Wãwen an Jesus Jelet Aolepen Lal
“AOLEP nan ko Jesus ear ba ilo gospel ko, ilo ittino im iman mejen armij ro, emaroñ kar ba kaki iumin ruo wõt awa,” ri ukok Bible eo Edgar Goodspeed ear ba. “Nan kein reiet wõt ear lap air kaitoklimoen, kamakit im tõbar buruen armij, jemaroñ ba, bwe ejelok bar juõn armij ear lukkun jelet aolepen lal einwõt e.”
Ke Jesus Christ ear kamwijlok jerbal eo an ion lal ilo yiõ eo 33 C.E., ear wõr enañin 120 ri kalor maan im kõrã ro an. (Jerbal 1:15) Rainin, elõñlok jen ruo billion armij ro rej ba rej Christian. Ebar lõñ buki million armij ro rej tõmak bwe Jesus ej juõn ri kanan. Emol bwe ekanuij lap an nan in katakin ko an jelet armij ro.
Ri tel ro rejjab Christian rar kile bareinwõt bwe Jesus ear jelet armij ro ibelakin lal. Ñan wanjoñok, ri tel in kabuñ eo an Ri Jew etan Hyman Enelow ear je: “Jesus ear armij eo ebuñbuñ tata, eo elaplok an armij ro katak kake jen ro jet, im elaplok an jelet armij jen ro jet ilo aolepen bwebwenato in kabuñ ko an armij.” Enelow ear bareinwõt ba: “Wõn eo emaroñ kalikar ewi joñan an kar Jesus jelet armij ro? Yokwe eo ear kwaloke, wãwen an kainemõn armij, men ko remõn ear kõmmani, kejatdikdik im lañliñ eo ear kamakit buruen armij kaki—aolep men kein jejañin lo an bar juõn armij kõmmani jen jinoin lal tok ñan kiõ. Men ko rebuñbuñ im aorõk, im emõn armij ro rar kõtõbraki, rejjab maroñ buñbuñ, im emõnier wõt men ko Jesus ear kõmmani. Ear armij eo emõntata ilo aolepen bwebwenato eo an armij ion lal.” Im ri tel eo an Ri Hindu ro Mohandas K. Gandhi ear ba: “Ijañin jelã juõn armij eo ear kõmman elõñ men ko ñan armij einwõt Jesus. Emol, kabuñ eo an Christian elukkun emõn.” Bõtab, ear ba bareinwõt: “Abañ eo ej bed ibbemi, kom Ri Christian ro. Komij jab mour ekkar ñan nan in katakin ko ami.”
Christendom ak kabuñ ko rej ba rej Christian rar likjap in mour ekkar ñan nan in katakin ko an Jesus. Cecil John Cadoux, ri bwebwenato in kabuñ eo an Christian, ear ba bwe “iloan kabuñ eo an Christian, wãwen an kabuñ eo kajekdon mour erreo ear laplok wõt jidik kin jidik” im “ri tel in kabuñ ko an Christian rar lo abañ in . . . jen 140 A.D liktak.” Ear loe: “An diklok air kejbãrok mour erreo ilo kabuñ eo an Christian ilo tujinoin ilo mol enaj kar kamakit armij ñan mour ekkar ñan mantin lal in.”
Wãwen kejbãrok mour erreo ear mõkaj an diklok wõt ilo ebeben eo kein kemen, ke Constantine Iroij in Rom eo ear jino tõmak ilo kabuñ eo an Christian. “Ri bwebwenato ro an lal rar kile, im jet ien lukkun dike,” Cadoux ear je, “wãwen an kabuñ eo an Christian ebbururu ilo katak ko an kin an kobalok ibben Constantinus.” Inem elõñ buki yiõ ko jen ien eo liktak, ro rej ba rej Christian rar kõmman elõñ manit ko renana ñan katton etan Christ.
Inem, kajitõk ko jekõnan lo uak ko ñan i rej: Ta eo Jesus ear lukkun katakin armij ro kake? Im ewi wãwen katakin ko an ren jelet kij?
[Pija eo ilo peij 3]
“Ijañin lo bar juõn ear kõmman elõñlok men ko jen Jesus.”—Mohandas K. Gandhi
[Pija eo ilo peij 3]
“Ejañin wõr bar juõn armij ear jelet lal in joñan wõt e.”—Edgar Goodspeed
[Credit Line]
Pija ko an Culver