nu kupondokela Yeova.—Filipi 2:​5-8.

⁵ Umulandu nauze uwalenzile Yesu asoololepo ukulaombela Yeova, welenginye pa visuma ivyali nu kucitika ndi cakuti watwalilila ukuya uwa cisinka kuli aliwe. (Aeb. 12:2) Wamanyile ukuti nga watwalilila ukuya uwa cisinka, wali nu kulenga izina lyakwe Isi ukucindikwa alino nu kulenga uluyembu ni mfwa ukufumiziwapo.

MULANDU UNO TULINZILE UKULAPEPA YEOVA

6-7. U mulandu ci uno antu aingi ndakai yasiombela Yeova, lelo u mulandu ci uno tulinzile ukulamupepela wenga sile?

⁶ Antu aingi ndakai yasiombela Yeova pa mulandu wakuti yatamumanya nupya yatamanya ni vintu ivisuma vino wayacitila. Vikwene ali vino cali nu ku yantu yano Paulo wasimikile umu Atena.—Mili. 17:​19, 20, 30, 34.

⁷ Paulo walondolwelile antu aakutikanga kuli aliwe ukuti Leza “akapeela antu yonsi umi nu muza alino ni vintu vyonsi.” Nupya watiile: “Aliwe walenga kuti tuye nu umi, kuti twapita nu kuti tuyeko.” Leza a Kaumba, nupya “umu muntu wenga amuno wapangiile antu amu nko zyonsi,” fwandi u walinga ukupepwa wenga sile.—Mili. 17:​25, 26, 28.

8. I vyani vino Yeova atalacita? Londololini.

⁸ Pa mulandu wakuti Yeova a Kaumba nupya Kateeka wa nsi yonsi, nga akulonda angatupatikizya ukuti twamuombela. Nomba atalatala acite vivyo. Lelo watupeela usininkizyo wakuti akuno waya nu kuti watutemwa swensi wenga na wenga. Akalonda ukuti antu aingi yaye ya cuza yakwe amanda pe. (1 Tim. 2:​3, 4) Ali mulandu uno Yeova watusambilizizya ukuti twasambilizyako yauze pa vintu ivisuma vino alacitila antu na pali vino alacita vivyo. (Mate. 10:​11-13; 28:​19, 20) Nupya watupeela icilongano muno tukamupepela alino na ya eluda aakatusakamala.—Mili. 20:28.

9. U mu nzila ci muno Yeova walangilamo ukuti watemwa antu yonsi?

⁹ Yeova walanga ukuti waya nu kutemwa ukupitila umu kupeela antu ivintu ivisuma kumwi sile na yayo azumila ukuti ataayako. Elenganyini pa visinka vii: Ukufuma na mpiti, antu yakapingulapo ukulingana na vino yakulola ukuti ali cisuma ni ciipe ukucila ukuvwila Yeova. Nanti ciye vivyo, Yeova akayapeela vino yakalondekwa pakuti yaye nu umi nu kulaipakizya. (Mate. 5:​44, 45; Mili. 14:​16, 17) Walenga ukuti yakwate ivyuza, ukukuzya ulupwa, alino nu kuipakizya ivisuma ivikafuma umu kuombesya kwao. (Masa. 127:3; Kasa. 2:24) Ivintu vii vyonsi vikalangilila ukuti Tata witu uwa kwi yulu watemwa antu yonsi. (Kufu. 34:6) Lekini lyene tulande pa vintu ivikalenga ukuti tusoololepo ukulamuombela na vino alalambula yayo aakamuombela.

UMULANDU UNO TWASOOLWELAPO UKULAOMBELA YEOVA

10. (a) U mulandu ci ucindame uno tulinzile ukulaombela Yeova? (Mateo 22:37) (b) I visuma ci vino mwaipakizya pa mulandu wakuti Yeova wateekela? (Masamu 103:​13, 14)

¹⁰ Wakwe Yesu, naswe kwene tukaombela Yeova pa mulandu wakuti twamutemwa sana. (Belengini Mateo 22:37.) Tukapalama sana kuli Yeova ndi cakuti twasambilila pa miyele yakwe. Wakwe, elenganyini pali vino Yeova watuteekelela. Lino Aina Izlaeli yafizilwe ukumuvwila wayapapasile ati: “Tiini ukucita iviipe nupya musenuke muli vino mukacita.” (Yele. 18:11) Yeova akaiusya ukuti tutamalilika nupya sweswe lukungu. (Belengini Masamu 103:​13, 14.) Ndi cakuti twelenganya pali vino Yeova wateekela na pa miyele yuze ino wakwata, tukakomeleziwa ukutwalilila ukulamuombela.

11. I vyani vimwi ivyalenga ukuti tusoololepo ukulaombela Tata witu uwa kwi yulu?

¹¹ Nupya twasoololapo ukulaombela Yeova pa mulandu wakuti ali cintu campomvu ukucita. (Mate. 4:10) Nupya twamanya ivisuma ivilacitika ndi cakuti twatwalilila ukuombela Yeova na ucisinka. Ndi cakuti tuli acisinka lino tukuombela Yeova, tukalenga izina lyakwe ukucindikwa, tukasinila Satana ukuti u wa ufi, nupya tukazanzya Tata witu. Nupya ndi cakuti twasoololapo ukulaombela Yeova ndakai, tukakwata upaalilo uwa kwikala amanda pe.—Yoa. 17:3.

12-13. I vyani vino tukusambililako ku vyacitikile ya Jane na ya Pam?

¹² Lino tucili ance, tungasambilila ivya kutemwa Yeova, nupya tungaya tukumutemelwako lino tukuya tukukula. Elenganyini pali vino ivyacitikile nkazi Jane na nkazi muze Pam.a Ya Jane yali ni myaka 11 alino ya Pam yali na 10 lino yatandike ukusambilila Baibo. Nanti cakuti avyazi yao yatalondanga ukusambilila, yazumilizye ya Jane na ya Pam ukulasambilila Baibo na Ya Nte Yakwe Yeova, cikulu sile yakuzanwa uku ceici pamwi na ya lupwa lwao. Ya Jane yatiile: “Vino Ya Nte Yakwe Yeova yansambilizye muli Baibo vyangazwile ukukana omvyako imilembo iikavulunganya uwongo alino nu kucitako uzelele.”

¹³ Lino papisile imyaka imwi, yonsi yoili izile iyaya ya kasimikila. Lyene izile iyatandika upainiya ala yakusakamala avyazi yao akote. Ya Jane yalanzile pali vino vyayacitikile ukuti: “Nasambilile ukuti Yeova akasakamala ya cuza yakwe aaya na ucisinka nu kuti ‘Yeova wamanya antu yakwe,’ wakwe vino 2 Timoti 2:19 ikalanda.” Ukwaula nu kutwisika, Yeova akasakamala yayo amutemwa nupya aakamuombela.

14. Uzye tungavwangilako uli Yeova ukupitila muli vino tukacita na vino tukalanda? (Loliniko ni cikope.)

¹⁴ Tukalonda antu ukumanya ukuti iviipe vino yuvwa pali Leza asi vya cumi. Elenganyini pali cii: Tuti mwakwata cuza winu umupalamisye uwaya ni cikuuku nupya akaelela. Wanda umwi, muvwa umuntu umwi akubepezya cuza winu ukuti u munkalwe nupya ataya ni cisinka. I vyani vino mungacita? Mungamuvwangilako. Vikwene ali vino tukacita ndi cakuti tuvwa antu yakulanda ivya ufi pali Yeova, tukamuvwangilako nu kulanda ivya cumi pali Aliwe. (Masa. 34:1; Eza. 43:10) Tukalanga ukuti tukalonda ukuombela Yeova nu mwenzo onsi ukupitila muli vino tukalanda na vino tukacita.

15. I visuma ci vino Paulo waipakizye lino wasenwike pakuti aombesya umu mulimo wakwe Leza? (Filipi 3:​7, 8)

¹⁵ Tukaitemelwa ukusenukako muli vimwi pakuti twaombesya umu mulimo wakwe Yeova. Wakwe, umutumwa Paulo wasoolwilepo ukusya icifulo cino wakweti umu mipepele ya Yayuda pakuti alondela Klistu alino nu kuombela Yeova. (Gala. 1:14) Ni vyacitike i vyakuti, waipakizye ivintu visuma umu mulimo wakwe Yeova nupya alateeka pamwi na Yesu ukwi yulu. Atalangulwike pali vino wasoolwilepo ukuombela Yeova, nupya naswe kwene tutalalanguluka.—Belengini Filipi 3:​7, 8.

16. I vyani vino tukusambililako kuli vino vyacitikile ya Julia? (Loliniko ni vikope.)

¹⁶ Ndi cakuti twika mano uku kuombela Yeova, tungaipakizya ivintu ivingi sana ndakai alino nu ku nkoleelo. Elenganyini pali vino vyacitikile nkazi Julia. Lino ya Julia yatatala yasambilila icumi, imbanga inyimbo uku ceici ala yacili kakazyana. Imbanga ningo sana icakuti yatandike ukuyasambilizya pakuti yakaye ya kimba amanyikisya ivya kwimba. Patalengile, ya Julia izile iyamanyikwa sana nupya imbanga umu vikulwa ivyamanyikwa sana. Lino yasambililanga apa sukulu lyakwe ya kimba, ka sukulu muze watandike ukulanda nayo pali Leza nupya wayalondolwelile ukuti izina lyakwe Leza, a Yeova. Patalengile, ya Julia yatandike ukusambilila Baibo imiku iili umu mulungu. Lino papisile insita izile iyasoololapo ukulaombela Yeova ukucila ukwika mano uku kwimba. Citangwike ukucita vii. Yatiile: “Antu aingi yanenanga ukuti ukonona isyuko lino wakwata, lelo nalondanga ukuomvya umi wane uku kuombela Yeova umu mulimo wa nsita yonsi.” Uzye yakauvwa uli pali vino yapingwilepo ukucita imyaka 30 uku cisila? Yatiile: “Naya nu mutende, nupya nataila Yeova ukuti alampeela vino umwenzo wane ukalonda.”—Masa. 145:16.

MWATWALILILA UKUOMBELA YEOVA

17. Uzye ukumanya ukuti tukwikala umu manda ampelelekezyo ya nsi, kwakuma uli yayo asoololapo ukulaombela Yeova na yayo atatala yasoololapo?

¹⁷ Tukwikala umu manda ya mpelelekezyo ya nsi yii. Umutumwa Paulo walemvile ati: “Pano ‘kwasyala sile insita inono,’ nupya ‘aakwiza alafika ukwaula ukucelwa.’” (Aeb. 10:37) Uzye vii vyatukuma uli? Insita iyatisyala iyakuti antu yasoololepo ukulaombela Yeova iticepa. (1 Kol. 7:29) Nupya ndi cakuti twasoololapo mpiti ukulaombela Leza, twamanya ukuti tulinzile ukulazizimizya intazi, lelo apa ‘insita sile inono.’

18. I vyani vino Yesu na Yeova yakalonda twacita?

¹⁸ Yesu wakomelizye antu ukuya asambi yakwe nu kutwalilila ukulamulondela. (Mate. 16:24) Fwandi ndi cakuti ipapita imyaka iingi ukufuma pano twatandikile ukuombela Yeova, tulinzile ukutwalilila nupya tutalinzile ukutoovoka. Tulinzile ukuombesya pakuti tutwalilile ukuombela Yeova. Citanguka ukucita vivyo, lelo tungaya ni nsansa alino nu kuipakizya umi lino tukumuombela ndakai.—Masa. 35:27.

19. I vyani vino tukusambilila kuli vino vyacitikile Gene?

¹⁹ Yamwi yakaelenganya ukuti ndi cakuti yakuombela Yeova yatanga yaipakizya umi. Ndi cakuti mwemwe acance, uzye mukayuvwa ukuti mukuipusula ku vintu vimwi ndi cakuti mukuombela Yeova? Gene, umwina uwacance watiile: “Nayuvwanga ukuti ukuya Inte Yakwe Yeova kwalenganga naipusula ukucitako ivintu vimwi. Calolekanga kwati ance aingi yano nakulilanga pamwi nayo yaipakizyanga ivintu ivingi, wakwe ukucina, ukwizizyanya, nanti ukuteya ivyangalo umwaya unkalwe lino nemo naomvyanga insita yane ukuya umu kulongana alino nu mu mulimo wa kusimikila.” Uzye vino welenganyanga vyalenzile acite vyani? Watiile: “Natandike ukucitako iviipe vimwi vino acance yanji yacitanga. Lelo vitalenganga naya ni nsansa zya cumi. Natandike ukwelenganya pa visuma ivyaya umu kuvwila vino Baibo ikalanda nupya napingwilepo ukulaombela Yeova nu mwenzo wane onsi. Ukufuma liili kwene, nailolela ukuti Yeova waswike mapepo yane yonsi.”

20. I vyani vino tukulondesya ukulacita?

²⁰ Kalemba wa masamu wimvile ati: “Uwa nsansa u muntu wino ukasoolola nu kupalamika pakuti aikala umu misolo yako.” (Masa. 65:4) Lekini tutwalilile ukulaombela Yeova, wakwe vino Yoswa wacisile lino watiile: “Lelo nemo na amu ng’anda yane, twakulaombela Yeova.”—Yoswa 24:15.