Tutaya Swenga

1-2. (a) U mulandu ci uno tungalandila ukuti nga twakwata intazi tusiya swenga? (b) I vyani vino tumasambilila umu cipande cii?

NDI cakuti twakwata intazi izitale, limwi tungayuvwa ukuti tuli umu mpanga nupya ituponga ukwa kuya. Nanti ciye vivyo, tusiya swenga. Tata witu uwa kwi yulu akalola intazi zino tukakwata nupya watulaya ukuti alatwazwa. Yeova walaya aomvi yakwe aaya na ucisinka ukuti: “Namamwavwanga.”—Eza. 41:10.

² Umu cipande cii, tumasambilila pali vino Yeova (1) akatutungulula, (2) akatupeela vino tukulondekwa, (3) akatucingilila, na (4) pali vino akatuteekezya. Yeova watulaya ukuti atalatwilila, asi mulandu ni ntazi zino tungakwata. Atalatutazyela. Fwandi tusiya swenga foo.

YEOVA AKATUTUNGULULA

3-4. Uzye Yeova akatutungulula uli? (Masamu 48:14)

³ Belengini Masamu 48:14. Yeova asitwenekela ukuti twaitungulula. Uzye akatungulula uli ya kapepa yakwe acisinka ndakai? Inzila yonga ino ikatutungulwilamo u kuomvya Baibo. (Masa. 119:105) Yeova akaomvya Izwi lyakwe pa kutwazwa kuya ni miyele isuma alino nu kupingula ningo pa vintu ivikalenga tuye ni nsansa ndakai alino nu umi wa manda pe ku nkoleelo.a Wakwe, akatusambilizya ivya kwelela yauze nu kukana twalilila ukuya asoke, ukuya acisinka muli vyonsi vino tukacita, alino nu kutemwa yauze nu mwenzo witu onsi. (Masa. 37:8; Aeb. 13:18; 1 Pet. 1:22) Ndi cakuti twaya ni miyele yii, cilalenga ukuti tuye avyazi asuma, iya nanti umuci umusuma, alino na ya cuza asuma.

⁴ Muli Baibo, Yeova akatunena pali vino vyacitikile antu akweti intazi wakwe sweswe nupya ayuvwile wakwe vino tukayuvwa. (1 Kol. 10:13; Yako. 5:17) Lino tukubelenga malyasi pa yantu yaa nu kuomvya vino tukusambililako, vikatwazwa umu vintu viili. Ica kutandikilapo, kukatwazwa ukumanya ukuti tutaya swenga, na yauze yakweti intazi wakwe zino tukakwata nupya yazizimizye. (1 Pet. 5:9) Cakwe ciili, tukasambililako ivya kuzizimizya intazi.—Loma 15:4.

5. Aa weni yano Yeova akaomvya pa kututungulula?

⁵ Nupya Yeova akaomvya aina na ya nkazi pa kututungulula.b Wakwe angalizi ya viputulwa yakatandalila ivilongano lyonsi nu kutukomelezya. Malyasi yano yakalanda yakakomya utailo witu alino nu kutwazwa ukutwalilila ukuya alemane. (Mili. 15:40–16:5) Ya eluda nayo yakaombesya ukwazwa kasimikila wenga na wenga ukupalama kuli Yeova. (1 Pet. 5:​2, 3) Avyazi yakaazwa ana yao muli vyakwe Leza, ukuyazwa ukuya na mano alino nu kuya ni miyele isuma. (Mapi. 22:6) Nupya ya nkazi akula muli vyakwe Leza yakacita vino ya nkazi acance yangakolanya, yakayapandako mano alino nu kuyakomelezya.—Tito 2:​3-5.

6. I vyani vino tulinzile ukucita pakuti Yeova atutungulula?

⁶ Yeova watupeela utunguluzi uno tukalondekwa. Uzye tungalanga uli ukuti tukataizya pali vino watucitila? Pa Mapinda 3:​5, 6 pakalanda ukuti: “Uwataila muli Yawe nu mwenzo wako onsi, utaezya ukutaila amano yako foo.” Ndi cakuti twacita vivyo, ‘alalenga inzila zitu ukuya izyololoke,’ kuli kuti alatwazwa ukukanacita ivintu ivingalenga tuye ni ntazi nupya tulaya ni nsansa umu umi. Tukataizya pali vino Yeova watumanya ningo, pali vino watutemwa, na pali vino akatupandako mano lino tukulondekwa uwazwilizyo.—Masa. 32:8.

YEOVA AKATUPEELA VINO TUKULONDEKWA

7. Iinzila ci zimwi zino Yeova akatusakamalilamo? (Filipi 4:19)

⁷ Belengini Filipi 4:19. Ukulunda pa kutwazwa muli vyakwe Leza, Yeova akatwazwa muli vino tukaombesya pakuti tuzane ivyakulya, ivyakuzwala, alino nu mwakwikala. (Mate. 6:33; 2 Tesa. 3:12) Ukuya kwene caya sile ningo ukusakamala pa vintu vii vino tukalondekwa, lelo Yeova asilonda twasakamala sana pa vintu vii. U mulandu ci? Pano Tata witu atalatala atazyele ya kapepa yakwe acisinka pa nsita ino yakulondekwa uwazwilizyo. (Mate. 6:8; Aeb. 13:5) Fwandi tungamutaila pali vino walanda ukuti alatusakamala muli vino tukalondekwa.

8. I vyani vino Yeova wacitiile Devedi?

⁸ Elenganyini pali vino Yeova wazwile Devedi. Pa myaka itale lino Devedi utukanga Umwene Saulo, Yeova wamusakamalanga nu kusakamala aonsi yano wali nayo muli vino yalondekwanga pakuti yangatwalilila ukuya nu umi. Lino Devedi welenginye pali vino Yeova wamusakamalanga pa nsita iya, watiile: “Nali umwance nomba lyene inkota lelo ntatala nalola umulungami ali wensi watazyelwa, nanti ana yakwe yakulenga ivyakulya.” (Masa. 37:25) Wakwe Devedi, namwe kwene mufwile mwailolela vino Yeova wamusakamile nanti vino wasakamile aina na ya nkazi lino yalondekwanga uwazwilizyo.

9. Uzye Yeova akasakamala uli antu yakwe ndi cakuti kwacitika uzanzo? (Loliniko ni vikope.)

⁹ Nupya Yeova akasakamala antu yakwe lino kwacitika uzanzo. Wakwe, lino kwali icipowe umu Yelusalemu umu manda ya Ina Klistu aakutandikilapo, aina ukufuma umu mpanga zyuze yatumile aina ivintu vino yalondekwanga. (Mili. 11:​27-30; Loma 15:​25, 26) Na ndakai kwene antu yakwe Leza yakalanga ukuti yaya na ukapekape. Wakwe, ndi cakuti kwacitika uzanzo, Yeova akalenga antu yakwe ukwazwilizya yayo atiyaponelwa na mazanzo muli vino yakulondekwa, ivili wa vyakulya, manzi, alino nu mulembo. Aakaombela umu makuule yakazifya mang’anda alino na Mang’anda ya Wene atiyononeka. Nupya aomvi yakwe Yeova yakakomelezya nu kuteekezya yayo atiyaponzya mang’anda yao nanti atemwikwa yao.c

10-11. I vyani vino mukusambililako kuli vino vyacitikile ya Borys?

¹⁰ Yeova akasakamala na yayo atatala yatandika ukumuombela. Tukakolanya Yeova nu kulondako inzila zino tungalangilamo icikuuku kuli yayo aasimuombela. (Gala. 6:10) Ndi cakuti tukucita vii, limwi tungayazwa ukusambilila ivingi pali sweswe alino na pali Yeova. Elenganyini pali vino vyacitikile ya Borys, ya mwalimu aakalamba api sukulu, aakaikala uku Ukraine. Nanti cakuti ya Borys asi ya Nte, yali ni cikuuku kuli ya Nte asambililanga api sukulu lyao nupya yacindike vino yazumilamo. Lino ya Borys yasoolwilepo ukuutuka inkondo kuno ikalilanga nu kuya uku ncende ukwaliko ningo umu mpanga kwene yii, aina yayazwile. Lino papisile insita ya Borys yazanyilwe uku Ciusyo ca mfwa yakwe Klistu. Lino ya Borys yelenginye pali vino aina yayacitiile, yatiile: “Ya Nte yali sana ni cikuuku kuli nene nupya yansakamile. Nkataizya sana Ya Nte Yakwe Yeova.”

¹¹ Naswe kwene tungakolanya Tata witu uwaya nu luse lino tukulanga ukutemwa kuli yayo akulondekwa uwazwilizyo ciye aakapepa yanji nanti foo. (Luka 6:​31, 36) Tukataila ukuti ukutemwa kuno tukayalanga kulalenga ukuti yakaye asambi yakwe Klistu. (1 Pet. 2:12) Asi mulandu yatandika ukuombela Yeova nanti foo, tulaya ni nsansa izyaya umu kupeela.—Mili. 20:35.

YEOVA AKATUCINGILILA

12. Uzye Yeova walaya ukucingilila antu yakwe kuli vyani? (Masamu 91:​1, 2, 14)

¹² Belengini Masamu 91:​1, 2, 14. Ndakai, Yeova walaya aomvi yakwe ukuti alayacingilila kuli vyonsi ivingonona ucuza wao na aliwe. Atalazumilizya Satana ukulesya antu yakwe ukulamupepa ukulingana na vino akalonda. (Yoa. 17:15) Nupya lino “ucuzi ukalamba” ulatandika, tungasininkizya ukuti alafikilizya ulayo uno walaya uwakuti alacingilila antu yakwe.—Kuso. 7:​9, 14.

13. U mu nzila ci muno Yeova akatucingilila wenga na wenga?

¹³ Uzye Yeova akatucingilila uli wenga na wenga? Yeova watupeela Baibo pakuti twamanya icipe ni cisuma. (Aeb. 5:14) Ndi cakuti tukulondela ivisinte vya muli Baibo, tulaicingilila uku vintu ivingonona ucuza witu na Yeova alino nu umi witu. (Masa. 91:4) Nupya Yeova akatucingilila ukuomvya icilongano. (Eza. 32:​1, 2) Ndi cakuti tukuzanwa pamwi na antu atemwa Yeova nupya aakalondela ivisinte vya muli Baibo, tukakomeleziwa nupya tukataluka uku vintu ivingonona ucuza witu na Leza.—Mapi. 13:20.

14. (a) U mulandu ci uno Yeova asitucingilila uku ntazi zyonsi? (b) Uzye amazwi aaya pa Masamu 9:10 yakalenga tusininkizye vyani? (Loliniko na futunoti.)

¹⁴ Insita zimwi Yeova wacingililanga aomvi yakwe aaku cisila uku vintu ivyali nu kulenga umi wao ukuya umu uzanzo. Lelo asi lyonsi lino wacitanga vii. Insita zimwi ivintu ivyaula ukwenekela vingatucitikila. (Kasa. 9:11) Nupya Yeova waleka aomvi yakwe yamwi ukucuziwa nupya insita zimwi nu kufwa pakuti asinile Satana ukuti u wa ufi. (Yobo 2:​4-6; Mate. 23:34) Vikwene ivikacitika na ndakai. Nanti cakuti Yeova atanga afumyepo intazi zino tukweti, tungasininkizya ukuti Yeova atalatazyela yayo amutemwa.d—Masa. 9:10.

YEOVA AKATUTEEKEZYA

15. Uzye tungateekeziwa uli ni pepo, Izwi lyakwe Leza, alino na ina na ya nkazi? (2 Kolinto 1:​3, 4)

¹⁵ Belengini 2 Kolinto 1:​3, 4. Insita zimwi, tukalosya, ukusakamikwa, nanti ukuya nu ulanda. Ndi cakuti ivya musango uu vikumucitikila, vingalenga mwayuvwa ukuti mwaya mwenga. Uzye kuli anguvwikisya vino mukuyuvwa? Yeova akamuvwikisya. Asiuvwa sile uyi ndi cakuti tukucula lelo “aakatuteekezya umu macuzi itu yonsi.” Akacita uli vivyo? Ndi cakuti twapepa kuli Yeova ukufuma pansi ya mwenzo, akatupeela “umutende wakwe Leza, uwacila imyelenganyizizye yonsi iya yantu.” (Filipi 4:​6, 7) Nupya tukateekeziwa ndi cakuti twabelenga mazwi yakwe Yeova aaya muli Baibo. Muli Baibo Yeova watunena vino watutemwa, vino tungaya na mano, nupya watupeela upaalilo. Nupya tukateekeziwa lino tuli pa kulongana, pano tukasambiliziwa na ina na ya nkazi amazwi akukomelezya amuli Baibo.

16. I vyani vino tukusambililako kuli vino vyacitikile ya Nathan na ya Priscilla?

¹⁶ Tungalola vino Yeova akatukomelezya ukuomvya Baibo nga twelenganya pali vino vyacitikiile ya Nathan na ya Priscilla aakaikala uku United States. Imyaka inono ku cisila, yasoolwilepo ukukuukila ukwalondekwanga ya kasimikila ya Wene. Ya Nathan yatiile: “Twataile ukuti Yeova wali nu kutwazwa.” Lelo lino yafisile kuno yaile umu kuombela, izile iyakwata intazi ya kulwalilila nupya yatazanyile incito iyali nu kulayazwa muli vino yalondekwanga. Lino papisile insita, izile iyaswilila ukumwao nupya yatwalilile ukukwata intazi ya kuulizya impiya. Ya Nathan yatiile: “Nazungwile umulandu uno Yeova atatupaazile ukulingana na vino twenekelanga. Nupya natandike nu kusakamikwa ndi cakuti kwali vimwi vino naluvyanyizye.” Patalengiile, ya Nathan na ya Priscilla izile iiluka ukuti Leza atayatazyezile lino yalondekwanga uwazwilizyo. Ya Nathan yatiile: “Apa nsita iya, Baibo yali wakwe cuza witu uwatuteekezyanga nu kututungulula. Ukwika mano kuli vino Yeova watwazwanga ukucila ukwika amano uku ntazi zino twakwatanga, kwatwazwile ukusininkizya ukuti nu ku nkoleelo Yeova alatwazwa ukuzizimizya nu kutwalilila ukuya nu utailo.”

17. Uzye nkazi Helga wateekeziwe uli? (Loliniko ni cikope.)

¹⁷ Aina itu na ya nkazi nayo kwene yangatuteezya. U mu nzila ci? Elenganyini pali vino vyacitikile ya Helga, aakaikala uku Hungary. Pa myaka iingi, yakweti intazi izyalenzile yasakamikwa alino nu kuyuvwa ukuti yatacindama. Lelo nga yelenganya pali vino vyayacitikile, yakaiusya ukuti Yeova waomvizye aina na ya nkazi amu cilongano pa kuyateekezya. Yatiile: “Yeova lyonsi wangazwanga lino walolanga ukuti namatoovoka pa mulandu ni ncito ino naombanga, ukusakamala umwanane umulwale, alino ni ntazi zyuze zino nakweti. Cila wanda pa myaka 30, watwalilila ukunteekezya ukulingana na vino walaya. Yeova akankomya ukupitila umu mazwi akukomelezya yano aina na ya nkazi yakanena. Insita izingi napokelelanga mameseji, makadi, nanti mazwi akukomelezya pa nsita ino nalondekwanga ukukomeleziwa.”

18. Uzye tungateekezya uli yauze?

¹⁸ Twakwata isyuko ilya kukolanya Leza witu lino tukuteekezya yauze. Tungacita uli vivyo? Tungakutika lino yakulanda naswe, kuyanena mazwi akukomelezya, alino nu kuyazwa muli vino yakulondekwa. (Mapi. 3:27) Tukalondesya ukuteekezya antu yonsi aakacula, kumwi sile na yayo asiombela Leza. Lino aina mupalamano ya kulosya, lino iyalwala, nanti lino iyasakamikwa, tukayatandalila, kukutika kuli aliyo, nupya tukayanena mazwi akukomelezya amuli Baibo. Ndi cakuti tukukolanya “Leza aakateekezya muli vyonsi,” cilalenga ukuti twaazwa ya kapepa yanji ukuzizimizya intazi alino nu kwazwa asiombela Leza ukusambilila ivingi pali aliwe.—Mate. 5:16.

LYONSI YEOVA WAYA NASWE

19. I vyani vino Yeova akatucitila, nupya tungamukolanya uli?

¹⁹ Yeova akasakamala antu yonsi amutemwa. Asitutazyela ndi cakuti twakwata intazi. Wakwe vino umuvyazi uwaya nu kutemwa akasakamala umwana, ali vino na Yeova akasakamala aomvi yakwe acisinka. Akatutungulula, kutupeela vino tukalondekwa, kutucingilila, alino nu kututeekezya. Tukakolanya Tata witu uwa kwi yulu lino tukwazwa nu kukomelezya yauze lino yali ni ntazi. Umu nsi yii, tungakwata intazi alino nu kuya nu ulanda, lelo tungasininkizya ukuti Yeova waya naswe. Pano watulaya ukuti: “Utuvwa intete, pano indi naawe.” (Eza. 41:10) Fwandi ukwaula nu kutwisika, tungasininkizya ukuti tutaya swenga.