Erom Juõn ian Ro Nejin Anij
ENAÑIN 30 yiõ ko elikin Tarinae eo ilo Korea, radio eo an Korea ear kõmmane juõn program ñan jibañ armij ro bukõt ro uan family ko air me rar jab jelã ia eo rar jokwe ie jen kar ien tarinae eo. Ta eo ear walok? Elõñlok jen 11,000 armij rar bar iiaio ibben ro mõttair rejitenburu—kin dennin kemjalal, jañ, im jiburlep. The Korea Times ear report: “Ejañin kar wõr kain lañliñ rot in ilo bwebwenato an Ri Korea kin air bar ibben don.”
Ilo Brazil, kar aje Cézar ñan bar juõn armij ke ear niñniñ wõt ñan kõllã juõn muri. Joñoul yiõ ko tokelik, joñan an mõnõnõ in bar loe lukkun jinen ear emmakit jen ro rar kakajiririk e im relukkun mweie bwe en jokwe ibben.
Elap wõt joñan mõnõnõ ewalok ñe ro uan juõn family rej bar lo don ke rar jenolok im jako jen don! Bible eo ej kamelele kin jerata eo kar walok ke armij rar jenolok jen family eo an Anij. Ej bareinwõt jiroñ kij kin wãwen rej bar koba ibben don kiõ ilo lañliñ. Ewi wãwen ear walok jenolok in bareinwõt? Im ewi wãwen kwomaroñ bõk kunam ilo lañliñ eo?
Wãwen Family Eo An Anij Ear Jebel
Ri jeje sam ear ba kin Jehovah Anij, Ri Kõmanman eo: “Ibõm unin dren in mour.” (Sam 36:9) Jehovah ej Jemen juõn family elap, ro retiljek im meletlet. Family in ej kitibuj enjel ro me rej nejin ilo jitõb, im armij ro nejin ilal.
Ke armij eo nejin Anij moktata, Adam, ear jumae, einwõt an kamelele ilo katak eo lok iman, ear walok juõn jebel ikõtan armij ro im Jemeir eo elap yokwe ibben im ej Ri Kõmanman eo air. (Luk 3:38) Kin jumae eo an Adam, e im ro inen tokelik rar luji jerammõn eo bwe ren kar ro nejin Anij. Ikijen ri karejaran Moses, Anij ear kalikar ta eo ear walok: “Rar kõmõn men ko re nana ñõn E, re jab nejin [Anij], men in air bwir.” “Nana eo,” ak bwir eo air ear kajenolok ir jen Anij, eo ekwojarjar im wãppen wõt. (Duteronomi 32:4, 5; Aiseia 6:3) Inem, ilo juõn wãwen alikar, armij ro rar atajinimjin.—Dri Epesõs 2:12.
Ñan kalikar joñan air jenolok jen Anij, Bible eo ej kennan kin ro rej bed ilikin family eo an Anij einwõt “dri kijirãt.” (Dri Rom 5:8, 10) Kin air jebel jen Anij, armij ro rar eñtan iumin tel eo enana an Satan im leen jab wãppen eo rar jolete. (Dri Rom 5:12; 1 Jon 5:19) Armij ri jerawiwi remaroñ ke erom mõttan family eo an Anij? Ro rejjab wãppen remaroñ ke erom ro nejin Anij, einwõt Adam im Eve mokta jen air kar jerawiwi?
Aini Ajiri ro Rar Jebel
Jehovah, ilo yokwe ear kõmman juõn ial ñan armij ro rejjab wãppen im rej yokwe e. (1 Dri Korint 2:9) Ri jilek Paul ej kamelele: “Eñin bwe Anij e ar ber ilo Kraist im Ej kilajrõk lõl ñõn E mõke, im jab watõk air jerawiwi ñõn ir.” (2 Dri Korint 5:19) Einwõt kar kamelele ilo katak eo lok iman, Jehovah Anij ear letok Jesus Christ einwõt juõn binmour kin jerawiwi ko ad. (Matu 20:28; Jon 3:16) Kin kamolol, ri jilek John ear jeje: “Komin lale wãwen õt yokwe Jemer e ar letok ñõn kij, bwe jen etnake nejin Anij.” (1 Jon 3:1) Kin men in, ear bellok juõn ial ñan armij ro rekiblie bwe ren bar erom ro mõttan family eo an Jehovah.
Meñe aolep armij ro emwij kobaik ir ñan loan family eo an Anij renaj lukkun lañliñ iumin kejbãrok eo an Jemeir ilañ, lale wãwen an Bible eo kalikar bwe naj aini ir ilo ruo kumi ko. Jej konono: “Ekar ñõn An [Anij] lemnok emõn eo E ar bebe ilo E, ñõn jerbal an ien ko rejejit, bwe En kobaik men ko otemjej ilo Kraist, men ko i lõñ, im men ko i lõl.” (Dri Epesõs 1:9, 10) Etke Anij ej karõke men kein ilo wãwen in?
Ilo wãwen an Jehovah karõk ajiri ro nejin ilo ruo kumi ej ñan jibañ ir bwe ren burukuk ilo family eo an. Ejjab juõn karõk ebin ñan melele kake. Joñan an lap ro uan family eo an Anij ej einwõt juõn ailiñ. Ilo jabdewõt ailiñ, rej kãlet juõn kumi edik ñan tel ailiñ eo bwe ro jet ren maroñ bed ilo ainemõn im jokane. Ealikar bwe, ian kien ko an armij ejelok juõn ear maroñ bõktok ainemõn eo emol, ak Anij emwij an keboj ñan family eo an juõn kien ewãppen. Jehovah ear kãlet ro nejin, kumi eo kein kajuõn, “men ko i lõñ,” bwe ren erom juõn kien, ak Ailiñ in lañ. Ilo ijo, rein renaj iroij einwõt “kiñ ion lõl.”—Reveles̃õn 5:10.
Ro Nejin Anij ion Lal
Jehovah ej bareinwõt aini “men ko i lõl,” ej million armij ro ibelakin lal, bwe ilo ien ejejjet remaroñ erom ro nejin ilal. Einwõt Jemen eo ejoij, ej katakin ir yokwe bwe ren ibben don wõt ilo burukuk, meñe rej jen ailiñ ko kajjojo. Bar ro relej, ro elap air mour kin kõnan ko air make wõt, ro rej lũñ, im ri kiblia ñan Anij rej bõk kir eo bwe ren ‘ukõt ir jen air kijdrat ñõn air ro jeran,’ Anij.—2 Korint 5:20.
Ta kin ro rejjab kõnan bõk kir eo an Anij bwe ren jeblak ñan e einwõt ajiri ro nejin? Jehovah eban rumij ilo an kõmmane men eo ej aikwiji ibben rein, bwe en kejbãrok ainemõn im burukuk ilo family eo an. Enaj wõr juõn “ran in ekajet im kokkure armij renana.” (2 Piter 3:7) Anij enaj karreoiki lal ilo an jolok ri jumae ro. Enaj lukkun lap mõnõnõ ñan ro rej bokake!—Sam 37:10, 11.
Elikin ien in enaj walok juõn thousand yiõ in ainemõn, im ilo ien in aolep ro rej bõk yokwe eo an Anij renaj jidik kin jidik bar jeblak ñan mour eo ewãppen me Adam ear luji. Bar ro remij renaj jerkakbiji. (Jon 5:28, 29; Reveles̃õn 20:6; 21:3, 4) Ilo wãwen in Anij enaj kajejjet kallimur eo an: “Men in kõmõn e naj mejõl jen kamokoko an wabõnbõn, ñõn iloan anemkwojan in aibujuij an ro nejin Anij.”—Dri Rom 8:21.
Burukuk Ibben Jemõm
Cézar im thousand Ri Korea ro kar konono kake ilo jinoin katak in rar aikwij kate ir ñan bar koba ibben family ko air im bõk mõnõnõ. Armij rein ilo Korea rar aikwij bõk kunair ilo program eo, im Cézar ear illok jen ro rar kakajiririk e. Ilo ejja wãwen in ñan am jeblak ibben Jemõm ilañ, Jehovah Anij, im bõk leen mõnõnõ ilo family eo an, kwonaj aikwij bebe kake im jeblak ñan ibben. Kwonaj et?
Ñan ruaklok ñan Anij einwõt Jemõm, kwoj aikwij katak Nan eo an, Bible eo, bwe en jibañ yuk kaddek juõn tõmak ebin ilo e im kallimur ko an. Kwonaj katak ñan liki men ko Anij ej ba kinke ej ñan tokjen eo am. Kwonaj bareinwõt aikwij kõtlok an Anij kajimwe yuk im kaje yuk, bwe Bible eo ej ba ñan Ri Christian ro: “Anij ej kõmõn ñõn kom einwõt ñõn ro nejin; bwe ewi nejin eo jemen e jab kajeik e?”—Dri Hibru 12:7.
Bõk buñten ne kein renaj ukõt likieo in wãwen mour eo am. Bible eo ej ba: “Komin erom ekal ilo buruemi, Im bwe komin kõnõk armij ekal, eo ekar ñõn Anij emwij kõmõne ekal ilo wãnik im kwojarjar in mol.” (Dri Epesõs 4:23, 24) Inem jerbale nan in kakkõl eo an Peter: “Einwõt ro nejin jilkaie, komin jab mõke kõmõnmõn kom ekar ñõn mõm ko ami mokta, ilo ien ami jajelokjen.”—1 Piter 1:14.
Lo Family Eo Am Emol
Ke Cézar ear lo jinen, ear lukkun mõnõnõ kinke ej kab jelã bwe ewõr juõn jein ladik im ledik. Eindein, ñe kwoj ruaklok ñan Jemõm ilañ, kwonaj lo bwe elõñ jeim im jatim ilo congregation eo an Ri Christian. Ilo am kamao ibbeir, kwonaj eñjake bwe elaplok air ebake yuk jen family eo am ilo kanniek.—Jerbal 28:14, 15; Dri Hibru 10:24, 25.
Nan in kir in ebellok ñan kwe bwe kwon kobalok ibben Jemõm im ro jeim im jatim remol. Lañliñ eo kwonaj bõke enaj einlok wõt lañliñ eo me Cézar im thousand Ri Korea ro rar ione ke rar bar kobalok ibben family ko air.
[Pija eo ilo peij 8]
Cézar ke ej 19 an yiõ ibben jinen
[Pija ko ilo peij 10]
Bõk buñten ne ko ñan ruaklok ñan Anij