Wõnm̦aanl̦o̦k Wõt im Kõkajoor Jem̦jerã eo Am̦ Ippãn Jeova

Ilo am̦ kar katak jãn bũrookraam̦ in katak Baibõl̦ in, elukkuun lõñ men ko kwaar katak kaki kõn Jeova. Men ko kwaar katak kaki rar kõm̦m̦an bwe kwõn lukkuun yokwe e ñan joñan eo me bõlen em̦õj am̦ kar ajel̦o̦k eok make ñane im peptaij. Ak el̦aññe kwõjjañin kar, eokwe bõlen kwõj l̦õmn̦ak in kõm̦m̦ane men in ilo raan ko rej pãd im̦aan. Bõtab, ãlikin am̦ peptaij ejjab mel̦el̦ein bwe ebõjrak am̦ ruwaakl̦o̦k ñan Jeova. Kwõmaroñ wõnm̦aanl̦o̦k wõt ilo am̦ ruwaakl̦o̦k ñan Jeova ñan indeeo. Ewi wãween?

1. Etke kwõj aikuj wõnm̦aanl̦o̦k wõt im kõkajoorl̦o̦k jem̦jerã eo am̦ ippãn Jeova?

Jej aikuj kate kõj ñan wõnm̦aanl̦o̦k wõt im kõkajoorl̦o̦k jem̦jerã eo ad ippãn Jeova. Etke? “Kõnke jen jab pel̦o̦k” jãne. (Hibru 2:1) Ta eo emaroñ jipañ kõj ñan wõnm̦aanl̦o̦k wõt im karejar ñan Jeova ilo tiljek? Jemaroñ kõm̦m̦an bwe jen poub wõt ilo jerbalin kwal̦o̦k naan im pukot wãween ko jet ñan kal̦apl̦o̦k ijo kun̦aad ñan Anij eo ad ilo ad karejar ñane. (Riit Pilippai 3:16.) Ad karejar ñan Jeova ej wãween mour eo em̦m̦antata!​—Sam 84:10.

2. Bar ta ko jet kwõj aikuj wõnm̦aanl̦o̦k wõt im kõm̦m̦ani?

Meñe bũrookraam̦ in katak Baibõl̦ in ej tõn jem̦l̦o̦k kiiõ, ak mour eo am̦ ãinwõt juon Kũrjin enaaj wõnm̦aanl̦o̦k wõt. Baibõl̦ eo ej ba bwe jej aikuj “kõn̦ak mour eo ekããl.” (Epesõs 4:23, 24) Ilo am̦ wõnm̦aanl̦o̦k wõt im katak Naanin Anij im pãd ilo kweilo̦k ko an eklejia, kwõnaaj katak men ko rekããl kõn Jeova im kadkad ko kadkadin. Pukot wãween ko ñan am̦ maroñ kal̦apl̦o̦k am̦ anõke kadkad ko kadkadin ilo mour eo am̦. Wõnm̦aanl̦o̦k wõt im kõm̦m̦an jabdewõt oktak ko kwõj aikuj kõm̦m̦ani bwe kwõn maroñ kam̦õn̦õn̦õik Jeova.

3. Ewi wãween an Jeova naaj jipañ eok ñan kõm̦m̦an wõnm̦aanl̦o̦k ko?

Baibõl̦ ej ba: ‘Anij . . . enaaj kadedeikl̦o̦k an katakin im kammineneik eok. Enaaj kõm̦m̦an bwe kwõn kajoor im tiljek, im enaaj kõm̦m̦an bwe kwõn tõt im pen.’ (1 Piter 5:10) Kõj aolep jej iioon menin kapo ko. Jeova ej letok men ko jej aikuji bwe jen maroñ kajoor wõt im lukkuun kõjparok jãn men kein. (Sam 139:23, 24) Ej kallim̦uri eok bwe enaaj lewaj ñan kwe kõn̦aan eo im maroñ eo ñan am̦ maroñ karejar ñane ilo tiljek.​—Riit Pilippai 2:13.

KAM̦WILAL̦L̦O̦K AM̦ MEL̦EL̦E

4. Jab bõjrak jãn am̦ roñjake im kõnono ippãn eo Jeram̦ em̦m̦antata

Em̦õj an jar im katak Baibõl̦ jipañ eok ñan erom jeran Jeova. Ewi wãween an men kein maroñ jipañ eok bwe en l̦apl̦o̦k wõt am̦ epaake?

Riit Sam 62:8, innem bwebwenato kake kajjitõk in:

• Ñan am̦ maroñ kõkajoorl̦o̦k jem̦jerã eo am̦ ippãn Jeova, ewi wãween am̦ maroñ kakõm̦anm̦anl̦o̦k wãween am̦ jar?

Riit Sam 1:2, innem bwebwenato kake kajjitõk in:

• Ñan am̦ maroñ kõkajoorl̦o̦k jem̦jerã eo am̦ ippãn Jeova, ewi wãween am̦ maroñ kakõm̦anm̦anl̦o̦k wãween am̦ riit Baibõl̦?

Ewi wãween kwõmaroñ kõm̦m̦an bwe en l̦apl̦o̦k am̦ bõk tokjãn jãn am̦ katak ippam̦ make? Ñan lale jet wãween ko, kõjo̦e PIJAIN ALWÕJ eo, innem bwebwenato kake kajjitõk kein:

PIJAIN ALWÕJ: Kakõm̦anm̦anl̦o̦k Am̦ Katak Ippam̦ Make (5:22)

• Ta jet iaan wãween ko ilo pija eo kwõmaroñ jerbali?

• Ta men ko kokõn̦aan ekkatak kaki?

5. Kõm̦m̦an mejãnkajjik ko

Ñe ewõr am̦ mejãnkajjik ilo jerbal eo an Jeova, men in enaaj jipañ eok ñan kõm̦m̦an wõnm̦aanl̦o̦k ko. Kõjo̦e PIJAIN ALWÕJ eo, innem bwebwenato kake kajjitõk in:

PIJAIN ALWÕJ: The Best Life Ever (3:31)

• Ilo pijain alwõj eo, ewi wãween an Cameron kar bõk tokjãn jãn an kar kõm̦m̦an mejãnkajjik ko?

Ejjab aolep remaroñ em̦m̦akũt ñan kwal̦o̦k naan ilo bar juon aelõñ. Ijoke, kõj aolep jemaroñ kõm̦m̦an mejãnkajjik ko me jemaroñ tõpari. Riit Jabõn Kõnnaan 21:5, innem l̦õmn̦ak kõn ta mejãnkajjik ko kokõn̦aan kõm̦m̦ani . . .

• ilo eklejia eo.

• ilo jerbalin kwal̦o̦k naan.

Ewi wãween an naanin kakapilõk eo ilo eoon in jipañ eok bwe kwõn maroñ tõpar mejãnkajjik ko am̦?

Mejãnkajjik ko kwõmaroñ l̦õmn̦ak kaki

• Kakõm̦anm̦anl̦o̦k wãween am̦ jar.

• Riiti aolepen Baibõl̦ eo.

• Kal̦apl̦o̦k am̦ jel̦ã kajjien aolep ro ilo eklejia eo am̦.

• Pukot juon am̦ rũkkatak im jino katak Baibõl̦ ippãn.

• Bõk jerbalin akjel̦õri bainier ak rekũl̦ar bainier.

• El̦aññe kwõj juon likao ak em̦m̦aan, kate eok ñan erom juon rijjipañ ilo eklejia.

TARLEP IN KATAK EO ILO TUKADU

Wõnm̦aanl̦o̦k wõt im jab bõjrak jãn am̦ kõkajoore jem̦jerã eo am̦ ippãn Jeova im kõm̦m̦an mejãnkajjik ko. Ilo wãween in, kwõnãj maroñ m̦õn̦õn̦õ ilo mour n̦e am̦ ñan indeeo!

Ãlij

• Etke kwõmaroñ lukkuun tõmak im lõke bwe Jeova enaaj jipañ eok ñan am̦ maroñ karejar ñane ilo tiljek?

• Ewi wãween am̦ maroñ kõkajoorl̦o̦k jem̦jerã eo am̦ ippãn Jeova?

• Ñe kwõj kõm̦m̦an mejãnkajjik ko, ewi wãween an men in nãj jipañ eok ñan kõm̦m̦an wõnm̦aanl̦o̦k ko?

KAL̦APL̦O̦K AM̦ MEL̦EL̦E

Ta eo eaorõkl̦o̦k ippãn Jeova, ñe jej kõm̦m̦ane juon wõt men el̦ap im em̦m̦an ñan kaalikkar ad tiljek ñane, ak ñe jej tiljek ñane raan otemjej ilo aolepen mour eo ad?

Be Faithful Like Abraham (9:20)

Meñe juon ri-karejeran Jeova emaroñ tiljek wõt, ak emaroñ bar jakol̦o̦k an m̦õn̦õn̦õ. Lale ewi wãween bwe en maroñ bar m̦õn̦õn̦õ.

Regain Joy Through Study and Meditation (5:25)

Ewi wãween am̦ maroñ kõm̦m̦an mejãnkajjik ko im tõpari?

“Use Spiritual Goals to Glorify Your Creator” (The Watchtower, July 15, 2004)

Etke elukkuun aorõk bwe juon Kũrjin en rũtto im kajoor ilo tõmak, im ewi wãween bwe kwõn maroñ tõpar men in?

“Kalaplok Ar Jela kin Katak ko Remũlõl an Anij Kinke ‘Ran eo Elab an Jeova Ebak’” (Imõniaroñroñ, Mãe 15, 2009)