2 Piter
3 Ro rejitõnbõro, eñin ej kiiõ lõta eo kein karuo ij jewaj ñan kom̦. Im ãinwõt kar ilo lõta eo aõ kein kajuon, ikõn̦aan ko̦ruj l̦õmn̦ak kan̦e ami ikijjeen aõ kakeememej kom̦, 2 bwe kom̦win keememej wõt naan ko ri-kanaan ro rekkwõjarjar rar ba m̦oktal̦o̦k,* im kien ko Irooj im ri-Lo̦mo̦o̦r eo ear kwal̦o̦ki ikijjeen rijjilõk ro ami. 3 M̦oktata, kom̦win jel̦ã men in bwe ilo raan ko ãliktata, ro rej kajjirere renaaj itok kõn naanin kajjirere ko aer, renaaj wõnm̦aanl̦o̦k im kõm̦m̦an ekkar ñan kõn̦aan ko aer, 4 im renaaj ba: “Ewi kallim̦ur eo kõn iien eo enaaj pãd? Jãn iien eo ke ro jim̦m̦aad rar mej, men otemjej rejja ãindein wõt jãn jinoin kõm̦anm̦an lal̦.”
5 Rej kõjekdo̦o̦n mel̦el̦e in em̦ool, bwe kõn naan ko Anij ear ba, lañ ear pãd jãn iien ko etto, im lal̦ in ear wal̦o̦k lõñtak jãn dãn im ear pãd iol̦apen dãn ko, 6 im lal̦ eo ilo iien eo ear jorrããn kõn ejja men kein wõt ke ear ibwijleplep im jakol̦o̦k kõn dãn. 7 Im ikijjeen naan ko Anij ej ba, lañ im lal̦, ko rej pãd kiiõ, em̦õj likũti bwe ren kõttar kijeek im rej pãd m̦ae raanin ekajet eo im iien eo naaj ko̦kkure ro rej jum̦ae Anij.
8 Ijoke ro rejitõnbõro, kom̦win jab mel̦o̦kl̦o̦ke men in bwe juon raan ippãn Jeova* ej ãinwõt juon to̦ujin iiõ, im juon to̦ujin iiõ ej ãinwõt juon raan ippãn. 9 Jeova* eban rum̦wij in kajejjet kallim̦ur eo an ãinwõt an jet armej l̦õmn̦ak, bõtab ej kijenmej ippemi kõnke ejjab kõn̦aan bwe jabdewõt en jako, ak ekõn̦aan bwe aolep ren ukel̦o̦k. 10 Ijoke raan eo an Jeova* enaaj itok ãinwõt juon ri-ko̦o̦t, im ilo iien in lañ ko renaaj jakol̦o̦k kõn juon ainikien jourur,* im men ko ilo lañ ko im lal̦ renaaj õnl̦o̦k kõn an lukkuun kajoor aer bwil, im lal̦ im jerbal ko ie renaaj alikkar.*
11 Innem, kõnke aolep men kein renaaj õnl̦o̦k ilo wãween in, kom̦win kanooj etale kain armej rot kom̦ bwe kom̦win kwõjarjar ilo m̦wil im kom̦win kõm̦m̦ani men ko rej kaalikkar ami mour ñan Anij, 12 ilo ami kõttar im keememej wõt* iien eo enaaj itok* raan eo an Jeova,* im ilo iien in lañ ko renaaj jako ilo kijeek, im men ko ilo lañ ko im lal̦ renaaj õnl̦o̦k kõn an lukkuun kajoor aer bwil! 13 Ijoke ekkar ñan kallim̦ur eo an, jej kõttaretok lañ ko rekããl im juon lal̦ ekããl, ijo wãnõk enaaj pãd ie.
14 Kõn men in, ro rejitõnbõro, kõnke kom̦ij kõttaretok men kein, kom̦win kanooj kate kom̦ bwe ilo jem̦l̦o̦kin en maroñ lo ami aenõm̦m̦an im an ejjel̦o̦k mããr im lippijinjin ippemi. 15 Bareinwõt, kom̦win watõk bwe an Irooj meanwõd ej mel̦el̦ein lo̦mo̦o̦r, ãinwõt an kar Paul, eo jeid im jatid ejitõnbõro, jejewaj ñan kom̦ ekkar ñan mãlõtlõt eo kar lel̦o̦k ñane. 16 Ej kõnono kõn men kein ãinwõt an kar kõm̦m̦ane ilo aolepen lõta ko an. Bõtab, jet iaan mel̦el̦e ko ie epen ñan mel̦el̦e, im ro ejjel̦o̦k jel̦ã ippãer* im ro rem̦õjn̦o̦ rej ikũri, ãinwõt aer bareinwõt kõm̦m̦ane ñan m̦õttan ko jet ilo Jeje ko, im men in enaaj tõll̦o̦k er ñan aer jako.
17 Kõn men in, kom̦ ro rejitõnbõro, kõnke em̦õj ami jel̦ãl̦o̦k im̦aan kõn men kein, kom̦win kõjparok bwe kom̦win jab jebwãbwe ippãer kõn men ko rebõd armej ro renana rej kõm̦m̦ani im kom̦ jujen buñ jãn ami jutak pen. 18 En jab ãindein, bõtab en l̦apl̦o̦k wõt ami bõk jouj eo el̦ap im jel̦ãl̦o̦kjen̦ eo kõn ad Irooj im ri-Lo̦mo̦o̦r Jesus Christ. Aiboojoj en ilo̦k ñane kiiõ im ñan indeeo. Amen.