CIPANDE CA KUSAMBILILAMO 32
LWIMBO NA. 38 Alamwazwa Ukuya Akome
Vino Yeova Akatwazwa Ukuzizimizya
“Leza aakapeela icikuuku cikulu . . . alakomya utailo winu, alamupeela maka, nupya alamutungilila.”—1 PET. 5:10.
VINO TUMASAMBILILAPO
Ivintu vino Yeova watupeela pa kutwazwa ukuzizimizya alino na vino tungaomvya ivintu vivyo.
1. U mulandu ci uno citangukila ukuzizimizya ukufika nu ku mpela, nupya a weni angatwazwa? (1 Petulo 5:10)
ANTU yakwe Yeova yakalondekwa ukuzizimizya umu manda yaa aakushalikizya atale. Yamwi yakacula uku ndwala. Yamwi nayo yakacula pa mulandu wakuti umwi wino yatemwa wafwa. Yamwi nayo yakacuziwa kuli ya lupwa alino na amu uteeko. (Mate. 10:18, 36, 37) Asi mulandu ni ntazi zino mukupitamo Yeova angamupeela amaka akuzizimizya.—Belengeni 1 Petulo 5:10.
2. Aekwi kuno tukafumya amaka akuzizimizya?
2 Ukuzizimizya kukapiliula ukutwalilila ukuya na ucisinka kuli Yeova nu kulamuombela asi mulandu ni ntazi. Tungazizimizya pa mulandu wakuti Yeova akatupeela “amaka acila maka ya yantu” fwandi ukwaula ukuti Yeova atwazwe tutanga tuzizimizye. (2 Kol. 4:7) Umu cipande cii, tumasambilila pa vintu 4 vino Yeova watupeela ivikatwazwa ukuzizimizya. Nupya tumasambilila pali vino tungacita pakuti vitwazwe.
IPEPO
3. U mulandu ci uno tungalandila ukuti ipepo i cizungusho?
3 Yeova watucitila icintu ica kuzungusya icikatwazwa ukuzizimizya. Nanti cakuti sweswe yayembu watupeela ishuko ilya kulanda nawe, nupya akakutika kuli sweswe. (Aeb. 4:16) Elenganyini pali cii: Tungapepa kuli Yeova pa nsita ili yonsi nupya apa ntazi iili yonsi. Angatuvwa asi mulandu nu lulimi nanti kuno tukaikala, ciye tuli swenga nanti tuli umu cifungo. (Yona 2:1, 2; Mili. 16:25, 26) Ndi cakuti itusakamikwa nupya tutamanyile vino tumalanda umwi pepo, Yeova akamanya vino tukulonda ukulanda. (Loma 8:26, 27) Umu cumi, ipepo i cizungusho!
4. Twamanya uli ukuti Yeova alatwasuka ndi cakuti twapepa ukuti atwazwe ukuzizimizya?
4 Yeova watunena ukupitila umwi Izwi lyakwe ukuti “consi cino twamulenga icikuvwana nu kulonda kwakwe, akatuvwa.” (1 Yoa. 5:14) Uzye tungalenga Yeova ukuti atwazwe ukuzizimizya? Ee. Ukucita vivyo kwalingana nu kulonda kwakwe. U mulandu ci uno twalandila vivyo? Ndi cakuti tukuzizimizya, cingalenga Yeova aasuke Satana aakamuzewanya. (Mapi. 27:11) Baibo ikalanda ukuti Yeova akalonda ukuti alange “amaka yakwe ukupitila umu kwazwa aakamuombela ni myenzo yonsi.” (2 Mila. 16:9) Fwandi tungasininkizya ukuti Yeova wakwata amaka akutwazwa pakuti twazizimizya.—Eza. 30:18; 41:10; Luka 11:13.
5. Uzye ipepo lingalenga uli tuye nu mutende? (Ezaya 26:3)
5 Baibo ikalanda ukuti ndi cakuti twapepa kuli Yeova pali vino vikutusakamika, “umutende wakwe Leza, uwacila imyelenganyizizye yonsi iya yantu ulacingilila imyenzo [itu] na melenganyo [itu].” (Filipi 4:7) Tukataizya pa mutende uu. Antu asipepa Yeova nayo kwene yakakwata intazi, nupya yakaezya inzila izipusanepusane pakuti yamale intazi zino yakweti nanti ukwililako. Wakwe, yamwi yakata ukwelenganya pa vili vyonsi pakuti yuvweko ningo. Ukucita vii kungalenga yafilwe ukucingilila amelenganyo yao, na cii cingalenga ukuti yatungululwa ni viwa. (Loliniko na Mateo 12:43-45.) Nanti cakuti antu yakaomvya inzila zii pakuti yuvweko ningo, yasikwata umutende uukafuma kuli Yeova. Twataila Yeova, fwandi tukapepa kuli aliwe nu kumulenga ukuti atupeele umutende. Wakwe vino watulaya, alatwalilila ukutupeela umutende. (Belengini Ezaya 26:3.) Inzila yonga ino Yeova akatupeelelamo umutende u kutwiushako malembo aangatuteekezya. Malembo yayo yakatwiushako vino Yeova watutemwa na vino akalondesha ukutwazwa.—Masa. 62:1, 2.
6. I vyani vino mungacita pakuti ipepo lyamwazwa sana? (Loliniko ni cikope.)
6 Vino mungacita. Lino mwakwata intazi, mwanena Yeova vino mukuyuvwa nu ‘kusumbila icisendo cinu pali Yeova’ alino nu kupepa kuli aliwe ukuti amupeele umutende. (Masa. 55:22) Nupya mwalenga na mano kuli aliwe pakuti amwazwa ukumanya ivya kucita pa ntazi ino mukweti. (Mapi. 2:10, 11) Lino mukulenga ukuti amwazwe, mutailila nu kulapepa mapepo akutaizya. (Filipi 4:6) Mwaelenganya pa nzila zino akumwazwilamo cila wanda alino nu kumutaizya pa vintu vino akamupeela. Nanti cakuti mungacuziwa pa mulandu ni ntazi, mutailila ukwelenganya pa vintu vino Yeova akumucitila.—Masa. 16:5, 6.
Ndi cakuti mwapepa kuli Yeova, mukalanda nawe. Nga mukubelenga Baibo ala Yeova akulanda namwe (Lolini palaglafu 6)b
IZWI LYAKWE LEZA
7. Uzye ukusambilila Baibo kungatwazwa uli ukuzizimizya?
7 Yeova watupeela Izwi lyakwe pakuti lyatwazwa ukuzizimizya. Muli Baibo mwaya malembo aakalangilila ukuti Yeova akatwazwa. Elenganyini api lembo lyonga sile. Pali Mateo 6:8 pakati: “Tata winu wamanya vino mukalonda na lino mutatala mwamulenga.” Yesu u walanzile mazwi yaa, nupya wamanya ningo Yeova ukucila antu yonsi. Fwandi tungasininkizya ukuti ndi cakuti tukucula, Yeova akamanya vino tukulondekwa nupya alatwazwa. Muli Baibo mwaya malayo yano Yeova watulaya akuti angatupeela amaka yano tukalondekwa pakuti tuzizimizye.—Masa. 94:19.
8. (a) Landini pa cisinte ca muli Baibo icingatwazwa ukuzizimizya. (b) I vyani ivingatwazwa ukwiusha visinte vya muli Baibo ivingatwazwa?
8 Visinte vya muli Baibo vingatwazwa ukuzizimizya. Visinte vii, vingalenga tuye na mano angatwazwa ukulapingula ningo pa vintu. (Mapi. 2:6, 7) Wakwe, Baibo ikatunena ukuti tutalinzile ukulasakamala pa vilacitika uku nkoleelo, lelo cila wanda tulinzile ukulataila Yeova. (Mate. 6:34) Ndi cakuti lyonsi tukubelenga malembo nu kwelenganyapo, cilalenga twaiusha ivisinte vya muli Baibo ivilatwazwa ukulapingula ningo pa vintu.
9. Uzye tukauvwa uli ndi cakuti twabelenga malyasi amu muli Baibo pali vino Yeova wazwile aomvi yakwe?
9 Muli Baibo mwaya malyasi aakalanda pa yantu ataile Yeova na vino Yeova wayazwile. (Aeb. 11:32-34; Yako. 5:17) Ukwelenganya pali vino Yeova wayazwile, kungatwazwa ukukomya utailo witu uwakuti naswe kwene Yeova angatwazwa. Pano Yeova “ali kacingilila witu nupya ali maka itu, aliwe akatwazwa lyonsi umu nsita ya ntazi.” (Masa. 46:1) Nupya ndi cakuti tukwelenganya pali vino aomvi yakwe Yeova yalangilile ukuti yali nu utailo na vino yatwalilile ukumuombela na lino ivintu vyatazile, tukalondesha ukulayakonya.—Yako. 5:10, 11.
10. Uzye mungacita uli pakuti Baibo yamwazwa?
10 Vino mungacita. Mwabelenga Baibo cila wanda, nupya mwalemba malembo angamwazwa. Aingi yakabelenga ilembo lya cila wanda umu nsita ya katondo nupya yazana ukuti ukucita vii kukayakomelezya. Ukucita vii kwazwile nkazi Mariea wino avyazi yakwe yoili yayazanyile na kansa. I vyani ivyayazwile ukuzizimizya lino yasakamalanga avyazi yao ala kwashala sile imyezi inono kuti yafwe? Ya Marie yalanzile ati: “Cila katondo na belenganga ilembo lya wanda umu kabuku kakuti Twasambilila Malembo Cila Wanda nu kwelenganyapo. Ukucita vii kwangazwile ukulaelenganya pali Yeova alino na pa vintu ivisuma vino akatusambilizya umwi Izwi lyakwe ukucila ukwika mano uku ntazi zino nakweti.”—Masa. 61:2.
AINA NA YA NKAZI
11. Uzye tukayuvwa uli ndi cakuti twelenganya pali vino aina na ya nkazi yakazizimizya intazi?
11 Yeova watupeela aina na ya nkazi akatwazwa ukuzizimizya. Ukumanya sile ukuti “intazi zino mukaculako azino na ina inu umu nsi yonsi yakaculako,” kukalenga tusininkizye ukuti tutaya swenga. (1 Pet. 5:9) Fwandi tungasininkizya ukuti intazi ili yonsi ino tungakwata, na yauze nayo yakwatapo izikolineko nupya yazizimizya. Cii cikupiliula ukuti naswe kwene tungazizimizya.—Mili. 14:22.
12. Uzye aina na ya nkazi yangatwazwa uli, nupya naswe tungayazwa uli? (1 Kolinto 1:3, 4)
12 Aina na ya nkazi yangatwazwa lino tukuzizimizya ukupitila muli vino yakalanda nu kucita. Nupya vikwene ali vino cali nu ku mutumwa Paulo. Paulo wataizye yayo amwazwile lino yamunyepiile pa ng’anda, ala akuyalumbula na mazina. Yateekizye Paulo, kumukomelezya, alino nu kumwazwa muli vino walondekwanga. (Filipi 2:25, 29, 30; Kolo. 4:10, 11) Ivya musango uu naswe kwene vingatucitikila ndakai. Lino tukulondekwa uwazwilizyo pakuti tuzizimizye, aina na ya nkazi yakatwazwa, nayo nga yakwata intazi naswe tukayazwa.—Belengini 2 Kolinto 1:3, 4.
13. I vyani vyazwile nkazi Maya ukuzizimizya?
13 Aina na ya nkazi yazwile sana nkazi Maya aakaikala uku Russia. Umu 2020 ya kapokola yaile iyalondelezya umu ng’anda yakwe, nupya yamutwazile uku cilye pa mulandu wakuti wanenangako yauze vino wazumilamo. Ya Maya yalanzile ati: “Pa nsita iya, natonsile, nasakamile, nupya nali nu ulanda. Lelo aina na ya nkazi yantumilanga foni, kundembela mameseji na makalata. Vii vino yacisile vyalenzile insininkizye ukuti yantemilwe. Lyonsi namanyile ukuti aina na ya nkazi yantemwa nupya a lupwa lwane. Lelo umu 2020 ali lino nailolile sana ukuti yantemwa.”
14. I vyani vino tungacita pakuti aina na ya nkazi yatwazwe? (Loliniko ni cikope.)
14 Vino mungacita. Lino mukuzizimizya intazi, mwapalama uku ina na ya nkazi. Mutasitooka ukulenga uwazwilizyo kuli ya eluda. Yangaya “wa ncende iya kucingililwamo uku cimuza, wa ncende iya kuuwamo uku mvula iya cimuza.” (Eza. 32:2) Mwaiusha ukuti ya kapepa yauzo nayo kwene yakuzizimizya intazi. Ndi cakuti mwacitilako umwi aakulondekwa uwazwilizyo ivintu ivisuma, cingalenga ukuti muvwe ningo nupya cingamwazwa ukuzizimizya intazi ino mukweti.—Mili. 20:35.
Mwapalama sana ku ina na ya nkazi (Lolini palaglafu 14)c
VINO YEOVA WATULAYA
15. Uzye ukwelenganya pa vilacitika uku nkoleelo kwazwile uli Yesu, nupya kungatwazwa uli naswe? (Aebele 12:2)
15 Yeova watulaya ivintu visuma sana ivikatwazwa ukuzizimizya. (Loma 15:13) Iushini ukuti Yesu wazizimizye ivyamucitikile pa wanda wa kushalikizyako ukuya pano nsi pa mulandu wakuti wisile mano kuli vino Yeova wamulavile. (Belengini Aebele 12:2.) Yesu wamanyile ukuti ndi cakuti watwalilila ukuya uwa ucisinka wali nu kulenga izina lyakwe Yeova ukucindikwa. Nupya Yesu walondeshanga ukuya pamwi na Isi alino nu kulamuombela pamwi na ina yakwe umu Wene uwa kwi yulu. Naswe kwene, upaalilo uwa kwikala amanda pe umu nsi ipya yakwe Leza ukatwazwa ukuzizimizya intazi ili yonsi ino tungakwata umu nsi yii yakwe Satana.
16. Uzye upaalilo wazwile uli nkazi umwi ukuzizimizya, nupya i vyani vino tungasambililako kuli vino walanzile?
16 Elenganyini pali vino upaalilo uwa kwikala umu nsi ipya wazwile nkazi Anna uwa ku Russia, wino iya yamwisile umu cifungo ala akulolela ukuti yamupingule. Lino vii vyacitike ya Anna yalanzile ati: “Insita izingi nkapepa kuli Yeova pali vino watulaya nu kwelenganyapo, ukucita vii kukangazwa ukukanatoovoka. Ndakai namanya ukuti ivintu vingatutalila lelo uku nkoleelo tulaipakizya ivintu vingi visuma. Yeova alacimvya alwani yakwe nupya alatulambula.”
17. Uzye tungalanga uli ukuti tukataizya pa upaalilo uno Yeova watupeela? (Loliniko ni cikope.)
17 Vino mungacita. Mwapaatulako insita iya kwelenganya pa vintu visuma vino Yeova wamulaya. Mwaelenganya ukuti muli umu nsi ipya nupya mukuipakizya ivintu ivisuma. Nupya intazi ili yonsi ino tungakwata iya “pa kasita sile akanono.” (2 Kol. 4:17) Nupya mwaezya na maka ukunenako yauze vino mwazumilamo. Elenganyini pali vino ivintu vikatalila antu aasiombela Yeova. Yakakwata intazi, lelo yatamanya ivintu ivisuma vino Yeova watulaya. Nanti cakuti mwayanena sile mazwi anono, mungayakomelezya nupya yangalondesha ukumanyilapo na vyuze pa Wene wakwe Yeova na pali vino watulaya.
Mwapaatulako insita iya kwelenganya pali vino Yeova watulaya (Lolini palaglafu 17)d
18. U mulandu ci uno tungatailila malayo yakwe Yeova?
18 Pa cisila cakuti Yobo wazizimizya intazi, wanenyile Yeova ati: “Lyene namanya ukuti wakwata amaka ya kucita ivintu vyonsi nupya kusi nanti acimwi cino wapanga ukucita cino ungafilwa ukucita.” (Yobo 42:2) Wakwe vino Yobo wasambilile, kusi icili consi icingalesha Yeova ukufikilizya ukulonda kwakwe. Ukumanya icisinka cii kungatwazwa lino tukuzizimizya. Wakwe, elenganyini pa mwanaci uwalwala pa nsita itali. Watoovoka pa mulandu wakuti ya dokota aingi yezya ukumulwazya lelo yafilwa. Lyene wazana dokota umwi nupya wamunena icikalenga alwala alino na vino angamwazwa pakuti apole. Lilyo kwene sile umwanaci uvwa ningo nanti cakuti pamapita insita inono pakuti atandike ukuvwa ningo. Lyene cimamwangukila ukuzizimizya pano atamanya ukuti amapola. Umu nzila ili imwi kwene, naswe tungazizimizya pano twamanya ukuti vino Yeova watulaya ukuti kulaya Paladaise i vya cumi.
19. I vyani vino tulinzile ukucita pakuti twazizimizya?
19 Wakwe vino itusambilila, Yeova akatwazwa ukuzizimizya intazi ukuomvya ipepo, Izwi lyakwe, aina na ya nkazi, alino na vino watulaya. Ndi cakuti tukuomvya ivintu vii vino Yeova watupeela, tulatwalilila ukuzizimizya ukufikila lino alafumyapo ukucula konsi umu nsi yii yakwe Satana.—Filipi 4:13.
LWIMBO NA. 33 Mwatuula Masakamika Inu Kuli Yeova
a Asi mazina yao acumi cumi.
b ULONDOLOZI WA CIKOPE: Umwina akatwalilila ukuzizimizya cila wanda nu kutwalilila ukuya uwa cisinka kuli Yeova.
c ULONDOLOZI WA CIKOPE: Umwina akatwalilila ukuzizimizya cila wanda nu kutwalilila ukuya uwa cisinka kuli Yeova.
d ULONDOLOZI WA CIKOPE: Umwina akatwalilila ukuzizimizya cila wanda nu kutwalilila ukuya uwa cisinka kuli Yeova.