Epesõs
1 Jãn Paul, juon rijjilõk an Christ Jesus ikijjeen ankilaan Anij, ñan ro rekkwõjarjar ilo Epesõs im rej tiljek ilo aer juon wõt ippãn Christ Jesus:
2 Jouj eo el̦ap im aenõm̦m̦an eo jãn Anij, eo ej Jemãdwõj, im jãn Irooj Jesus Christ, en pãd ippemi.
3 Nõbar en ilo̦k ñan Anij, eo ej Jemãn ad Irooj Jesus Christ, kõn an kar letok elõñ jeraam̦m̦an ko ñan kõj ijoko ilañ ikijjeen jetõb kwõjarjar* eo an kõn ad juon wõt ippãn Christ, 4 ilo an kar kããlõt kõj bwe jen juon wõt ippãn* m̦okta jãn jinoin lal̦,* bwe jen kwõjarjar im jab lippijinjin im̦aan mejãn Anij kõn wõt yokwe eo ad ñane. 5 Ear karõkl̦o̦k im̦aan bwe enaaj bõk kõj bwe jen ro nejin ikijjeen Jesus Christ, ekkar ñan men eo ej kam̦õn̦õn̦õik e im ankilaan, 6 ñan bõktok nõbar ñane kõn wõt jouj eo an el̦ap me ear kwal̦o̦k ñan kõj ikijjeen eo ejitõnbõro ippãn. 7 Kõn wõt e, kar kõl̦l̦ãik on̦ããn ad rõl̦o̦k ikijjeen bõtõktõkin, aet, bwe jen maroñ bõk jeorl̦o̦k bõd jãn jerawiwi ko ad. Ear kõm̦m̦ane men in kõn wõt jouj eo an ekanooj in l̦ap.
8 Ear l̦apl̦o̦k wõt an kwal̦o̦k jouj eo an el̦ap ñan kõj ilo an letok mãlõtlõt im jel̦ãl̦o̦kjen̦* otemjej 9 ikijjeen an kwal̦o̦k ñan kõj men eo ettino im eokkwõjarjar kõn ankilaan. Im men in ej ekkar ñan men eo ej kam̦õn̦õn̦õik e im ear karõke, 10 bwe en wõr juon jerbalin loloodjake* m̦ae iien enaaj jejjet iien eo em̦õj pepe kake ñan kobaiktok men otemjej im̦aan Christ, men ko ilañ im men ko ilal̦, aet, ñan im̦aan Christ, 11 eo kõmij juon wõt ippãn im kar karõk bwe kõmin ri-jolõt ippãn. Kar karõkl̦o̦k im̦aan men in ekkar ñan karõk eo an eo ej katõprak men otemjej ilo an kõm̦m̦ani pepe ko ekkar ñan ankilaan, 12 bwe kõm eo kõmar likũt am kõjatdikdik ilo Christ m̦oktata, kõmin maroñ jerbal ñan bõktok aiboojoj ñane. 13 Kom̦ bareinwõt kom̦ar likũt ami kõjatdikdik ilo e ãlikin ami kar roñ ennaan eo em̦ool, ennaan eo em̦m̦an kõn ami maroñ bõk lo̦mo̦o̦r. Ãlikin ami tõmak, kar jiil̦i kom̦ kõn jetõb kwõjarjar,* eo kar kallim̦ur kake kõn e. 14 Men in ej ãinwõt juon kein kam̦ool l̦o̦k im̦aan* bwe jenaaj bõk menin jolõt eo ad, im kar kõm̦m̦ane ñan karõl̦o̦k armej ro an Anij* ikijjeen juon on̦ããn, ñan bõktok nõbar im aiboojoj ñan Anij.
15 Eñin unin ña bareinwõt, jãn ke iar roñ kõn ami tõmak ilo Irooj Jesus im kõn yokwe eo kom̦ar kwal̦o̦k ñan aolep ro rekkwõjarjar, 16 ejjab bõjrak aõ kam̦m̦oolol kõn kom̦. Bareinwõt, ejjab jem̦l̦o̦k aõ likũt kom̦ ilo jar ko aõ 17 kõnke Anij eo an ad Irooj Jesus Christ, im ej juon Jemãn el̦ap aiboojoj ippãn, en lewaj ñan kom̦ jitũbõn mãlõtlõt im bwe kom̦win maroñ mel̦el̦e men ko ej kwal̦o̦k kaki bwe kom̦win bõk jel̦ãl̦o̦kjen̦ eo ejim̦we kõn E. 18 Ear kõpel̦l̦o̦k mejãn bũruomi bwe kom̦win maroñ jel̦ã kõn kõjatdikdik eo ear kũr kom̦ ñane, im kõn jeraam̦m̦an ko rel̦l̦ap ej pojakin lil̦o̦k ñan ro rekkwõjarjar bwe ren jolõti, 19 im bwe kom̦win jel̦ã joñan an lukkuun l̦ap kajoor eo an me ej letok ñan kõj rũttõmak ro. Men in ej alikkar ilo wãween an kar kõjerbal maroñ eo an el̦ap 20 ke ear kõjerkak Christ jãn mej im kajijete ituanbwijmaroñin pein ijoko ilañ, 21 ilõñin aolep kien im kajoor im maroñ im ri-tõl im ãt otemjej, ejjab ilo jukjukun pãd* in wõt ak ilo bar jukjukun pãd eo ej itok wõt. 22 Bareinwõt, ear likũt men otemjej ium̦win neen im kõm̦m̦an bwe e eo en bõran* aolep men ko rej ekkejell̦o̦k ñan eklejia eo, 23 im eklejia eo ej ãnbwinnin Christ, im elikiio kobban kõn e, im e eo ej kajejjet men otemjej.