Lõmaro Rej Lor Juõn Iju

KWOJ lo ke iju en e maram me juõn ian lõmarein ej jitõñe? Ke r’ar ilok jen Jerusalem, iju eo e ar walok. Lõmarein rej itok jen Rear, im rej etale makõtkit in iju ko. Rej tõmak bwe iju in ekãl ej tel ir ñõn juõn eo elap tokjen.

Ke lõmaro r’ar tõbar Jerusalem, r’ar kajitõk: ‘Ewi ajiri eo me e naj kiñ in dri Ju ro?’ “Dri Ju ro” ej bar juõn ãt in dri Israel ro. ‘Kim ar jino lo iju eo an ajiri eo ke kim ar ber i Rear,’ lõmaro r’ar ba, ‘im kim ar iten kabuñ ñõn e.’

Ke Herod, eo ej kiñ ilo Jerusalem, e ar roñ nan in e ar illu. E ar jab kõnan bwe bar juõn kiñ en bõk jikin. Kin men in, Herod e ar ãñintok pris ro relap im kajitõk: ‘Kiñ eo emwij kalimur kake, e naj lotak ia?’ R’ar uak im ba: ‘Baibel eo ej ba ilo Bet’le-em.’

Inem Herod e ar kir lõmaro jen Rear, im ba: ‘Komin ilem kabukõt ajiri eo. Ñe komij loe, komin kõjellaik iõ. I konan ilem kabuñ ñõn e bareinwõt.’ Ak, ilo mol, Herod e ar kõnan lo ajiri eo bwe en mõn e!

Ilo ien in, iju eo ej emõkit iman lõmaro im tel ir ñõn Bet’le-em, im ej bwijrak ion jikin eo me ajiri eo ej ber ie. Ke lõmaro r’ar dreloñ ilo mweo, rej lo Meri im niñniñ eo Jisõs. Rej kwalok men in lelok ko im lilok ñõn Jisõs. Ak tokelik Jeova ej kakkil lõmaro ilo juõn tõnak bwe ren jab jeblak iben Herod. Kin men in rej jeblak ñõn ailiñ eo air ikijen bar juõn ial.

Ke Herod e ar roñ bwe lõmaro jen Rear r’ar jeblak ñõn jo jikiir, elap an illu. Inem ej jiroñ bwe ren mõn aolep ladrik ro ilo Bet’le-em jen ruo yiõ im wonlõllok. Ak Jeova ej kakkil Josep lok man ilo juõn tõnak, im Josep ej ilok iben famili eo an lok ñõn Ijipt. Tokelik, ke Josep e ar roñ bwe e mij Herod, ej ãñin Meri im Jisõs im jeblak ñõn Naz’e-ret. Eñin jikin eo me Jisõs e ar ridtolok ie.

Ta eo kwoj lemnõk e ar kõmõn bwe en romak iju eo ekãl? Kememij, bwe lõmaro r’ar jino ilok ñõn Jerusalem elikin air lo iju eo. Setan Devil eo e ar kõnan mõn Nejin Anij, im e ar jela bwe Kiñ Herod ilo Jerusalem e naj kajeoñ in mõn e. Inem kar Setan eo im e ar kõmõn bwe en romak iju eo.