Juõn Eman Me Ejjab Mijõk

LALE mõk an armij ro kajerere kake likao in. Kwo jela ke wõn lein? Ej Jeremaia. Ej juõn dri kanan an Anij e kanuij lap tokjen.

Elikin wõt an Kiñ Jo-sai’a jino kokkure ekjõp ko ilo eneo, Jeova e ar jiroñ Jeremaia bwe en an dri kanan. Bõtap, ilo an Jeremaia lemnõk, e drik ñõn an an bõk jerbal in juõn dri kanan. Ak Jeova e ar ba E naj jibañ e.

Jeremaia e ar jiroñ dri Israel ro bwe ren jolok air kõmõni men ko renana. E ar ba: ‘Anij ro me dri ailiñ ko rej kabuñ ñõn ir re wan.’ Ak elõñ dri Israel ro r’ar kõnan kabuñ wõt ñõn ekjõp ko im jab Anij eo emol, Jeova. Ke Jeremaia e ar jiroñ armij ro bwe Anij e naj kajeik ir kin air nana, r’ar ettõñ in kajerere.

Elõñ yiõ r’ar motlok. E ar mij Jo-sai’a im jilu aliñ ko tokelik, Je-hoi’akim nejin e ar erõm kiñ. Jeremaia e ar wonmanlok wõt im jiroñ armij ro im ba: ‘Jerusalem e naj jebeeplok elañe komij jab jolok ami nana.’ Pris ro r’ar jibwe Jeremaia im lamij im ba: ‘Kimin kar mõn yuk kin am ba men kein.’ Inem r’ar jiroñ bwirõk ro an Israel im ba: ‘Jeremaia en kar mij, kinke e ar konono nae jikin kwelok in ar.’

Ta eo Jeremaia e naj kõmõne kiõ? Ejjab mijõk! E ar jiroñ aolepeir im ba: ‘Jeova e ar jilkintok iõ bwe in kennanek kom men kein. Elañe komij jab jolok ami nana, Jeova e naj kajebeeplok Jerusalem. A komin jela men in: Elañe komij mõn iõ, kom naj mõn juõn eo me ejelok ruen.’

Bwirõk ro rej kotlok bwe Jeremaia en mour, ak ro dri Israel r’ar jab jolok air nana. Tokelik, Neb-u-kad-nez’zar, kiñ in Babilõn, e ar itok in tõrinaek Jerusalem. Ilo jemlokin, Neb-u-kad-nez’zar e ar kõmõn bwe dri Israel ro ren dri korijeran. E ar bõk elõñ tausan iair lok ñõn Babilõn. Kwon baj lemnõk mõk elañe armij ro kwo jaje kajeir r’ar bõklok yuk jen ijo jikõm ñõn juõn eneo kwo jaje kake!