Epesõs
5 Kõn men in, kom̦win ri-kajjioñe Anij, ãinwõt ro nejin rejitõnbõro, 2 im wõnm̦aanl̦o̦k wõt ilo ami etetal ilo yokwe ãinwõt an kar Christ bareinwõt yokwe kõj* im ajel̦o̦k e make kõn kõj* ãinwõt juon menin joortak im katok ebwiin mãlu ñan Anij.
3 Jab kõtl̦o̦k bwe l̦õñ* im jabdewõt men ko rettoon kab arõk ren wal̦o̦k ibwiljimi, kõnke rejjab ekkar ñan ro rekkwõjarjar. 4 Bareinwõt, en jab wal̦o̦k kõm̦m̦an ko rekajjookok, naan ko rebwebwe, im kõm̦m̦an kõjak ko renana—men ko rejekkar—ijoke kom̦win kwal̦o̦k kam̦m̦oolol. 5 Kom̦ jel̦ã im kom̦ij kile ippemi make bwe ejjel̦o̦k juon ri-l̦õñ,* ak juon eo ej mour ettoon, ak juon eo earõk, eo im ej m̦õttan kabuñ ñan ekjab, ewõr an ãjinkõj ilo Aelõñ* eo an Christ im an Anij.
6 Kõn wõt men kein, illu eo an Anij enaaj itok ioon ro nejin kipliia. Innem ejjel̦o̦k armej en m̦on̦e kom̦ kõn naan ko ejjel̦o̦k kobbaer. 7 Kõn men in, kom̦win jab kobal̦o̦k ilo kõm̦m̦an ko aer, 8 bwe kom̦ kõn pãd ilo marok, ak kiiõ kom̦ij pãd ilo meram ilo ami juon wõt ippãn Irooj. Kom̦win wõnm̦aanl̦o̦k wõt im etetal ãinwõt ajri in meram, 9 bwe aolep men ko rem̦m̦an, im wãnõk, im m̦ool rej leen meram. 10 Kom̦win wõnm̦aanl̦o̦k wõt im lukkuun lale ta ko rej kabuñbũruon Irooj, 11 im bõjrak jãn ami bõk kun̦aami ilo jerbal ko rewaan an marok, bõtab kom̦win kajedmatmat jerbal kein. 12 Bwe men ko armej rej kõm̦m̦ani ilo ittino rekajjookok, joñan elukkuun kajjookok ñan kõnono kaki. 13 Kiiõ em̦õj kajedmatmat* aolep men kein ikijjeen meram eo, bwe men ko em̦õj kaalikkari rej oktak im meram. 14 Kõn men in, em̦õj ba: “O kwe eo kwõj kiki, kwõn ruj, im kwõn jerkak jãn mej, im Christ enaaj rome eok.”
15 Innem kom̦win kanooj lale wãween ami etetal bwe en jab ãinwõt ri-jajel̦o̦kjen̦, ak en ãinwõt ro remãlõtlõt, 16 im kom̦win kõjerbal iien ko ami ilo mãlõtlõt* kõnke raan ko renana kein. 17 Kõn men in, kom̦win bõjrak jãn ami jajel̦o̦kjen̦, ak kom̦win kate wõt kom̦ ñan jel̦ã ta ankilaan Jeova.* 18 Bareinwõt, kom̦win jab kadek kõn wain kõnke ej tõll̦o̦k ñan m̦anit ko renana,* bõtab kom̦win koobrak kom̦ iien otemjej kõn jetõb kwõjarjar.* 19 Kom̦win kõnono ñan doon* kõn sam ko, nõbar Anij im al kõn al in kabuñ, im kom̦win kõjañjañ im al ñan Jeova* jãn bũruomi, 20 im iien otemjej, lel̦o̦k kam̦m̦oolol ñan eo ej ad Anij im Jemãd, kõn men otemjej ilo etan ad Irooj Jesus Christ.
21 Kõn wõt mijak* Christ, kom̦win kõttãik kom̦ ñan doon. 22 Kõrã ro ren kõttãik er ñan l̦õm̦aro pãleer, ãinwõt ñan Irooj, 23 kõnke l̦eo ej bõran lio pãleen, ãinwõt an Christ bõran eklejia eo, im ej ri-lo̦mo̦o̦ren ãnbwin in.* 24 Innem, ãinwõt an eklejia eo kõttãiki ñan Christ, ãindein lim̦aro rej aikuj bareinwõt kõttãik er ñan l̦õm̦aro pãleer ilo men otemjej. 25 Kom̦ l̦õm̦aro, wõnm̦aanl̦o̦k wõt im yokwe lim̦aro pãleemi, ãinwõt an kar Christ bareinwõt yokwe eklejia eo im lel̦o̦k an mour kõn e, 26 bwe en kokkwõjarjare im karreoiki kõn dãn, eo ej naanin Anij. 27 Ilo wãween in, en aiboojoj eklejia eo im̦aan mejãn, en eokkwõjarjar im jab ettoon, im ejjel̦o̦k lippijinjin ak el̦l̦oktõktõk ak men ko ãierl̦o̦kwõt.
28 Ilo ejja wãween in wõt, l̦õm̦aro rej aikuj yokwe lim̦aro pãleer, ãinwõt aer yokwe ãnbwinnier make. Juon em̦m̦aan eo ej yokwe lio pãleen ej yokwe e make, 29 bwe ejjel̦o̦k em̦m̦aan en̦ ej dike ãnbwinnin* make, bõtab ej naajidiki im kaorõke, ejja ãinwõt an Christ kõm̦m̦an ñan eklejia eo, 30 kõnke kõj aolep jej m̦õttan ko ilo ãnbwinnin. 31 “Kõn men in, l̦eo enaaj em̦m̦akũt jãn jinen im jemãn im pãdwõt ippãn lio pãleen, im erro naaj juon wõt kanniõk.” 32 Men eo ettino im eokkwõjarjar elukkuun aorõk. Men in ij kõnono kake kiiõ ej kõn Christ im eklejia eo. 33 Bõtab kajjojo iaami ej aikuj yokwe lio pãleen ãinwõt an yokwe e make. Bareinwõt, lio ej aikuj lukkuun kwal̦o̦k kautiej ñan l̦eo pãleen.