Jeje Ko Ion Kiin Mweo

TA EO ej walok ijin? Armij ro rej ber ilo juõn ien kwojkwoj elap. Kiñ in Babilõn eo e ar kirtok juõn tausan armij ro re utiej iben. Rej irak im mõña jen jãbi gold im silver ko me r’ar bõki jen loan tempel eo an Jeova ilo Jerusalem. Ak, ilo iriñ, pã ko pein juõn eman rej walok ilo mejatoto eo im jino jeje ion kiin mweo. Aolep armij re lukkun lelñoñ.

Bel-shaz’zar, leo jibwin Neb-u-kad-nez’zar, ej kiñ kiõ. Ej lamij im ba bwe ren ãñintok dri meletlet ro an. ‘Jabrewõt eo e maroñ konono jeje kein im kwalok meleleir ñõn iõ,’ kiñ eo ej ba, ‘I naj lelok elõñ men in lelok ko ñõn e im koutiej e bwe en ken ka jilu ilo ailiñ eo.’ Ak ejelok juõn ian dri meletlet ro e maroñ konono jeje ko ion kiin mweo, ak kwalok meleliir.

Lio jinen kiñ eo ej roñ air keroro im dreloñ loan jikin mõña eo elap. ‘Kwon joij im jab lelñoñ,’ ej jiroñ kiñ eo. ‘Eor juõn eman ilo ailiñ eo am me e jela kajien anij ro rekwojarjar. Ke jimaam Neb-u-kad-nez’zar e ar kiñ, e ar likit lein bwe en jeban aolep dri meletlet ro an. Etan ej Daniel. Kwon jilkinlok bwe ren ãñintok e, im e naj kwalok ñõn yuk melelen men kein otemjej.’

Inem e mõkaj air ilok im bukõt tok Daniel. Elikin an kwalok an jab kõnan bõk jabrewõt men in letok, Daniel e jino kwalok unin an kar Jeova jolok Neb-u-kad-nez’zar, jimaan Bel-shaz’zar, jen an kiñ juõn ien. ‘E ar lukkun utiej buruen,’ Daniel ej ba. ‘Im Jeova e ar kajeik e.’

‘Ak kwe,’ Daniel ej jiroñ Bel-shaz’zar, ‘kw’ar jela kin men eo e ar walok ñõn e, im kwoj utiej buru einwõt kar Neb-u-kad-nez’zar. Kw’ar kadreloñ kũp im jãbi ko jen tempel eo an Jeova im irak jen i. Kw’ar nebar anij ko kõmõn jen alal im dreka, im kw’ar jab nebar Dri Kõmõnmõn eo ar elap. Eñin unin an Anij jilkintok pã eo bwe en jeje nan kein.

‘Ir kein nan ko emwij jei,’ Daniel ej ba: ‘MI’NI, MI’NI, TI’KIL im PAR’SEN.’

‘MI’NI ej melelen bwe emwij an Anij bwini ran ko ran in ailiñ eo am ñõn an jemlok. TI’KIL melelen bwe emwij joñwe yuk ilo ken paun ko im kile bwe kwo nana. ‘PAR’SEN melelen bwe emwij lelok ailiñ eo am ñõn ro dri Mid im dri Põrsia.’

Ilo ien eo Daniel ej konono wõt, ro dri Mid im dri Põrsia re jino nitbwile Babilõn. Rej bõk anjo ion jikin kwelok eo im mõn Bel-shaz’zar. E jejjit kitien jeje ko ion kiin mweo bõñin eo wõt! Ak ta eo enaj walok ñõn dri Israel ro kiõ? Mõttõn jirik je naj jela, ak mokta jen lale ta eo ej walok ñõn Daniel.