Luk

3 Ilo iiõ eo kein kajoñoul l̦alem in an Taibiriõs Sizar irooj l̦apl̦ap, Pontiõs Pail̦at ear kom̦ja* ilo Judia, Herod* ear tõl ilo Galili, im l̦eo jein etan Pilip ear tõl jikin ko ilo Ituria im Trakonitis, im Laisensias ear tõl ilo Abilini. 2 Ilo tõre ko an Keiapas im bũrij eo eutiej etan Annas, Anij ear kwal̦o̦k naanin keeañ ko an ñan Jon, nejin Zakeraias, ke Jon ear pãd ilo ãne jem̦aden.

3 Kõn men in, Jon ear ilo̦k ñan aolep jikin ko ipel̦aakin Reba Jordan, im ear kwal̦o̦k ñan armej ro bwe rej aikuj peptaij ñan kaalikkar aer ukel̦o̦k bwe Anij en maroñ jol̦o̦k jerawiwi ko aer, 4 ãinwõt kar je ilo bok eo an ri-kanaan Aiseia: “Juon ainikien ej lam̦õj jãn ãne jem̦aden im ba: ‘Kõpooj ial̦ eo an Jeova!* Kajim̦we ial̦ eo an. 5 Ej aikuj jioñ aolep kom̦lal̦ ko ikõtaan tol̦ ko, im aolep tol̦ ko rel̦l̦ap im tol̦ ko reddik ren jepaan wõt juon. Ej aikuj jim̦we aolep ial̦ ko raankeke, im en metal aolep ial̦ ko redekãke, 6 im aolep armej* renaaj lo wãween an Anij bõktok lo̦mo̦o̦r.’”

7 Innem ke armej ro rar itok ñan ippãn Jon bwe en peptaiji er, ear ba: “Kom̦ nejin jineik vaiper ko, wõn eo ear kakkõl kom̦ bwe kom̦win ko jãn raanin kwi eo an Anij? 8 Kõm̦m̦an ko ami ren kaalikkar bwe kom̦ij ukel̦o̦k. Kom̦win jab ba ippemi make im ba, ‘Ebream ej jememmim.’ Ij ba ñan kom̦ bwe Anij emaroñ ukot dekã kein bwe ren erom nejin Ebream. 9 Ilo m̦ool, em̦õj likũti juon ũlũl iturin okran wõjke ko. Jabdewõt wõjke ejjab em̦m̦an men ko leen ñe ej kalle naaj jeke im jol̦o̦ke ilo kijeek.”

10 Innem armej ro rar kajjitõk ippãn im ba: “Ta eo kõmij aikuj kõm̦m̦ane?” 11 Jon ear uwaak im ba: “Em̦m̦aan eo ewõr ruo an nuknuk* en lel̦o̦k juon ñan em̦m̦aan eo ejjel̦o̦k an, im eo ewõr kijen en bar ãindein ñan eo ejjel̦o̦k kijen.” 12 Ekar bar wõr ri-tõltõl eowõj rar itok bwe ren peptaij, im rar kajjitõk ippãn im ba: “Ri-Kaki, ta eo kõmij aikuj kõm̦m̦ane?” 13 Ear uwaake er im ba: “Ñe kom̦ij tõltõl eowõj, kom̦win jab bõk* el̦apl̦o̦k jãn joñan eo em̦õj an kien karõke.” 14 Ekar bar wõr rũttarin̦ae rar kajjitõk ippãn im ba: “Ta eo kõmij aikuj kõm̦m̦ane?” Im ear ba ñan er: “Kom̦win jab bõk jabdewõt men jãn armej ro ilo ami kaamijak er ak kõm̦m̦an rueer ilo ami riab. Kom̦win m̦õn̦õn̦õ wõt kõn kõj ko ami.”*

15 Kõnke armej ro rar kõtmãne an Christ itok, rar kiiõ jino l̦õmn̦ak im ba ilo bũrueer kõn Jon im ba, “Bõlen em̦m̦aan in ej Christ.” 16 Bõtab Jon ear ba ñan er aolep im ba: “Ña ij peptaiji kom̦ ilo dãn, bõtab eo ekajoorl̦o̦k jãn ña enaaj itok, im ijekkar ñan jel̦ate to in juuj ko an. Enaaj peptaiji kom̦ kõn jetõb kwõjarjar* im kõn kijeek.* 17 Ej jibwe juon kein jerbal* ñan kõjenolo̦k wiit ko jãn kilier, ñan an lukkuun karreoiki jikin kõm̦m̦an wiit eo an im ñan an aini aolepen wiit ko ñan ilowaan im̦õn kakkon̦ eo an. Bõtab, enaaj tile kilin wiit ko ilo kijeek eo ejaje kun.”

18 Bareinwõt, ear rõjañ armej ro ilo elõñ wãween, im ear wõnm̦aanl̦o̦k wõt im kwal̦o̦k kõn ennaan eo em̦m̦an ñan er. 19 Bõtab Jon ear kauweiki Herod, ri-tõl eo an Galili, kõn an nana men ko ear kõm̦m̦ani, im kõn an kar m̦areik Herodias, lio pãleen l̦eo jein. 20 Kõn men in, Herod ear bar kõm̦m̦ane juon men enana, ear likũti Jon ilo jikin kalbuuj.

21 Jon ear peptaiji elõñ armej, im ear bar peptaiji Jesus. Ke Jesus ear jar, lañ ear pel̦l̦o̦k 22 im jetõb kwõjarjar* ear itok ioon ãinwõt juon m̦ul̦e, im juon ainikien jãn lañ ear ba: “Kwe Nejũ jitõnbõro ippa im ebuñbũruõ kõn kwe.”