1 Tessalonika
4 Ãliktata, ro jeim im jatim, ãinwõt ami kar bõk naanin kakapilõk jãn kõm kõn wãween eo kom̦ij aikuj etetal ñan kabuñbũruon Anij, im ilo m̦ool kom̦ij kõm̦m̦ane men in, ak kiiõ kõmij kajjitõk im akwel̦ap ñan kom̦ ilo etan Irooj Jesus, bwe kom̦win wõnm̦aanl̦o̦k wõt im kal̦apl̦o̦k ami kõm̦m̦ane men in. 2 Kom̦ jel̦ã kõn naanin kakapilõk* ko kõmar liwaj ñan kom̦ jãn Irooj Jesus.
3 Eñin ankilaan Anij, ej bwe kom̦win kwõjarjar im kom̦win kõjparok kom̦ jãn l̦õñ.* 4 Kajjojo iaami ej aikuj jel̦ã irooj ioon ãnbwinnin make bwe en kwõjarjar im en bõktok kautiej, 5 im jab ãinwõt ri-aelõñ ko rejjab jel̦ã Anij, ro rejaje irooj ioon kõn̦aan eo ekajoor ñan pãd ippãn juon, im ejjab po kõn̦aan in aer. 6 Ejjel̦o̦k ej aikuj kõm̦m̦ane juon iaan men kein rejekkar im kõjorrããn eo jein im jatin kõnke Jeova* enaaj kaje ro rej kõm̦m̦ani aolep men kein, ãinwõt ammim kar jiroñ kom̦ m̦oktal̦o̦k im lukkuun kakkõl kom̦ kake. 7 Anij ear jab kũr kõj ñan men ko rettoon, ak ear kũr kõj bwe jen kwõjarjar. 8 Innem eo ej kõjekdo̦o̦n naanin kakkõl kein, ejjab kõjekdo̦o̦n armej ak ilo m̦ool ej kõjekdo̦o̦n Anij, eo ej lewaj jetõb kwõjarjar* eo an.
9 Ak ikijjeen yokwe eo ikõtaan jemjein jemjati, kõmij jab aikuj jejewaj kake men in ñan kom̦ kõnke Anij ej katakin kom̦ ñan yokwe doon. 10 Ilo m̦ool, ãindein ami kõm̦m̦an ñan aolep ro jeid im jatid ilo aolepen Masedonia. Bõtab kõmij akwel̦ap ñan kom̦ ro jeim im jatim bwe kom̦win wõnm̦aanl̦o̦k wõt im kal̦apl̦o̦k ami kõm̦m̦ane men in. 11 Kom̦win kõm̦m̦an bwe en juon ami kõttõpar ñan mour ilo aenõm̦m̦an, im jab bõk kun̦aami ilo men ko an ro jet me ejjel̦o̦k ami l̦o̦k ie, im kom̦win jerbal kõn peimi, ãinwõt ammim kar kaiñi kom̦, 12 bwe en maroñ jim̦we ami etetal im̦aan mejãn ro ilikin, im en ejjel̦o̦k men en̦ kom̦ij aikuji.
13 Bareinwõt, ro jeim im jatim, kõmij jab kõn̦aan bwe kom̦win jaje ta eo enaaj wal̦o̦k ñan ro rej kiki ilo mej, kõnke kom̦win jab bũrom̦õj ãinwõt ro ejjel̦o̦k aer kõjatdikdik. 14 El̦aññe jej tõmak bwe Jesus ear mej im bar mour, ãindein Anij enaaj bareinwõt kõmour ro rar kiki ilo mej ikijjeen Jesus bwe ren pãd ippãn. 15 Kõmij jiroñ kom̦ men in ekkar ñan naan eo an Jeova,* bwe kõj ro renaaj mour ilo iien eo Irooj enaaj pãd, jeban jerkakpeje m̦okta jãn ro rar kiki ilo mej; 16 kõnke Irooj enaaj wanlal̦tak jãn lañ im kũr kõn juon ainikien el̦ap, im kõn juon ainikien arkenjel̦, im kõn jilel an Anij, im ro rar mej ilo aer juon wõt ippãn Christ renaaj jerkakpeje m̦okta. 17 Ãlikin, kõj ro im renaaj mour wõt, jenaaj wanlõñl̦o̦k ilo kõdo̦ ko im kobal̦o̦k ippãer bwe jen wõnm̦aik Irooj ilo mejatoto, innem jenaaj pãd ippãn Irooj iien otemjej. 18 Kõn men in, kom̦win wõnm̦aanl̦o̦k wõt im kaenõm̦m̦an doon kõn naan kein.