CIPANDE CA KUSAMBILILAMO 30
LWIMBO NA. 97 Umi Witu Wasintilila pi Zwi Lyakwe Leza
Twalililini Ukusambilila Masambililo Apya Uku Masambililo Aakutandikilapo Muli Baibo
“Nkalonda ukuti namwiusya ivintu vii lyonsi nanti cakuti mwavimanya nupya mwazumila icumi cino mwasambilile.”—2 PET. 1:12.
VINO TUMASAMBILILAPO
Vino mungasambilila masambililo apya uku masambililo amuli Baibo aakutandikilapo nanti cakuti ipapita imyaka iingi ukufuma pano mwayasambilile.
1. Uzye icumi cino mwasambilile muli Baibo pa muku wa kutandikilapo camwazwile uli?
Ivintu vino twasambilile lino twatandike ukusambilila Baibo vyalenga tusenuke. Wakwe, lino twasambilile ukuti izina lyakwe Leza a Yeova, calenzile tupalame ukuli aliwe. (Eza. 42:8) Lino twasambilile ivikacitika ndi cakuti umuntu wafwa, twatiile ukwelenganya ukuti atemwikwa itu afwa yakacula. (Kasa. 9:10) Nupya lino twasambilile pali Paladaise ino Leza watulaya, twatiile ukusakamala pa vilacitika uku nkoleelo. Twasininkizye ukuti tutalikala sile manda 70 nanti 80, lelo tulikala amanda pe.—Masa. 37:29; 90:10.
2. Uzye 2 Petulo 1:12, 13 ikalangilila uli ukuti Aina Klistu akula muli vyakwe Leza yangatwalilila ukulaelenganya pa masambililo ya muli Baibo yano yasambilile mpiti?
2 Tutalinzile ukuta ukwika mano uku masambililo yano twatandikilepo ukusambilila muli Baibo. Muli kalata yakwe ciili ino umutumwa Petulo walamvile, walembiile Aina Klistu ‘azumile icumi.’ (Belengini 2 Petulo 1:12, 13.) Lelo pa nsita iya umu cilongano mwali antu aipe alondanga ukuti aina yafume umu cumi. (2 Pet. 2:1-3) Petulo walondanga ukukomelezya aina na ya nkazi ukutaluka uku visambilizyo vya ufi vino antu yasambilizyanga. Pakuti yacite vivyo, waiwisheko masambililo yano yasambilile mpiti. Masambililo aakutandikilapo yali nu kuyazwa ukwalilila ukuya acisinka ukufika nu ku mpela.
3. Londololini umulandu uno Aina Klistu yonsi yalinzile ukutwalilila ukwelenganya pa masambililo amuli Baibo yano yasambilile.
3 Lino tukuya tukukula muli vyakwe Leza, tungasambilila masambililo apya uku masambililo aakutandikilapo muli Baibo. Katulangilile: Umuntu uwamanyikisha ukweleka na wino akusambilila ukweleka yangaomvya ivintu ivili vimwi pa kweleka ivyakulya vimwi. Lelo uwamanyikisha ivyakweleka angaomvya ivintu vivyo umu nzila izipusanepusane pakuti aeleke ivyakulya ivilyompe. Nanti cakuti itulengela umu cumi, vino twasambilile mpiti vingatwazwa na ndakai. Vino ivintu vyaya umu umi witu ni milimo ino tukaomba umu umulimo wakwe Yeova vifwile vyasenuka ukufuma pano twabatiziwilwe. Ndi cakuti twelenganya pa vintu vino twasambilile mpiti, tukalola inzila izipya muno tungaomvezya ivyeo vivyo. Lekini tulole vino Aina Klistu akula muli vyakwe Leza yangasambililako uku masambililo amuli Baibo akutandikilapo.
YEOVA A KAUMBA
4. Uzye ukumanya ukuti Yeova a Kaumba kwatwazwa uli?
4 “Leza u wapanzile ivintu vyonsi.” (Aeb. 3:4) Twamanya ukuti uwaumvile insi ni vya umi vyonsi ivyayamo a Kaumba uwakwatisha mano na maka. U watuumvile, fwandi watumanya ningo sana. Ni cicindamishe icakuti, akatusakamala. Wamanya ivingatuzipila. Ukumanya ukuti Yeova a Kaumba kwalenga umi witu ukusenuka umu nzila izingi.
5. I cumi ci icingatwazwa ukuya aicefye? (Ezaya 45:9-12)
5 Ukumanya ukuti Yeova a Kaumba kulinzile ukutulenga ukuya aicefye. Lino Yobo wisile sile mano kuli vino wailolanga na kuli vino yauze yamulolanga, Yeova wamwiwisheko ukuti a Kaumba uwa maka yonsi. (Yobo 38:1-4) Vino Yeova wiwisheko Yobo vyalenzile Yobo ailuke ukuti vyonsi vino Yeova akacita i vilungame. Kasesema Ezaya walanzile ukuti antu yatalinzile ukulaelenganya ukuti yakwatisha mano ukucila Kaumba.—Belengini Ezaya 45:9-12.
6. A lilaci lino cacindama ukwelenganya pa maka na mano vino Kaumba wakwata? (Loliniko ni vikope.)
6 Ndi cakuti umuntu waombela Yeova pa myaka iingi, limwi angatandika ukutwisika. (Yobo 37:23, 24) Nomba uzye ukwelenganya pa maka na mano yano Kaumba wakwata kungamwazwa uli? (Eza. 40:22; 55:8, 9) Ukwiusha ukuti vino Yeova akwelenganya vyacindama ukucila vino tukaelenganya, tulatwazwa ukuya aicefye.
I vyani ivingatwazwa ukulaiusha ukuti vino Yeova akaelenganya vyacindama ukucila vino tukaelenganya? (Lolini palaglafu 6)d
7. I vyani vino ya Rahela yacisile pakuti yazumile ukusenuka ukwa mwi iuvi?
7 Ukwelenganya pali Kaumba kukaazwa ya Rahela ukusenuka ndi cakuti umwi uvi mwaya ukusenuka kumwi. Yatiile: “Insita zimwi cikantalilila ukuzumila vino aakatungulula yakapingulapo. Wakwe, nanti cakuti natamvile Ivyeo Ivipya Ukufuma Ukwi Umba Ilikatungulula #8 Ivya mu 2023, nazungwike lino naweni umwina uwali ni vilezu akulanda ilyasi. Fwandi napefile kuli Yeova kuti angazwe ukuzumila ukusenuka kuu.” Ya Rahela yilwike ukuti pa mulandu wakuti Yeova a Kaumba, wamanya inzila isuma iyakutungulwilamo iuvi lyakwe. Ndi cakuti cikumitalila ukulondela nanti ukuzumila utunguluzi upya, mulinzile ukuicefya nu kwelenganya pa maka na mano yano Kaumba witu wakwata.—Loma 11:33-36.
MULANDU UNO LEZA WAZUMILIZIZYA UKUCULA
8. Uzye ukumanya umulandu uno Leza wazumilizizya ukucula kwamwazwa uli?
8 U mulandu ci uno Leza wazumilizizya ukucula? Antu yamwi aatamanya icasuko ukwi iuzyo lii yakasokela Leza nanti ukuzumila ukuti atayako. (Mapi. 19:3) Lelo mwemo mwasambilila ukuti tukacula pa mulandu nu luyembu alino nu kukanamalilika, asi Yeova aakalenga. Nupya mwasambilila ukuti vino Yeova wateekelela antunze vyalenga ukuti antu aingi yamumanye nu kuilolela vino alafumyapo ukucula amanda pe. (2 Pet. 3:9, 15) Kumanya umulandu uno Leza wazumilizizya ukucula kwalenga ukuti mumutaile nu kupalama kuli aliwe.
9. A lilaci lino tungalondekwa ukwelenganya pa mulandu uno Yeova wazumilizizya ukucula?
9 Twamanya umulandu uno cacindamila ukuya ateekele lino tukuloleela ukuti Yeova akafumyepo ukucula. Lelo ndi cakuti wino twatemwa wafwa nanti lino ya lupwa lwitu yali ni ntazi nanti lino yatufyenga, tungasoka nu kutandika ukuyuvwa ukuti Yeova akulengela ukufumyapo ukucula. Ndi cakuti twatandika ukuyuvwa vii, tulinzile ukwelenganya pa mulandu uno Yeova akazumilizizya umulungami ukucula.a (Masa. 34:19) Nupya tungelenganya na pa mulandu uno alafumizizyapo ukucula amanda pe.
10. I vyani ivikaazwa ya Anne ukuteekeziwa ukufuma pano ya nyina yafwila?
10 Ukumanya umulandu uno Leza wazumilizizya ukucula kungatwazwa ukuzizimizya intazi. Ya Anne aakaila pa cilila ca Mayotte icayela pa Indian Ocean yatiile: “Nali sana nu ulanda lino ya mayo yafwile imyaka inono uku cisila. Nanti ciye vivyo, lyonsi nayiushangako ukuti Yeova asi aliwe aakalenga ukuti twacula. Akalondesha ukufumyapo ukucula konsi nu kutuutulula atemwikwa itu afwa. Ukwelenganya pa cumi cii kukalenga inje nu mutende nupya cii cikanzungusha.”
11. Uzye ukumanya umulandu uno Leza wazumulizizya ukucula kungalenga uli tutwalilile ukusimikila?
11 Ukumanya icumi pa mulandu uno Leza wazumilizizya ukucula kukalenga tutwalilile ukusimikila. Pa cisila ca kulondolola pali vino Yeova wateekela pa mulandu wakuti akalonda antu ukulapila nu kupusuka, Petulo walemvile ati: “Mulinzile ukuya antu aya ni miyele ya muzilo nupya aipeelesya umu kuombela Leza.” (2 Pet. 3:11) Umulimo wa kusimikila waya pa milimo ino ‘tukaombela Leza’. Wakwe vino Tata witu watemwa antu, avino naswe twayatemwa. Tukalonda ukuti yakikale umu nsi ipya yakwe Leza. Yeova wapeela antu aku ncende kuno mukaikala ishuko ilya kutandika ukulamupepa. Ala iishuko sana lino mwakwata ilya kuombela pamwi na Leza nu kukwazwa antu aingi ukusambilila pali aliwe lino impela itatala iza.—1 Kol. 3:9.
TUKWIKALA UMU “MANDA AKUSHALIKIZYA”
12. Uzye ukumanya ukuti tukwikala umu manda akushalikizya kwamwazwa uli?
12 Baibo yalondolola ningo vino antu yali nu kuya umu “manda akushalikizya.” (2 Tim. 3:1-5) Ndi cakuti twalola vino antu yakucita ndakai, vikulangilila ukuti vino Baibo yalanda i vya cumi. Kulola vino imiyele ya yantu ikwipilako sile, kukalenga tusininkizye ukuti Izwi lyakwe Leza i lya cumi.—2 Tim. 3:13-15.
13. Uzye icilangililo cino Yesu walanzile icaya pali Luka 12:15-21 cingatwazwa uli?
13 Kumanya ukuti tukwikala umu manda akushalikizya kukatwazwa ukwika mano uku vintu ivicindamishe. Tungalola umulandu uno ukucitila vii kwacindamila uku cilangililo cakwe Yesu icaya pali Luka 12:15-21. (Belengini.) U mulandu ci uno Yesu wanenyile umonsi uwakweti ivyuma ukuti “Ciwelewele”? Asi pa mulandu wakuti umonsi wii wakweti ivyuma, lelo apa mulandu wakuti wisile amano uku vintu itaali ivicindame. ‘Waikolonganikilanga icuma, lelo ataali umukankala kuli Leza.’ Waluvyanyizye pali vino ataomvizye ningo insita pano ataali nu kwikala manda aingi. Leza wamunenyile ati: “Ilelo kwene usiku yamakupoka umi.” Uzye ilyasi lii lingatwazwa uli ndakai? Vino impelelekezyo ya nsi yii ili umupipi, tulinzile ukuyuzya ukuti: ‘Uzye mauyo yano nkaimika yakalangililila ukuti nika mano uku vintu ivicindamishe? A mauyo ya musango ci yano nkakomelezya ana yane ukwimika? Uzye nkaomvya amaka yane, insita, ni vintu vino nakwata uku kuikolonganikila ivyuma nanti nkakolonganikila ivyuma ukwi yulu?’
14. Uzye ivyacitikile ya Miki vikutwazwa uli ukulola umulandu uno cacindamila ukwiusha ukuti tukwikala umu manda akushalikizya?
14 Ndi cakuti tukwelenganya sana pa visinka ivikalangilila ukuti mu cumi tukwikala umu manda akushalikizya, cilatwazwa ukulapingula ningo pa vintu. Vikwene i vyacitikiile nkazi Miki. Walanzile ukuti: “Lino namazile isukulu lya ku sekondali, nalondanga ukuya uku masambililo akusambilila pa nyama. Nomba nalondanga nu kuombako upainiya alino nu kuya uku ncende ukukalondekwa ya kasimikila aingi. Ya cuza yane aakula muli vyakwe Leza yanenyile ukuti nelenganyepo sana ndi cakuti ningakwanisha ukufikilizya uyo uno nimike uwa kusambilila pa nyama nupya pa nsita ili imwi kwene nu kufikilizya mauyo yano nimike muli vyakwe Leza. Yanjiwisheko nu kuti insi yii ili umupipi nu kononwa. Nupya yanjiwisheko nu ukuti umu nsi ipya ndakwata isyuko lya kusambilila pa nyama izingi amanda pe. Fwandi nasoolwilepo ukuya uku masambililo apa nsita sile inono. Ukucita vii kwalenzile nzane incito iyangazwanga lino naombanga upainiya wa nsita yonsi, nupya lino papisile insita nizile inkukila uku Ecuador ukwalondekwanga ya kasimikila.” Ndakai ya Miki na ya iya yaya umu mulimo wa kutandalila ivilongano umu Ecuador.
15. Uzye ivyacitikile Yakobo vingatwazwa uli ukunatovooka ndi cakuti antu yasikulonda ukukutika ukwi lyasi lisuma? (Loliniko ni vikope.)
15 Tutalinzile ukutoovoka ndi cakuti antu yakukana ukuvwa ukwi lyasi lisuma. Antu yangasenuka. Elenganyini pali Yakobo umwina wakwe Yesu. Waweniko kuno Yesu wakulanga, lino wizila aya a Mesiya, na vino wasambilizyanga ukucila umuntu ali wensi. Lelo pa myaka iingi, Yakobo atalondelanga Yesu. Yakobo wizile aya umusambi wakwe Yesu nupya umucincile pa cisila cakuti Yesu watuutululwa.b (Yoa. 7:5; Gala. 2:9) Mutalinzile ukutovooka ukusikimikila kuli ya lupwa aasilonda ukuvwa ukwi lyasi lisuma nanti ukuswilila kuli yayo aakanyile ukuvwa lino mwayasimikile pa muku wa kutandikilapo. Mwaiusha ukuti tukwikila umu manda akushalikizya nupya umulimo wa kusimikila iupamvya. Vino mukayasimikila ndakai vingalenga yize yasenuke uku nkoleelo, limwi ala nu ucuzi ukalamba watandika.c
I vyani ivingatwazwa ukutwalilila ukusimikila kuli ya lupwa asi ya kapepa? (Lolini palaglafu 15)e
MWATAIZYA PALI VINO YEOVA AKATWIUSHAKO
16. Uzye vino Yeova akatwiushako vyamwazwa uli? (Loliniko na kambokosi akakuti “Mwaviomvya Uku Kwazwa Yauze.”)
16 Ivyeo vimwi ivikalanda pali Baibo vino tukapokelela vyapekanyiziwa kukwazwa antu atamanya masambililo amuli Baibo akutandikilapo. Wakwe, malyasi aku yantu yonsi yano tukakutika cila mulungu, vipande vimwi na mavidyo ivyaya pa jw.org, alino na yamagazini aku yantu yonsi vikapekanyiziwa ukukwazwa antu aasi ya Nte. Nanti ciye vivyo, naswe kwene tukasambililako vimwi ku vyeo vii. Vikatwazwa ukutemelwako Yeova, ukutaila sana Izwi lyakwe, alino nu kuya ya kasambilizya yasuma yakwe Baibo.—Masa. 19:7.
17. A lilaci lino mungalondekwa ukwelenganya pa masambililo amuli Baibo akutandikilapo?
17 Swe Ya Nte Yakwe Yeova tukauvwa ningo ndi cakuti kwaya ukusenuka muli vino twamanyile mpiti. Lelo tukataizya pa cumi ca muli Baibo cino twasambilile pa muku wa kutandikilapo icalenzile tupalame kuli Yeova. Ndi cakuti twatunkwa ukukanalondela utunguluzi uwa mwi uvi, tulinzile ukuicefya nu kwiusha ukuti Kaumba uwakwatisha amaka na mano aliwe akatungulula iuvi. Ndi cakuti tukuzizimizya intazi nanti atemwikwa itu yali ni ntazi, tulinzile ukuteeka umwenzo nu kwelenganya pa mulandu uno Yeova wazumilizizya ukucula ukutwalilila ukuyako. Nupya lino tukupingula pali vino tumaomvya insita itu ni vintu vino twakwata, tulinzile ukwiusha ukuti tukwikala umu manda akushalikizya nupya likwene sile impela yasha yize. Lekini vino Yeova akatwiushako vitwalilile ukutulenga ukuya na mano alino nu kutwalilila ukulamuombela na ucisinka.
LWIMBO NA. 95 Luswepo Lukukulilako Sile
a Lolini icipande icakuti “Uzye Ukucula Kulatala Kusile?” muli Zyukini! Na. 2 2020.
c Lolini icipande cakuti “I Vyani Vino Twamanya Pali Vino Yeova Alapingula Antu Uku Nkoleelo?” umu Lupungu Lwa Mulinzi lwakwe Mei 2024 mafwa 8-13.
d ULONDOLOZI WA VIKOPE: Pa kukomaana kwakwe ya eluda, umwina walanda vimwi vino ya eluda yauze yatazumilizye. Lyene usiku ala akulola intanda, welenganya pali vino Kaumba wakwatisha amano na maka nupya wiluka ukuti vino Yeova akulonda ivicindama ukucila vino akwelenganya.
e ULONDOLOZI WA CIKOPE: Lino nkazi akuisambilizya Baibo walondelezya usininkizyo uukulangilila ukuti tukwikala umu manda akushalikizya. Cii calenga ukuti atumile kaci wakwe asi Nte foni nu kumusimikila.