Ladrik Eo Jisõs Ilo Tempel Eo

LALE mõk an ladrik eo konono iben lõmarein re ridto. Lõmarein rej dri kaki ro ilo tempel eo an Anij ilo Jerusalem. Im ladrik eo ej Jisõs. E ridtolok kiõ. Eor 12 yiõ ridtan.

Dri kaki ro rej lukkun bwilõñ kin an lap an Jisõs jela kin Anij im menko emwij jeje ilo Baibel eo. Ak etke Josep im Meri rejjab ber ijin bareinwõt? Re ber ia? Jen lale.

Aolep yiõ Josep ej ãñinlok famili eo an lok ñõn Jerusalem ñõn juõn kwojkwoj etan Kijone. Ej juõn ial e aitok jen Naz’e-ret ñõn Jerusalem. Ejelok wair kaar, im ejelok balun ko. E jañin wor men kein ilo ran ko. Enañin aolep armij ro rej ilok lõllok, im rej aikwij tarrin jilu ran ñõn air tõbar Jerusalem.

Ilo ien in, elõñ ro nejin Josep. Inem eor ro jatin Jisõs ladrik im ledrik im rej aikwij in bar lali ir. Eokwe, ilo yiõ in, Josep im Meri r’ar ilok iben ro nejiir lok ilo ial eo e aitok bwe ren jeblak non Naz’e-ret. Rej lemnõk bwe Jisõs ej itok wõt ibeir tok. Ak ke r’ar bwijrak ilo jemlokin ran eo, rejjab lo Jisõs. Rej bukõt e iben ro nukiir im jerair, ak ejoko! Kin men in rej jeblak ñõn Jerusalem im bukõt e ijo.

Elikin jirik ien rej lo Jisõs ijin, iben dri kaki ro. Ej roñjake ir im kwalok kajitõk ko. Im aolep armij ro re bwilõñ kin joñan an meletlet Jisõs. Ak Meri ej ba: ‘Nejiõ, etke kw’ar kõmõn men in ñõn kim? Kimro jemõm ar lukkun inebata ke kw’ar joko.’

‘Etke kom ar aikwij in bukõt iõ?’ Jisõs ej uak. ‘Kom ar jab jela ke bwe Ij aikwij in ber ilo mweo imõn Jema?’

Aet, Jisõs ej yokwe an ber ijo bwe en maroñ katak kin Anij. Ejab en kar eindrein ke kij bareinwõt? Ilo Naz’e-ret, ijo jikin, Jisõs ekõñ ilok ñõn imõn kwelok eo bwe en kabuñ aolep wiik. Kinke e ar lukkun roñjake aolep ien, elõñ men ko e ar katak jen Baibel eo. Jen kajeoñwe Jisõs im anõk joñõk eo an.