Juõn Enjel Ej Lolok Meri

KÕRA in e dreo ej Meri. Ej juõn kõra in Israel, im ej jokwe ilo jikin kwelok eo etan Naz’e-ret. Anij e jela bwe liin ej juõn armij e kanuij emõn. Eñin unin an jilkintok Ge’bri-el, enjel eo an, bwe en konono iben. Kwo jela ke ta eo Ge’bri-el e ar iten kennan ñõn Meri kake? Jen lale.

‘Yokwe yuk, kwe elap am jerammõn,’ Ge’bri-el ej ba ñõn e. ‘Jeova ej ber ibõm.’ Meri e jañin lo armij in mokta. E inebata kinke ejaje ta melelen nan ko ej kwaloki. Ak e mõkaj an Ge’bri-el kainemõn e.

‘Meri, kwon jab mijõk,’ ej ba. ‘Jeova e kanuij mõnõnõ ibõm. Eñin unin an naj kõmõn juõn men e lukkun emõn ñõn yuk. Mõttõn jirik kwo naj keutak nejõm man, im kwo naj likit etan Jisõs.’

Ge’bri-el ej wonmanlok wõt im kamelele: ‘Ajiri in e naj buñbuñ, im naj naetan Nejin Anij Eo Eutiejtata. Jeova e naj kõmõn bwe en kiñ, einwõt kar Devid. Ak Jisõs e naj iroij in drio, im ailiñ eo an e jamin jemlok!’

‘E naj kijkan an walok men kein?’ Meri ej kajitõk. ‘Na I jañin belele. I jañin ber iben juõn eman, inem ekijkan aõ maroñ neje?’

‘Kajur an Anij e naj itok iom,’ Ge’bri-el ej uak. ‘Kin men in naj likit etan ajiri eo nejõm, Nejin Anij.’ Inem ej kennanek Meri im ba: ‘Kwon kememij lio jeõm, Elisabet. Armij ro r’ar ba bwe e ridto ñõn an maroñ neje. Ak mõttõn jirik e naj keutak nejin man. Inem kwo lo ke, ejelok juõn men Anij e ban kõmõne.’

Elikin nan in, e mõkaj an Meri uak im ba: ‘Ña dri korijeran Jeova! En walok ibã einwõt am kar ba.’ Inem enjel eo e ar ilok.

Meri ej kaiur lok in lolok Elisabet. Ke Elisabet e ar roñ ainiken Meri, niñniñ eo ej makõtkit kin loñliñ i lojien Elisabet. Elisabet ej obrõk kin jitõb an Anij, im ej ba ñõn Meri: ‘Kweo kwo jerammon ian kõra rõn.’ Meri ej ber iben Elisabet iomin tarrin jilu aliñ, inem e jeblak ñõn mweo imõn ilo Naz’e-ret.

Meri e ar iten belek juõn eman etan Josep. Ak ke Josep e jela bwe e bõroro Meri, ej lemnõk bwe en jab belek e. Kin men in, enjel an Anij ej ba ñõn e: ‘Kwon jab mijõk in bõk Meri bwe en belõm. Bwe Anij eo e ar lelok bwe en wor nejin man.’ Inem Meri im Josep rej mare, im kõttar an Jisõs lotak.