R’ar Makoko In Buñbero

KWOJ kememij ke am kar roñ kin lõmarein jilu? Aet, rej ro jeran Daniel, ro r’ar makoko in mõña men ko im e ar jab emõn air mõña. Dri Babilõn ro r’ar naetair Sha’drak, Mi’shak im A-bed’ni-go. A kwon kalimjek ir kiõ. Etke rejjab buñbero iman ekjõp in elap, einwõt aolep armij ro jet? Jen lale.

Kwoj kememij ke kien ko me Jeova e ar mõke jeje im naetair Kien ko Joñoul? Eo ken ka juõn iair ej ba: ‘Komin jab kabuñ ñõn jabrewõt anij ijalokiõ.’ Likao rein rej bokake kien in, meñe ejjab juõn men e biruru air kõmõne.

Neb-u-kad-nez’zar, kiñ in Babiloñ, e ar kir elõñ armij ro re utiej bwe ren nebar ekjõp in me e ar kajutake. Ej kap mwij an jiroñ aolep armij ro: ‘Ñe komij roñ ainikin jilil ko, arp ko im ken kajõñjõñ ko jet, komin buñbero im kabuñ ñõn ekjõp gold in. Jabrewõt eo ejjab buñbero im kabuñ, naj jolok e na ilo juõn um e urur im bwil kin kijeek kiõ, kiõ wõt.’

Ke armij ro rej kõjellaik Neb-u-kad-nez’zar bwe Sha’drak, Mi’shak im A-bed’ni-go r’ar jab buñbero, e lukkun illu. Ej ãñinlok ir ñõn iben. Ej lelok ñõn ir bar juõn ien bwe ren buñbero. Ak likao ro rej liki Jeova. ‘Anij eo kimij jerbal ñõn e e maroñ lomoren kim,’ rej jiroñ Neb-u-kad-nez’zar. ‘Ak jekron elañe ejjab lomoren kim, kim jamin buñbero ñõn ekjõp gold in am.’

Ke ej roñ nan in, ej kap laplok an Neb-u-kad-nez’zar illu. Eor juõn um ebak im ej jiroñ armij ro im ba: ‘Komin kalaplok joñan bwil eo an um ne jiljilimjuõn alen jen kar mokta!’ Inem ej jiroñ lõmaro rej mõke wõt driibin ilo jar in tõrinae eo an bwe ren lukwõj Sha’drak, Mi’shak, im A-bed’ni-go im jolok ir na ilo um eo. Joñan an bwil um eo, e mij driibin ro ilo kijeek eo. Ak ta kin likao ro jilu im r’ar jolok ir ilo kijeek eo?

Kiñ eo ej reilok ñõn loan um eo, im e kanuij lap an lelñoñ. ‘J’ar jab lukwõj jilu eman im jolok ir na ilo um eo e bwil kin kijeek ke?’ ej kajitõk.

‘Aet, eindrein am kar kõmõn,’ ro dri korijeran rej uak.

‘Ak Ij lo emen eman rej etetal ilujen kijeek eo,’ ej ba. Rejjab lukjak, im kijeek eo ejjab kokkure ir. Im jekjek in eo ken ka emen ej einwõt juõn anij.’ Kiñ eo ej kebaklok aur in um eo im lamij: ‘Sha’drak! Mi’shak! A-bed’ni-go! Komin driojtok, kom dri korijeran Anij Eo Eutiejtata!

Ke r’ar driojtok, aolep r’ar lo bwe r’ar jab jorran jen kijeek eo. Inem kiñ eo ej ba: ‘Nebar Anij eo an Sha’drak, Mi’shak im A-bed’ni-go! E ar jilkintok enjel eo an im lomoren ir kinke r’ar makoko in buñbero im kabuñ ñõn jabrewõt anij ijalokin Anij eo air.’

Menin ejab juõn joñõk emõn ilo tiljek ñõn Jeova bwe jen lore ke?