Mark

4 Jesus ear bar jino katakin armej iturin lo̦jet, im juon jarlepju el̦ap ear itok ñan ippãn. Kõn men in, ear uwel̦o̦k ioon juon wa im jijet im wõnmetol̦o̦k jidik, ak aolepen jarlepju in armej ro rar pãd iparijet. 2 Innem ear jino katakin er ilo an kõjerbal elõñ waanjoñak ko. Im ke ear katakin er, ear ba: 3 “Kom̦win roñjake, ewõr juon ri-kallib ear ilo̦k im jeor ine. 4 Ke ear jeor ine, jet ine rar wõtlo̦k itõrerein ial̦ eo im bao ko imejatoto rar kãtem kañi. 5 Ine ko jet rar wõtlo̦k ilo ijo edekãke im edik bwidej eo ie, im ear m̦õkaj aer eddek kõn an mãni bwidej eo. 6 Bõtab kõn an kajoor an det rar aemedl̦o̦k, im kõn an ejjel̦o̦k okraer rar mej. 7 Im ine ko jet rar wõtlo̦k ibwiljin mar kãlõklõk ko. Im ke kãlõklõk ko rar eddekl̦o̦k, rar kapañ aer eddek im rar jab kalle. 8 Ak jet ine rar wõtlo̦k ioon bwidej eo em̦m̦an, im rar jino eddek im kilepl̦o̦k im jino kalle. Jet rar kalle 30, jet 60, im ko jet 100 alen l̦apl̦o̦k.” 9 Innem ear wõnm̦aanl̦o̦k im ba: “Eo ewõr lo̦jilñin ñan roñjake, en roñjake.”

10 Ke ej make iaan, rijjilõk ro 12 im ri-kal̦oor ro an rar kajjitõk ippãn kõn mel̦el̦ein waanjoñak ko ear kwal̦o̦ki. 11 Innem ear ba ñan er: “Em̦õj lewaj ñan kom̦ men eo ettino im eokkwõjarjar an Aelõñ eo an Anij.* Ak ro jet, ij kõjerbal waanjoñak ko 12 bwe meñe rej reito reitak ak ren jab loe, im meñe rej roñjake ak ren jab mel̦el̦e ñan jidik. Eñin unin reban oktak ñan Anij bwe en jol̦o̦k bõd ko aer.” 13 Innem ear wõnm̦aanl̦o̦k im ba: “Enaaj ewi wãween ami mel̦el̦e kõn waanjoñak ko jet ke kom̦ij jab mel̦el̦e kõn waanjoñak in?

14 “Ri-kallib eo ej jeore naan eo. 15 Ine ko rar wõtlo̦k itõrerein ial̦ eo rej jitõñl̦o̦k ñan armej ro me ej m̦õj wõt aer roñjake naan eo ak Setan eitok im jol̦o̦ke ennaan eo kar likũti ilo bũrueer. 16 Ine ko rar wõtlo̦k ijo edekãke rej jitõñl̦o̦k ñan armej ro me ej m̦õj wõt aer roñjake naan eo ak em̦õkaj aer tõmake im m̦õn̦õn̦õ kake. 17 Bõtab jidik wõt iien aer tõmak kõnke ine ko rar jab eddek ilo bũrueer. Innem ke rej iioon eñtaan ak jum̦ae kõn wõt naan eo, em̦õkaj aer ebbeer. 18 Ine ko rar wõtlo̦k ibwiljin mar kãlõklõk ko rej jitõñl̦o̦k ñan armej ro rej roñjake naan eo, 19 bõtab inepata ko an jukjukun pãd in* im aujiid eo kõn m̦weiuk, im kõn̦aan ko jet rej jelõt bũrueer im kapañ ennaan eo bwe en jab kalle. 20 Ãliktata, ine ko rar wõtlo̦k ioon bwidej eo em̦m̦an rej jitõñl̦o̦k ñan armej ro rej roñjake naan eo im m̦õn̦õn̦õ in bõke. Ine kein rar eddek im lõñ leer. Kõn men in, jet rar kalle 30, jet 60, im ko jet 100.”

21 Im ear bar ba ñan er: “Ejjel̦o̦k en̦ ej kalbubuuki juon l̦aam̦ kõn iep* ak illik l̦aam̦ ium̦win peet. Armej rej illik l̦aam̦ ilo jikin l̦aam̦. 22 Jabdewõt men ko ren̦ojak renaaj wal̦o̦k, im jabdewõt men ko rettino rejjãmin n̦ojak ñan indeeo. 23 Eo ewõr lo̦jilñin ñan roñjake, en roñjake.”

24 Ear wõnm̦aanl̦o̦k wõt im ba: “Kom̦win pokake men ko kom̦ij roñjaki. Joñan eo kom̦ij lel̦o̦ke ej joñan eo naaj bar lewaj ñan kom̦,* bõtab enaaj l̦apl̦o̦k wõt joñan eo kom̦ij bõke. 25 Jabdewõt eo emel̦el̦e, naaj kõm̦m̦an bwe en l̦apl̦o̦k wõt an mel̦el̦e. Bõtab jabdewõt eo ejjab mel̦el̦e, meñe ewõr jidik an jel̦ã ippãn ak enaaj jako jãne.”

26 Innem ear wõnm̦aanl̦o̦k im ba: “Aelõñ eo an Anij ej ãinwõt juon em̦m̦aan eo ej jeor ine ko n̦a ioon bwidej. 27 Em̦m̦aan eo ej kiki ilo boñ im rujlo̦k ilo raan, ak ine ko rej jul̦* im aetokl̦o̦k, bõtab em̦m̦aan eo ejjab jel̦ã ewi wãween aer eddek. 28 Jidik kõn jidik, ine ko rar make eddekl̦o̦k ilo bwidej eo. M̦oktata ewal̦o̦k mejãer, tokãlik ej wal̦o̦k bõlõk, im ãliktata ewal̦o̦k leer. 29 Ej jino wõt an kalo leer ak ejeki kõn jikõl̦, kõnke eiien m̦adm̦õd.”

30 Im ear bar wõnm̦aanl̦o̦k wõt im ba: “Ta eo jemaroñ keidi Aelõñ eo an Anij ñane? Ak waanjoñak ta eo jemaroñ kõjerbale ñan kõmel̦el̦e kake? 31 Ej ãinwõt juon ineen mustard.* Ine in ediktata iaan aolep ine ko ilo lal̦ in rej jeori ilo bwidej. 32 Bõtab ãlikin aer jeore, tokãlik ej eddekl̦o̦k im kilepl̦o̦k jãn keinikkan otemjej ilo juon jikin kallib. Bareinwõt, ra ko raan rekkillep im bao in mejatoto ko rej kãtem pãd ilo ellorin.”

33 Jesus ear kõjerbal elõñ waanjoñak ko ãinwõt waanjoñak kein ñan katakin armej ro kõn naan eo. Ear katakin er ekkar ñan joñan eo remaroñ mel̦el̦e kake. 34 Aolep iien ear kõjerbal waanjoñak ñe ej kõnnaan ñan armej ro. Bõtab ñe ej make iaan ippãn ri-kal̦oor ro an, ej kõmel̦el̦eik er kõn aolepen men kein.

35 Jo̦teenin raan eo wõt, ear ba ñan er: “Jen etal ñan iturãjetin lom̦al̦o in.” 36 Innem ãlikin aer jilkinl̦o̦k jarlepju eo, rar uwel̦o̦k ippãn ilo wa eo. Ekar bar lõñ wa rar jerak ippãerl̦o̦k. 37 Ãlikin aer jerak, tokãlik ear wal̦o̦k juon l̦añ el̦ap, im kõn an l̦ap an n̦o ko buñut wa eo, ejino uwel̦o̦k dãn im wa eo eitõn douj.* 38 Bõtab Jesus ear pãd il̦okwan wa eo im pitõke juon pet im kiki. Innem rar karuji im ba: “Ri-Kaki, ta kwõjjab abn̦õn̦õ ke m̦õttan jidik jemej ke?” 39 Kõn men in, ear jerkak im kauwe kõto eo im kõnnaanl̦o̦k ñan lo̦jet im ba: “Kwõn bõjrak im ikõñ!” Im ear jako an l̦ap kõto im ear lukkuun lur. 40 Im ear ba ñan er: “Etke enañin l̦ap ami mijak? Ta ejjañin wõr ami tõmak ke?” 41 Bõtab rar lõl̦ño̦ñ wõt, im rar kõnnaan ñan doon im ba: “Wõn armej in ke meñe kõto im n̦o ak rej bar pokake e?”