1 Tessalonika
2 Ro jeim im jatim, kom̦ kanooj in jel̦ã bwe ear wõr tõprak ko rar wal̦o̦k jãn am kar lowaj kom̦. 2 Meñe ilo jinoin kõmar iioon eñtaan im ear nana aer kõm̦m̦an ñan kõm ilo Pilippai, ãinwõt ami jel̦ã, bõtab Anij eo ad ear kaperan kõm bwe kõmin kwal̦o̦k ñan kom̦ ennaan eo em̦m̦an jãn e meñe kõmar iioon el̦ap jum̦ae.* 3 Naanin rõjañ ko kõmij liwaj rejjab bõd, ak ettoon, ak m̦on̦e kom̦, 4 bõtab kõmij kõnono ãinwõt ro Anij ear kamãlim er ñan bõk eddon ennaan eo em̦m̦an. Innem kõmij kõnono ejjab ñan kabuñbũruon armej, bõtab ñan kabuñbũruon Anij, eo ej etale bũruod.
5 Ilo m̦ool, kom̦ jel̦ã bwe kõmij jañin kar kõjerbal naanin nõbar ko retao ak kõm̦m̦an jabdewõt men kõn arõk; Anij ej ri-kam̦ool ilo men in! 6 Bareinwõt, kõmij jañin kar kappok nõbar jãn jabdewõt armej, jãn kom̦ ak jãn ro jet, meñe ilo m̦ool, ãinwõt ke kõmij rijjilõk ro an Christ, enaaj kar l̦ap ami eddodo im jol̦o̦k el̦ap jããn ñan jipañ kõm. 7 Ijello̦kun am ãindein, kõmar kwal̦o̦k wõt jouj ibwiljimi, ãinwõt an juon jinen eo ej kanninnin kwal̦o̦k an lukkuun kea kake* ajri ro nejin. 8 Kõn ammim lukkuun kea kõn kom̦, kõmar jek ilo bũruem ñan* lewaj ñan kom̦, ejjab ennaan eo em̦m̦an jãn Anij wõt ak bareinwõt mour ko ammim kõnke el̦ap ami jitõnbõro ippem.
9 Ro jeim im jatim, ejjel̦o̦k pere bwe kom̦ij keememej am kar jerbal im lukkuun kate kõm. Kõmar jerbal raan im boñ, bwe kõmin jab kõm̦m̦an an jabdewõt iaami eddodo im jol̦o̦k el̦ap jããn ñan jipañ kõm ke kõmar kwal̦o̦k ñan kom̦ ennaan eo em̦m̦an jãn Anij. 10 Kom̦ kab Anij, kom̦ij jim̦or ri-kam̦ool kõn am kar lukkuun tiljek, wãnõk, im an ejjel̦o̦k n̦otaam ippemi ilo am kar kõm̦m̦an ñan kom̦ rũttõmak ro. 11 Kom̦ kanooj jel̦ã bwe ear jab bõjrak am rõjañ im kaenõm̦m̦an kom̦ im kakapilõk kom̦ kajjojo, ãinwõt an juon jemãn kõm̦m̦ane ñan ro nejin, 12 kõnke kom̦win maroñ etetal wõt ekkar ñan wãween ko an Anij, eo ej kũr kom̦ ñan Aelõñ eo an* im aiboojoj eo an.
13 Ilo m̦ool, eñin bareinwõt un eo unin ejjab jem̦l̦o̦k am kam̦m̦oolol Anij, kõnke ke kom̦ar bõk naan eo an Anij, eo kom̦ar roñ kake jãn kõm, kom̦ar tõmake, ejjab kõnke ej jãn armej, ak kõnke elukkuun m̦ool ãinwõt ke ej naanin Anij, eo ej bareinwõt jerbal ilo kom̦ rũttõmak ro. 14 Kom̦ ro jeiũ im jatũ, kom̦ar oktak im ri-kajjioñe eklejia ko an Anij ilo Judia, im rej doon Christ Jesus, kõnke men ko kom̦ij eñtaan kaki jãn armej in aelõñ n̦e ami, erkein ejja men ko wõt rej bar eñtaan kaki jãn ri-Ju ro, 15 ro rar m̦an Irooj Jesus im ri-kanaan ro, im rar kaeñtaan kõm. Bareinwõt rejjab kabuñbũruon Anij, im rej jum̦aiki men ko rej ñan em̦m̦anl̦o̦k eo an aolep armej, 16 ilo aer kajjioñ bõbraik kõm jãn ad kwal̦o̦k ñan armej in aelõñ ko bwe ren maroñ bõk lo̦mo̦o̦r. Aer ãindein ej kalõñl̦o̦k wõt joñan jerawiwi ko aer, ijoke ilo jem̦l̦o̦kin, illu eo an enaaj itok ioer.
17 Ro jeim im jatim, ke kõmar jenolo̦k* jãn kom̦ ium̦win jidik iien (ilo ãnbwin, ejjab ilo bõro), kõmar lukkuun kate kõm bwe kõmin bar lo kom̦,* im eñin lukkuun kõn̦aan eo am. 18 Kõn wõt men in, kõmar kõn̦aan iwõj ñan ippemi. Aet ña Paul, iar kajjioñ kõm̦m̦ane men in, ejjab juon wõt alen, ak ruo alen, bõtab Setan ear bõbrae ial̦ in am. 19 Bwe ta kõjatdikdik eo am ak am lañlõñ ak am kũrawũn in anjo̦ im̦aan ad Irooj Jesus ñe enaaj pãd? Ejjab ke kom̦? 20 Em̦ool kom̦ eo kom̦ij unin am utiej bũruem im am lañlõñ.