Daniel Ilo Roñ in Laiõn

AIEYA! Einwõt Daniel e lukkun ber ilo juõn jikin e kauatata. Ak kiru laiõn ko rejjab kokkure e! Kwo jela ke ta unin? Wõn eo e ar likit Daniel ijin iben aolep laiõn kein? Jen lale.

Kiñ in Babilõn eo kiõ ej juõn eman etan Da-rai’õs. E lukkun lap an mõnõnõ iben Daniel kinke Daniel e kanuij joij im meletlet. Da-rai’õs ej kãlet Daniel bwe en juõn iroij ilo ailiñ eo an. Men in ej kõmõn bwe lõmaro jet ilo ailiñ eo ren junmare Daniel, inem eñin men eo rej kõmõne.

Rej ilok iben Da-rai’õs im ba: ‘Kimij lemnõk, O kiñ, bwe kwon kar kõmõn juõn kien im ba bwe iomin 30 ran ejelok juõn armij en jar ñõn jabrewõt anij ak armij ijallokõm, O kiñ. Elañe jabrewõt ejjab bokake kien in, ren jolok e ilo roñ eo iben laiõn ko.’ Da-rai’õs ejjab jela unin an lõmarein kõnan kõmõne kien in. Ak ej lemnõk bwe e juõn kien emõn, im kin men in ej ba bwe ren kabin kien in im jeje. Kiõ re ban ukõt kien in.

Ke Daniel e ar jela kin kien eo, e ar jeblak ñõn mweo imõn im jar, einwõt ekõn kõmõn aolep ien. Lõmaro re nana r’ar jela bwe Daniel e jamin jolok an jar ñõn Jeova. Re mõnõnõ, kinke ilo air lemnõk, karõk eo air bwe ren kokkure Daniel e iten tõbrak.

Ke Kiñ Da-rai’õs ej lo unin an kar lõmarein kõnan kõmõne kien in, e kanuij buromõj. Ak e ban ukõt kien eo, im kin men in ej aikwij jiroñ bwe ren jolok Daniel iloan roñ in laiõn ko. Ak kiñ eo ej jiroñ Daniel: ‘Ij kejatrikrik bwe Anij eo am, eo kwoj korijer ñõn e, e naj lomoren yuk.’

Joñan an Da-rai’õs inebata, e jaje kiki boñin eo. Jibboñ in ran eo juõn ej ettõr lok ñõn roñ in laiõn ko. Kwo maroñ loe ilo pija in. Ej lamij im ba: ‘Daniel, dri korijeran Anij eo emour! Anij eo kwoj jerbal ñõn E e ar lomoren yuk jen laiõn ko ke?’

‘Anij e ar jilkintok enjel eo an,’ Daniel ej uak, ‘im kil loñin laiõn ko bwe ren jab kokkure iõ.’

Kiñ eo e kanuij mõnõnõ. Ej jiroñ bwe ren kwotak liñlok Daniel jen loan roñ eo. Inem ej jiroñ bwe ren jolok lõmaro re nana me r’ar kajeoñ in kokkure Daniel na iloan roñ in laiõn ko. Mokta jen air tõbar kabin roñ eo, laiõn ko rej jibwe ir im moruj drii ko driir.

Inem Kiñ Da-rai’õs ej jeje ñõn aolep armij ro ilo ailiñ eo an im ba: ‘Ij jiroñ kom bwe aolep ren koutiej Anij eo an Daniel. Ej kõmõn men in kabwilõñlõñ ko relap. E ar lomoren Daniel bwe laiõn ko ren jab kõñe.’