Mwataila Ukuti Yeova Wamutemwa

1. U mulandu ci uno mwaipeezile kuli Yeova? (Loliniko ni cikope.)

UZYE mukaiusha lino mwaipeezile kuli Yeova? Mwaipeezile kuli aliwe pa mulandu wakuti mwizile imumumanya nu kumutemwa. Mwalavile ukuti mulamuombela nu mwenzo winu onsi, umi winu onsi na mano inu yonsi na maka inu yonsi. (Mako 12:30) Ukufuma lili kwene, mwatwalilila ukumutemelwako. Fwandi mungasuka uli ndi cakuti umwi wamuzizye ukuti, “Uzye umu cumi mwatemwa Yeova?” Ukwaula nu kusitooka mungamwasuka muti, “Namutemwa sana ukucila umuntu aliwensi nanti icintu icili consi!”

2-3. I vyani vino Yeova akalonda ukuti tutaile, nupya i vyani vino tumasambilila umu cipande cii? (Yelemiya 31:3)

² Nomba mungasuka uli ndi cakuti umwi wamuzizye ukuti, “Uzye mwasininkizya ukuti Yeova wamutemwa?” Uzye mungasitooka ukwasuka pa mulandu wakuti mukalola kwati Yeova atanga amutemwe? Nkazi umwi wino yatalanganga ukutemwa lino wali umwance, walanzile ati: “Namanya ukuti natemwa Yeova. Nupya nsitwisika. Lelo insita izingi nkatwisika ndi cakuti Yeova wantemwa.” Fwandi i vyani ivingamwazwa ukumanya ndi cakuti Yeova wamutemwa?

³ Yeova akalonda musininkizye ukuti wamutemwa. (Belengini Yelemiya 31:3.) Nupya Yeova walondanga ukuti musambilile pali aliwe nu kuya cuza wakwe. Nupya lino mwaipeezile kuli aliwe nu kubatiziwa, Yeova wamupeezile icintu icisuma sana kuli kuti, ukutemwa kwa cumi. Fwandi wamitemwa sana nupya atalatala amushe. Ukutemwa kuu, u kukalenga alola ya kapepa yakwe acumi, ukwikako sile namwe kwene u kuti yacindama kuli aliwe. (Malaki 3:17) Yeova akalonda mwayuvwa ukuti wamutemwa, wakwe vino Paulo wayuvwanga. Paulo walemvile ukuti: “Pano insininkizya ukuti nanti imfwa nanti umi nanti ya malaika nanti amauteeko nanti ivintu ivyayako ndakai nanti iviliza nanti ivya maka nanti ivya kwi yulu nanti ivya pano nsi nanti sile iciumbwa icili consi vitalalenga ukuti Leza ate ukututemwa.” (Loma 8:​38, 39) Umu cipande cii, tumasambilila umulandu uno cacindamila ukumanya ukuti Yeova watutemwa na vino tungacita pakuti tusininkizye ukuti watutemwa.

MULANDU UNO TULINZILE UKUTAILILA UKUTI YEOVA WATUTEMWA

4. Uzye tungacimvya uli imicenjelo yakwe Satana?

⁴ Ukutaila ukuti Yeova watutemwa kungalenga ukuti twalwisha “imicenjelo” yakwe Satana. (Efes. 6:11) Satana angacita ivili vyonsi pakuti alenge tute ukuombela Yeova. Inzila yonga ino akaomvya, u kulanda ukuti Yeova atatutemwa. Insita izingi akatuzanza lino tukuvwa uyi pali vino vyatucitikile uku cisila, lino tuli ni ntazi nanti lino tutamanyile ivilacitika uku nkoleelo. (Mapi. 24:10) Satana waya wakwe cisama akulonda ukuzanza inyama iitanga iicingilile. Fwandi akaezya ukututoovola lino tuli nu ulanda. Fwandi ndi cakuti twataila ukuti Yeova watutemwa, tulaiteyanya ukukaanya Satana alino ni micenjelo yakwe.—1 Pet. 5:​8, 9; Yako. 4:7.

5. U mulandu ci uno cacindamila ukulayuvwa ukuti Yeova watutemwa nu kuti twacindama kuli aliwe?

⁵ Nga twazumila ukuti Yeova watutemwa, tungapalama sana kuli aliwe. U mulandu ci uno twalandila vivyo? Yeova watuumvile ukuti twalanga ukutemwa kuli yauze alino nu kutemwikwa kuli yauze. Ndi cakuti umwi walanga ukutemwa kuli sweswe, naswe tukalondesha ukulanga ukutemwa uku muntu kwene wiyo. Fwandi nga twatemwa sana Yeova, nawe alatutemwa. (1 Yoa. 4:19) Nupya ndi cakuti ukutemwa kuno twamutemwa kukuya kukulilako, nawe alatutemwa sana. Baibo ikatunena ukuti: “Palamini kuli Leza, nawe alapalama kuli mwemwe.” (Yako. 4:8) Nomba, i vyani vino tulinzile ukucita pakuti tusininkizye ukuti Yeova watutemwa?

I VYANI IVINGAMWAZWA UKUSININKIZYA UKUTI YEOVA WAMUTEMWA?

6. Pakuti tuzumile ukuti Yeova watutemwa, i vyani vino tulinzile ukupepelapo?

⁶ Mwapepa lyonsi nupya umu kulungatika. (Luka 18:1; Loma 12:12) Mungapepa kuli Yeova insita izingi cila wanda pakuti amwazwe ukulailola wakwe vino akamilola. Insita izingi, mungauvwa uyi pali mweineco nupya cingamutalila ukutaila ukuti Yeova wamutemwa. Lelo mwaiusha ukuti Yeova waluta sana umwenzo winu. (1 Yoa. 3:​19, 20) Wamimanya ningo ukucila vino mwaimanya mweineco, nupya akalola imiyele isuma ino mwakwata ino mwemo mutanga mulole. (1 Sam. 16:7; 2 Mila. 6:30) Fwandi mutasitooka ukumunena ivili uku mwenzo, nu kumulenga ukuti amwazwe ukuzumila ukuti wamutemwa. (Masa. 62:8) Pa cisila ca kupepa, cacindama ukucita ivintu vii ivyalondelelapo.

7-8. Uzye Masamu yakatwazwa uli ukusininkizya ukuti Yeova watutemwa?

⁷ Mwataila vino Yeova akalanda. Walenzile ya kalemba yakwe Baibo ukulemba pali vino waya. Lolini vino Devedi kalemba wa masamu walondolwile Yeova. Walemvile ati: “Yeova waya apiipi na yayo aaya nu ulanda; Akapususya atiyatoovoka.” (Masa. 34:18) Ndi cakuti muli nu ulanda, mungayuvwa ukuti muli mwenga. Umu nsita izya musango uu, Yeova akapalama sana kuli mwemwe pano akamanya ukuti pa nsita yii mukulondekwa uwazwilizyo. Nupya Devedi walemvile ati: “Sunga minsozi yane umu nyambi yako.” (Masa. 56:8) Yeova akamanya lino muli nu ulanda na lino mukucula. Akamusakamala nupya akauvwa uyi ndi cakuti mukucula. Wakwe vino manzi amu nyambi yangazwa umuntu akupita umu lwanga, ali vino na minsozi yinu yacindama kuli Yeova nupya akalola lino mukucula na lino mukulila. Pali Masamu 139:3 pakalanda ukuti: “[Yeova] wamanya inzila zyane zyonsi.” Yeova akalola vyonsi vino mukacita, lelo akaika sana mano ku visuma vino mukacita. (Aeb. 6:10) U mulandu ci? Pano akataizya pali vino mukaombesha pakuti mwamuzanzya.a

⁸ Ukupitila umu malembo aakuteekezya aaya umwi Izwi lyakwe, Yeova akatunena ukuti akatusakamala nupya watutemwa sana. Wakwe vino itusambilila, Satana akasalanganya ilyasi lya ufi ilya kuti Yeova atamutemwa. Fwandi insita zimwi nga mukutwisika ndi cakuti Yeova wamutemwa mwayuzya imuti, ‘Uzye a weni wino nataila, uzye “isi wa ufi” nanti “Leza wa cumi”?’—Yoa. 8:44; Masa. 31:5.

9. Usininkizyo ci uno Yeova wapeela uku yantu amutemwa? (Kufuma 20:​5, 6)

⁹ Mwaelenganya pali vino Yeova akayuvwa pali yayo amutemwa. Elenganyini pali vino Yeova wanenyile Mose na Ina Izlaeli. (Belengini Kufuma 20:​5, 6.) Yeova walaya ukuti alatwalilila ukulanga ukutemwa kuli yayo amutemwa. Amazwi yaa yakalenga tusininkizye ukuti Yeova atalata ukutemwa yayo amutemwa. (Neem. 1:5) Fwandi ndi cakuti insita zimwi mukulonda usininkizyo uwakuti Yeova wamutemwa, mwayuzya mweineco ukuti, ‘Uzye natemwa Yeova?’ Lyene mwaelenganya pali cii: Ndi cakuti mwamutemwa nupya mukaezya na maka ukucita ivya kumuzanzya mungasininkizya ukuti wamitemwa sana. (Dan. 9:4; 1 Kol. 8:3) Cii cikupiliula ukuti ndi cakuti mwasininkizya ukuti mwatemwa Yeova, mutalatwisika ukuti wamutemwa. Ukwaula nu kutwisika mulasininkizya ukuti alatwalilila ukumitemwa nupya atalatala amushe.

10-11. Uzye Yeova akalonda mwalola uli ilambo? (Galatiya 2:20)

¹⁰ Mwaelenganya api lambo. Ilambo lyakwe Yesu Klistu ali upe ukalamba uno Yeova wapeezile antunze. (Yoa. 3:16) Nomba uzye Yeova watumile umwanakwe pakuti aize amufwile? Ee. Elenganyini pali vino vyacitikile umutumwa Paulo. Iushini ukuti wacisile imembu izingi sana lino atatala waya Umwina Klistu nupya walondekwanga ukutwalilila ukulwisha utonte wakwe. (Loma 7:​24, 25; 1 Tim. 1:​12-14) Lelo wizile atandika ukulola ilambo ukuti uupe uno Yeova wamupeezile. (Belengini Galatiya 2:20.) Iushini ukuti Yeova u walenzile ukuti Paulo alembe amazwi yaa. Fwandi Yeova akalonda ukuti tusambilileko kuli vino Paulo walemvile. (Loma 15:4) Mazwi yano Paulo walemvile yakalangilila ukuti Yeova akalonda mutaile ukuti ilambo lyakwe Yesu uupe uno wamupeela. Ndi cakuti mukulola ilambo ukuti uupe, cilalenga mutaile sana ukuti Yeova wamutemwa ngu muntu wenga.

¹¹ Tukataizya Yeova pali vino watumile Yesu ukwiza pano nsi nu kutufwila. Lelo umulandu na uze uno Yesu wiziile pano nsi u kunenako yauze icumi pali Leza. (Yoa. 18:37) Icumi kwene cii cikalanda na pali vino Yeova watemwa ana yakwe.

VINO YESU AKATWAZWA UKUZUMILA UKUTI YEOVA WATUTEMWA

12. U mulandu ci uno tungatailila vino Yesu walanda pali Yeova?

¹² Lino Yesu wali pano nsi, waipakizyanga ukunenako yauze pali vino Yeova waya. (Luka 10:22) Tungataila vino Yesu walanzile pali Yeova. U mulandu ci? A pa mulandu wakuti Yesu wikazile sana na Yeova ukwi yulu lino atatala wiza pano nsi. (Kolo. 1:15) Yesu wamanyile vino Isi wamutemwa. Nupya wamanya na vino Isi watemwa ya malaika aaya na ucisinka alino na ana yakwe aonsi na anaci aaya pano nsi. Uzye Yesu akatwazwa uli ukuzumila ukuti Leza watutemwa?

13. Uzye Yesu akalonda twalola uli Yeova?

¹³ Yesu akalonda ukuti twalola Yeova wakwe vino akamulola. Umu mabuku a ilyasi lisuma Yesu wama Yeova ukuti “Isi” ukucila pa miku 160. Nupya lino walandanga na alondezi yakwe waomvyanga mazwi akuti “Tata winu” nanti “Tata winu uwa kwi yulu.” (Mate. 5:16; 6:26) Lino Yesu atatala wiza pano nsi, aomvi yakwe Yeova acisinka yamanga Yeova ukuti ‘Uwa maka,’ ‘Leza wa Papelapela,’ ‘Kaumba Mukalamba,’ alino na mazina yauze. Lelo Yesu wamanga Yeova ukuti ‘Tata’ witu. Izwi lii likalangilila ukuti Yeova akalonda ukuti aomvi yakwe yayuvwa ukuti yapalama kuli aliwe, wakwe vino umwana akayuvwa kuli isi uwaya nu kutemwa. Lekini tulande pa nsita zino Yesu waomvizye izina lyakuti “Tata.”

14. Uzye Yesu walangilile uli ukuti swensi kwene twacindama kuli Tata witu uwa kwi yulu? (Mateo 10:​29-31) (Loliniko ni cikope.)

¹⁴ Ica kutandikilapo, elenganyini pa mazwi yano Yesu walanzile aaya pali Mateo 10:​29-31. (Belengini.) Utunyi tutanga tulange ukutemwa nanti ukupepa Yeova. Lelo Yeova watwikako sana amano icakuti kusi akangapona pansi ukwaula ukuti Tata witu amanye. Ndi cakuti Yeova akasakamala utunyi utunono, tungasininkizya ukuti swe yantu akatusakamala sana pa mulandu wakuti twamutemwa nupya tukamuombela. Yesu walanzile nu kuti Tata witu wapenda “ni nyele zya ku mitwe inu zyonsi.” Pa mulandu wakuti Yeova wamanya nu tuntu utunono sana pali sweswe, tungasininkizya ukuti watwikako sana amano. Ukwaula nu kutwisika, Yesu akalonda swensi kwene tumanye ukuti twacindama sana kuli Tata witu uwa kwi yulu.

15. Uzye amazwi yano Yesu walanzile aaya pali Yoani 6:44 yakamusambilizya vyani pali Tata winu uwa kwi yulu?

¹⁵ Lolini umuku na uze uno Yesu waomvizye izwi lyakuti “Tata.” (Belengini Yoani 6:44.) Tata winu uwa ukwi yulu wamwazwile ukuti mumumanye nu kupalama kuli aliwe. U mulandu ci uno wamupalamikiile? A pa mulandu wakuti waweni imiyele isuma muli mwemwe. (Mili. 13:48) Lino Yesu walanzile amazwi aaya pali Yoani 6:​44, afwile walozyanga uku mazwi yano Yeova walanzile aaya pali Yelemiya 31:3. Pano Yeova walanzile uku yantu yakwe ukuti: “Pa mulandu nu kutemwa kwene kuu ukwa cumi icalenga ukuti nkupalamike kuli nene.” (Yele. 31:3; loliniko na Ose. 11:4) Elenganyini pali vino mazwi yaa yakapiliula. Tata witu uwa kwi yulu uwaya nu kutemwa lyonsi akalola imiyele inu isuma ino mwemo musilola nu kulola.

16. (a) I vyani vino Yesu watusambilizye, nupya u mulandu ci uno tulinzile utailila ivintu vivyo? (b) I vyani ivingamwazwa ukusininkizya ukuti Yeova ali Tata umusuma wino mungakwata? (Lolini kambokosi akakuti “Tata Wino Swensi Tukalondekwa.”)

¹⁶ Vino Yesu walondolola Yeova ukuti a Tata witu, tungati mu mazwi yauze Yesu walanda ati: “Yeova asi Tata wane sile, lelo namwe kwene a Tata winu. Nupya nkulonda musininkizye ukuti wamutemwa nupya akamusakamala wenga na wenga.” Fwandi ndi cakuti insita zimwi mwatandika ukutwisika ndi cakuti Yeova wamutemwa, mwayuzya imuti, ‘Uzye ntanga ntaile amazwi ya Mwana uwamanya ningo Tata witu nupya aakalanda lyonsi icumi pali aliwe.—1 Pet. 2:22.

MWATWALILILA UKUSININKIZYA UKUTI YEOVA WAMUTEMWA

17. U mulandu ci uno tulinzile ukutwalilila ukusininkizizya ukuti Yeova watutemwa?

¹⁷ Tulinzile ukwezya na maka ukucita ivingatwazwa ukutwalilila ukusininkizya ukuti Yeova watutemwa. Wakwe vino itusambilila, Satana umulwani witu, akaomvya imicenjelo pakuti atulenge tute ukuombela Yeova. Satana akalonda ukututoovola. Fwandi alatwalilila ukutwezya nu kulenga twayuvwa ukuti Yeova ataatutemwa. Tutalinzile ukuleka ukuti Satana acimvye.—Yobo 27:5.

18. Mungacita uli pakuti mutwalilile ukusininkizya ukuti Yeova wamutemwa?

¹⁸ Pakuti mutwalilile ukulasininkizya ukuti Yeova wamutemwa, mulinzile ukulapepa kuli aliwe nu kumulenga ukuti aamwazwa ukulailola wakwe vino akamulola. Mwaelenganya sana pa malembo aakalondolola vino Yeova akasakamala yayo amutemwa. Mwaiusha ukuti Yeova alatwalilila ukutemwa yayo yonsi amutemwa. Mwaelenganya pa mulandu uno mulinzile ukulalolela ilambo ngu uupe kuli mwemwe. Nupya mwataila ukuti Yeova a Tata winu uwa kwi yulu wakwe vino Yesu walanzile. Lyene ndi cakuti umwi wamuzya ukuti, “Uzye mwasininkizya ukuti Yeova wamutemwa?” mulamwasuka ukuti, “Ee, wantemwa! Nupya cila wanda nkacita ivikalangilila ukuti namutemwa.