Ien Lotak Eo An Jisõs Ñõn Ien Mij Eo An

Kar jilkintok enjel Gebriel ñõn juõn jiroñ emõn etan Meri. E ar jiroñ Meri bwe e naj keutak juõn nejin eo me e naj bõk jerbal in kiñ ñõn in drio. Ajiri eo, Jisõs, e ar lotak ilo juõn menjer, im sheperd ro r’ar lolok e ijen. Tokelik, juõn iju e ar tel lõmaro jen Rear ñõn iben ajiri eo. Jej katak wõn eo e ar kõmõn bwe ren lo iju eo, im kin wãwen air lomoren Jisõs jen ro im r’ar kajeoñ in mõn e.

Tokelik, jej lo Jisõs, ke e ar 12 yiõ ridtan, ej kennan iben dri kaki ro iloan tempel eo. Joñouldrualitõk yiõ ko tokelik, Jisõs e ar baptais, im ilo ien in e ar jino jerbale men eo Anij e ar jilkintok e ñõn lõl bwe en kõmõne, jerbal in kwalok nan im katakin kin ailiñ eo. Ñõn jibañ e ilo jerbal in, Jisõs e ar kãlet 12 eman im kõmõn ir bwe ren dri jilik ro an.

Jisõs e ar bareinwõt kõmõn elõñ men in kabwilõñlõñ ko. E ar najirik elõñ tausan armij ro kin jet wõt iik ko redrik im jet loaf in bred. E ar kemour ro dri nañinmij im kajerkakbiji ro re mij. Eliktata, jej katak kin men ko relõñ me r’ar walok ñõn Jisõs iomin ran eo eliktata in an mour ion lõl, im kin wãwen air kar mõn e. Jisõs e ar kwalok nan iomin tarrin jilu yiõ jimõttõn. MÕTTÕN EO KEN KA 6 ej konono kin menko im r’ar walok iomin 34 yiõ.