CIPANDE CA KUSAMBILILAMO 46
Yeova Watupeela Usininkizyo Uwakuti Insi Ilaya Paladaise
‘Wensi akulonda ukupalwa pano nsi alapalwa na Leza wa cumi.’—EZA. 65:16.
LWIMBO NA. 3 Wewe Maka Itu, Wewe Twasintililamo
VINO TUMASAMBILILAPOa
1. I vyani vino kasesema Ezaya wanenyile Aina Izlaeli?
KASESEMA Ezaya walondolwile Yeova ukuti a “Leza wa cumi.” Izwi lino yasenula ukuti “icumi” likapiliula ukuti “ameni.” (Eza. 65:16.) “Ameni” ikapiliula ukuti “ciye vivyo kwene,” nanti “ica cumi.” Izwi ilyakuti “ameni” nga lyaomviwa muli Baibo ukulozya kuli Yeova nanti Yesu, cikalangilila ukuti ivikulandwapo ivya cumi. Fwandi vino Ezaya walembiile Aina Izlaeli vyali ivya icumi, ivyakuti: Vyonsi vino Yeova walaya, vikafikiliziwa. Yeova walangilila ukuti amazwi yaa acumi pano akafikilizya amalayo yonsi yano watulaya.
2. U mulandu ci uno tulinzile ukutailila malayo yakwe Yeova aakalanda pa vilacitika uku nkoleelo, nupya a mauzyo ci yano tumaasuka?
2 Uzye naswe tungasininkizya ukuti vyonsi vino Yeova walaya ukutucitila uku nkoleelo vilafikiliziwa? Mupipi ni myaka 800 ukufuma umu manda yakwe Ezaya, umutumwa Paulo walanzile umulandu uno amalayo yakwe Yeova yayela acumi. Paulo walanzile ukuti: “Leza atanga abepe.” (Aeb. 6:18) Wakwe vino kafukoka katanga kafumye amanzi asuma alino na manzi amucele, ali vino na Yeova Intulo ya cumi atanga abepe. Fwandi tungataila vyonsi vino Yeova walanda, ukwikako sile na vino walaya ukuti alacita uku nkoleelo. Umu cipande cii tumaasuka amauzyo yaa: I vyani vino Yeova walaya ukutucitila uku nkoleelo? Nupya i vyani vino Yeova wacita ivikalangilila ukuti alafikilizya vyonsi vino watulaya?
I VYANI VINO YEOVA WALAYA?
3. (a) Uulayo ci uno aomvi yakwe Yeova yonsi yatemwa? (Kusokolola 21:3, 4) (b) I vyani vino yamwi yakalanda nga twayanenako pa ulayo uu?
3 Ulayo uno tumalandapo wacindama sana uku yaomvi yakwe Leza yonsi. (Belengini Kusokolola 21:3, 4.) Yeova walaya ukuti “kutalaya imfwa, kutalaya ukuloosya nanti ukulila nanti ukuvwa ukuwaika.” Sweingi tukaomvya amazwi yaa asuma aya muli Baibo aakalanda pali vino umi ulaya umu Paladaise lino tukusimikila. Uzye antu yamwi yakacita uli ngayuvwa ulayo uu? Yamwi yakati, “Ivintu vii vyazipisya vitanga vicitike.”
4. (a) I vyani vino Yeova walanzile ukuti i vilaacitika umu manda itu? (b) Kulunda pa kulaya ulayo uu, i vyani na vyuze vino Yeova wacisile?
4 Ukuya kwene, lino Yeova walenzile umutumwa Yoani ukulemba ulayo uu ukalanda pali vino umi ulaya umu paladaise, wamanyile ukuti twali nu kulanenako yauze pa upaalilo uu ukalanda apa Wene. Yeova wamanyile nu kuti cali nu kutalila antu ukuzumila ulayo uu uwa “vintu ivipya.” (Eza. 42:9; 60:2; 2 Kol. 4:3, 4) Nomba tungasininkizya uli nupya tungazwa uli yauze ukusininkizya ukuti amapalo akazanwa pa Kusokolola 21:3, 4 yalafikiliziwa? Yeova wacita ivintu ivingi ivyalenga tusininkizye ukuti alafikilizya vyonsi vino watulaya. I vyani vimwi vino wacita?
YEOVA AKATWAZWA UKUSININKIZYA UKUTI ULAYO WAKWE ULAFIKILIZIWA
5. I vyani ivikalenga tutaile ulayo wakwe Leza uukalanda pali Paladaise, nupya aepi pano tukavizana?
5 Tukazana umulandu uukalenga tutaile ulayo uno Yeova watulaya ukalanda pali Paladaise umu vikomo ivyalondelelapo. Pa vikomo vii tukabelengapo ukuti: “Uwikala pa cilimba ca wene walanzile ati: ‘Lolini! Nkupanga ivintu vyonsi ukuya ivipya.’ Walanzile nu kuti: ‘Lemba, pano mazwi yaa aacisinka nupya acumi.’ Nupya wanenyile ati: ‘Ivifikiliziwa! Nene Aufa nupya Omega, uwa kutandikilapo nupya uwa kusyalikizya.’”—Kuso. 21:5, 6a.
6. U mulandu ci uno amazwi aaya pa Kusokolola 21:5, 6 yakakomezya utailo witu umu malayo yakwe Leza?
6 U mulandu ci uno amazwi yaa amuli Baibo yakakomezya utailo witu umu malayo yakwe Leza? Ibuku limwi lyalanzile apa vikomo vii ukuti: “Vino Yeova wacitanga paa cali kwati akusaina icipepa icalangililanga ukuti alafikilizya vino walaya.” Ulayo wakwe Leza walembwa pali Kusokolola 21:3, 4. Lyene, pa vikomo 5 na 6, caya kwati Yeova wasaina amapepala ukulangilila ukuti alafikilizya ulayo wakwe. Lekini tulande pali vimwi vino Yeova wacita ivyalenga tumutaile sana.
7. A weni uwatandika ukulanda umu cikomo 5, nupya u mulandu ci uno vino walanda vyacindamila?
7 Icikomo 5 catandikilako na mazwi akuti: “Uwikala pa cilimba ca wene walanzile ati.” (Kuso. 21:5a) Amazwi yaa yacindama sana pano yakalangilila amazwi yano Yeova umwineco walanzile umu vilolwa pa miku itatu umwi buku lya Kusokolola. Usininkizyo uu utapeezilwe ukupitila muli ya malaika nanti muli Yesu, lelo Yeova umwineco u wapeezile. Cii cikalenga tutaile amazwi alondelelapo umu cikomo cii. U mulandu ci? Pano “Leza aatanga abepe.” (Tito 1:2) Amazwi yaa yakalenga tusininkizye ivyalembwa pali Kusokolola 21:5, 6.
“LOLINI! NKUPANGA IVINTU VYONSI UKUYA IVIPYA.”
8. I vyani vino Yeova walanda ivikalenga tusininkizye ukuti vino walaya i vya cumi? (Ezaya 46:10)
8 Lekini lyene tulande apa mazwi yano Yeova walanzile akuti “Lolini!” (Kuso. 21:5) Izwi lino yasenula umu Cigiliki lyakuti “lolini!” lyaomviwa imiku ingi umwi buku lya Kusokolola. Lupapulo lwa kulondelezyamo ivyeo lwalondolola ukuti itoni lii (Ekisiklamesyeni) ilyaomviwa “likaazwa kabelenga ukwika amano uku mazwi alondelilepo.” I vyani vino Leza walanzile ivyalondelela api toni lii? Walanzile ukuti: “Nkupanga ivintu vyonsi ukuya ivipya.” Icacumi ukuti Yeova alacita ivintu vii uku nkoleelo, lelo pa mulandu wakuti wasininkizya ukuti alafikilizya ulayo uu walanzile kwati ivintu vivyo vyatandika ukucitika.—Belengini Ezaya 46:10.
9. (a) Uzye amazwi aakuti “vyonsi ukuya ivipya” yakalozya uku vintu ci viili vino Yeova alacita? (b) I vyani ivilacitikila “iyulu” ni “nsi” ivilipo ndakai?
9 Lekini tulande apa mazwi na yauze aya pali Kusokolola 21:5, aakuti: “Nkupanga ivintu vyonsi ukuya ivipya.” Umu cipande cii amazwi yaa yakalozya uku vintu viili vino Yeova alacita kuli kuti ukonona insi ii ipe nu kuleta insi ipya. Pa Kusokolola 21:1 tukabelengapo ukuti: “Iyulu lya mpiti ni nsi ya mpiti ala ivifumapo.” “Iyulu lya mpiti” likalozya uku mauteeko aakatungululwa na Satana ni viwa vyakwe. (Mate. 4:8, 9; 1 Yoa. 5:19) Izwi lyakuti “insi,” muli Baibo likalozya uku antu akaikalamo. (Utan. 11:1; Masa. 96:1) Fwandi, “nsi ya mpiti” ikalozya uku antu aipe ayako ndakai. Yeova atalazifya sile “iyulu” ni “nsi” ivilipo ndakai lelo alavyonona nu kupyanikizyapo vyuze. Pi “yulu” ni “nsi” ivilipo ndakai alapyanikizyapo “iyulu ilipya ni nsi ipya” kuli kuti uteeko upya na antu alungame.
10. I vyani vino Yeova alalenga ukuya ivipya?
10 Pa Kusokolola 21:5, pakalanda pa vintu vino Yeova ali nu kulenga ukuya ivipya. Mwiusye ukuti Yeova atalanzile ukuti: “Nkupanga ivintu vyonsi ivipya.” Lelo walanzile ukuti: “Nkupanga ivintu vyonsi ukuya ivipya.” Cii cikupiliula ukuti, Yeova alalenga antu ni nsi ukuya ivipya lino alayalenga ukuya amalilike. Wakwe vino Ezaya wasoowile, Yeova alalenga insi yonsi ukuya wakwe vino icalo ca Edeni cali. Nupya alatulenga ukuya apya swensi wenga na wenga. Alapozya alemale, impafu, na yacipuli, nupya alalenga afwe ukuya nu umi nupya.— Eza. 25:8; 35:1-7.
“MAZWI YAA AACISINKA NUPYA ACUMI. . . . IVIFIKILIZIWA!”
11. I vyani vino Yeova wanenyile Yoani ukucita nupya u mulandu ci?
11 I vyani na vyuze vino Leza walanzile ivikalenga tumutaile sana? Yeova wanenyile Yoani ukuti: “Lemba, pano mazwi yaa aacisinka nupya acumi.” (Kuso. 21:5) Yeova atanenyile sile Yoani ukuti “lemba.” Lelo wamunenyile nu mulandu. Watile: “Pano mazwi yaa aacisinka nupya acumi,” icikulangilila ukuti tungataila amazwi yakwe Leza. Tukataizya sana pali vino Yoani uvwilile vino yamunenyile ‘ukulemba.’ Cii calenga twabelenga pa ulayo wakwe Leza ukalanda pali Paladaise nu kwelenganya pa mapalo asuma yano tukaloleela.
12. U mulandu ci uno Yeova walandiile ukuti: “Ivifikiliziwa”?
12 I vyani na vyuze vino Leza walanzile? Watile, “Ivifikiliziwa!” (Kuso. 21:6) Paa vino Yeova walanda pali Paladaise vyaya kwati vyafikiliziwa mpiti. Nupya wakwata insambu izya kulanda vivyo pano kusi icili consi icingalenga afilwe ukufikilizya vino akalonda. Lyene Yeova walanda na vyuze ivikalenga tusininkizye ukuti alafikilizya vino walaya. I vyani vivyo kwene?
“NENE AUFA NUPYA OMEGA”
13. U mulandu ci uno Yeova walandiile ukuti: “Nene Aufa nupya Omega”?
13 Wakwe vino itulandapo mpiti, Yeova walanzile umwineco na Yoani imiku itatu umu vilolwa. (Kuso. 1:8; 21:5, 6; 22:13) Apa miku yonsi itatu, Yeova waomvyanga amazwi akuti: “Nene Aufa nupya Omega.” Izwi lyakuti aufa ali izwi lya kutandikilako muli aufabeti ya Cigiliki, lyene izwi lyakuti omega ali lyakusyalikizyako. Fwandi vino Yeova wailondolola ukuti a “Aufa nupya Omega,” cikalangilila ukuti ndi cakuti watandika ukucita vimwi ala alamalilila ukucita ivintu vivyo.
Ndi cakuti Yeova watandika ukucita vimwi, akasininkizya ukuti wamalilila umulimo uwo (Lolini mapalaglafu 14, 17)
14. (a) A lilaci lino Yeova walanzile ukuti a “Aufa” nupya a lilaci lino alalanda ukuti a “Omega.” (b) Uzye amazwi aaya pa Utandiko 2:1-3 yakalenga tusininkizye vyani?
14 Pa cisila cakuti Yeova waumba Adamu na Eva, wayanenyile ukulonda kwakwe uku yantunze ni nsi. Baibo ikalanda ukuti: “Leza wayapaazile nu kuyanena ati: ‘Vyalanini nu kuvula, mukumane insi.’” (Utan. 1:28) Pa nsita iya tungati Yeova walanzile ukuti a “Aufa.” Yeova walangilile ukulonda kwakwe: Insita yali nu kwiza lino ana yakwe Adamu na Eva acuvwila nupya amalilike yali nu kuzula insi nu kuilenga ukuya paladaise. Ndi cakuti Yeova wafikilizya ukulonda kwakwe, cilaya kwati walanda ukuti a “Omega.” Lino Yeova wamazile “ukuumba mayulu, insi na vyonsi ivyayamo,” walanzile vimwi ivyalangilila ukuti alafikilizya ukulonda kwakwe. Tukazana amazwi yaa pa Utandiko 2:1-3. (Belengini.) Yeova walanzile ukuti uwanda uwalenga 7 wali u wanda wa muzilo kuli aliwe. Uzye cii cikapiliula cani? Cii cikalangilila ukuti Yeova alafikilizya ukulonda kwakwe uku nsi nu ku yantunze pa mpela ya manda 7.
15. U mulandu ci uno Satana limwi afwile welenganyizizyanga ukuti wali nu kulesya ukulonda kwakwe Leza ukucitika?
15 Lino Adamu na Eva yapondwike, yizile iyaya ayembu nupya yambukizye ana yao uluyembu ni mfwa. (Loma 5:12) Limwi cii cifwile calenzile Satana ukulaelenganya ukuti casila Leza atalafikilizya ukulonda kwakwe ukwakulenga antu acuvwila nupya amalilike ukuzula insi. Uzye Satana wali nu kulesya Yeova ukufikilizya ukulonda kwakwe? Satana afwile welenginye ukuti Yeova ataali nu kufikilizya vino walavile. Limwi welenginye ukuti Leza wali nu kukoma Adamu na Eva nu kuumba atwalane yauze amalilike aali nu kufikilizya ukulonda kwakwe. Lelo Leza acita vivyo, Ciwa nga walanzile ukuti Leza uwa ufi. U mulandu ci? A pa mulandu wakuti pa Utandiko 1:28, Yeova wanenyile Adamu na Eva ukuti ana yao yali nu kuzula insi.
16. U mulandu ci uno Satana welenganyizizyanga ukuti Yeova ataali nu kufikilizya vino walavile?
16 I vyani vyuze vino limwi Satana welenginye ukuti ali vino Leza amacita? Satana afwile welenginye ukuti Yeova wali nu kuleka Adamu na Eva ukukwata ana yano yataali nu kuyapo amalilike. (Kasa. 7:20; Loma 3:23) Vii ivicitika, Ciwa nga walanzile ukuti Leza atafilwa ukufikilizya ukulonda kwakwe. U mulandu ci? Pano vii vyali nu kulenga Leza atafikilizya ukulonda kwakwe, kuli kuti, ukulenga ana yakwe Adamu na Eva acuvwila nupya amalilike ukuzula umu Paladaise pano nsi.
17. Uzye Yeova wamazile uli intazi yakwe ucipondoka wakwe Satana na antunze aakutandikilapo, nupya i vyani ivilacitika uku nkoleelo? (Loliniko ni cikope.)
17 Yeova wakweti inzila isuma iyakufikilizizyamo ukulonda kwakwe nanti cakuti Satana alino na Adamu na Eva yamupondokiile. Satana atatazile aelenganyapo apa nzila ii ino Yeova waomvizye. (Masa. 92:5) Yeova wazumilizye Adamu na Eva ukukwata ana nupya cii calenzile vino Yeova walanzile ukucitika. Nupya Yeova walangilile ukuti nga walanda ukuti alacita vimwi, kusi icili consi icingamulesya ukufikilizya vino walanda. Wasininkizye ukuti ukulonda kwakwe kukacitike lino wapeezile “mwanakwe” uwali nu kupususya ana yakwe adamu na Eva acuvwila. (Utan. 3:15; 22:18) Satana atelenginyepo ukuti Leza angapeela umwanakwe uwali nu kupeela umi wakwe ilambo pakuti apususye antunze. U mulandu ci? Pano wapeezile ilambo pa mulandu nu kutemwa kwa cumi. (Mate. 20:28; Yoa. 3:16) Satana wene atakwata ukutemwa kuu. Nomba i vyani ivilacitika pa mulandu ni lambo lii? Pa cisila ca Myaka 1,000 iya Kuteeka Kwakwe Klistu, ana yakwe Adamu na Eva acuvwila nupya amalilike yalikala umu paladaise pano nsi wakwe vino Yeova walondanga pa kutandika. Apa nsita iya, Yeova alalanda ukuti a “Omega.”
VINO TUNGAKOMYA UTAILO WITU UWAKUTI YEOVA ALALETA PALADAISE
18. I vintu ci vitatu vino Yeova walanda ivikalenga tusininkizye ukuti alafikilizya vino walaya? (Loliniko na kambokosi kakuti “Milandu Itatu Iikalenga Tutaile Malayo Yakwe Yeova.”)
18 Wakwe vino itusambilila, tungazwa uli antu aakatwisika ukuti Leza atalafikilizya ulayo wakwe uwakuleta Paladaise ukusininkizya ukuti alaufikilizya? Ica kutandikilapo, Yeova umwineco u walaya ulayo uu. Ibuku lya Kusokolola lyalanda ukuti: “Uwikala pa cilimba ca wene walanzile ati: ‘Lolini! Nkupanga ivintu vyonsi ukuya ivipya.’” Wakwata mano, amaka, nupya akalondesya ukufikilizya ukulonda kwakwe. Cakwe ciili, Yeova wamanya ukuti vino walanzile vilacitika cakuti walanzile ulayo uu kwati wafikiliziwa mpiti. Walanzile ukuti: “Mazwi yaa aacisinka nupya acumi. . . . Ivifikiliziwa!” Cakwe citatu, Yeova ndi cakuti watandika cimwi, akasininkizya ukuti wamalilila wakwe vino walanda ukuti a “Aufa nupya Omega.” Yeova alalenga tusininkizye ukuti Satana uwa ufi.
19. Ndi cakuti antu yakutwisika ulayo wakwe Leza uwakuleta Paladaise, i vyani vino mungacita?
19 Mwaiusya ukuti lyonsi lino mukunenako yauze pali vino Leza watulaya, ala mukukomya utailo winu umu malayo yano watulaya. Ndi cakuti mwaca mwabelengela umwi ulayo wa kuteekezya ukalanda pali paladaise uwaya pa Kusokolola 21:4 nupya walanda ukuti, “Ivintu vii vyazipisya vitanga vicitike,” i vyani vino mungacita? Mungamubelengela nu kumulondolwela ivikomo 5 na 6. Mwalangilila antu vino Yeova wapeela usininkizyo wakuti alafikilizya vino walaya.—Eza. 65:16.
LWIMBO NA. 145 Leza Watulaya Ukuti Kulaya Paladaise
a Umu cipande cii tumalanda pali vino Yeova walanda ivikalenga tusininkizye ukuti ulayo uno walaya uwakuleta Paladaise uwa cumi. Lyonsi lino tukunenako yauze pa ulayo uu, tukakomya utailo witu umu malayo yakwe Yeova.