Rom

9 Ij kõnono m̦ool ãinwõt juon ri-kal̦ooran Christ. Ijjab riab, bõklõkõt e aõ ej make kam̦ool ikijjeen jetõb kwõjarjar* 2 bwe ikanooj in bũrom̦õj im ejjab bõjrak an eddo bũruõ. 3 Yokwe bwe en kar ña eo ij jenolo̦k jãn Christ, im en kar ña eo ij jorrããn ijello̦kun ro jeiũ im jatũ, ro nukũ ilo kanniõk 4 me rej ri-Israel. Armej ro rein Anij ear bõk er bwe ren nejin, ear lel̦o̦k ñan er aiboojoj, bujen ko, Kien eo, jeraam̦m̦an eo bwe ren kabuñ ñane, im kallim̦ur ko. 5 Rein rej wal̦o̦ktok jãn ro jim̦m̦aad, im Christ ear wal̦o̦ktok jãn er. Jen nõbar Anij ñan indeeo, eo ej irooj ioon men otemjej. Amen.

6 Bõtab ejjab mel̦el̦ein bwe naan ko an Anij rar likjab. Ejjab aolep ro rar wal̦o̦ktok jãn Israel rej lukkuun “ri-Israel.” 7 Bareinwõt, meñe rar itok jãn Ebream, ak ejjab mel̦el̦ein bwe er aolep rej lukkuun nejin.* Jeje ko rej ba, “Ro naaj n̦aetaer bwe rej nejũm̦* renaaj wal̦o̦ktok jãn Aisak.” 8 Mel̦el̦ein bwe ajri ro ilo kanniõk rejjab lukkuun nejin Anij, bõtab ajri ro rar wal̦o̦ktok kõn wõt kallim̦ur eo, rej lukkuun ro nejin.* 9 Eñin kallim̦ur eo kar kwal̦o̦ke: “Ñe enaaj jejjet iien eo, inaaj itok im Sera enaaj kõl̦otak juon nejin l̦addik.” 10 Ejjab men in wõt ak ke Rebeka ear etta kõn ruo nejin bo, nejierro Aisak, eo jim̦m̦aad, 11 Anij ear karõkl̦o̦k im̦aan kõn wãween an naaj kããlõt juon iaaer, im men in ejjab wawa ioon kõm̦m̦an ko an armej eo, bõtab ej wawa ioon Eo ej kũr armej eo. Eñin unin ilo tõre eo ke rejjañin kar l̦otak im rejjañin kõm̦m̦an jabdewõt men em̦m̦an ak nana, 12 kar ba ñan Rebeka: “Eo erũtto enaaj ri-kõm̦akoko ñan eo edik.” 13 Jeje ko rej ba: “Iar yokwe Jekob, ak Iso iar dike.”

14 Innem ta eo jenaaj ba kiiõ? Anij ekalijekl̦o̦k ke? Ejjab ñan jidik! 15 Ear ba ñan Moses: “Inaaj kwal̦o̦k tũriam̦o ñan jabdewõt eo inaaj tũriam̦okake, im inaaj kwal̦o̦k jouj ñan jabdewõt eo inaaj jouj ñane.” 16 Kõn men in, kããlõt eo an Anij ejjab wawa ioon kõn̦aan ko an juon armej ak kõn an kate,* bõtab ej wawa wõt ioon Anij, eo ewõr tũriam̦o ippãn. 17 Ilo Jeje ko, Anij ear kõnnaan ñan Pero im ba: “Unin aõ kar kõtl̦o̦k bwe kwõn mour wõt ej bwe in kõjerbal eok ñan kwal̦o̦k aõ kajoor im kwal̦o̦k ãt eo eta ñan aolepen lal̦ in.” 18 Aet, Anij ej kwal̦o̦k tũriam̦o ñan jabdewõt eo ekõn̦aan tũriam̦okake, bõtab ej kõtl̦o̦k an ro jet kapen bũrueer.

19 Ijoke kom̦ naaj kajjitõk ippa im ba: “Innem etke Anij el̦akkar lo wõt ruõn armej? Bwe ewõr ke en̦ emaroñ jum̦aik ankilaan?” 20 Ak kiiõ wõn kwe bwe kwõn jum̦aik ankilaan Anij? Juon men kar ãeiki ej ke kajjitõk ippãn eo ear kõm̦m̦ane im ba: “Etke kwaar kõm̦m̦ane ña ilo wãween in?” 21 Ta ejjel̦o̦k an ri-kõm̦m̦an jãpe eo maroñ ioon kũl̦e eo ke? Ta ejjab maroñ kõjerbal ejja kũl̦e eo wõt ñan kõm̦m̦ane juon jãpe ñan men ko el̦ap tokjãer, im bar kõm̦m̦ane juon jãpe ñan men ko edik tokjãer ke? 22 Ãindein ippãn Anij, ewõr an maroñ ñan bõktok illu eo an im kwal̦o̦k an kajoor, bõtab ej kijenmej ippãn jãpe ko me rej tõllo̦kier ñan bõk ko̦kkure. 23 Ear kõm̦m̦ane men in bwe en kwal̦o̦k kõn aiboojoj eo an el̦ap ñan jãpe ko me rej tõllo̦kier ñan bõk tũriam̦o, ko ear kõpooji m̦oktal̦o̦k bwe ren bõk aiboojoj. 24 Jãpe kein ej kõj, im ear kããlõt kõj ejjab jãn ibwiljin ri-Ju ro wõt, bõtab jãn bar ibwiljin ri-aelõñ ko. Innem ta jorrããn eo ilo men in? 25 Ejjel̦o̦k oktak men in jãn men eo ear ba ilo bokin Hoseia: “Armej ro rejjab doõ, inaaj n̦aetaer ‘ro doõ,’ im kõrã eo iar jab yokwe, inaaj n̦aetan ‘eo ij yokwe,’ 26 im ilo jikin eo iar jiroñl̦o̦k er im ba, ‘Kom̦ij jab armej ro doõ,’ naaj n̦aetan ro ilo ijin ‘nejin Anij eo emour.’”

27 Bareinwõt, Aiseia ear kwal̦o̦k kõn Israel im ba: “Meñe elukkuun lõñ armej in Israel ãinwõt bok ko iparijet, ak jet wõt iaaer renaaj bõk lo̦mo̦o̦r. 28 Jeova* enaaj etale aolepen lal̦ in. Enaaj kadedeikl̦o̦k men in im eban rum̦wij kake.”* 29 Aiseia bareinwõt ear kanaan im ba: “El̦aññe Jeova,* ri-tõl eo an jarin tarin̦ae eo ilañ, ear jab kõtl̦o̦k bwe jet iaan ro nejid* ren mour wõt, innem jenaaj kar ãinwõt armej in Sodom im Gomorra.”

30 Ta eo jenaaj ba kiiõ? Meñe ri-aelõñ ko rar jab jibadek wãnõk, bõtab kiiõ em̦õj aer bõk wãnõk. Wãnõk in ej wal̦o̦k jãn tõmak. 31 Meñe ri-Israel ro rar jibadek wãnõk, eo ej pedped ioon kien eo, ak rar jab lukkuun kajejjete* kien eo. 32 Etke? Kõnke rar jab jibadeke ikijjeen tõmak, bõtab rar jibadeke ikijjeen kõm̦m̦an ko aer. Rar buñ kõn wõt “dekãin tipñõl eo,” 33 ãinwõt an Jeje ko ba: “Roñjake m̦õk! Ij likũt ilo Zaion juon dekãin tipñõl im juon dekãin kal̦õkatip, bõtab eo ej likũt an tõmak ilo e eban ajl̦o̦k.”