Luk
4 Jesus ear obrak kõn jetõb kwõjarjar,* im ear etal jãn Reba Jordan. Jetõb kwõjarjar* ear tõle ñan ãne jem̦aden, 2 im ear pãd ijo ium̦win 40 raan. Ear jab m̦õñã ñan jidik ium̦win aolepen raan kein, im ke ear jem̦l̦o̦k raan kein, ear kanooj kwõle. Kõn men in, Tepil̦ eo ear kajjioñ kapoiki, 3 im ear ba ñane: “El̦aññe kwe nejin Anij, kwõn ba ñan dekã in bwe en erom bũreet.” 4 Ak Jesus ear uwaak im ba: “Em̦õj je, ‘Armej rejjab maroñ mour wõt kõn bũreet.’”
5 Innem Tepil̦ eo ear ãñinl̦o̦k Jesus ñan raan juon tol̦ im kaalooje kõn aolep aelõñ ko ilo lal̦ in ium̦win jidik wõt iien. 6 Im Tepil̦ eo ear ba ñane: “Inaaj lewaj aolep aelõñ kein im aer aiboojoj bwe ren pãd ium̦win maroñ eo am̦. Aolep men kein rej pãd ium̦win maroñ e aõ, im imaroñ lil̦o̦k ñan jabdewõt eo ikõn̦aan. 7 El̦aññe kwõnaaj buñpedo im kabuñ ñan ña juon wõt alen, aolep men kein renaaj am̦.” 8 Innem Jesus ear uwaak im ba: “Em̦õj je, ‘Kwõn kabuñ ñan Jeova* am̦ Anij, im e wõt kwõn karejar ñane.’”*
9 Innem Tepil̦ eo ear ãñinl̦o̦ke ñan Jerusalem, im ear bõke ñan ijo eutiejtata ilo tampel̦ eo, im ear ba ñane: “Ñe kwe nejin Anij, kwõn kãlal̦l̦o̦k jãn ijin 10 bwe em̦õj je, ‘Enaaj ba ñan enjel̦ ro an kõn kwe bwe ren kõjparok eok,’ 11 im, ‘Renaaj kotak eok kõn peier bwe en jab itaak neem̦ ilo dekã.’” 12 Bõtab Jesus ear uwaak im ba: “Em̦õj je, ‘Kwõn jab mãlejjoñe Jeova* am̦ Anij.’” 13 Ãlikin an Tepil̦ eo kajjioñ kapo Jesus, ear ilo̦k jãne m̦ae bar juon iien.
14 Innem Jesus ear jepl̦aak ñan Galili, im jetõb kwõjarjar* eo an Anij ear pãd ippãn. Ennaan ko rem̦m̦an kõn e rar ajeededl̦o̦k ñan aolep bukwõn ko ijo. 15 Bareinwõt, ear katakin armej ro ilo im̦õn kabuñ ko aer, im er otemjej rar nõbare.
16 Tokãlik, ear ilo̦k ñan Nazeret, ijo ear dik im rũttol̦o̦k ie. Innem ãinwõt an kõn kõm̦m̦ane ilo raanin Jabõt,* ear del̦o̦ñl̦o̦k ilo im̦õn kabuñ eo im ear jutak bwe en riit. 17 Rijjipañ eo ear lel̦o̦k ñane bok lemlem eo an ri-kanaan Aiseia, im ear erl̦o̦ke im pukote ijo ej ba: 18 “Jitũbõn* Jeova* ej pãd ippa kõnke em̦õj an kapit* eõ bwe in kwal̦o̦k kõn ennaan eo em̦m̦an ñan ro rejeram̦õl. Ear jilkintok eõ bwe in kwal̦o̦k ñan ri-kõm̦akoko ro bwe renaaj anemkwõj, kwal̦o̦k ñan ro repilo bwe renaaj lol̦o̦kjen̦, karõl̦o̦k ro rej pãd ilo eñtaan, 19 im kwal̦o̦k bwe ej iien an Jeova* buñbũruon kake armej.” 20 Ãlikin an riit, ear limi bok lemlem eo im karo̦o̦le ñan ippãn rijjipañ eo. Innem ear jijet, bõtab aolep armej ro ilo im̦õn kabuñ eo rar kanooj kalimjeke. 21 Innem ear ba ñan er: “Eoon eo ej kab m̦õj ami roñjake em̦õj an jejjet kũtien rainin.”
22 Aolep armej ro rar kwal̦o̦k naan ko rem̦m̦an kõn e im rar bwilõñ kõn naan ko rejouj ear kwal̦o̦ki, im rar ba: “Ejjab ke l̦eo nejin Josep in?” 23 Innem ear ba ñan er: “Ejjel̦o̦k pere bwe kom̦ naaj kõjerbal jabõn kõnnaan eo ej ba, ‘Taktõ, kwõn kõmour eok make.’ Kom̦ naaj kõjerbale ñan ña ilo ami ba, ‘Kõmar roñ bwe elõñ men ko kwaar kõm̦m̦ani ilo Kaperneum, kwõn bar kõm̦m̦ani men kein ilo bukwõn in am̦.’” 24 Bareinwõt ear ba: “Armej rejjab kautieje jabdewõt ri-kanaan jãn bukwõn eo aer. 25 Ñan waanjoñak, ij ba ñan kom̦ bwe ilo kar tõre ko an Ilaija, ke ear jab wõt ium̦win jilu iiõ im jiljino allõñ, im ear l̦ap ñũta ilo aolepen ãneo, ear lõñ kõrã ilo Israel ear mej l̦õm̦aro pãleer. 26 Meñe ãindein ak Anij ear jab jilkinl̦o̦k Ilaija ñan ippãn jabdewõt iaan kõrã rein. Bõtab ear jilkinl̦o̦k ñan ippãn juon kõrã emej l̦eo pãleen ilo Zarepat, juon jikin ilo Saidon. 27 Bareinwõt, ilo tõre ko an ri-kanaan Ilaisha, ear lõñ rar bõk nañinmej in lõba ilo Israel. Meñe ãindein ak ear jab karreoiki* jabdewõt iaaer ijello̦kun wõt em̦m̦aan in Siria eo etan Neaman.” 28 Aolep armej ro ilo im̦õn kabuñ eo me rar roñ an ba men kein rar oktak im kanooj illu. 29 Innem rar jutak im kadiwõjl̦o̦ke ñan nabõjin jikin eo, im rar tõll̦o̦ke ñan jabõn tol̦ eo bukwõn eo aer ej pãd ie bwe ren itõn ko̦wõtlo̦ke. 30 Bõtab ear etal ibwiljierl̦o̦k im ilo̦k wõt ilo ial̦ eo an.
31 Innem ear wanlal̦l̦o̦k ñan Kaperneum, juon jikin ilo Galili, im ear katakin armej ro ilo raanin Jabõt. 32 Armej ro rar lukkuun bwilõñ kõn wãween an katakin kõnke wãween an kõnono ear ãinwõt juon eo ewõr maroñ ippãn. 33 Ilo iien in, ear wõr juon em̦m̦aan ilo im̦õn kabuñ eo jetõb ettoon* ear mo̦k* n̦a ippãn. Em̦m̦aan eo ear lam̦õj kõn juon ainikien el̦ap im ba: 34 “Jesus ri-Nazeret, ta n̦e kokõn̦aan jãn kõm? Kwaar itõn kaeñtaan kõm ke? Ilukkuun jel̦ã wõn kwe, kwe ri-Karejar eo Eokkwõjarjar an Anij.” 35 Bõtab Jesus ear kauweiki im ba: “Kwõn ikõñ, im kwõn diwõjl̦o̦k jãn em̦m̦aan n̦e.” Ãlikin an jetõb ettoon eo patõke em̦m̦aan eo n̦a ibwiljin armej ro, ear diwõjl̦o̦k jãne bõtab ear jab kõjorrããne. 36 Ke aolep armej ro rar lo men in, rar lukkuun bwilõñ im rar kõnnaan ñan doon im ba: “Kain naan rot kein ej kõjerbali? Joñan an l̦ap kajoor im maroñ ippãn, meñe jetõb ko rettoon* ak rej pokake ta ko ej ba im diwõjtok jãn armej ro!” 37 Innem ear ajeededl̦o̦k ennaan ko kõn e ilo aolep jikin ko ipel̦aakin ãneo.
38 Ãlikin an ilo̦k jãn im̦õn kabuñ eo, ear etal im del̦o̦ñl̦o̦k ilo m̦weo im̦õn Saimõn.* Kõrã eo jinen lio pãleen Saimõn ear eñtaan kõn an l̦ap an piba, im rar kajjitõk bwe en jipañe. 39 Innem ear ilo̦k im jutak ijo kõrã eo ej babu ie im kõmouri, im ear jako an piba, im em̦õkaj an jerkak im jino kõm̦m̦an kijeer.
40 Ilo iien eo al̦ ej tulo̦k, aolep armej ro ewõr ri-nañinmej ippãer rar bõktok ri-nañinmej ro ñan ippãn Jesus. Innem ear kõmour er ilo an likũt pein ioon kajjojo iaaer. 41 Bareinwõt, jetõb ko rettoon rej diwõjtok jãn elõñ iaan armej ro, ak rej lam̦õj im ba: “Kwe Nejin Anij.” Bõtab ear kauweik er im jab kõtl̦o̦k aer ba jabdewõt kõnke rejel̦ã bwe e Christ.
42 Innem ke ear jibboñ, ear ilo̦k jãn ijo im etal ñan juon jikin bwe en make iaan ie. Bõtab jarlepju in armej ro rar pukpukote im ke rar itok ñan ijo ej pãd ie, rar kajjioñ kabõjrake bwe en jab etal jãn er. 43 Bõtab ear jiroñl̦o̦k er im ba: “Ij aikuj bar kwal̦o̦k kõn ennaan eo em̦m̦an kõn Aelõñ eo an Anij* ilo jikin ko jet, kõnke eñin unin an kar Anij jilkintok eõ.” 44 Kõn men in, ear ilo̦k im kwal̦o̦k naan ilowaan im̦õn kabuñ ko ilo Judia.