Taitõs
1 Jãn ña Paul, ri-kõm̦akoko an Anij im rijjilõk an Jesus Christ ekkar ñan tõmak an ro rej kããlõt in Anij, im jel̦ãl̦o̦kjen̦ eo ejim̦we kõn m̦ool eo im ej kitibuj tiljek ñan Anij, 2 im ej pedped ioon kõjatdikdik eo ñan mour indeeo me Anij, eo eban riab, ear kallim̦ur kake jãn iien ko etto; 3 bõtab ilo iien eo ear karõke, ear kajeeded naan eo an ikijjeen jerbalin kwal̦o̦k naan eo kar kappeik eõ kake, ekkar ñan kakien eo jãn Anij, eo ej ad ri-Lo̦mo̦o̦r; 4 ñan Taitõs, juon nejũ em̦ool ilo tõmak, eo jej juon wõt kake:
Jouj eo el̦ap im aenõm̦m̦an eo jãn Anij, eo ej Jemãdwõj, im jãn Christ Jesus ad ri-Lo̦mo̦o̦r, en pãd ippam̦.
5 Iar likũt kwe ilo Krit bwe kwõn kajim̦we men ko ie rejjab jim̦we,* im bwe kwõn kããlõt ilo kajjojo bukwõn ro remaroñ bõk jerbalin lale eklejia, ãinwõt aõ kar jiroñ eok im ba: 6 jabdewõt em̦m̦aan ej lale eklejia en* ejjel̦o̦k n̦otaan, en juon wõt pãleen, aolep ro nejin ren rũttõmak im en ejjel̦o̦k n̦otaaer ilo m̦anit ko renana* ak rejjab jum̦ae. 7 Bwe ãinwõt juon ri-karejeran Anij, juon eo ej lale eklejia ej aikuj ejjel̦o̦k n̦otaan, en jab l̦õmn̦ak wõt kõn e make, en jab bõro kadu, ejjab aikuj ekkadekdek, lãj,* im arõk ñan koorl̦o̦k men ko ippãn, 8 bõtab ej aikuj juon eo ejel̦ã lale armej,* juon eo ej yokwe em̦m̦an, elol̦o̦kjen̦,* ewãnõk, etiljek, ejel̦ã irooj ioon make, 9 ej aikuj dãpiji wõt naan ko rem̦ool* ilo wãween an katakin, bwe en maroñ kõkajoor* ro jet ikijjeen katak ko rejim̦we* im kauweik ro rej jum̦ae.
10 Bwe elõñ ri-jum̦ae, elõñ rũkkõnono waan, ri-etao, im el̦aptata ro rej eddãp wõt ñan m̦wijm̦wij.* 11 Eñin unin ekkar ñan kiil lo̦ñier, kõnke ejjab bõjrak aer ko̦kkure tõmak eo an aolep ro ilowaan juon baam̦le ilo aer kwal̦o̦k kõn men ko rejjab aikuj in kar kwal̦o̦ki. Rej ãindein kõnke ren koorl̦o̦k men ko ippãer ilo aer etao. 12 Juon iaan ri-kanaan ro aer make ear ba: “Aolep iien armej in Krit rej riab, rej ãinwõt menninmour ko relãj, im rejowan im bũrooklep.”
13 Naan kein rem̦ool, eñin unin kwõn wõnm̦aanl̦o̦k wõt im lukkuun kauweik er bwe ren maroñ ãjmour ilo tõmak, 14 im bwe ren jab roñjake ino̦ñ ko an ri-Ju ro im kakien ko an armej ro rej el̦l̦o̦k jãn m̦ool eo. 15 Men otemjej rerreo ñan armej ro rerreo, bõtab ro rettoon im ejjel̦o̦k aer tõmak, ejjel̦o̦k men en̦ erreo ippãer kõnke l̦õmn̦ak im bõklõkõt ko aer rettoon. 16 Rej kwal̦o̦k ilo̦bwilej im ba bwe rejel̦ã Anij, ak rej kõjekdo̦o̦ne ilo kõm̦m̦an ko aer, kõnke rej menin kajjõjõ, rejjab pokake, im rejjab ekkar ñan jabdewõt jerbal ko rem̦m̦an.