Kiñ Eo Emõn Eliktata An Israel

RIDTAN Josaia kar drualitõk wõt yiõ ke e ar jino an kiñ in bwij ko ruo i-tu rõk in Israel. Joñan yiõ in e lukkun drik ñõn juõn armij bwe en kiñ. Kin men in, ilo jinoin, jet ian ridto ro rej jibañ e ñõn an iroij ion ailiñ eo.

Elikin an Jo-sai’a kiñ iomin jiljilimjuõn yiõ, e jino kabukõt Jeova. Ej lor jõñõk eo an kiñ ro remõn einwõt Devid, Ji-hosh’a-pat im Hez-e-kai’a. Inem, ilo ien eo ej likao wõt, Jo-sai’a ej kõmõn juõn men im ej kalikar an beran.

Iomin juõn ien e aitok, elõñ wõt ian dri Israel ro r’ar lukkun nana. R’ar kabuñ ñõn anij wan ko. R’ar buñbero iman ekjõp ko. Kin men in, Jo-sai’a im lõmaro mõttõn r’ar ilok im jino jolok kabuñ wan jen eneo. Jerbal in e ar kanuij lap kinke e lukkun lõñ ro r’ar kabuñ ñõn anij wan. Kwo maroñ lo an Jo-sai’a im lõmaro mõttõn rupi ekjõp ko ijin.

Tokelik, Jo-sai’a ej likit jilu eman bwe ren kõkãl tempel eo an Jeova. Rej ain mõnni jen armij ro im lelok ñõn lõmarein ñõn kõllã wõnan jerbal eo rej kõmõne. Ilo ien eo rej jerbal ion tempel eo, Hil-kai’a, pris eo elap ej lo juõn men elap tokjen ijin. Ej buk in kien eo me Jeova e ar jiroñ Moses bwe en jeje, elõñ yiõ ko remotlok. Buk in e ar joko iomin elõñ yiõ.

R’ar bõklok buk in ñõn Jo-sai’a, im ej kajitõk bwe ren readi ñõn e. Ke e ar roñjake, Jo-sai’a ej kile bwe armij ro r’ar jab kejbarok kien Jeova. E kanuij lap an buromõj kake men in, im ej kekel nuknuk ko an, einwõt kwoj loe ijin. Ej ba: ‘E illu Jeova iber, kinke ro jimaar r’ar jab kejbarok kien ko emwij jeje ilo buk in.’

Jo-sai’a ej jiroñ Hil-kai’a, pris eo elap bwe en ilem eoroñ ennan kin ta eo Jeova e naj kõmõn ñõn ir. Hil-kai’a ej ilok iben kõra eo etan Hul’da, eo ej juõn dri kanan, im kajitõk iben. Ej lelok ñõn e ennan jen Jeova bwe en bõklok ñõn iben Jo-sai’a, im e ba: ‘I naj kaje Jerusalem im aolep armij ro kinke r’ar kabuñ ñõn anij wan im kobrõk eneo kin nana. Ak kinke kwe Jo-sai’a, kw’ar kõmõne men eo emõn, kaje in e jamin itok mae ien eo kwo mij.’