1 Tessalonika
3 Kõn men in, ke kõmar jab maroñ kõttarl̦o̦k wõt, kõmar l̦õmn̦ak em̦m̦anl̦o̦k ñe kõm pãdwõt ilo Atens; 2 im kõmar jilkinwaj Timote, eo jeid im jatid im ej ri-karejeran Anij* kõn ennaan eo em̦m̦an kõn Christ, ñan jipañ kom̦ bwe kom̦win pen wõt* im bwe en kaenõm̦m̦an kom̦ ilo tõmak, 3 bwe ejjel̦o̦k juon en m̦õjn̦o̦* kõn men kein rej kaeñtaan kom̦, bwe kom̦ jel̦ã bwe jenaaj iioon wõt eñtaan rot kein. 4 Ke kõmar pãd ippemi, kõm kõn jiroñ kom̦ l̦o̦k im̦aan bwe jenaaj eñtaan kõn ad iioon apañ ko, im ãinwõt ami jel̦ã, eñin men eo ear wal̦o̦k. 5 Eñin unin ke iar jab maroñ kõttarl̦o̦k wõt, iar jilkinwaj e bwe in jel̦ã ke kom̦ij tiljek wõt, kõnke ri-Kapo eo emaroñ kapo kom̦ ilo jabdewõt wãween, im enaaj oktak im ejjel̦o̦k tokjãn jerbal ko am.
6 Em̦õj an kiiõ Timote jepl̦aaktok jãn ippemi im ear jiroñtok kõm ennaan ko rem̦m̦an kõn ami tiljek im yokwe. Ear jiroñtok kõm kõn ami jab mel̦o̦kl̦o̦k kõm, im bwe kom̦ kanooj kõn̦aan lo kõm ãinwõt ammim bar kõn̦aan lo kom̦. 7 Eñin unin ro jeim im jatim, ilo aolepen am bũrom̦õj* im eñtaan, kõmij bõk kaenõm̦m̦an kõn wõt kom̦ im kõn ami kwal̦o̦k ami tiljek. 8 Kõnke ñe kom̦ij jutak pen wõt ilo Irooj, ej kõm̦m̦an bwe kõmin bar kajoor.* 9 Innem ewi wãween am maroñ kwal̦o̦k am kam̦m̦oolol Anij kõn kom̦, kõn joñan lañlõñ eo el̦ap kõmij bõke im̦aan mejãn Anij kõn wõt kom̦? 10 Raan im boñ kõmij lukkuun jar im akwel̦ap bwe kõmin lo kom̦* bwe kõmin maroñ jipañ kom̦ kõn men ko kom̦ij likjab kaki ilo tõmak.
11 Kiiõ ij kõjatdikdik bwe ad Anij im Jemãd, kab ad Irooj Jesus ren kõpel̦l̦o̦k juon ial̦ ñan am maroñ iwõj ñan ippemi. 12 Bareinwõt, Irooj en kõm̦m̦an bwe en eddekl̦o̦k im l̦apl̦o̦k yokwe eo ami ñan doon im ñan aolep, ãinwõt an l̦ap am yokwe kom̦, 13 bwe en kõkajoor bũruomi, im en ejjel̦o̦k n̦otaami im kom̦win kwõjarjar im̦aan ad Anij, eo Jemãd, ñe ad Irooj Jesus enaaj pãd ekoba aolep ri-karejar ro an rekkwõjarjar.